प्रेरितों के काम 4
4
पतरस अर यूहन्ना की गिरफ्तरी
1जब पतरस अर यूहन्ना लुखुं मा यु बुल्णा छा त यहूदी याजक अर यरूशलेम शहर का मन्दिर का सरदार अर सदूकी#4:1 सदूकी यहूदी अगुवों को एक झुण्ड जु मुर्दों मा बट्टी ज्यूँदो हूंण पर विश्वास नि करदींनि ऊं पर रब रबा-तब तबा हवे गैनी। 2उ भौत गुस्सा हवे कि पतरस अर यूहन्ना यीशु का बारा मा लुखुं तैं सिखाैंदी छा कि जु लोग मुरयां छिनी पिता परमेश्वर ऊं तैं फिर से ज्यूँदो कैरी दयालो जन वेल यीशु तैं मुरयां बट्टी ज्यून्दो कैरी। 3ऊंल ऊं द्वीयूँ तैं गिरफ्तार कैरी कै दुसरा दिन तक हवालात मा रखि किलैकि रुमुक हवे गै छै। 4पर वचन का सुनण वलो मा बट्टी भौत लुखुं यीशु पर विश्वास कैरी अर ऊं की गिणती पाँच हजार मनिख्युं कि छै जु यीशु मा विश्वास कन वला बण गैनी।
पतरस अर यूहन्ना : यहूदी सभा का संमणी
5हैंका दिन ऊंका अगुवा, दाना-सयाणों अर यहूदी व्यवस्था तैं सिखांण वला यरूशलेम शहर मा एक जगत कठ्ठा हवेनि 6अर वीं सभा मा जु मौजूद छा उ महायाजक हन्ना अर वेका कुटम्ब का कैफा, यूहन्ना अर सिकन्दर छा। 7अर पतरस अर यूहन्ना तैं बीच मा खड़ो कैरी कै पुछण लगि गैनी आदिम तैं ठिक कनु कु कै ल त्वे तैं सामर्थ अर अधिकार दियुं च। 8तब पतरस ल पवित्र आत्मा से भरिके ऊंमा बोलि, हे लुखुं का मुखियों अर दाना-सयाणों 9हम ल एक दुखी मनिख की भलै कैरी च अर आज हम बट्टी वेका बारा मा लोग पूछताछ कैरी के जांच कना छिनी की उ कन के बचये गैनी। 10त तुम सब लोग अर सैरा इस्राएलियों तैं जांणि जांण चयणु च की यीशु मसीह नासरी जै तैं तुम ल सूली पर चड़ै अर पिता परमेश्वर ल यीशु तैं मुर्दों मा बट्टी दुबारा ज्यूँदो कैरी अर आज यीशु का नौं बट्टी यु मनिख तुमारा संमणी अच्छो भलो खड़ो च। 11मसीह यीशु ही उ ढुंगो च अर जै तुम मिस्त्रियों ल फुंड ढोलयुं समझी अर देखा उ ही कोंणा की कोढ़ी को ढुंगो बंणि गै। 12यीशु का अलावा कै और दुसरा का द्वारा उद्धार अर बचाव नि च किलैकि आसमान का तौला अर मनिख्युं मा और कुई हैंको नौं नि दिये गै जैका द्वारा हम मुक्ति पै सैका।
यीशु का नौं कु चेलों तैं धमकी
13जब ऊंल पतरस अर यूहन्ना को साहस देखि अर यु जांणि की यु साधारण मनिख छिन अर परमेश्वर के वचन का कुछ खास शिक्षा नि पै छै उ हकदक हवे गैनी। अगुवों ल ऊं तैं पैछांणि यु सम्भव इलै हवे साकी किलैकि उ यीशु का दगड़ी रौंदा छा। 14ऊंल वे मनिख तैं जु खूब हवे छो पतरस अर यूहन्ना का दगड़ी खड़ो देखि के वे झुण्ड का लोग ऊँका विरोध मा कुछ नि बोलि सकिनि। 15यांका बाद ऊंल पतरस अर यूहन्ना तैं महासभा बट्टी भैर जांणै की आज्ञा दे, अर उ आपस मा बात कन लगि गैनी, 16“हम यूं मनिख्युं का दगड़ी क्य कैरा? किलैकि यरूशलेम शहर का सब रौंण वलो पर प्रगट च कि यूंका द्वारा एक बकि बातों चमत्कार का काम दिखाये गै अर हम वांको इंकार नि कैरी सकदां। 17पर लुखुं मा यु समाचारों कु अर प्रचार नि हवे अर ऊं तैं धमकांवां कि उ यु नौं से फिर कै हैंका मनिख दगड़ी बात नि कैरो कखि या बात लुखुं मा और जादा नि फैली जौं।” 18तब ऊंल पतरस अर यूहन्ना तैं बुलै अर ऊं तैं धमकी दे के बोलि “यीशु का नौं से कुछ भि नि बुल्य्यां अर न कुछ सिखायां।” 