അപ്പോസുത്തലാര് 7
7
തെപാനോസു ബദ്‌ല് സൊന്റാന്
1<<ഈ സൊല്ലുവാദെല്ല നേര്‌ത്തേഗ?>> എന്റ് എഗുദാര് ദൊഡ്ഡ പൂസാരി തെപാനോസുന കേ്ട്ടാന്.
2അദുക്കുള തെപാനോസു ഇത്തെ സൊന്നാന്: <<അണ്ണനാമെ തമ്പ്യാമെ, അപ്പനാമെ കേ്ള്‌ന്! നമ്മ് അവുറഗാമ് പാട്ടാന് ആരാന് എന്നുവ എ്ഡേക്ക് പോയി ഇര്‌ക്കുവാദ്‌ക്ക് മുദാല് മെസെപൊത്തേമ്‌ല് പെ്ളേത്തിന്താന്. അയി ഗളിഗേല്, കണ്ണ്‌ല് നോഡ്യ മുഡ്യാത്ത ബെ്ള്‌സാത്ത്‌ല് ഇര്‌ക്കുവ സാമി അയാള്‌ക്ക് ബെ്ളിപട്ടാന്. 3<നീ നിന്ന് നാഡ്‌നാമ് ജാദിഗാള്‌നാമ് ബ്‌ട്ട്‌തള്ളി നാന് കാട്ടി തരുവ ദേസാക്ക് പോഡൊ>#ഉറുപത്തി 12:1 എന്റ് സൊന്നാന്.
4അത്തെ അയാള് പെ്ളേത്തിന്ത തന്ന് കല്ല്‌ദെയാര് നാഡ്‌ന ബ്‌ട്ട് ആരാന് എന്നുവ എ്ഡേക്ക് ബന്ത് ഇന്തിന്താന്. അവുറഗാമ് അപ്പനച്ചാന് സത്ത പ്‌റസാരി സാമി അയാള്‌ന അദ്‌ലിന്ത് നിമ്മ ഇന്നാല് ഇര്‌ക്കുവ ഈ ദേസാക്ക് സൊല്ലി ബ്‌ട്ടാന്. 5ആന ഒന്റഡി ബൂമി ഗുഡി സാമി അവുറഗാമ്‌ക്ക് സൊന്തായി കൊഡുക്കാലെ. അയി ഗളിഗേല് അയാള്‌ക്ക് മക്കാള് ഒന്റുമു ഇല്ലാദെ ഇന്ത് ഗുഡി അയാള്‌ക്ക്‌മ് അയാള് സത്ത പ്‌റ അയാള് കാല്‌കെ്ളേക്ക്‌മ് അയി ദേസന സൊന്തായി കൊഡുക്കുവേന് എന്റ് അവുറഗാമ്‌ക്ക് സാമി ബാക്ക് കൊഡുത്താന്. 6സാമി അവുറഗാമ്‌ക്ക് ഇത്തെ സൊന്നാന്: <നിന്ന് കാല്‌കെ്ളെ ബേ്റെ നാഡ്‌ക്ക് പോയി ഇര്‌ക്കുവാര്, അയി ദേസഗാറാര് അവാര്‌ന അഡിമെഗാള് മാഡി നാനൂറു ബര്‌സ്സ കൊഡിമെപഡുസുവാര്. 7ആന അവാര്‌ന അഡിമെ ഗിലാസ ഗേസ്‌ന ജനഗാള്‌ന നാന് ദെ്ണ്ടിക്കുവെ, അദ്‌ക്ക് പ്‌റ നിന്ന് കാല്‌ക്ക് പട്ടവാര് അയി നാഡ്‌ലിന്ത് ഈ എ്ഡേക്ക് ബന്ത് എനാന കുമ്മുഡി നഡാക്കുവാര്.>#ഉറുപത്തി 15:13,14 8സാമി അവുറഗാമോഡ ഒന്റു ഒപ്പന്ത ബെത്താന്. അദുക്കുള്ള നെപ്പ്‌ക്ക്‌ത്തെ പരിസേദനെ സാത്ത്‌റ ഗേവാദ്. അത്തെ അവുറഗാമ്‌ക്ക് ഇസഗാക്ക് പ്‌റാന്ത് നാള് തെഗേന്ത പ്‌റ അയി മഗാന പരിസേദനെ സാത്ത്‌റ ഗേന്താന്. ഇസഗാക്ക് തന്ന് മഗാന് ആക്കോവുനാമ് പരിസേദനെ സാത്ത്‌റ ഗേന്താന്, ആക്കോവു തന്ന് മഗനച്ചനാര് പന്നന്റ് മക്കാള്‌ഗാള്‌നാമ് പരിസേദനെ സാത്ത്‌റ ഗേന്താന്, ഇവാര്‌ത്തെ പേര്‌കേ്ട്ട നമ്മ് ബമ്മേസ പാട്ടനാമ്.
