प्रेरितों के काम 13
13
बरनबास अर शाऊल को भिजे जांण
1अन्ताकिया शहर का विश्वासियों की मण्डलि मा कई परमेश्वर का तरपां बट्टी बुल्ण वला अर कई शिक्षक छा। उ शिक्षक बरनबास अर शमौन, जैको दुसरो नौं नीगर भि छो, अर लूकियुस कुरेनी, अर देश का चौथाई भाग का हेरोदेस राजा को मुहबोला भैय जु दगड़ी बड़ा हवीनि मनाहेम, अर शाऊल। 2जब उ उपवास मा रै के पिता परमेश्वर की आराधना कना छा, त पवित्र आत्मा ल बोलि, “मि कु बरनबास अर शाऊल तैं वीं सेवा कु अलग कर जै कु मिल ऊं तैं बुलै।” 3तब ऊंल उपवास अर पिता परमेश्वर बट्टी प्रार्थना कैरी के शाऊल अर बरनबास का मुंड मा हथ रखि के ऊं तैं पिता परमेश्वर की सेवा कु भेजि दींनि।
पौलुस की पैली प्रचार यात्रा
4इलै शाऊल अर बरनबास पवित्र आत्मा का द्वारा अन्ताकिया शहर बट्टी सिलूकिया बंदरगाह तक भिजै गैनी; अर उ उख बट्टी समुद्री जहाज मा बैठी के साइप्रस टापू का सलमीस बंदरगाह कु चलि गैनी। 5अर सलमीस शहर मा पौंछि के, पिता परमेश्वर का वचन यहूदियों का मिलणा का भवन मा जै के सुनांण लगि गै; अर यूहन्ना मरकुस वेकी मदद कनु कु वे दगड़ी छा। 6यांका बाद ऊंल पूरा टापू बट्टी हवे के पाफुस शहर मा पौंछि गैनी। उख ऊंकी मुलाकात बार-यीशु नौं का एक यहूदी जादूगर का दगड़ी हवे, जु झूठो दावा करदो छो की उ परमेश्वर का तरपां बट्टी बुल्ण वला च। 7उ सिरगियुस शाऊल का दगड़ी भि काम करदो छो जु वे द्वीप को राज्यपाल छो, जु बुद्धिमान आदिम छो। वे राज्यपाल ल बरनबास अर शाऊल तैं बुलै के पिता परमेश्वर को वचन सुनांण चाहे। 8पर जादूगर बार-यीशु जै को यूनानी नौं इलीमास छो, अर ऊंको विरोध कैरी के वे राज्यपाल तैं प्रभु यीशु पर विश्वास कन से रुकण चाहे। 9तब शाऊल ल जैको नौं पौलुस भि च, पवित्र आत्मा बट्टी पूर्ण हवे के इलीमास जादूगर का तरपां गौर से देख के बोलि, 10“हे कपटी अर चकड़ैति ल पूर्ण शैतान की सन्तान, अर हर एक अच्छी बातों को भि दुश्मन छै, क्य तू प्रभु का सीधा रस्ता तैं टेढ़ा कन नि छुड़ली? 11अब प्रभु त्वे तैं सजा दयालो; तू थोड़ा बगत तक कु अंधो हवे जाली अर सूरज का उज्यला तैं नि देख सकली।” तब एकदम वेकी आँखों का संमणी अंधेरो हवे गै, अर फिर उ लाचार हवे के इने-उनै ढुंढण लगि गै कि कुई वेको हथ पकड़ी के वेकी मदद कैरो। 12तब राज्यपाल ल जु कुछ हवे छो, देखि के अर प्रभु का उपदेश बट्टी चकित हवे के वेल प्रभु यीशु पर विश्वास कैरी।
पिसिदिया प्रदेश का अन्ताकिया शहर मा
