Romanos 11

Daizezeba ʉ̃kʉrʉ jʉrʉkuasia Israel

1Maʉ̃neba mʉã widꞌiya: ¿Daizezebara izhidꞌerã kenabꞌarisika? Mawũã ẽã. Mʉsidꞌa israelitarãta Abrahamneba uruta Benjamín warrarãnebema. 2Daizezebara izhidꞌerã kenabꞌari ẽã, ãzhira na wedꞌauba jʉrʉkuasia. ¿Kꞌawuadꞌa ẽka Elía ʉ̃rʉ̃ bꞌʉ tabꞌʉdꞌe jara bꞌʉra, Daizeze kĩrãbita Israel ʉ̃rʉ̃ bĩ ẽã bedꞌea mawũãsi ẽka? 3Nokꞌó, bʉa bedꞌeata jarabibarirã beakuabʉda, bʉita ne ba badata altar nʉmerã ãrĩkuabʉda. Mʉtrʉ abꞌabai bꞌidꞌata mʉrã beaita jirpanʉã. 4¿Mawũãĩ Daizezebara mawũãsi ẽka?: Mʉãrã mʉĩta nʉmʉkꞌãrĩã ũmakĩrãrã siete mil, ãzhira sãkꞌokꞌodꞌe kꞌopanekꞌa Baal ne zhi zromane erubꞌe kĩrãbitara. 5Aramaʉ̃ kĩrãkꞌa idꞌi ewadebidꞌa Daizezebara judíorã ʉ̃kʉrʉ jʉrʉkuasia izhi biaba. 6Izhi biaba jʉrʉbʉrʉra jʉrʉbʉrʉ ẽã kꞌãrẽ obʉrʉba. Kꞌãrẽ obʉrʉba jʉrʉra ya izhi biaba jʉrʉbʉrʉ ẽã.

7¿Aramaʉ̃nerã sãwũãpe? Israel bꞌera Daizezema bia nʉmeãĩta jʉrʉ bꞌeadꞌadꞌe duane ẽbasia. Mawũãmina izha jʉrʉkuadꞌara mawũã duanesia, waya wuaabema zarea duanesia. 8Maʉ̃ẽnabemata zhi bꞌʉmata mawũã bꞌʉa:

Daizezebara izhidꞌebema kꞌawua bꞌedꞌa ẽã nʉmʉnaba, dabʉbara ũdudꞌa ẽã, ne ũrĩbaribara ũrĩna ẽã idꞌi basiidꞌu. (Deuteronomio 29:4; Isaías 29:10)

9Rey Davidbara mawũãsia:

Bia nekꞌo bꞌeba krĩchabigarua bʉara kꞌawua o ẽãta, maʉ̃ta kidꞌabe kĩrãkꞌa nʉmʉdua ãzhi bꞌaeta, aramaʉ̃ne ãzhi pua kꞌawua oita.

10Daʉbꞌerrea bꞌe kĩrãkꞌa nʉmʉdua bʉdꞌebema ũdubʉdara ũdu bꞌedꞌa ẽbamarẽã, ĩjãna ẽãba zuburiabigarua ewariza. (Salmos 69:22-23)

Ẽdrʉbi nʉmʉã judíorã ẽãta

11Maʉ̃neba mʉã widꞌiya: ¿Israelitarã Cristodꞌebema ĩjãna ẽãba tẽnedrʉbʉdara jipa bꞌaesidꞌakꞌa? ¡Mawũã ẽã! Baribʉrʉ aribꞌaedꞌa ẽãnebara Daizezebara judíorã ẽãta ẽdrʉbi nʉmʉã, aramaʉ̃ne Judíorãta bĩ ẽã bꞌeamarẽã. 12Aribꞌaedꞌa ẽãba judíorã bꞌaebʉdata mawũã ẽjũãne judíorã ẽãta bꞌe biaitabemabʉrʉ, ¿audre bia nʉmʉĩ ẽka Cristodꞌebemata judíorãba jipa ĩjãbʉdadꞌera?

13Mʉrã bedꞌeaya marã judíorã ẽãta bꞌea. Mʉrã Daizezeba marã judíorã ẽãma zokꞌadꞌaba mʉma biga mʉ miã ũrãgꞌa bꞌʉra. 14Mʉãrã krĩña bꞌʉa mʉrãta bꞌeba maʉ̃ta krĩñanamarẽã aramaʉ̃ne ẽdrʉdꞌamarẽã ʉ̃kʉrʉ ãzhirãnebemata. 15Daizezeba judíorã kenabꞌaridꞌata ẽjũãne nʉmʉ biaitabemabʉrʉ, ¿judíorãba Cristodꞌebemata ĩjãbʉdadꞌera Daizeze ũme bꞌai jõ ẽã bꞌeai ẽka beudꞌa kĩrãkꞌa bꞌeadꞌata?

16Pega waragꞌabʉrʉta naara Daizezea diabʉrʉdꞌera izhidꞌea wuaabemasidꞌa. Aramaʉ̃ kĩrãkꞌa judíorã zhi kꞌarrata izhidꞌeta bꞌeadꞌaba judíorã Daizezedꞌea. Aramaʉ̃nerã bakuru kꞌarrata Daizezedꞌeta nʉmʉnebara izhidꞌea zhi taerãsidꞌa. 17Bakuru olivo zhi ura judíorãã. Cristodꞌebemata ĩjãna ẽãba Daizezebara ʉ̃kʉrʉ bꞌʉatukuasia olivo zhi u taera, mobe marã judíorã ẽãta olivo meãbemata bꞌeta mama kꞌarakuasia, judíorã zhi kꞌarradꞌebemata erunʉmana kĩrãkꞌa aramaʉ̃ne marã Daizezebara bia erunʉmʉã olivo kꞌarra bꞌata biadꞌe kĩrãkꞌa. 18Mawũãmina marã audre biarãta krĩcharãũdua olivo zhi u taeta mawũã bꞌʉatukuadꞌa kꞌãñabara. Mawũã krĩchadꞌara budebaudua marãba anʉmʉ ẽãta zhi kꞌarrara, awuarabʉrʉ zhi kꞌarraba anʉmʉã marãta.

