Romanos 9

Daizezeba jʉrʉdꞌa Israel bꞌera

1Cristodꞌeba mʉãrã wãrãta jaraya, mʉrã sewa nebʉrʉ ẽãta kꞌawua bꞌʉa Jawurebiadꞌeba. 2Israel bꞌe kꞌarea mʉrã baridua kꞌãbãẽã sopua bꞌʉa. 3Mʉ ãĩ bꞌebʉrʉba ĩjãnaĩta bꞌasibʉrʉ mʉrã Daizezea zuburia obibʉrʉta Cristodꞌebara ãĩ bꞌekꞌausia mʉ ʉrerã zharadꞌebemata kʉãgꞌaba. 4Ãzhira israelitarãta bꞌea, ãzhira Daizezeba zhi warrarã babigadꞌa, izhi kĩrãwãrẽãta ũdubigadꞌa, izha kꞌãrẽ oita jarakꞌadꞌa, izhi ũrãgꞌata Moisédꞌeba dedꞌekadꞌa, izhira sãwũã ibia jaradꞌaidꞌe bꞌʉta kꞌawuabigadꞌa, izha kꞌãrẽ diaita jarakꞌadꞌa. 5Ãzhira Abrahamneba, Isaacdꞌeba, Jacobodꞌeba uruta bꞌea, ãzhidꞌeba naʉ̃ zharadꞌe zesia Cristora, izhira Daizezeta ne jõmaʉ̃ ʉ̃rʉ̃ bꞌʉa, mawũẽ ewari nʉmʉ jõma ibia jaradꞌaya. Amén.

6Mʉãrã jara nʉmʉ ẽã izha jaradꞌara Daizezebara aribꞌae ẽãta. Awuarabʉrʉ jara nʉmʉã Israel bꞌedꞌeba urura Daizezema jõmarã israelitarã ẽãta. 7Abrahamneba urura Daizezema jõmarã Abraham warrarã ẽã, maʉ̃neba izhara mawũãsia: Bʉ warrarã nʉmaña Isaacdꞌeba. 8Aramaʉ̃nerã Abraham warrarã bari zharadꞌeba bꞌera Daizeze warrarã ẽã. Awuarabʉrʉ Abraham warrarã Daizezedꞌera warra izha jaradꞌadꞌebema. 9Izhara mawũãsia: Mʉrã año abꞌaʉdꞌe zeya, maʉ̃nerã Sara tokꞌara wau erubꞌaya

10Bari maʉ̃ ẽã, awuarabʉrʉ Rebecabidꞌa Isaacdꞌeta memerãta tosia zõrã dazhirãta bꞌadꞌadꞌeta. 11Wadꞌi todꞌa ẽwedꞌa, wadꞌi bia ẽãta miã biata odꞌa ẽwedꞌa Daizezeba jʉrʉdꞌadꞌeba nʉmaĩrã, aramaʉ̃ne kꞌãrẽ odꞌadꞌeba nʉma ẽbaira awuarabʉrʉ izha jʉrʉdꞌadꞌeba nʉmaĩrã, 12Daizezebara Rebecaa mawũãsia: Nabemabara aribꞌaeya tẽãbemata. 13Maʉ̃ẽnabemata zhi bꞌʉmata mawũã bꞌʉa: Mʉãrã Jacobo kʉãgꞌasia, mawũãmina Esaú jurasia.

14¿Mawũẽ kꞌasia adꞌaipe? ¿Daizezebara bia ẽãta obꞌʉka? ¡Mawũã ẽã! 15Izhara Moiséa mawũãsia: Mʉãrã sozuburiaya mʉã sozuburia krĩñata. 16Aramaʉ̃nerã izhita jʉrʉbi krĩñaba kꞌãrẽ onʉmʉta jʉrʉ ẽã, awuarabʉrʉ Daizezebara jʉrʉbaria izha sozuburia krĩñata. 17Maʉ̃ẽnabemata zhi bꞌʉmata izhara Egiptodꞌebema nokꞌoa mawũãsia: Mʉã bʉra nokꞌota bꞌʉsia bʉdꞌeba mʉ zareata ũdukꞌawabigaita, aramaʉ̃ne mʉ zhi zromata jara bꞌeamarẽã drua jõmaʉ̃ne. 18Aramaʉ̃ne Daizezebara izha sozuburia krĩñata sozuburia bꞌʉa, bedꞌea ũrĩ ẽã zarea nʉmabi krĩñata zarea nʉmabi bꞌʉa.