9അവാര്‌ക്ക് തമ്മ് തമ്പി ഓസേപോഡ കണ്ണ്‌കഡി ആറ്റ്. അദുക്കുള അവാര് അയാള്‌ന ഒന്റു അഡിമെ മാഡി മിസ്‌റേമ്‌ക്ക് ബിറ്റ് തള്ള്‌നാര്. ആന സാമി ഓസേപോഡ ഇന്താന്. 10അയാള്‌ക്ക് ബന്ത എല്ലാ കജട്ടഗാള്‌ലിന്ത്‌മ് സാമി അയാള്‌ന കാപാറ്റ്‌നാന്. ആന ഓസേപ് മിസ്‌റേമ് രാജാവു പട്ട്‌ക്ക് പോഗാട്ടി സാമി അയാള്‌ന നല്ല അറുവു ഇര്‌ക്ക്‌ന്റവാന്‌മ്, എല്ലാ ആള്‌ഗാള്‌ക്ക് പ്‌ഡിത്തവാന്‌മ് മാഡ്‌നാന്. രാജാവു അയാള്‌ന മിസ്‌റേമ് നാഡ്‌ക്ക് ഒട്ടുക്കു അദിഗാരിമ്, രാജകോട്ടെന നോഡിനഡാത്ത്‌ന്റവാന്‌മ് മാഡിബെത്താന്.
11അയി കാലാത്ത്‌ല് മിസ്‌റേമ് നാഡ്‌ല്‌മ്, കാനാന് നാഡ്‌ല്‌മ് ഒട്ടുക്കു പഞ്ച പ്‌ഡിത്താദ്‌നാലെ ദൊഡ്ഡ കജട്ടാമ് ബന്ത്‌ദ്. അദ്‌നാലെ നമ്മ് പാട്ടനാമ്‌ക്ക് തിന്ന്യ ഒന്റുമു കെ്ഡേക്കാദെ ആറ്റ്. 12മിസ്‌റേമ്‌ല് അന്ന ഇര്‌ക്ക്‌ന്റ് എന്റ് ആക്കോവു കേ്ട്ടാന്. അദ്‌നാലെ അയാള് തന്ന് മഗാനാര്‌ന മുദാല് ആങ്ക് പോയി അന്ന ബാങ്കി ബര്യ സൊല്ലി ബ്‌ട്ടാന്. അവാര്‌ത്തെ നമ്മ് പാട്ടനാമ്. 13പിന്നേമ് അവാര് പോഗാട്ടി ഓസേപ് തന്ന് അണ്ണാര് തമ്പ്യാര്‌ക്ക് താന് ആര് എന്റ് സൊല്ലി കൊഡുത്താന്. മിസ്‌റേമ് രാജാവുക്കുമു ഓസേപ് കുഡുമഗാറാര്‌ന പറ്റി തെരിന്ത്‌ദ്. 14അത്തെ ഓസേപ് സേദി ബ്‌ട്ട് തന്ന് അപ്പാന് ആക്കോവുനാമ്, അയാള് കുഡുമാത്ത്‌ല് ഇര്‌ക്ക്‌ന്റവാര്‌ന ഒട്ടുക്കുമു മിസ്‌റേമ് നാഡ്‌ക്ക് ബ്‌ളിത്ത് ബര്‌സ്സ്‌നാന്. അവാര് മൊത്ത എ്ള്‌വത്തഞ്ച് ആള്‌ഗാള് ഇന്താര്. 15അത്തെ ആക്കോവുമു, മഗാനാര്‌മ് മിസ്‌റേമ് ദേസാക്ക് പോയിത്തെ സത്താര്. 16അവാര് സാവുന സേഗേമ്‌ക്ക്‌മ് എ്ഡ്‌ത്ത് പോനാര്. ആമോരു മഗാനാരോഡ അവുറഗാമ് ബെലേക്ക് ബാങ്ക്‌ന സുഡാലേക്ക് അയി സാവുഗാള്‌ന പാത്ത്‌നാര്.
