प्रेरितों के काम 2
2
पवित्र आत्मा को आंण
1यहूदियों का पिन्तेकुस्त का त्यौहार का दिन, त सभि चेला एक जगह मा कट्ठा हुयां छा।#2:1 लैव्य. 23:15-21, व्य. 16:9-11 2अर अचानक स्वर्ग बट्टी बड़ा औडल-पौडल जन स्वींस्याट की सी आवाज हवे अर वीं आवाज ल सैरो घौर जख उ कट्ठा हुयां छा गूंजी गै। 3तब ऊँका समणी इन ज्वाला प्रकट हवे जैको आकार जीभ का जन छो, जु अलग हवे के ऊंमा बट्टी हरेक आदिम पर ए के ठैरदी गै। 4उ सभि पवित्र आत्मा से भुरे गैनी अर पवित्र आत्मा ल ऊं तैं योग्यता दींनि वेका अनुसार उ बनि-बनि भाषा बुल्ण लगि गैनी।
5वे बगत आसमान का मूड़ी रौंण वला हर अन्य-जाति को जु पिता परमेश्वर का भय मनणवला कई यहूदी छा जु कि दुनिया का हरेक देश बट्टी त्यौहार मनांण कु अयां छा अर यरूशलेम शहर मा रौंणा छा। 6जब आवाज हवे त भौत बड़ी भीड़ लगि गै अर लोग हकदक रै गैनी किलैकि हरेक अपड़ी-अपड़ी भाषा मा शिष्यों तैं बुल्द सुणै द्ये। 7उ लोग बड़ा हकदक हवे के बुल्ण लगि गैनी “देखा यु जु बुल्णा छिनी क्य यु सभि लोग गलील मा रौंण वला नि छिन? 8त यु क्य हूंणु च, जु हम मा बट्टी हरेक यूं तैं अपड़ी-अपड़ी मातृभाषा मा बात करद सुनणु च? 9हम मा बट्टी कुछ लोग पारथी क्षेत्र बट्टी छिनी कुछ मादी, एलामी अर मेसोपोटामिया, यहूदिया प्रान्त, कप्प्दूकिया, पुन्तुस, एशिया, 10अर पंफूलिया प्रदेश, फ्रूगिया प्रदेश अर मिस्र देश कुरेन शहर का नजीक लीबिया देश का कुछ हिस्सा, यूं सभि देशों का यहूदियों ल अर रौंण वला अर रोम शहर मा दिखण वला अन्यजाति, 11जौनु यहूदी धर्म अपणैयले छो क्रेते अर अरब मुल्क का निवासी हम सभि अपड़ी-अपड़ी भाषा मा यूं बट्टी पिता परमेश्वर का बड़ा चमत्कार का कामों की चर्चा सुंणदां।” 12अर उ सभि समझी नि सकिनि हकदक हवे के एक हैंका बट्टी बुल्ण लगि गैनी कि “यु क्य हूंणु च” 13पर हौरु ल ऊं की मजाक बणै के बोलि, “यु त दाखमधु का नशा मा छिन।”
पिन्तेकुस्त का दिन पतरस कु भाषण
14पर तब पतरस ऊं ग्यारह प्रेरितों दगड़ी खड़ो हवे अर ऊंची आवाज मा ऊंकु बुल्ण लगि गै, “हे यहूदी भयों अर हे यरूशलेम शहर वासियों तुम मेरी बातों तैं सूंणा। 15तुम मा बट्टी कुछ लोग इन सुचणा छिनी कि हम लोग नशा मा छा पर हम नि छा किलैकि अभि त सुबेर का नौं बजि च।” 16जु हम दगड़ी हवे छो यु वे बात की पूर्ति च जु योएल परमेश्वर का तरपां बट्टी बुल्ण वला का द्वारा पिता परमेश्वर का वचन मा बुलै गै छो
17परमेश्वर इन बुल्दो कि “आखिर दिनों मा इन होलो कि
मि अपड़ी आत्मा सभि मनिख्युं तैं दयुलु
तुम्हरा नौंना अर तुम्हरी नौंनि परमेश्वर की तरपां बट्टी बुलला
