അപ്പോസുത്തലാര് 8
8
1തെപാനോസുന കൊന്റാദ് സെരിത്തെ എന്റ് സവുലു സൊന്നാന്.
സവുലു ഏസ്സ്‌ഗാറാര് കൂട്ടന സെര്യായി കൊഡിമെപഡ്‌സ്‌ന്റാന്
അയി നാള് താനെ എര്‌സലേമ്‌ല ഏസ്സ്‌ഗാറാര് കൂട്ടാന നലമായി കൊഡിമെപഡിസ്യ പ്‌ഡിത്താര്. അപ്പോസുത്തലാര് അല്ലാത്ത ഏസ്സ്‌ഗാറാര് ഒട്ടുക്കു ജില്ലമ്പുല്ലാത്ത് ആയി തള്ള്‌നാര്. അവാര് എഗുദ, സമര്യ ദേസ സാരി പോയി എജ്ജ്‌നാര്. 2ഒന്റരെ ബക്‌തിഗാറാര് തെപാനോസുന പാത്ത്‌ന പ്‌റസാരി അയാള്‌ക്ക് ദൊഡ്ഡാദ്‌ക്ക് അഗാറി ബ്‌ന്ത് കേ്യിന്താര്.
3ആന സവുലു ബീ്ഡ് ബീ്ഡ പോയി ഏസ്സ്‌ഗാറാര് കൂട്ടാത്ത്‌ല പെ്ണ്ണ്‌മക്കാള്‌നാമ്, ഗണ്ടാള്‌നാമ് ഇ്ള്‌ത്ത്‌ബലിത്ത് എ്ഡ്‌ത്ത് പോയി ജെയില്‌ക്ക് അഡേത്താന്. അയാള് അത്തെ ഗേന്ത് ഏസ്സ്‌ഗാറാര് കൂട്ടന കെ്ഡിസ്യ ഓരാഡ്‌നാന്.
സമര്യാല് നല്ല സേദിന സൊല്ലുന്റാര്
4ജില്ലമ്പുല്ലാത്ത് ആയി പോന ഏസ്സ്‌ഗാറാര് നല്ല സേദിന സൊല്ലികൊണ്ടു എല്ലാ സാരി പോനാര്. 5പീലിപോസു സമര്യാല ഒന്റു പട്ടണാക്ക് പോയി ക്‌റ്‌സ്‌ത്ത്‌ന പറ്റി അദ്‌ല ആള്‌ഗാള്‌ക്ക് സൊന്നാന്. 6അദ്‌ലിന്തവാര് പീലിപോസു സൊന്നാദ്‌ന കേ്ട്ട്‌മ്, അയാള് ഗേന്ത അദിസ്യഗാള്‌ന കണ്ട്‌മ് ഇന്താര്. അദ്‌നാലെ അദ്‌ലവാര് പീലിപോസു നായന സൊക്കാന കേ്ട്ടിന്താര്. 7കെ്ട്ടജാദി തട്ടിന്തവാര്‌ലിന്ത് അയി ജാദിഗാള് ദൊഡ്ഡാദ്‌ക്ക് അഗാറി ബെ്ളിഗെ കഡാന്ത് പോറ്റു. മൊത്തന സപ്പെനോയിഗാറാര്‌മ്, മൊണ്ടിഗാള്‌മ് തെ്ളിന്താര്. 8അത്തെ അയി പട്ടണാത്ത്‌ല് എത്ത്‌റാഗോ പിര്യരിമെ ആറ്റ്.
9സീമോനു എന്നുവ ഒന്റു മന്ത്‌റവാദി അദ്‌ല് ഇന്തിന്താന്. അയാള് താന് ദൊഡ്ഡവാന് എന്റ് തനാന താനെ സൊല്ലികൊണ്ടു മന്ത്‌റ ഗേന്ത് മോഡി കാട്ടി സമര്യ പട്ടണാത്ത്‌ല ആള്‌ഗാള്‌ന അദിസ്യപഡിസിന്താന്. 10അയി പട്ടണാത്തല് ഇര്‌ക്കുവ ഉജാന്തവാര്‌ലിന്ത് സ്‌ന്നവാര് ബീസാക്ക് <<ഇയാള്‌ക്ക് സാമി സക്‌തി എന്നുവ <ദൊഡ്ഡ സക്‌തി> >> ഇര്‌ക്ക്‌ന്റ് എന്റ് സൊല്ലിന്താര്. 11അയാള് എഞ്ചോ നാള് മന്ത്‌റ ഗേന്ത് മോഡി കാട്ടിന്താദ്‌ന കണ്ട് ആള്‌ഗാള് അദിസ്യപട്ടിന്താര്. അദ്‌നാലെ അവാര് അയാള് സൊല്ലുവാദ്‌ന കേ്ട്ട് നഡാന്തിന്താര്. 12ആന സാമി ആള്യ പോവാദ്‌ന പറ്റിമ്, ഏസ്സ് ക്‌റ്‌സ്‌ത്ത്‌ന പറ്റിമ് സൊല്ലുവ നല്ല സേദിന പറ്റി പീലിപോസു സൊല്ലുഗാട്ടി ആള്‌ഗാള് അദ്‌ന നമ്പ്‌നാര്. അത്തെ നമ്പ്‌ന ഗണ്ടാള്‌മ് പെ്ണ്ണ്‌മക്കാള്‌മ് ഒട്ടുക്കു നീര്‌ക്ക് മുളുഗുനാര്. 13സീമോനു താന്‌മ് അദ്‌ന നമ്പി നീര്‌ക്ക് മുളുഗുന പ്‌റസാരി പീലിപോസുക്കു എ്ണേന്താന്. അദ്‌ല് നഡാന്ത ദൊഡ്ഡ അദിസ്യഗാള്‌നാമ് അഡ്യാളഗാള്‌നാമ് കണ്ട് സീമോനു അന്തബ്‌ട്ടാന്.