19पर पतरस अर यूहन्ना ल ऊं तैं जवाब दींनि “तुम ही न्याय कैरा क्य यु परमेश्वर का नजर मा भलो च कि हम परमेश्वर कि आज्ञा से बढ़ि के तुमारी आज्ञा तैं मांणा। 20किलैकि यु त हम बट्टी हवेनि सकदु कि जु हम ल देखि च अर जु सूंणि उन ही बुलयां।” 21तब ऊंल पतरस अर यूहन्ना तैं और धमकै के छोड़ी दींनि किलैकि उ समझी नि सकिनि की ऊं तैं कन के दंड द्या इलै की ज्वा घटना हवे छै व वांका कारण सब लोग परमेश्वर कि बड़ै कना छा। 22किलैकि जु मनिख चमत्कार का काम का द्वारा खूब हुयुं च उ चालिस बरस से जादा उम्र को छो।
चेलों की परमेश्वर बट्टी प्रार्थना
23तब उ छुटी के अपड़ा दगड़ियों मा ऐनी अर जु कुछ प्रधान याजक ल अर लुखुं का दाना-सयाणों ल ऊंमा बोलि छो उ सब ऊं तैं सुंणै दींनि। 24यु सूंणि के ऊंल एक चित हवे के ऊंची आवाज मा पिता परमेश्वर बट्टी बिनती कैरी “हे स्वामि तु उ ही छै जै ल आसमान अर धरती अर समुद्र अर जु कुछ वां मा च उ सब कुछ तिल ही बंणै।” 25तिल पवित्र आत्मा का द्वारा अपड़ा सेवक अर हमारा पूर्वज राजा दाऊद का गिच्चा बट्टी यु बोलि, “अन्यजातियों ल हल्ला किलै मचै? अर देश-देश का लुखुं ल बेकार अर बेमतलब कि बातों को किलै ध्यान कैरी? 26प्रभु अर वेका मसीह का विरोध मा धरती का राजा अर राज्यपाल एक दगड़ी कठ्ठा खड़ा हवे गैनी। 27किलैकि सच मा तेरु पवित्र सेवक यीशु का विरोध मा जै को तिल अभिषेक कैरी राजा हेरोदेस अर पुन्तियुस पिलातुस राज्यपाल भि अन्यजातियों का अर इस्राएलियों का दगड़ा यरूशलेम शहर मा कट्ठा हवेनि 28ऊंल उ ही कैरी जु कुछ तेरी सामर्थ अर मनसा से ठैरयूं छो उन कैर! 29अब हे प्रभु धर्म का अधिकारियों की धौंस तैं सुनण अर अपड़ा सेवकों तैं यु वरदान दे की तेरु उ वचन बड़ा साहस से सुंणौनु। 30खूब कनु कु अपड़ो हथ बड़ो की अद्भुत काम अर चमत्कार का काम तेरु पवित्र सेवक यीशु का नौं से करे जौनु।” 31जब ऊंल पिता परमेश्वर बट्टी प्रार्थना कैरेले छै त व जगह जख उ बैठयां छा हिली गै अर उ सभि पवित्र आत्मा से भुरे गैनी अर परमेश्वर का वचन तैं साहस से सुणौंणा रैनी।
विश्वासियों की एकता
32विश्वास कन वलो कि मण्डलि एक मनसा कि छै इख तक कि कुई भि अपड़ी धन सम्पति कु अपड़ी नि बुल्दो छो पर सब सम्पत्ति साझा की छै। 33प्रेरितों बड़ी सामर्थ का दगड़ी प्रभु यीशु कि फिर से ज्यून्दा होंणै गव्है दींण रैनी अर ऊं सभियूं पर बड़ी कृपा छै। 34ऊंमा कुई भि गरीब नि छो किलैकि जौं मा जमींन या घौर छा उ ऊं तैं बेचि-बेचि के बिकीं चिज्युं कि कीमत लैके वे तैं चेलों तैं दे दीन्दा छा 35अर जथग भि जै तैं जरूरत हूंदी छै प्रेरितों वांका अनुसार सभियूं मा बांटि दींद छा। 36यूसुफ नौं को साइप्रस द्वीप का रौंण वलो एक लेवि छो जै को प्रेरित बरनबास नौं बट्टी बुलौन्दा छा जै को मतलब च, एक इन आदिम जु दूसरों तैं उत्साहित करदो। 37वेकी कुछ जमींन छै ज्वा वेल बेचि दींनि अर मोल का रुप्या लैके लुखुं मा बंटणु कु प्रेरितों तैं दे दींनि।
Currently Selected:
प्रेरितों के काम 4: GHMNT
Highlight
Share
Copy
Want to have your highlights saved across all your devices? Sign up or sign in
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