अर तुम्हरा जवान दर्शन दिखला
अर तुम्हरा दाना सयाणा मनिख सुपन्या दिखला
18ऊं दिनों मा, मि अपड़ा दास, अर दासियों तैं अपड़ा आत्मा दयुलु
अर ऊं परमेश्वर का तरपां बट्टी बुलला।
19मि मथि आसमान मा सैरी शक्ति
अर मुड़ी धरती पर चिन्ह दिखौलु यानि
ल्वे, आग, अर धुंआ का बादल।
20प्रभु कु दिन औंण से पैली
सूरज अंधेरो हवे जालो
अर जून ल्वे का जन हवे जालो। ऊं दिन महान अर तेजस्वी दिन होलो
21अर जु कुई प्रभु को नौं ल्यालु उ बचै जालो।”#2:21 योए. 2:28-32
22“हे इस्राएलियों यु बातों तैं कि नासरत वासी यीशु एक मनिख छो जु परमेश्वर की तरपां बट्टी हूंणु का प्रमाण ऊं सामर्थ का कामों अर चमत्कार का काम अर चिन्हों बट्टी प्रगट च, जु परमेश्वर ल तुमारा बीच वेका द्वारा कैरी के दिखै जै तैं तुम अफ ही जंणदा छा। 23यु ही यीशु पिता परमेश्वर की ठैरैईं मनसा का अनुसार अर परमेश्वर का हूंण वला पूर्व ज्ञान का अनुसार पकड़वये गै छो अर तुम ल अधर्मियों का हथों ल वे तैं सूली पर चढ़ै कै मरवै दींनि। 24पर वे तैं पिता परमेश्वर ल मृत्यु का बन्धनों बट्टी छुड़ै के ज्यूँदो कैरी किलैकि मृत्यु वे तैं अपड़ा वश मा रखु यु हवे ही नि सकदो छो।#2:24 2 शमू. 22:6, भज. 18:4, भज. 116:3 25किलैकि राजा दाऊद यीशु बारा मा इन बुल्द, ‘मि प्रभु तैं हमेशा अपड़ा संमणी दिख्दी रयूं किलैकि उ मेरी दैंणी तरपां च मि ऊं लुखुं से नि डरदु जु मि तैं नुकसान पौंछांण चंदींनि। 26मि आनन्द से भुरे ग्यों अर बुल्दो छों, अर मेरू शहर भि आस मा बणयुं रालो। 27किलैकि तू मि तैं मुर्दों मा नि रौंण दीलि अर अपड़ा पवित्र जन तैं अधोलोक मा सड़ण भि नि दीलि। 28तिल मि तैं जीवन को बट्टो बतै अर तू मि तैं अपड़ी उपस्थिति मा रौंण से आनन्द बट्टी भोरि दीलि’#2:28 भज. 16:8-11
29हे विश्वासी भयों, मि तुम मा कुलपिता राजा दाऊद का बारा मा तुम बट्टी साहस का दगड़ी बोल सकदु छों कि उ त मोरि गै अर दफनाये भि गै अर वेकी कब्र आज तक भि हमारा इख मौजूद च। 30पर उ त परमेश्वर का तरपां बट्टी बुल्ण वलो छो अर जंणदु छो कि पिता परमेश्वर ल सौं खै छै कि मि तेरु कुल बट्टी एक आदिम तैं तेरु सिहासन पर बैठौलु।#2:30 2 शमू. 7:12,13, भज. 132:11 31यु जांणि के भविष्य मा पिता परमेश्वर क्य कन जांणु च, राजा दाऊद ल यीशु मसीह का मुरदों मा बट्टी ज्यून्दा हूंणै की बात कैरी वेल बोलि, कि यीशु तैं न त अधोलोक मा छोड़ी जालो अर न पिता परमेश्वर वेकी देह तैं सड़ण दयालो।#2:31 भज. 16:10 32परमेश्वर ल यु यीशु ज्यूँदो कैरी जैका हम सभि गवाह छा। 