Kɛ́wɛɛ 14

Pɔli ní Baanabasi é Ikoniyɔmu

1Ii sé mínngɛ Ikoniyɔmu, Pɔli ní Baanabasi é lo Yawudhyaa olu yɛ sɛ́ɛbho ŋó kɔ́ɔnnɔn, i yɛ́ kóman o kɛ́ séɲan ó kósɔn, Yawudhyaa ólu shɛ́ɛman, óni Gɛlɛki ólu shɛ́ɛman ŋé kɛ́ lánanbhaa lé. 2Wáa Yawudhyaa mínnu mán lá i la, ólu táa síya gbɛ́ɛ olu sáala, kɛ i lɔ́su bhádhyeman ŋólu mán. 3Yáanin o bɛ́ kwɔ́, Pɔli ní Baanabasi é tó Ikoniyɔmu kɛ wáati já ngɛ́. I tɛ́ɛ kómanla ni tɛ́ɛnga ne ni lánanyaba le Mantii o la. A le lé tɛ́ɛ se dila i man kɛ tɔ́ɔmanse ni káwananngo lu kɛ, kɛ a yáa mɔɔn tɔ olu la, ko ii kóman mín nvɔla nɛ́nmɛn o ta sháafɛ, ko o lée tínɲan o lé.

4Só o mɔɔn ólu i lɔ́taa fyaa le, lɔ́lu kɛ́ Yawudhyaa ólu fɛ́, lɔ́lu tɛ́ɛ céladhye ŋólu fɛ́. 5Yawudhyaa ólu ni síya gbɛ́ɛ olu ni i yɛ kunndii ólu tɛ́ɛ fɛ kɛ kóyoo ngbɛ́ Pɔli ní Baanabasi la kɛ i bwó káwa la, kɛ i faa. 6Pɔli ní Baanabasi é bhɔ́ i yɛ́ nánmaan ó ɲánle mínngɛ, ii bhɔ́ kɛ táa Likahoni só ólu mánshaa fɛ́, Lisitili, óni Dɛlibe mala ó lɔ. 7Yénɔn i kwɔ́, Pɔli ní Baanabasi é Sanmankanmɛɛ o láse.

Pɔli ní Baanabasi é Lisitili

8Cɛ lɔ tɛ́ɛ Lisitili a sé ŋólu fáanin ndɛ́ɛ a man le, nánmaan le tɛ́ɛ ale, kɛ tá a wóo wáati o man, a mán táamankɛ. 9O cɛ ó tóo mánlɔnin ndɛ́ɛ Pɔli kómankan ŋó lɔ. Pɔli é i ɲán gbáan a lɔ́, kɛ́ yé óo lánanya míin cɛ ó la, óo sé kɛ a lákɛɛnya. 10Pɔli é kóman a yɛ fáanla kó: «I wíi kɛ́ i lɔ́ i sé ŋólu ká!» Aa i gbán ndéeman kɛ́ i lɔ́ a sé ŋólu ká kɛ táaman kɛ́.

11Ii Pɔli yɛ ko kɛ́nin o yé mínngɛ, ii gbáa kɛ fɔ Likahoninnga kan ŋó lɔ kó: «Án ɲɛn Ala olu wɛɛ i yɛ́ɛman kɛ kɛ́ mɔɔnninnvin ŋólu síya le óni i wɛɛ i yíi an njɛ́man!»

12Ii Baanabasi kíi ko Zeusi, kɛ́ Pɔli kíi ko Ɛlimɛsi#14.12 Gɛlɛki ólu fɛ́, Sɔ́life nɔ́ tɔ́ɔ tɛ́ɛ kó Zeusi, o le tɛ́ɛ i yɛ Sɔ́life ŋó tɔ́ ólu bɛ́ kunndii o le; Sɔ́life mín ndɛ́ɛ túun nan ale la, o lée ale lálamyaan la, a tɔ́ɔ kó Ɛlimɛsi. . Kɛ mansɔɔ Pɔli lé tɛ́ɛ kómankɛbhaa o le. 13Zeusi bhatobho ŋo mín ndɛ́ɛ só o lona o la. Mɔɔn mín ndɛ́ɛ Zeusi yɛ faanlɛɛɲansebhaa o lé, óo nisitola lɔ́lu myaan kɛ yíifee olu míin ngɛ, kɛ o bhyáa olu kannan, ile ni yaman o táa ni olu le lona o la. Kɛ mansɔɔ i tɛɛ fɛ́ kɛ olu fáa, kɛ ó kɛ́ fáanlɛɛ lé Pɔli ní Baanabasi la. 14Céladhye Pɔli ní Baanabasi é o myɛ́n mínngɛ, ii i kannanfaani olu fála, ii i láteeya yaman o cɛ́man kɛ gbáa kɛ fɔ́ kó: 15«Bhádhye ŋolu, áa míin ngɛ́la mínnɛɛn le kósɔn? Án nee lúu, adamandhye né le, álee lu sí le! Án ni nan Sanmankanmɛɛ ó fɔ a yɛ le, ke áa fála bhatofe ndɔɔnnda ŋolu la kɛ yɛ́ɛman kɛ́ Ala ɲáanman o bháto, o mín ŋé sangboo óni lúukolo óni kɔ́ɔyi o lá, óni a kɔ́ɔnnɔnfe ŋólu bɛ́. 16Wáati tínminnin ŋó lɔ, a tɛ wɛɛ Adamandhye ŋólu bɛ́ tó i yɛ́ɛ sao o bhóo. 17O bɛ́ kwɔ́, Ala tɛ́ɛ a yɛ́ɛ yáala á lá, ni kóbhɛɛ shɛ́ɛman ngɛ le á yɛ́. Aa a sáo o díla á man kɛ bhɔ́ sangboo o lɔ, kɛ́ án ɲɛn sunman ŋolu ɲan a wáati lɔ, kɛ́ án ɲɛn lɔ́min olu sháaya óni kɛ nisɔdhyaaba kɛ á yɛ.»

