marqus 1
1
1lh̬bar ifulkin n‑yasuɛ lmasiḥ yus n‑rbbi. 2ibda ġmklli ityaran ġayd izrin f‑ufus n‑nnabi išaɛya, inna rbbi: «rad‑aznġ arqqas‑inu ad‑ak‑izwur ijjujad‑ak aġaras‑nnk. 3ha‑yan‑wawal ar‑itbrraḥ ġ‑lh̬la ar‑ittini ‹jjujadat aġaras n‑siditnnġ, tssnmm tiġarasin‑ns.›»
tabrraḥt n‑yuḥanna
4ġmkan a‑s‑d‑iban yuḥanna amsddam ġ‑lh̬la ar‑itbrraḥ ar‑ittini: «flat kullu ma‑tskarm yʷh̬šn, tddmm ġ‑waman, baš ad‑awn‑iṣamḥ rbbi f‑ddnub‑nnun.» 5ffuġn‑d s‑dars mddn ggutnin zġ‑tmazirt n‑yudaya d‑imzdġn n‑tmdint n‑urušalim, ar‑tqrran s‑ddnub‑nsn, ddmn kullutn f‑ufus‑ns ġ‑wasif n‑urdun. 6yuḥanna ar‑ilssa taḍut n‑irɛaman ar‑yaggs s‑ubkkas n‑ilm, ar‑ištta tamurġi d‑tammnt l‑lh̬la. 7ar‑itbrraḥ ar‑ittini: «ra‑d‑yašk tigira‑nu yan yugʷr‑iyi. ur‑sthllaġ ad‑knuġ ad‑rẓmġ ifalan n‑turẓiyin‑ns. 8nkki ssddmġ‑kʷn ġ‑waman, imma ntta ra‑kʷn‑issddm s‑rruḥ lqudus n‑rbbi.»
udum l‑lmasiḥ f‑ufus n‑yuḥanna
9yan‑wass ġ‑uwssan‑an iffuġ yasuɛ tamdint n‑naṣira lli‑illan ġ‑tmazirt n‑jalil, yašk‑id iddm ġ‑wasif n‑urdun f‑ufus n‑yuḥanna. 10ġir inkr‑d zġ‑waman s‑iẓra ignwan rẓmn, igguz‑d fllas rruḥ lqudus n‑rbbi zund yan‑utbir, 11isawl‑d yan‑wawal zġ‑ignwan yini: «kiyi tgit iwi iɛzzan. frḥġ srk bahra.»
šiṭan yurm lmasiḥ
12iddu yasuɛ idḥi‑t rruḥ lqudus ġakudan s‑lh̬la. 13ikka‑n ġ‑dar luḥuš ġ‑lh̬la kkuẓ id‑mraw n‑wass, ar‑t‑itarm šiṭan, ar‑ti‑tɛawann lmalayka.
imḥḍarn imzwura
14lliġ ityamaẓ yuḥanna ġ‑lḥbs yašk‑id yasuɛ s‑tmazirt n‑jalil ar‑itbrraḥ s‑lh̬bar ifulkin n‑rbbi 15ar‑ittini: «ikmml zzman, takmur‑d‑tgldit n‑rbbi. flat kullu ma‑tskarm yʷh̬šn, tġwim ġ‑lh̬bar‑ad ifulkin.» 16iftu ġ‑tama n‑umda n‑jalil, iẓr simɛan ntta d‑gʷmas andraws. ingʷmarn n‑islman ad‑gan. grn‑in ššbkt ġ‑umda. 17isawl yasuɛ yini‑asn: «aškad‑d munat didi, rarġ‑kʷn a‑tgm ingʷmarn n‑mddn.» 18fln ššbayk‑nsn ġakudan, munn dids. 19izayd iftu yan imikk s‑n‑iẓra yaɛqub yus n‑zabdi ntta d‑gʷmas yuḥanna. llan ġ‑tanawt‑nsn ar‑tɛdaln ššbayk. 20iġr‑asn ġakudan, fln‑in babatsn zabdi ġ‑tanawt ntta d‑ih̬ddamn‑ns, munn d‑yasuɛ.