14അയി ഗളിഗേല് അപ്പോസുത്തലാര് എര്‌സലേമ്‌ല് താനെത്തെ ഇന്താര്. സമര്യാല ആള്‌ഗാള് സാമി സൊല്ലുസുലാക്കാന നമ്പ്‌നാര് എന്റ് അപ്പോസുത്തലാര് കേ്ട്ടാര്. അദ്‌നാലെ അവാര് പത്ത്‌റോസുനാമ്, ഓഗന്നാന്‌നാമ് ആങ്ക് സൊല്ലി ബ്‌ട്ടാര്. 15അവാര് അദ്‌ക്ക് പോയി എജ്ജി സമര്യാല് ഇര്‌ക്കുവ ഏസ്സ്‌ഗാറാര്‌ക്ക് സാമിനിഗാല് കെ്ഡേക്ക്യ ബേ്ണ്ടി പരേസ്‌നാര്. 16-17അദ്‌നാലെ പത്ത്‌റോസുമു, ഓഗന്നാന്‌മ് അവാര്‌ക്ക് കയി ബെക്കാട്ടി അവാര്‌ക്ക് സാമിനിഗാല് കെ്ഡേത്ത്‌ദ്. അവാര് ആണ്ടവാന് ഏസ്സ് പേര്‌ല് നീര്‌ക്ക് മുളിഗി ഇന്താദല്ലാദെ, അന്നമാട്ട്‌ക്ക് അവാര്‌ക്ക് ആര്‌ക്ക്‌മ് സാമിനിഗാല് കെ്ഡേക്കാദെ ഇന്ത്‌ദ്.
18അപ്പോസുത്തലാര് ഏസ്സ്‌ഗാറാര്‌ക്ക് കയി ബെക്കാട്ടി അവാര്‌ക്ക് സാമിനിഗാല് കെ്ഡേക്കുവാദ്‌ന സീമോനു കണ്ടാന്. അദ്‌നാലെ അയാള് പത്ത്‌റോസുക്കുമു, ഓഗന്നാന്‌ക്ക്‌മ് പണാന കൊഡുത്തു, 19<<നാന് ഏവാരൊന്റാള്‌ക്ക് കയി ബെത്തദാന അവാര്‌ക്ക് സാമിനിഗാല് കെ്ഡേക്ക്യ എനാക്ക്‌മ് ഈ അദിഗരാന തരുഡൊ>> എന്റ് കേ്ട്ടാന്.
20അദുക്കുള പത്ത്‌റോസു ഇത്തെ തിരിക്കി സൊന്നാന്, <<സാമി തരുവ ദാനന പണ കൊഡുത്തു ബാങ്കുഡൊ എന്റ് നീ നെനേത്താദ്‌നാലെ, നീയിമ്, നിന്ന് പണാമ് നാസമായി പോഡൊ! 21നിന്ന് മനേസ്സ് നല്ലാദ് അല്ല എന്റ് സാമിക്ക് തെരിവു. അദ്‌നാലെ എമ്മ ഗേവ ഈ ഗിലാസാക്ക് നിനാക്ക് എമ്മോഡ എജേയ മുഡ്യാമാട്ട. 22നീ ഗേവ കാര്യഗാള് തപ്പ് എന്റ് തെരിന്ത് അദ്‌ന തള്ളി ഇന്നി ഗേഗാദെ ഇര്‌ക്കുഡൊ. അദ്‌ക്ക് പ്‌റസാരി സാമിന പരേസ്. അന്നാപ്പ് സാമി നിമ്മ് തപ്പ്‌ക്ക് പൊറിമെ തരുവാന്. 23നിന്ന് മനേസ്സ്‌ല് പൂര കീ്ട്ട്‌ഗന തുമ്പിസി ബെത്ത്‌റ്‌ന്റായി എന്റ്‌മ്, കെ്ട്ടാദ് ഗേവാദ്‌ക്ക് അഡിമെ ആയി ഇര്‌ന്റായി എന്റ്‌മ് നാന് കാണ്‌ന്റെ.>>
24അദുക്കുള അയാള് <<നിമ്മ സൊന്ന പാസെ എനാക്ക് തട്ടാദെ ഇര്‌ക്ക്യ എനാക്ക് ബേ്ണ്ടി നിമ്മ ആണ്ടവാന്‌ക്ക് പരേസ്‌ന്>> എന്റ് സീമോനു പത്ത്‌റോസുക്കുമു ഓഗന്നാന്‌ക്ക്‌മ് സൊന്നാന്.