17സാമി അവുറഗാമ്‌ക്ക് കൊഡുത്ത ബാക്ക് നഡാക്കുവ കാല ബര്‌ഗാട്ടി മിസ്‌റേമ് ദേസാല് ഇസ്‌റവേല് ജനഗാള് മൊത്തനാക്ക് പെര്‌ഗ്‌നാര്. 18കഡേസില് ബേ്റെ ഒന്റു രാജാവു മിസ്‌റേമ് ദേസന ആള്യ പ്‌ഡിത്താന്. അയാള്‌ക്ക് ഓസേപ്‌ന പറ്റി തെര്യാദെ ഇന്ത്‌ദ്. 19അയി രാജാവു നമ്മ് പാട്ടനാമ്‌ന ഏമാത്തിമ്, നല്ല കൊഡിമെപഡിസിമ് ഇന്താന്. അവാര് പച്ചെപ്‌ള്ളെഗാള്‌ സത്ത്‌തള്ള്യ ബേ്ണ്ടി ബീ്ഡ്‌ക്ക് ബെ്ളിഗെ തെ്റ്യാമ് രാജാവു നത്ത്‌നാന്.
20ഈ ഗളിഗേല്‌ത്തെ മോസെ പാട്ടാന് പ്‌റാന്താദ്. മോസെ നല്ല അളാഗുള്ള മഗ ആയിന്താന്. മൂറു മാസ അയി മഗാന തമ്മ് ബീ്ഡ്‌ല് ബളാത്ത്‌നാര്. 21അയി മഗാന ബീ്ഡ്‌ലിന്ത് തെ്റിഗാട്ടി മിസ്‌റേമ് രാജാവു മഗാള് തന്ന് സൊന്ത മഗാനായി എ്ഡ്‌ത്ത് ബളാത്ത്‌നാള്. 22മിസ്‌റേമ്‌ഗാറാര്‌ക്ക് ഇര്‌ക്കുവ അറുവുന പൂരാമ് മോസെ പഡിത്താന്. നായാത്ത്‌ല്‌മ് ഗിലാസാത്ത്‌ല്‌മ് ദൊഡ്ഡവാന് ആനാന്.