13पौलुस अर वेका दगड़िया पाफुस शहर बट्टी समुद्री जहाज मा यात्रा शुरू कैरी, अर पंफूलिया प्रदेश का पिरगा शहर मा जै के पौंछि गैनी; अर यूहन्ना मरकुस ऊं तैं छोड़ी के यरूशलेम शहर कु वापिस ऐ गै। 14अर पिरगा शहर बट्टी अगनैं बढ़ि के गलातिया प्रान्त का पिसिदिया जिला का नजदीक अन्ताकिया शहर मा पौछिनी; अर यहूदियों को विश्राम को दिन यहूदियों का मिलणा का भवन मा जै के बैठी गैनी। 15मूसा द्वारा लिखीं परमेश्वर की व्यवस्था अर परमेश्वर का तरपां बट्टी बुल्ण वलो की किताब बट्टी पढ़ण का बाद यहूदियों का मिलणा का भवन को सरदारों ल ऊंमा संदेश भेजि, “हे विश्वासी भयों, जु लुखुं का उत्साह कु तुम्हरा मन मा कुई बात हो त बोला।”
16तब पौलुस ल खड़ो हवे के अर हाथ बट्टी इशारा कैरी के ऊं तैं शान्त कैरी के बोलि, हे इस्राएलियों, अर पिता परमेश्वर बट्टी डरण वलो अन्यजातियों, सूंणा! 17यूं इस्राएलियों का पिता परमेश्वर ल हमारा पूर्वजों तैं चुणि, अर जब यु मिस्र देश मा परदेशी हवे के रौंदा छा, तब ऊंकी गिणती मा उन्नति हवे; अर पिता परमेश्वर ल ऊं तैं मिस्र देश बट्टी बड़ी महान सामर्थ ल भैर निकली। 18अर उ कुई चालीस साल तक एकांत जंगल मा ऊं तैं सहन कनु रै, जबकि ऊंल बार-बार ऊंका हुकुम को अणबुलयूं कैरी। 19अर पिता परमेश्वर ल कनान देश मा सात अन्य-जाति को नाश कैरी के हमारा पूर्वजों का कब्जा मा कैरी दींनि। 20हमारा पूर्वजों ल ऊंका पूर्वजों का मिस्र देश मा पौंछि जांण तक लगभग चार सौ पचास साल बाद कनान पर अधिकार कन शुरू कैरी; “पिता परमेश्वर का तरपां बट्टी बुल्ण वला शमूएल तक इस्राएल का लुखुं पर राज्य कनु कु अगुवा नियुक्त करिनि।
21जब शमूएल अभि तक ऊंको अगुवा ही छो, तब ऊंल एक राजा की माँग कैरी, त पिता परमेश्वर ल बिन्यामीन का गोत्र मा एक मनिख, मतलब कीश का नौंना शाऊल तैं ऊंल राजा बणये, अर वेल इस्राएली लुखुं पर चालीस साल तक शासन कैरी। 22फिर पिता परमेश्वर ल शाऊल तैं राजा की गद्दी बट्टी हटै के राजा दाऊद तैं ऊंको राजा बणै; जैका बारा मा वेल गव्है दींनि, मि तैं एक आदिम, यिशै को नौंनो राजा दाऊद, जु मेरा मन का अनुसार च मिली गै उ ही मेरी सैरी इच्छा तैं पूरी करलो।” 23वेका ही वंश मा बट्टी पिता परमेश्वर ल अपड़ी सौं का अनुसार इस्राएलियों मा एक उद्धारकर्ता, मतलब यीशु तैं भेजि। 24जैका आंण से पैली यूहन्ना ल सभि इस्राएलियों तैं अपड़ा पापों को पश्चाताप कनु अर पिता परमेश्वर की तरपां मुड़णु अर बपतिस्मा लींणे की जरूरत च। 25अर जब यूहन्ना अपड़ी सेवा पूरी कन पर छो, त वेल बोलि, “तुम कि सुचदियां की मि कु छो? मि मसीह नि छो; पर देखा, जु मेरा बाद एक आंण वलो च, उ मि बट्टी भौत जादा महान च अर मि यु योग्य भि नि छो कि वेका जुत्ता का तस्मों तैं खोल साको।”