25പത്ത്‌റോസുമു, ഓഗന്നാന്‌മ് സാമി തമാക്ക് ഗേന്ത് കൊഡുത്താദ്‌നാമ്, ആണ്ടവാന് സൊല്ലുസുലാക്കനാമ് പറ്റി സൊന്നാര്. അദ്‌ക്ക് പ്‌റ അവാര് എര്‌സലേമ്‌ക്ക് തിരിഗി പോനാര്. അത്തെ പോഗാട്ടി അവാര് സമര്യാല എഞ്ചോ ഊരുക്ക്‌റാഗ ആണ്ടവാന് നല്ല സേദിന സൊന്നാര്.
പീലിപോസുമു എത്തോപ്യ നാഡ് റാണിത്ത് ജോലിഗാറാന്‌മ്
26ആണ്ടവാന് ദൂദാന് പീലിപോസുക്കു ഇത്തെ സൊന്നാന്, <<നീ ഒരിങ്കി തെക്ക് സാരി പോവ ബട്ടെമേലെ പൊ, അദ് എര്‌സലേമ്‌ലിന്ത് ഗാസ എന്നുവ നാഡ്‌ക്ക് പോവ ബട്ടേത്തെ ആയിന്ത്‌ദ്.>> (ഈ ബട്ടെ ബ്‌ട്ട്‌തള്ളി ഇര്‌ന്റ്) 27-28അദ്‌നാലെ പീലിപോസു അന്നാല് താനെ ഒരിങ്കി പോനാന്. അദുക്കുള അയാള് ഒന്റു എത്തോപ്യ നാഡ്‌ഗാറാന് തന്ന് നാഡ്‌ക്ക് പോവാദ്‌ന കണ്ടാന്. പെ്ണ്ട്‌റിപെ്ണ്യാന് ആയിന്ത അയാള് എത്തോപ്യ റാണിക്ക് പണ കാര്യ നോഡുവ ദൊഡ്ഡ ജോലിഗാറാന് ആയിന്താന്. അയാള് എര്‌സലേമ്‌ക്ക് പോയി സാമി കുമ്മുഡുന പ്‌റ തിരിഗി തന്ന് ബീ്ഡ്‌ക്ക് പോയി കൊണ്ടിന്താന്. തേര്‌ല് പോയി കൊണ്ടു ഇര്‌ക്കാട്ടി അയാള് ഏസ്സയ്യ സാമിദാസ് ബൊക്കുന പഡിത്ത്‌കൊണ്ടു ഇന്താന്. 29<<അയി തേര്‌ക്ക് ഒപ്പ പൊ>> എന്റ് സാമിനിഗാല് പീലിപോസുക്കു സൊല്ലുറ്റു.
30പീലിപോസു ഓഡി തേര്‌ക്ക് അര്‌ഗെ പോഗാട്ടി അയാള് ഏസ്സയ്യ സാമിദാസ് ബൊക്കു പഡിക്കുവാദ്‌ന കേ്ട്ടാന്. <<നീ പഡിക്കുവാദ് എന്ത് എന്റ് നിനാക്ക് തെരിന്റാ?>> എന്റ് പീലിപോസു അയാള്‌ന കേ്ട്ടാന്.