23മോസേക്ക് നാപ്പദ് ബയിസ്സ് ആറ്റ്. അദുക്കുള തന്ന് ഇസ്‌റവേല് കൂട്ടാര് എത്തെ ഇര്‌ന്റാരെന്റ് നോഡ്യ എന്റ് അയാള് മുഡിവു എ്ഡ്‌ത്താന്. 24ഒന്റു മിസ്‌റേമ്‌ഗാറാന് ഒന്റു ഇസ്‌റവേല്‌ഗാറാന്‌ന ദെ്ണ്ടാക്കെല്ല കൊഡിമെപഡുസുവാദ്‌ന മോസെ കണ്ടാന്. അദുക്കുള മോസെ ഇസ്‌റവേല്‌ഗാറാന്‌ക്ക് തൊണേക്ക് പോയി മിസ്‌റേമ്‌ഗാറാന്‌ന കൊന്റു പളി തീത്താന്. 25തന്ന് കൂട്ടാര്‌ക്ക് പട്ട ഇസ്‌റവേല്‌ഗാറാര്‌ന അഡിമേലിന്ത് ബ്‌ഡിസി എ്ഡ്‌ത്ത് ബര്യ സാമി തനാന സൊല്ലി ബ്‌ട്ട്‌റ്‌ന്റാന് എന്റ് ഇസ്‌റവേല്‌ഗാറാര് നെപ്പ് കെ്ഡേസി ഇര്‌ക്കുവാര് എന്റ് മോസെ നെനേത്താന്. ആന അവാര് ഇത്തെല്ല നെനേക്കാലെ. 26മറ്‌നാള് ഇസ്‌റവേല്‌ഗാറാര് റാഡാള് മല്ല് പ്‌ഡിക്കുവാദ്‌ന മോസെ കണ്ടാന്. അദ്‌നാലെ അയാള് അവാര്‌ന രാജി കൂഡുസ്യ ഓരാഡി കൊണ്ടു ഇത്തെ സൊന്നാന്. <ഈങ്ക് നോഡുനു, നിമ്മെല്ല ഒന്റേ കൂട്ടാരല്ല? പിന്നെ നിമ്മ ആങ്കീങ്ക് ഇത്തെ മല്ല് കെ്ട്ടുവാദ് എന്ത്‌ക്ക്?>
27മല്ല്‌ക്ക് പോനവാന് മോസെന അത്തഗ ഉന്തി എ്ഡ്‌ത്ത് ബ്‌ട്ട് ഇത്തെ കേ്ട്ടാന്. <നീ എമാക്ക് രാജാവ? നിനാക്ക് ഈ അദിഗര തന്താദ് ആര്?> 28<നെന്നെ മിസ്‌റേമ്‌ഗാറാന്‌ന കൊന്റ പാസെ എനനാമ് കൊല്ല്യ നോഡുന്റായ?>#പയണ 2:14 29മോസെ അയാള് സൊന്നാദ്‌ന കേ്ട്ട് ഇസ്‌റവേല് നാഡ്‌ലിന്ത് ഓഡി പോയി മിദ്യാന് ദേസാല് ജാദ്യാനായി ഇന്താന്. അദ്‌ല് അയാള്‌ക്ക് റാഡ് മഗാനാര് പ്‌റാന്താര്.
30നാപ്പദ് ബര്‌സ്സ കളിന്ത പ്‌റ സീനായി മലേക്ക് അര്‌ഗെ ഇര്‌ക്കുവ ബെ്ട്ടെകാഡ്‌ല് തീ ബെന്ത് കൊണ്ട്‌റ്‌ക്കുവ മുള്ളു ഗുമ്പുന മോസെ കണ്ടാന്. അയി തീ കുളാക്ക് ഒന്റു ദൂദാന് മോസേക്ക് ബെ്ളിപട്ടാന്. 31അദ്‌ന കണ്ട് മോസെ അദിസ്യപട്ടാന്. അദ്‌ന സൊക്കാന നോഡ്യ മുളളു ഗുമ്പുക്കു അര്‌ഗെ പോനാന്. അദുക്കുള: 32<നാന് നിന്ന് പാട്ടനാമ് സാമിത്തെ. നാന് അവുറഗാമ്‌ത്ത്‌മ്, ഇസഗാക്ക്‌ത്ത്‌മ്, ആക്കോവുത്തുമു സാമിത്തെ> എന്റ് ആണ്ടവാന് സൊല്ലുവാദ്‌ന അയാള് കേ്ട്ടാന്.#പയണ 3:6 അദുക്കുള മോസെ അഞ്ചിക്കേക്ക് സദ്‌റ ബെ്ട്ട്‌നാദ്‌നാലെ മുള്ളു ഗുമ്പു സാരി നോഡ്യ അയാള്‌ക്ക് ദയിര ബരാലെ.