33यु ही यीशु तैं परमेश्वर ल अपड़ी दैणी तरपां सबसे ऊंची जगह बैठै अर पिता ल जन वे बट्टी करार कैरी छै वे तैं पवित्र आत्मा दे अर वेल उ ही पवित्र आत्मा हम तैं दींनि जन कि आज तुम जु दिखणा अर सुचणा छा। 34किलैकि राजा दाऊद त स्वर्ग पर नि चैड़ि उ अफी बुल्णु च कि ‘प्रभु परमेश्वर ल मेरा प्रभु बट्टी बोलि कि मेरा दैंणि तरपां बैठ 35जब तक मि तेरु बैरियों तैं तेरु खुट्टों की चौकी का समान बणै द्यों’ 36इलै इस्राएलियों जांणि ल्या कि पिता परमेश्वर ल यु ही यीशु तैं जै तैं तुम ल सूली पर चड़ै प्रभु और मसीह द्वी वे ठैरे।”
37जब ऊंल इन सूंणि त ऊंका मन बहुत दुखी गैनी अर उ पतरस तैं अर और प्रेरितों तैं पुछण लगि गैनी कि “हे विश्वासी भयों, अब इन बता कि हम ल क्य कन?” 38पतरस ल ऊंकु बोलि “तुम मा बट्टी हरेक मन फिरावा अर अपड़ा पापों की माफी कु यीशु मसीह का नौं से बपतिस्मा ल्यावा ज्यां बट्टी तुम पवित्र आत्मा को दान पैल्या। 39किलैकि य करार तुम कु अर तुम्हरी सन्तान कु अर ऊं सब दूर-दूर तक रौंण वला लुखुं कु भि च ऊं सभियूं कु जौं तैं हमारो परमेश्वर अफ मा बुलांदु।”#2:39 योए. 2:32 40पतरस ल भौत सैरी बातों से भि गव्है दे-दे के यु बात बार-बार बोलि के उ बट्टी बिनती कैरी, कि अफ तैं ई टेढ़ी जाति बट्टी बचावा।#2:40 व्य. 32:5, भज. 78:8 41जु कुछ पतरस ल बोलि, जौनु भि वेका संदेश पर विश्वास कैरी ऊंल बपतिस्मा लये अर वे ही दिन करीब तीन हजार लोग ऊं दगड़ी मिली गैनी।
विश्वासियों को साझो जीवन
42उ प्रेरितों बट्टी वचन की शिक्षा पांण मा अर संगति रखण मा उ प्रभु भोज मा सहभागी हूंदा छा अर विश्वासी एक दगड़ी अपड़ो खांणु खांदा छा अर पिता परमेश्वर बट्टी प्रार्थना कन मा लौलीन रौंदा छा।
43यरूशलेम शहर मा सभि लुखुं पर डौर अर हैरानी छै गै, अर भौत सा चमत्कार का काम और चिन्ह प्रेरितों का द्वारा प्रगट हूंदा छा। 44अर सब विश्वासी लोग एक जगह मा कठ्ठा हूंदा छा अर ऊं की सभि चीज-बस्ति साझा मा छै। 45उ अपड़ी सम्पति अर चिज्युं बिकै-बिकै के जन जै तैं जरूरत हूंदी छै उन ही सभियूं मा बांटि दींद छा। 46उ हरेक दिन एक मन हवे के पिता परमेश्वर बट्टी यरूशलेम शहर का मन्दिर मा कट्ठा हूंद छा अर घौर-घौर मा प्रभु भोज लींदा छा अर सच्चा मन दगड़ी रै के खांणु खांदा छा। 47अर पिता परमेश्वर की बढ़ै करदां छा अर सभि लोग ऊं बट्टी खुश छा अर प्रभु बचै जांणवला लुखुं तैं हरेक दिन मण्डलि मा मिलौंदु छो।
Currently Selected:
प्रेरितों के काम 2: GHMNT
Highlight
Share
Copy
Want to have your highlights saved across all your devices? Sign up or sign in
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