18O kóman olu bɛ́ fɔnin ngwɔ́, wáa o bɛ́ kwɔ́, Pɔli ní Baanabasi tɛ́ kaa dɛ́sɛ mɔɔn olu man kó i kɛ́nan fáanlɛɛ bhɔ́ i la.

19Lo nɔ la, Yawudhyaa lɔ́lu bhɔ́ Antiyɔsi Pisidi mala o lɔ, óni Ikoniyɔmu kɛ nán yaman o lɔ́lo, ii Pɔli bwó káwa la, kɛ́ a fónvo kɛ táa a le só o kwɔ́ ká, a tɛ́ɛ kɛla i kɔɔnnɔn le ko a wɛɛ fáa. 20Wáa kaamɔɔndhye ŋolu táa i ládhyɛ Pɔli tɔ́ɔfɛ mínngɛ, Pɔli é í wíi kɛ ló só o kɔ́ɔnnɔn. O ló ŋo lúusɔgbɛ o aa bhɔ́ ní Baanabasi lé kɛ́ táa Dɛlibe.

Kwɔ́sɛɛ o Antiyɔsi, Sili mala o lɔ

21Pɔli ní Baanabasi é wɛ́ɛ Sanmankanmɛɛ o lásela Dɛlibe só o kɔ́ɔnnɔn mínngɛ, ii mɔɔn shɛ́ɛman ngɛ́ kaamɔɔndhye nu le. O kwɔ́, ii i kwɔ́sɛɛ kɛ táa Lisitili, kɛ́ bhɔ́ yé kɛ táa Ikoniyɔmu, kɛ tó táala Antiyɔsi Pisidi mala o lɔ. 22I tɛ́ɛ kaamɔɔndhye ŋolu yóso lagbɛyala, ko ii i lɔ́ja kɛ́ tó lánanya o lɔ, i tɛ́ɛ fɔla i yɛ kó: «Án ngákan ne kɛ sɛɛ shɛ́ɛman myaan ótun sannin án ní ló Ala yɛ́ Mansaya o lɔ́.» 23Pɔli ní Baanabasi é ɲɛ́nmɔɔn lɔ́lu bhɔ kɛ́ olu síi Egilizi o bɛ́ kée ngée nán kunnan. O kwɔ́, ii súnno kɛ Ala dɛ́li, kɛ i kɛ́ɛfa Mantii o man, ii lá Mantii o minnan. 24O kwɔ́, Pɔli ní Baanabasi é Pisidi mala o lɔtimin, kɛ táa Panfili mala o lɔ. 25Ii Ala Saaninkan o fɔ́ Pɛlizeka olu yɛ, o kwɔ́ kɛ́ táa Atali. 26Yénɔn, ii lo kúun ŋo lɔ kɛ i kwɔ́sɛɛ Antiyɔsi. Sanni ii i yɛ bháala o la lamyaan, lánanbhaa olu i kɛɛfa Ala yɛ nɛ́nmɛn o man Antiyɔsi, kwáalenin i yɛ bháala o wɛ́ɛ í láfa.

27Ii sé Antiyɔsi mínngɛ, ii Kílisi yɛ́ mɔɔn olu ládhyɛ. Ala tɛ́ wɛɛ ko súu óo súu kɛ ní ile, óni a wɛ́ɛ lánanya sháa o lá laka síya gbɛ́ɛ olu yɛ ɲán mín man, ii o bɛ́ ɲánfɔ i yɛ. 28Pɔli ní Baanabasi é tó kaamɔɔndhye ŋólu fɛ́ kɛ wáatija ngɛ́.

Currently Selected:

Kɛ́wɛɛ 14: MXX

Highlight

Copy