33ആണ്ടവാന് മോസേക്ക് ഇത്തെ സൊന്നാന്, <നീ നെലെ പട്ട്‌ല്‌ത്തെ നിന്റ് ഇര്‌ന്റായി. അദ്‌നാലെ നിന്ന് കാല്‌ല സെര്‌പ്പ്‌ന കളാത്തി തള്ള്. 34മിസ്‌റേമ് ദേസാത്ത്‌ല് ഇര്‌ക്കുവ എന്ന് ജനഗാള് കജട്ടഗാള്‌ന നാന് കണ്ട്‌റ്‌ന്റെ. അവാര് കേ്സിനാമ് നാന് കേ്ട്ട്‌റ്‌ന്റെ, അവാര്‌ന കാപാറ്റ്യ നാന് അഡി ബന്ത്‌റ്‌ന്റെ. അദ്‌നാലെ ഇന്നി ബാ, നാന് നിനാന മിസ്‌റേമ് ദേസാക്ക് സൊല്ലി ബ്‌ഡ്‌വെ.>#പയണ 3:5,7,8,10 >>
35തെപാനോസു പിന്നേമ് സൊന്നാന്, <<ഇസ്‌റവേല്‌ഗാറാര് തെ്റിന്ത് തള്ള്‌ന മോസെത്തെ ഇദ്. <നീ എമാക്ക് രാജാവ? നിനാക്ക് ഈ അദിഗര തന്താദ് ആര്?> എന്റ് അവാര് കേ്ട്ടിന്താര്. ആന ഈ മോസെനത്തെ സാമി ഇസ്‌റവേല്‌ഗാറാര്‌ക്ക് അദിഗാരിമ്, അവാര്‌ന കാപാറ്റ്‌ന്റവാന്‌മ് മാഡി സൊല്ലി ബ്ട്ടാദ്. കത്തികൊണ്ടു ഇര്‌ക്കുവ മുള്ളു ഗുമ്പുഗാള്‌ല് അയാള്‌ക്ക് ബെ്ളിപട്ട ദൂദാന്‌നത്തെ സാമി മോസേക്ക് തൊണെ സൊല്ലി ബ്ട്ടാദ്. 36മോസെ ഇസ്‌റവേല്‌ഗാറാര്‌ന മിസ്‌റേമ്‌ല് ഇന്ത് ബെ്ട്ടെകാഡ്‌മേലെ നാപ്പദ് ബര്‌സ്സ നഡാത്ത്‌നാന്. മിസ്‌റേമ്‌ല്‌മ്, സെങ്കഡാല്‌ല്‌മ് അദിസ്യഗാള്‌മ്, അഡ്യാളഗാള്‌മ് ഗേന്ത്‌കൊണ്ടുത്തെ അവാര്‌ന നഡാത്ത്‌നാദ്.
37ഈ മോസെത്തെ ഇസ്‌റവേല്‌ഗാറാര്‌ക്ക് ഇത്തെ സൊന്നാദ്, <ആണ്ടവാന് ആയിര്‌ക്കുവ നിമ്മ് സാമി എനാന സൊല്ലി ബ്‌ട്ട പാസെ ഒന്റു സാമിദാസ്‌ന നിമാക്ക് സൊല്ലി ബ്‌ഡുവാന്. അയാള് നിമ്മ് കൂട്ടാര്‌ക്ക് പട്ട ഒന്റൊരുത്താന്‌ത്തെ ആയിര്‌ക്കുവാന്.>#മറിസി സൊല്ലുവ സട്ട 18:15 38സീനായി മലേല് സാമിദൂദാനോഡ നായ നൊഡിന്താദ്‌മ്, ബെ്ട്ടെകാഡ്‌ല് ഇസ്‌റവേല് കൂട്ടാത്ത്‌ല് നമ്മ് പാട്ടനാമോഡ ഒപ്പ ഇന്താദ്‌മ് ഈ മോസെത്തെ. ഉജുരു തരുവ സൊല്ലുസുലാക്കാന നമാക്ക് തര്യ ബേ്ണ്ടി സാമി ഈ മോസേക്ക്‌ത്തെ കൊഡുത്താദ്. അയി സൊല്ലു സുലാക്കനത്തെ മോസെ നമാക്ക് തന്താദ്.