19Maʉ̃neba iabꞌaʉba mʉãã mawũãĩ baya: ¿Mawũãta kꞌãrẽã dazhira bedꞌea bara bꞌea abꞌʉ? ¿Aramaʉ̃nerã kꞌaiba sãwũãĩpe izha krĩñane nʉmʉkꞌãrĩrã? 20¿Bʉra kꞌaipe Daizezea mawũã bedꞌeaira? ¿Zokꞌobara zhi odꞌaa mawũãĩ bʉka?: ¿Mʉrã kꞌãrẽã kꞌãwũã osi? 21¿Zokꞌo obaribara egorora izha krĩñane oi ẽã bꞌʉka, abꞌaʉ egoroba oi ẽã bꞌʉka zokꞌo abꞌa ne biadꞌe zokꞌaita, abꞌa ne baridudꞌe zokꞌaita?

22Aramaʉ̃ kĩrãkꞌa Daizezebara izha krĩñata obʉrʉta izhi kĩrũbita izhi zareata ũdukꞌawabiga krĩñane kꞌãbãẽã zrogꞌasia kꞌazhiruata obꞌeba kĩrũbiba aduabigai badꞌata. 23Mawũã zrogꞌasia izhira kĩrãwãrẽã zromata izha sozuburiadꞌarãã kꞌawuabigai kꞌarea, nawedꞌa aribꞌaesia mawũã kĩrãwãrẽãnebemata bꞌeabiita. 24Maʉ̃rãta izha trʉ̃kuadꞌara trʉ̃kuasia dazhirãta, bari judíorãnebemata trʉ̃ ẽbasia, awuarabʉrʉ trʉ̃sia judíorã ẽãnebemasidꞌa. 25Maʉ̃ẽnabemata Daizezeba jaradꞌata Oseas librodꞌe mawũã bꞌʉa:

Mʉãrã mʉrẽrã aya mʉrẽrã ẽbadꞌata. Mʉã kʉãgꞌata duana ẽbadꞌata mʉã kʉãgꞌata bꞌea aya. (Oseas 2:23)

26Maʉ̃ẽnabemata dewara mawũã bꞌʉa:

Mʉãrã marã mʉrẽrã ẽã adꞌata, Daizeze zokꞌai bꞌʉ warrarã aya. (Oseas 1:10)

27Dewara Isaíaba Israel bꞌedꞌebemata mawũãsia:

Israel bꞌe warrarãnebemata pusa ibu kĩrãkꞌa nʉmaĩmina bari ʉ̃kʉrʉ ẽdrʉdꞌaya.

28Maʉ̃ẽnabema Daizezebara druadꞌe bꞌera kꞌawua oya kꞌadrʉabai. (Isaías 10:22-23)

29Dewara nawedꞌara Isaíabara mawũãsia:

Daizeze ne jõmaʉ̃ne zhi zromaba dazhirãta ʉ̃kʉrʉ zokꞌai bꞌʉ ẽbasibʉrʉ, dazhirã berabꞌarikꞌausia Sodoma jõna kĩrãkꞌa, Gomorra jõna kĩrãkꞌa. (Isaías 1:9)

Bedꞌea ne ẽbaya ĩjãbʉrʉdꞌeba

30¿Mawũẽ kꞌasia adꞌaipe? Judíorã ẽãrã bedꞌea ne ẽbaidꞌebemane nʉme ẽãta, Daizezebara bedꞌea ne ẽã bꞌʉkua nʉmʉã Cristodꞌebemata ĩjãbʉdaba. 31Maʉ̃ne Israel bꞌera bedꞌea ne ẽbaidꞌebema ũrãgꞌadꞌe nʉmeta bedꞌea ne ẽã bꞌʉkua ẽã. 32¿Kꞌãrẽneba mawũãpe? Mawũãta nʉmʉã maʉ̃ne nʉmeta Cristodꞌebemata ĩjãna ẽãba, awuarabʉrʉ kꞌãrẽ obꞌeba bedꞌea ne ẽbaidꞌe nʉmeã. Mawũã Cristodꞌebema ĩjãna ẽãba tẽnedrʉsidꞌa mongꞌarama tẽnedrʉi kĩrãkꞌa. 33Maʉ̃ẽnabemata zhi bꞌʉmata mawũã bꞌʉa:

Mʉã Jerusalénne mongꞌarata bꞌʉya zhãrã tẽnedrʉbarita, izhidꞌebemata ĩjã bꞌʉra bariara ẽã. (Isaías 28:16)

Currently Selected:

Romanos 9: cto

Highlight

Copy