Romanos 10
10
1Mebẽrã, wãrãnebai mʉã sodꞌeba krĩña bꞌʉra mʉrã Daizezea zhiwidꞌi bꞌʉa ẽdrʉdꞌamarẽã Israel bꞌeta. 2Mʉã kꞌawuaidꞌera Daizezeba krĩñane nʉma krĩña bꞌea, mawũãmina wãrĩnu sãwũãta kꞌawua duanu ẽã. 3Daizezeba sãwũã bedꞌea ne ẽã bꞌʉbarira kꞌawuadꞌa ẽã, mawũẽ ãzha kꞌãrẽ obꞌeba bedꞌea ne ẽã bꞌeaita krĩcha nʉmeba Daizezeba bedꞌea ne ẽã bꞌʉidꞌebemane duanu ẽã. 4Moisé ũrãgꞌara ma aribꞌaesia Cristoba, maʉ̃neba Daizezebara bedꞌea ne ẽã bꞌʉya izhidꞌebemata ĩjãbʉdara.
5Moisébara ũrãgꞌadꞌeba bedꞌea ne ẽbaidꞌebemata bꞌʉdꞌata mawũãsia: Ũrãgꞌata aribꞌae bꞌʉra maʉ̃neba bꞌaya. 6Mawũãmina Cristodꞌebemata ĩjãbʉrʉba bedꞌea ne ẽbaira mawũã bꞌʉa: Sodꞌeba mawũãrãrũã: ¿Kꞌaita wãrĩzeipe ʉ̃taara? Aramaʉ̃ne Cristo udꞌaa weira. 7Miã mawũãrãrũã: ¿Kꞌaita wãĩpe eidꞌu beudꞌa bꞌeidꞌura? Aramaʉ̃ne Cristo wãrĩzebiira beudꞌa bꞌe maẽba. 8¿Mawũãĩ kꞌãñabara Daizezebara kꞌãrẽta jara bꞌʉ? Mawũã bꞌʉa: Bedꞌeata Cristodꞌebema bʉara borekea ĩjã bꞌeya, bʉara bʉ iba jaraidꞌe bꞌʉa, sodꞌeba ĩjãĩne bꞌʉa. Daibara maʉ̃ bedꞌeata ĩjãĩnebemata jara panʉã. 9Bʉzhi iba Jesústa Nokꞌota jarara, Daizezeba beudꞌata piradrʉbidꞌata sodꞌeba ĩjãrã bʉra ẽdrʉya. 10Mawũã sodꞌeba ĩjãbʉrʉra bedꞌea ne ẽã bꞌʉya, mawũã dazhi iba jarabʉrʉra ẽdrʉbiya.
11Maʉ̃ẽnabemata zhi bꞌʉmata mawũã bꞌʉa: Izhidꞌebemata ĩjã bꞌʉra bariara ẽã. 12Aramaʉ̃nerã izhara awuara eda ẽã judíorãta miã judíorã ẽãta, izhita jõmaʉ̃ Nokꞌobara biodꞌe kꞌareba bꞌʉa kꞌarebata widꞌibʉdara. 13Aramaʉ̃nerã Nokꞌoa kꞌarebata widꞌibʉdara ẽdrʉya.
14¿Mawũãmina kꞌarebara sãwũã widꞌidꞌaipe izhidꞌebemata ĩjãna ẽãrã? ¿Sãwũã ĩjãnaĩpe izhidꞌebemata ũrĩnakꞌara? ¿Sãwũã ũrĩnaĩpe kꞌaiba jaraita ne ẽbʉrʉ? 15¿Sãwũã jaradꞌaipe jaradꞌe zokꞌakuadꞌa ẽbʉrʉ? Maʉ̃ẽnabemata zhi bꞌʉmata mawũã bꞌʉa: ¡Kꞌãbãẽã kĩrãwãrẽã adu-a bꞌaidꞌebemata jara bꞌera bedꞌea biata!
16Mawũãmina judíorã jõmaʉ̃bara ĩjãna ẽbasia Cristodꞌebema bedꞌea biara. Maʉ̃ẽnabemata Isaíabara mawũãsia: ¿Nokꞌó, kꞌaiba ĩjãbʉrʉ daiba jarabʉdara? 17Aramaʉ̃nerã ũrĩbʉrʉba ĩjã bꞌʉa, Cristodꞌebemata mawũã ũrĩbʉrʉba Daizeze bedꞌeadꞌeba. 18Mawũãmina mʉã widꞌiya: ¿Maʉ̃ bedꞌeara judíorãbara ũrĩna ẽbasika? Wãrãnebai ũrĩsidꞌa. Maʉ̃ẽnabemata zhi bꞌʉmata mawũã bꞌʉa:
Izhidꞌebemata drua jõmaʉ̃ maẽ jarasidꞌa, drua wawaraidꞌu jarasidꞌa izhi bedꞌeara. (Salmos 19:4)
19Mʉã wakusa widꞌiya: ¿Maʉ̃ kꞌawuadꞌa ẽka Israel bꞌebara? Maʉ̃ẽnabemata Daizezebara naara Moisédꞌeba mawũãsia:
Mʉã marã bĩ ẽãbiya mʉrẽrã ẽãta bia edabʉrʉba, mʉnebema kꞌawua ẽã bꞌeadꞌata bia edabʉrʉba kĩrũbigaya. (Deuteronomio 32:21)
20Dewara Daizezedꞌeba Isaíaba wãnigua mawũãsia:
Mʉrã ũdusidꞌa mʉ jʉrʉ ẽã bꞌeadꞌaba, mʉrã zhi ũdukꞌawabigasia mʉ widꞌi ẽã bꞌeadꞌaa. (Isaías 65:1)
21Mawũãmina Israel bꞌedꞌebema Daizezebara Isaíadꞌeba mawũãsia:
Mʉãrã ewariza kꞌareba krĩñasia bedꞌea aribꞌae ẽã bꞌeta, bedꞌea ũrĩ ẽã bꞌeta. (Isaías 65:2)
Currently Selected:
Romanos 10: cto
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