39ആന നമ്മ് പാട്ടനാമ് മോസെ സൊല്ലുപഡിക്ക് ഇര്‌ക്കാലെ. അവാര് അയാള്‌ന തെ്റിന്ത് തള്ള്‌നാര്. അവാര് മിസ്‌റേമ് ദേസാക്ക് താനെ പോയ ആസെപട്ടാര്. 40അദ്‌നാലെ അവാര്: <മിസ്‌റേമ് ദേസാലിന്ത് എമാന കൂട്ടി ബന്ത മോസേക്ക് എന്താറ്റ് എന്റ് എമാക്ക് തെര്യ. അദ്‌നാലെ എമാന നഡാത്ത്യ സാമിഗാള്‌ന മാഡി തരുഡൊ> എന്റ് അഗരോനുക്കു സൊന്നാര്.#പയണ 32:1 41അയി ഗളിഗേല്‌ത്തെ അവാര് ഒന്റു ഓരി കന്റ് സെലെന മാഡി അദ്‌ക്ക് പലി കൊഡുത്താദ്, അത്തെ അവാര് തമ്മ് കയില് മാഡ്‌ന ഓരി കന്റ് സെലേല് നോമ്പി ഗേന്ത് കൂത്താഡ്‌നാര്. 42അദുക്കുള സാമി അവാര്‌ന തള്ള്നാന്. നേരനാമ്, ബെ്ള്ളിഗാള്‌നാമ്, നിലാവുനാമ് കുമ്മുഡി നഡാക്ക്യ അവാര്‌ന ബ്‌ട്ടാന്. സാമിദാസ് ബൊക്കുലു ഇത്തെ എ്ള്‌ദിര്‌ക്ക്‌ന്റ്:
<ഇസ്‌റവേല് ജനഗാളെ! നാപ്പദ് ബര്‌സ്സ ബെ്ട്ടെകാഡ്‌ല്
ബേ്ണ്ട്‌ഗാള്‌ന അറ്‌ത്ത് പലി കൊഡുത്താദ് എനാക്കല്ല?
43നിമ്മ കുമ്മുഡി നഡാക്ക്യ മേലോക്കു എന്നുവ സാമി ഗുഡുസുലുനാമ്, ഉരുവനാമ് സുമാന്ത് നഡാന്ത്‌റ്,
റേപാന് എന്റ് പേര് സൊല്ലുവ ബാന്‌ല ബെ്ള്ളി ഉരുവാന സാമി എന്റ് കുമ്മുഡുന്റുറു.
ഇദ്‌ഗാളെല്ല നിമ്മ കുമ്മുഡ്യ മാഡ്‌ന സെലെഗാള്‌ത്തെ.