26“हे विश्वासी भयों, तुम जु अब्राहम की सन्तान छा; अर पिता परमेश्वर बट्टी डरण वलो अन्यजाति लुखुं, सूंणा, पिता परमेश्वर ल हम मा यीशु का बारा मा यु सन्देश भेजि कि जु लुखुं तैं ऊंका पापों बट्टी उद्धार कनु कु अयुं च।” 27यरूशलेम शहर का लुखुं ल अर ऊंका अगुवों ल यीशु मसीह तैं नि पछयांणी अर ऊंल पिता परमेश्वर का तरपां बट्टी बुल्ण वला लुखुं का ऊं वचनों तैं नि समझी जौं तैं उ हर यहूदियों को विश्राम को दिन पढ़दा छा; इलै ऊंल बोलि यीशु मौत का लैक च अर इन कै पिता परमेश्वर का तरपां बट्टी बुल्ण वला लुखुं का वचनों तैं पूरो कैरी। 28ऊंल मारि डलणा का योग्य कुई भंगार वेमा नि पै, फिर भि राज्यपाल पिलातुस बट्टी बिनती कैरी, कि उ मरै जौं। 29अर जब ऊंल उ सब कैरी जु पिता परमेश्वर के वचन मा लिखै गै छो, ज्यांमा वे तैं वे सूली पर मुरण शामिल छो जु उ उठै के लीगि छो। 30पर पिता परमेश्वर ल वे तैं मुरयां मा बट्टी फिर से ज्यूँदो कैरी, 31अर उ ऊं तैं जु वे दगड़ी गलील प्रदेश बट्टी यरूशलेम शहर ऐ छा, भौत दिनों तक अपड़ा शिष्यों तैं दिखै दींणु रै; यु उ ही च जु हम यहूदियूं कु गवाह च। 32अर हम तुम तैं वीं सौं का बारा मा जु हमारा पुरणो बट्टी पिता परमेश्वर ल कैरी छै, यु शुभ सन्देश प्रचार सुनांणा छा। 33पिता परमेश्वर ल यीशु तैं मुरयां बट्टी ज्यूँदो कैरी, उ ही वादा वेल ऊंका वंशजों कु पूरा कैरी। जन कि भजन संहिता की किताब वेका दुसरा संख्या मा नौंनो का बारा मा पिता परमेश्वर ल बोलि, “कि तू मेरू नौंनो छै अर आज बट्टी मि तेरु बुबा बंणि ग्यूं”
34पिता परमेश्वर ल अपड़ा वचन मा वे तैं मुर्दों मा बट्टी ज्यूँदो अर कभी भि नि सड़ण का बारा मा बोलि। पिता परमेश्वर ल बोलि, “मि त्वे तैं पवित्र अर पक्की आशीष दियुलु, जैको वादा मिल दाऊद राजा बट्टी कैरी छो” 35इलै दाऊद राजा ल एक और भजन मा भि लिखीं, “तू अपड़ा पवित्र आदिम तैं सड़ण नि दीलि” 36दाऊद राजा त पिता परमेश्वर की इच्छा का अनुसार अपड़ा बगत मा सेवा कैरी के मोरि गै, अर अपड़ा पुरणों का दगड़ी खडै गै, अर वेकी देह सैड़ी भि गै। यां बट्टी हम जणदां कि दाऊद राजा यु भजन मा अपड़ा बारा मा बात नि कनु च। 37पर उ यीशु का बारा मा बात कनु च, जै तैं पिता परमेश्वर ल मुर्दों मा बट्टी ज्यूँदो कैरी, अर उ सैड़ी नि सकदु। 38इलै, हे विश्वासी भयों; तुम जांणि ल्या कि यीशु का द्वारा पापों की माफी को शुभ संदेश तुम तैं दिए गै अर जूं बातों बट्टी तुम मूसा की व्यवस्था का द्वारा निर्दोष नि ठैरे सकदा छा। 39पर व व्यवस्था ऊं लुखुं कु यीशु पर विश्वास कना का द्वारा निर्दोष ठैरदींनि। 