31അദുക്കുള അയാള് <<ഇദ്‌ന പറ്റി ആരാറ്റ സൊല്ലി തരാദെ പോന എനാക്ക് എത്തെ തെരിവു?>> എന്റ് സൊന്നാന്. പ്‌റസാരി അയാള് പീലിപോസുന തന്നോഡ ഒപ്പ കുക്കാക്ക്യ തേര്‌ക്ക് ഏ്റ്യ സൊന്നാന്. 32സാമി ബൊക്കുലു ഈ സൊല്ലു സുലാക്കനത്തെ അയാള് പഡിത്തിന്താദ്,
<<ബെ്ട്ട്യ എ്ഡ്‌ത്ത് പോവ ആഡ്‌ന പാസേമ്,
തുപ്പുഡുന കത്താര്‌സ്‌ഗാട്ടി സപ്പെന്റ്‌റ്‌ക്കുവ കൊറ്യാഡ് കുട്ടിന പാസേമ്
അയാള് ഒന്റുമു സൊല്ലാദെ ഇന്താന്.
33അയാള്‌ന മാനഗെ്ഡിസിമ്, പാവ ഗേഗാദെ ഇന്ത അയാള്‌ന പാവഗാറാന്‌മ് മാഡ്‌നാര്.
ബൂമില് അയാള് ഉജുരുന ഇല്ലാദെമാഡി തള്ള്‌നാര്,
അദ്‌നാലെ അയാള് കാല്‌കെ്ളെന പറ്റി ആര്‌ക്ക് സൊല്ല്യ മുഡിമ്?>>#ഏസ്സയ്യാവു 53:7,8
34<<സാമിദാസ് ആര്‌ന പറ്റി ഇത്തെ സൊന്റാന്? തനാന പറ്റിത്തെ സൊന്റാന? ഇല്ലെ ബേ്റെ ആരാറ്റ്‌ന പറ്റിത്തെ സൊന്റാന? എന്റ് എനാക്ക് സൊല്ലി താ>> എന്റ് സൊന്നാന്. 35അദുക്കുള പീലിപോസു അയാള് പഡിത്തിന്ത ഈ സാമി ബൊക്കുല സൊല്ലുസുലാക്കാന അര്‌ത്ത മാഡികൊണ്ടു അയാള്‌ക്ക് ഏസ്സ് ക്‌റ്‌സ്‌ത്ത്‌ന പറ്റി സൊല്ലുവ നല്ല സേദി സൊല്ല്യ പ്‌ഡിത്താന്.
36അത്തെ അവാര് ബട്ടെമേലെ പോയി കൊണ്ടു ഇര്‌ക്കാട്ടി നീര് ഇര്‌ക്കുവ ഒന്റു എ്ഡേക്ക് എജ്ജ്‌നാര്. അദുക്കുള അയാള് പീലിപോസുക്കു <<ഇദാഗെ നീര് ഇര്‌ന്റ്. ഇന്നി നീര്‌ക്ക് മുളുഗുവാദ്‌ക്ക് എനാക്ക് എന്ത് തഡേസ?>> എന്റ് പീലിപോസുന കേ്ട്ടാന്. 37<<നീ മനേസ്സാറ നമ്പുവദാന നീര്‌ക്ക് മുളുഗുല>> എന്റ് പീലിപോസു അയാള്‌ക്ക് സൊന്നാന്. <<ഏസ്സ് ക്‌റ്‌സ്‌ത്ത് സാമിമഗാന് എന്റ് നാന് നമ്പ്‌ന്റെ>> എന്റ് അയി പെ്ണ്ട്‌രിപെ്ണ്യാന് സൊന്നാന്.
38പ്‌റ തേര്‌ന ന്‌റ്‌ത്ത്യ അയി പെ്ണ്ട്‌രിപെ്ണ്യാന് സൊന്നാന്. അവാര് റാഡാള്‌മ് നീര്‌ക്ക് ഇ്റാഗ്‌നാര്. പീലിപോസു അയാള്‌ന നീര്‌ക്ക് മുളുഗുസ്‌നാന്. 39അവാര് നീര്‌ലിന്ത് ഏ്ട്ടിക്ക് ഏ്റ്‌ഗാട്ടി സാമിനിഗാല് പീലിപോസുന എ്ഡ്‌ത്ത് പോനാന്. അയി പെ്ണ്ട്‌രിപെ്ണ്യാന് പിന്നെ അയാള്‌ന കാണാലെ. എന്റാല്‌മ് അയാള് പിര്യപിര്യത്തോഡ പിന്നെ നഡാക്ക്യ പ്‌ഡിത്താന്. 40അസ്‌തോദുലു ബെത്ത്‌ത്തെ പിന്നെ പീലിപോസുന കണ്ടാദ്. പിന്നെ അയാള് കയിസര്യാക്ക് പോനാന്. അത്തെ പോഗാട്ടി അയാള് എഞ്ചോ പട്ടണഗാള്‌ല് നല്ല സേദി സൊല്ലികൊണ്ട് പോനാന്.
Currently Selected:
അപ്പോസുത്തലാര് 8: സാമി സേദി
Highlight
Share
Copy
Want to have your highlights saved across all your devices? Sign up or sign in
New Life Computer Institute