അദ്‌നാലെ നാന് നിമാന ബാവിലോണുക്കു അച്ചാരി ഇര്‌ക്കുവ നാഡ്‌ക്ക് കഡാത്തുവെ.>#ആമോസു 5:25
44ബെ്ട്ടെകാഡ്‌ല് നമ്മ് പാട്ടനാമ്‌ക്ക് ഒന്റു ഗുഡുസുലു ഇന്ത്‌ദ്. അയി ഗുഡുസുലു സാമിക്ക് ഇര്‌ക്ക്യ മുഡിവ ഗുഡുസുലുത്തെ ആയിന്ത്‌ദ്. സാമി അവാരോഡൊപ്പ ഇര്‌ക്ക്‌ന്റാനെന്റുള്ള തെ്ള്‌വുക്കുത്തെ ഈ ഗുഡുസുലു മാഡ്‌നാദ്. മോസേക്ക് മാഡ്യ സൊന്ന പാസെത്തെ ഈ ഗുഡുസുലുന മോസെ മാഡ്‌നാദ്. അദ് എത്തെ മാഡുഡൊ എന്റ് സാമി മോസേക്ക് കാട്ടി കൊഡുത്തിന്താന്. 45മോസെ അയി ഗുഡുസുലുന പാട്ടനാമ്‌ക്ക് കൊഡുത്താന്. ഇവാര്‌ക്ക് സാമി കൊഡുക്കുവെ എന്റ് സൊന്ന ബൂമിലിന്ത ആള്‌ഗാള്‌നെല്ല സാമി താനെ ഇല്ലദെ മാഡ്‌നാന്. അയി ദേസാക്ക് നമ്മ് പാട്ടനാമ് ഓസുവോഡ പോഗാട്ടി ഈ ഗുഡുസുലുനാമ് ഒപ്പ എ്ഡ്‌ത്ത് പോയിന്താര്. ദാവീദ് പാട്ടാന് ഇന്ത കാല മാട്ട്‌ക്ക് അവാര് അയി ഗുഡുസുലുന സൊക്കാന പേ്ണിസി ബെത്തിന്താര്. 46ദാവീദ് സാമിക്ക് പ്‌ഡിത്തവാന് ആയിന്താന്. അദ്‌നാലെ ആക്കോവു സാമിക്ക് സാമിബീഡ് കെ്ട്ട്യ ബ്‌ഡ്‌ഡൊ എന്റ് സാമിന കേ്ട്ടാന്. 47ആന ദാവീദ് മഗാന് സലോമോനുത്തെ സാമിക്ക് സാമിബീ്ഡ് കെ്ട്ട്‌നാദ്.
48ആന അവാന്‌ന ബ്‌ഡ ദൊഡ്ഡവാന് ആര്‌മ് . ഇല്ലെ ഈ സാമി മന്‌സാന് മാഡ്‌ന ബീ്ഡ്‌ല് ഇര്‌ക്കുവാദില്ലെ. സാമിദാസ് ഇത്തെ സൊന്റാന്,
49<ആണ്ടവാന് സൊന്റാന്,
മേലോഗ നാന് കുക്കാക്കുവ കുറിഞ്ചി,
ബൂമി നാന് ആളുവ പട്ട്,
എനാക്കായി നിമ്മ എത്തവ ബീ്ഡ് എ്ഡ്‌ത്ത് തരുവുറു?
എനാക്ക് ഇര്‌ക്കുവാദ്‌ക്കുള്ള എ്ഡെ ഏദ്?
50ഇദെല്ല നാന് ഉണ്ടാക്ക്‌നാദല്ല?>#ഏസ്സയ്യാവു 66:1,2 >>
51തെപാനോസു പിന്നേമ് ഇത്തെ സൊന്നാന്. <<നിമ്മ സില്ലറെ പ്‌ഡിവാദഗാറാരല്ല, നിമ്മ് മനേസ്സ് സാമി നെനേവു ഒന്റുമില്ലാദെ അപ്പാര കെ്ട്ട് തള്ളിര്‌ന്റ്‌, സാമി സേദി നിമ്മ് കാദ്‌ക്ക് ഏ്റ്‌വാദ്‌മ് ഇല്ലെ. നിമ്മ് പാട്ടനാമ്‌ന പാസെ നിമ്മാമ് എന്നാല്‌ക്ക്‌മ് സാമിനിഗാല് ഗേവാദ്‌ന ഗേയ ബ്‌ഡുവാദില്ലെ. 