प्रेरितों के काम 12
12
पतरस कि गिरफ्तरी अर छुटकारो
1वे बगत हेरोदेस राजा ल विश्वासियों की मण्डलि मा बट्टी कई लुखुं तैं सतौंणु कु ऊं तैं बन्धी बणै दींनि। 2ऊंल प्रेरितों मा बट्टी यूहन्ना का भैय याकूब तैं तलवार ल मरवै दींनि, 3अर जब वेल देखि कि यहूदी यु देखि के खुश हूंदींनि, तब वेल पतरस तैं पकड़ी दींनि; वे दिन अखमीरी रुठी को त्यौहार छो। 4अर हेरोदेस राजा ल पतरस तैं पकड़ी के जेल मा डाली दींनि, अर वेल चार-चार पहरेदारों तैं चार दल मा देख-रेख मा रख्युं छो, इलै की उ फसह का त्यौहार बाद ऊंको न्याय सभि लुखुं का संमणी कन वलो छो। 5जेल मा पतरस तैं बन्द रखै गै, पर विश्वासी लुखुं की मण्डलि पतरस कु ध्यान लगै के पिता परमेश्वर बट्टी प्रार्थना कनी छै।
6अर जब हेरोदेस राजा, पतरस तैं लुखुं का संमणी लांण वलो छो, वेका पैली रात पतरस जंजीरों बट्टी बंधयूं, अर द्वी सिपैयूं का बीच मा पुडयूं छो अर चौकीदार द्वार पर जेल की रखवली कना छा। 7तब अचानक प्रभु को एक स्वर्गदूत पतरस का संमणी उख ऐ, अर वे कोठरी मा उज्यालो हवे गै; फिर स्वर्गदूत ल पतरस तैं निंद मा हिलै के उठै अर बोलि, “जल्दी उठ।” अर जन ही पतरस निंद बट्टी जागि, अर वेकी हथों की जंजीर खुली के धरती पर लमडी गै। 8अर स्वर्गदूत ल पतरस बट्टी बोलि, “अपड़ो कमर बाँध के जुत्ता पैरी।” अर वेल उन ही कैरी, फिर स्वर्गदूत ल वे बट्टी बोलि, “अपड़ो कुर्ता पैरी के मेरा पिछनै हो ले।” 9जब पतरस वेका पिछनै-पिछनै भैर निकली त, तब वे तैं समझ मा नि ऐ, कि जु कुछ स्वर्गदूत द्वारा किये जांणु छो यु सभि कुछ हकीकत च या सुपिन्यो। 10जब उ पैली एक अर फिर दुसरा चौकीदार तैं पार कैरी के निकली के लूहा का बणयां द्वार तक पौंछि, जु कि नगर का तरपां छो, तब उ द्वार ऊंकु अफी खुली गै। अर उ निकली के एक गली का अंत तक पौंछिनी, अर तुरंत स्वर्गदूत पतरस तैं छोड़ी के चलि गै।
11तब पतरस होश मा ऐ अर बोलि, “अब मि तैं विश्वास हवे गै कि पिता परमेश्वर ल अपड़ा स्वर्गदूत तैं भेजि के मि तैं हेरोदेस राजा का हथों छुड़ै दींनि, अर यहूदी अगुवों की उम्मीद तोड़ी दींनि।” 12अर यु जांणि के कि पिता परमेश्वर ल वे तैं बचैयले, पतरस वे यूहन्ना का, जैको नौं मरकुस भि छो, की ब्वे मरियम का घौर भि ऐ, उख भौत सा विश्वासी कठ्ठा हवे कर प्रार्थना कना छा। 13जब पतरस ल भैरो को द्वार खट-खटये, तब रूदे नौं की दासी ऐ। 14अर पतरस की आवाज तैं पहचाणी के खुश हवे के बगैर द्वार खुल्यां भितर ऐ, अर सभियूं तैं बतांण लगि गै कि पतरस द्वार पर खड़ो च। 15यु सूंणि के ऊंल वे बट्टी बोलि, “तू पागल छै नौंनि।” पर वीं ल और भि जोर दे के बोलि, “मि सच बुल्णु छो, उ पतरस ही च।” पर ऊंल वेकी बात पर विश्वास नि कैरी अर वे बट्टी बोलि, “उ पतरस को स्वर्गदूत होलो।” 16यु बीच जब पतरस द्वार खट-खटाणु छो, तब ऊंल द्वार खोलि अर पतरस तैं देखि के हैरान हवे गैनी। 17पर पतरस ल ऊं बट्टी इशारा कैरी के चुप रौंणु कु बोलि, अर बतै कि पिता परमेश्वर ल वे तैं जेल मा बट्टी कन के भैर निकाली। फिर वेल बोलि कि, “तुम याकूब अर विश्वासी भयों तैं खबर भेजि दियां कि मि जेल मा बट्टी भैर ऐ ग्यूं।” येका बाद पतरस उख बट्टी दुसरी जगा चलि गै। 18सुबेर मा जब जेल का सिपै ल पतरस तैं जेलखना मा नि पै, तब वेमा हड़बड़ाट मचि गै कि पतरस कख गै? 19तब हेरोदेस राजा ल पतरस तैं खुजांणु को आज्ञा दींनि अर वे तैं सभि जगह जांच कैरी पर नि पै। त वेल पैरादारों बट्टी सवाल जवाब कैरी अर जब उ वेको जवाब नि दे सकिनि तब वेल आज्ञा द्ये कि पैरादारों मरै जौनु; अर उ यहूदिया प्रान्त छोड़ी के कुछ बगत कैसरिया शहर मा बितै।
हेरोदेस राजा कि मौत
20हेरोदेस राजा सूर अर सैदा का लुखुं बट्टी भौत नराज छो, इलै ऊं शहरों का लोग हेरोदेस राजा बट्टी मिलणु कु एक मन से वेमा ऐनी। सबसे पैली वेल बलास्तुस बट्टी मदद मांगी जु राजा को एक मुख्य अधिकारी छो। तब ऊंल हेरोदेस राजा बट्टी समझौता कनु कु बोलि किलैकि राजा का देश बट्टी ऊंका देश को पालन-पोषण हूंदो छो। 21जै दिन हेरोदेस राजा ल ऊं शहर का लुखुं बट्टी मिलणै की योजना बणै, अर राजवस्त्र पैरी के अपड़ा न्याय आसण पर बैठी के भाषण दींण लगि गै। 22वेकी बात सूंणि के उख का लोग जोर-जोर से चिलांणा रैनी, “यु कुई आदिम नि च, पर दिबता की आवाज च।” 23वे ही बगत पिता परमेश्वर का एक स्वर्गदूत ल वे तैं घायल कैरी, किलैकि वेल पिता परमेश्वर की महिमा नि कैरी; वेकी देह मा कीड़ा पुड़ीनि अर उ मोरि गैनी। 24पर पिता परमेश्वर को वचन बढ़णु अर और भि जादा फैलण लगि गै, अर विश्वासियों की ताकत बढण लगि गै। 25यहूदिया प्रदेश मा यहूदी विश्वासियों की मदद कनु कु पैसा दींण का बाद, बरनबास अर शाऊल यरूशलेम शहर बट्टी अन्ताकिया शहर कु लौटि ऐनी, अर यूहन्ना जैको नौं मरकुस भि छो ऊं दगड़ी छो।
Currently Selected:
प्रेरितों के काम 12: GHMNT
Highlight
Share
Copy
Want to have your highlights saved across all your devices? Sign up or sign in
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