40इलै चौकस रावा, इन नि हो, कि जु परमेश्वर का तरपां बट्टी बुल्ण वलो का तरपां बट्टी किताब मा लिख्युं च, तुम पर भि ऐ जौं। 41ऊंल बोलि, “हे निंदा कन वलो, देखा, अर चकित व, अर मोरि हवे जावा! किलैकि मि तुम्हरा दिनों मा एक काम करुलु; जैका बारा मा जु कुई तुम बट्टी वेका बारा मा बात करलो, त तुम कभी विश्वास नि करला”
42जब पौलुस अर बरनबास मन्दिर बट्टी निकलणा छा, तब लोग ऊं बट्टी बिनती कन लगिनि, कि हैंका यहूदियों को विश्राम को दिन हम तैं यु बात फिर सुणये जौं। 43अर जब यहूदियों का मिलणा का भवन मा बट्टी यहूदी सभा उठि गै त यहूदियों अर यहूदी मत मा बदलियां अन्यजाति भक्तों मा बट्टी बहुत सा पौलुस अर बरनबास का पिछनै हवे गैनी; अर ऊंल पौलुस अर बरनबास बट्टी बात कैरी के समझै, कि पिता परमेश्वर की कृपा मा बणयां रा।
पौलुस का द्वारा अन्यजातियों मा प्रचार की शुरुआत
44हैंका हफ्ता यहूदियों को विश्राम को दिन शहर का लगभग सभि लोग पिता परमेश्वर को वचन सुनणु कु कठ्ठा हवीनि। 45पर यहूदी अगुवा भीड़ तैं देखि के रमसे गैनी, अर अपमान कैरी के पौलुस की बातों का विरोध मा बुल्ण लगि गैनी। 46तब पौलुस अर बरनबास ल निडर हवे के बोलि, “जरूरी छो, कि पिता परमेश्वर को वचन पैली तुम तैं सुणये जांदु; किलैकि जब तुम वे तैं मना कैरी दींद, अर अफ तैं अनन्त जीवन का योग्य नि ठैरांदा, त अब, हम अन्यजाति लुखुं मा जौला।” 47किलैकि प्रभु ल हम तैं य आज्ञा द्ये, “मिल त्वे तैं अन्य-जाति लुखुं कु उज्यलो ठैरे, कि तुम तैं दुनिया मा हर जगह लुखुं तैं उद्धारकर्ता का बारा मा बतांण चयणु च”
48यु सूंणि के अन्यजाति लोग भौत खुश हवीनि, अर पिता परमेश्वर का वचन की बड़ै कन लगि गैनी, अर जथग अनन्त जीवन कु ठैरिनि, ऊंल विश्वास कैरी। 49तब प्रभु को वचन वे सैरा मुल्क मा फैलण लगि गै। 50पर यहूदियों का अगुवों ल ऊंची कुल की भक्त जननों तैं अर शहर का खास आदिमों तैं भड़कै। अर पौलुस अर बरनबास का खिलाफ जुल्म किये के ऊं तैं अपड़ा इलाका बट्टी भैर निकाली दींनि। 51तब पौलुस अर बरनबास ल ऊंका संमणी खुट्टों की धूल उखि झाड़ी दींनि, ऊं तैं यु दिखांणु कु कि पिता परमेश्वर ल ऊं तैं अस्वीकार कैरेले छो अर ऊं तैं दंड दयालो; फिर उ इकुनियुम शहर कु चलि गैनी। 52अर अन्ताकिया शहर मा चेला खुशी ल अर पवित्र आत्मा बट्टी भुरदी गैनी।
Currently Selected:
प्रेरितों के काम 13: GHMNT
Highlight
Share
Copy
Want to have your highlights saved across all your devices? Sign up or sign in
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