52നിമ്മ് പാട്ടനാമ് ഏദാറ്റ സാമിദാസ്‌ഗാള്‌ന കൊഡിമെപഡ്‌സാദെ ഇന്ത്‌റ്‌ന്റാര? അദ്‌താനെ അല്ല, നേര്‌മോഡ പെ്ളേക്ക്‌ന്റവാന് ബരുവാന് എന്റ് മുദാല് താനെ സൊല്ലിന്തവാര്‌നാമ് അവാര് കൊന്റു തള്ള്‌നാര്. ആന നിമ്മാമ് ഇന്നാല് അയി നേര്‌മെഗാറാന്‌ന കാട്ടി കൊഡുത്തു അയാള്‌ന കൊന്റു തള്ള്‌ന്‌റ്. 53സാമിസട്ട ദൂദാര്‌ഗാളോഡ ഇന്ത് നിമാക്ക് കെ്ഡേത്ത്‌ദ്. ആന നിമ്മ അദ്‌ക്ക് കെ്ട്ട്‌പട്ട് നഡാക്കാലെ!>>
തെപാനോസുന കല്ലെ്റിന്റാര്
54തെപാനോസു സൊന്ന ഈ നായന കേ്ട്ട് എഗുദ കോഡിദിഗാറാര്‌ക്ക് മൊനെ ബന്ത്‌ദ്. അദ്‌നാലെ അവാര് തെപാനോസുക്കു നേരെ പല്ല്‌ന കഡിത്താര്. 55ആന തെപാനോസുക്കു സാമിനിഗാല് ഏ്റി ഇന്ത്‌ദ്. അദുക്കുള അയാള് മേല് ബാന്‌ന നോഡി സാമിക്ക് ഇര്‌ക്കുവ സെര്യാന മദ്‌പ്പ്‌നാമ് സാമ്യോഡൊപ്പ ആള്യ സാമി ബല സാരി ഏസ്സ് കുക്കാന്ത് ഇര്‌ക്കുവാദ്‌നാമ് കണ്ടാന്. 56തെപാനോസു ഇത്തെ സൊന്നാന്, <<ഇദാഗെ മേലോഗ ത്‌റാന്ത്‌റ്‌ക്കുവാദ്‌നാമ്, മന്‌സാനായി പ്‌റാന്തവാന് സാമ്യോഡൊപ്പ ആള്യ സാമി ബല സാരി കുക്കാന്ത് ഇര്‌ക്കുവാദ്‌നാമ് നാന് കാണ്‌ന്റേന്!>>
57അദുക്കുള എഗുദ കോഡിദിഗാറാര് ആലാത്ത് ക്‌ളാമ്പ്‌നാര്. അവാര് കാദ്‌ന പൊത്തി പ്‌ഡിത്ത്‌കൊണ്ട് തെപാനോസു പട്ട്‌ക്ക് ഓഡുനാര്. 58അവാര് അയാള്‌ന പ്‌ഡിത്ത് പട്ടണാക്ക് ബെ്ളിഗെ എ്ഡ്‌ത്ത് പോയി കല്ലെ്റിന്താര്. തെപാനോസുന പറ്റി ഉറുട്ടു സൊന്നവാര് തമ്മ് ഉരുവുക്കു ഇക്കിന്ത ഉഡുപ്പുഗാള്‌ന കളാത്തി നോഡിര്‌ക്ക്യ സവുലു എന്നുവ ബാലിവെഗാറാന് പട്ട്‌ക്ക് ബെത്തിന്താര്. 59അവാര് കല്ലെ്റിന്ത്‌കൊണ്ടു ഇര്‌ക്കാട്ടി <<ആണ്ടവാന് ഏസ്സേ, എന്ന് ഉജുരുന നീ എ്ഡ്‌ക്കുഡോമെ!>> എന്റ് തെപാനോസു പരേസ്‌നാന്. 60അയാള് സന്ത്‌ന ഊന്റികൊണ്ടു ദൊഡ്ഡാദ്‌ക്ക് അഗാറി സൊന്നാന്, <<ആണ്ടവാനെ! അവാര് ഗേന്ത ഈ പാവഗാള്‌ക്ക് അവാര്‌ന നീ ദെ്ണ്ടിക്കാദെ ഇര്‌ക്കുഡോമെ>> എന്റ് സൊന്ന പ്‌റ അയാള് സത്താന്.
Currently Selected:
അപ്പോസുത്തലാര് 7: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