lmasiḥ issufġ ljnn yʷh̬šnn
21ruḥn tamdint n‑kafrnaḥum. ġ‑wass n‑usunfu ikšm yasuɛ s‑tgmmi n‑tẓallit ar‑isslmad mddn. 22ar‑tɛjjabn ġ‑ulmmud‑ns ašku ar‑srsn‑isawal ġmklli dars lḥqq ad‑asn‑yini ma‑tn‑d‑iqqann a‑t‑skarn. ur‑igi ntta zund imslmdn n‑ššrɛ. 23ġ‑tasaɛt‑an illa ġ‑tgmmi n‑tẓallit yan‑urgaz lli‑ġ‑illa yal‑ljnn yʷh̬šnn bahra. 24yut s‑yat‑tġuyyit yini: «wa‑yasuɛ gu‑naṣira, ma‑illan ġ‑gratnnġ didk? is‑di‑tuškit ad‑aġ‑thlkt? ssnġ ma‑tgit kiyi. amẓlay n‑rbbi a‑tgit.» 25isawl yasuɛ yamr ljnn yini‑as: «fssa, tffuġt zġ‑gis.» 26issmḥakka‑t ljnn bahra, yut s‑yat‑tġuyyit itjhhdn iffuġ zġ‑gis. 27ar‑tɛjjabn mddn kullutn ar‑ssmqsan i‑ngratsn ar‑ttinin: «ma‑iga mayad? kra n‑ulmmud l‑ljdid ayad. hati dars taẓḍḍart iggutn aylliġ a‑itamr ljnun ʷh̬šnnin, ar‑skarn s‑wawal‑ns.» 28ġakudan ar‑bahra‑sawaln mddn f‑yasuɛ, awin lh̬bar‑ns s‑kraygatt mani ġ‑tmazirt n‑jalil kullutt.
taḍggʷalt n‑simɛan
29lliġ iffuġ zġ‑tgmmi n‑tẓallit yašk‑id s‑tgmmi n‑simɛan d‑andraws. kšmn srs ntni d‑yaɛqub d‑yuḥanna. 30afn‑in taḍggʷalt n‑simɛan tgn tuḍn s‑tawla, inin‑as fllas. 31yakmur s‑tama‑ns yamẓ‑as ġ‑ufus issnkr‑tt‑id. titti zgis tawla, tnkr ar‑fllasn‑ttsh̬h̬ar.
lmasiḥ ijjujji imuḍan ggutnin
32ġ‑tdggʷat n‑ġassan lliġ‑n‑tḍr tafukt aškin‑d mddn s‑dar yasuɛ, awin‑as‑d imuḍan kullutn ula ġwilli‑ġ‑llan ljnun. 33munn‑d kullu ayt‑tmdint ġ‑imi n‑tgmmi. 34ijjujji imuḍan ggutnin zġ‑kullu timuḍan lli‑gisn‑llanin issufġ kigan d‑ljnun. ur‑yudji ljnun a‑fllas‑sawaln, ašku ssnn ntni ma‑iga.
tabrraḥt l‑lmasiḥ ġ‑jalil
35inkr‑d yasuɛ ġ‑tillas n‑ṣṣbaḥ, iffuġ iftu s‑yan mani ġ‑ur‑illi yan, ar‑ġin‑itẓalla. 36iḍfur‑t simɛan d‑willi dids llanin. 37lliġ‑t‑in‑ufan inin‑as: «ha‑mddn kullutn ar‑srk‑siggiln.» 38imma yasuɛ irur‑asn: «a‑nddu s‑iduran‑an yaḍni a‑n‑tbrraḥġ ġin‑daġ, ašku mayad a‑f‑d‑uškiġ.» 39izayd ar‑itkka kullu tamazirt n‑jalil ar‑itbrraḥ ġ‑tgʷmma n‑tẓallit ar‑issufuġ ljnun.
lmasiḥ ijjujji anjdam
40yan‑wass yuška‑d dars yan‑unjdam, iḍr ġ‑lgddam‑ns iḍalb‑t bahra yini‑as: «tẓḍart a‑yyi‑tssġust iġ‑trit.» 41iḥnnu gis yasuɛ bahra, iggr‑as s‑ufus‑ns, yini‑as: «riġ nkki. ġus.» 42ġakudan yitti zġ‑gis ljdam iġus. 43yazn‑t yasuɛ yuṣṣa‑t s‑lmɛqul 44yini‑as: «rar lɛaql ad‑ur‑tinit yat i‑yan, walaynni ddu tmlt ih̬f‑nnk i‑unmġur n‑tgmmi n‑rbbi tfkt f‑usġus‑nnk tiġrsi lli‑f‑yuṣṣa musa, a‑tg tugga i‑mddn.» 45imma ntta iffuġ ġakudan ar‑isawal bahra f‑yasuɛ, ar‑itawi lh̬bar n‑mad‑as‑ijran aylliġ ur‑sul‑iẓḍar yasuɛ a‑ikšm ibayyn s‑kra n‑uduwwar. iqama ġ‑lh̬la ar‑n‑dars‑ttaškin mddn zġ‑kraygatt tasga.
Currently Selected:
marqus 1: SHILNT10
Highlight
Share
Copy
Want to have your highlights saved across all your devices? Sign up or sign in
New Testament in Tashelhayt (Latin script) © United Bible Societies, 1998, 2010.
Robert Bernard Dann.