19Marã judíorã ẽãbara mawũãnaĩbaya: Daizezebara olivo zhi u taera mawũã bꞌʉatukuasia dazhirãta mama kꞌarakuaita. 20Wãrĩnuã, Cristodꞌebemata ãzha ĩjãna ẽãba bꞌʉatukuasia, mawũãmina marãbara ĩjãbʉdaba mama kꞌarakuasia. Maʉ̃ba marã biarãta krĩcharãũdua ãzhi kꞌãñabara, awuarabʉrʉ Daizezeta wawiaudua. 21Daizezeba olivo zhi u taeta bꞌʉatukuasibʉrʉ marãsidꞌa bꞌʉatukua bꞌeya.

22Kĩrãkuitaudua, Daizezera biata bꞌʉmina zhãrã jʉ̃ãkꞌaeabaria. Wãrãnebai jʉ̃ãkꞌaeasia judíorã zhi bꞌaekuadꞌata, mawũãmina marã bawarara biata nʉmʉã mawũã biata nʉmaĩnebemane nʉmebʉrʉ. Mawũã nʉme ẽbʉrʉ marãsidꞌa bꞌʉatukuaya. 23Judíorã Cristodꞌebema ĩjãna ẽãba bꞌʉatukuadꞌaba ĩjãnarã arimaẽ kꞌarakuaya, Daizezera zhi zroma wakusa arimaẽ kꞌarakuaira. 24Marãta olivo meãbema taeta bꞌʉatukuape olivo biata zhi uma kꞌarakuasibʉrʉ, ¿judíorã audrebai arimaẽ kꞌarakuai ẽka zhi olivoma?

Israel ẽdrʉdꞌaidꞌebema

25Mebẽrã, Daizezeba kꞌawuabi ẽã bꞌadꞌata mʉãrã marãba kꞌawuadꞌaita krĩña bꞌʉa, mawũãtrʉ judíorã kꞌãñabara audre biarãta krĩchadꞌa ẽã: Israel ʉ̃kʉrʉba ĩjã ẽã zarea nʉmerã, mawũã nʉmeã Cristodꞌebema ĩjãĩ bꞌeta judíorã ẽãta edꞌa zedꞌayeedꞌa. 26Mobebʉrʉ Israel ẽdrʉdꞌaya, maʉ̃ẽnabemata zhi bꞌʉmata mawũã bꞌʉa:

Jerusalénneba zeya zhãrã Ẽdrʉbita, maʉ̃bara Jacobodꞌeba uruta bꞌera bedꞌea ne ẽã bꞌʉya bia ẽãta odꞌapeadꞌara. (Isaías 59:20)

27Mʉã mawũã jaradꞌara ãzhi bawara aribꞌaeya, mʉãrã aramaʉ̃ne bedꞌea ne ẽã bꞌʉya ãzhi kꞌazhiruata biodꞌebara. (Jeremías 31:33-34)

28Jesúsdꞌebema bedꞌea biata judíorãba krĩñana ẽãba Daizeze bawara zhi jurata bꞌera marãta izhidꞌeta bꞌeaidꞌebema. Mawũãmina izha jʉrʉkuadꞌaba izha kʉãgꞌata bꞌea ãzhi zhibarirãneba. 29Aramaʉ̃ne izha diadꞌara jãrĩ ẽã, miã izha trʉ̃narã ãĩ bꞌʉ ẽã Daizezebara.

30Ewari nawedꞌara marãbidꞌa Daizezedꞌebema aribꞌaedꞌa ẽbasia, mawũãmina idꞌira marã sozuburia nʉmʉã judíorãba aribꞌaedꞌa ẽãba. 31Zhi mawũã idꞌidꞌe aribꞌaedꞌa ẽãrã marã sozuburia nʉmʉneba ãzhisidꞌa sozuburiaya. 32Aramaʉ̃ne Daizezebara zhãrã jõma idaribisia izhidꞌebema aribꞌae ẽã bꞌeamarẽã, aramaʉ̃ne jõma sozuburiaita.

33¡Daizezera biodꞌe kꞌãrẽ kꞌawua bꞌʉa, krĩcha kꞌawua bꞌʉa! ¡Miõba kꞌawua ẽã izha oita krĩcha bꞌʉra, dazha kꞌawua ẽã izha obꞌʉra!

34¿Kꞌaiba kꞌawuaipe Daizeze krĩchara? ¿O izhira kꞌaiba ũrãgꞌaipe?

35¿Kꞌaiba naara kꞌãrẽ diasi, izhabidꞌa kꞌãrẽ diamarẽãrã?

36Izhidꞌeba nʉmʉba izhikꞌareuba izhiita nʉmʉã ne jõma.

Izhitrʉ ibia jaradꞌaya ewari nʉmʉ jõma. Amén.

Currently Selected:

Romanos 11: cto

Highlight

Copy