Romanos 15

1Dazhi zarea nʉmebara kꞌarebadꞌaibara zarea nʉme ẽãrã, aramaʉ̃ne dazhiitabʉrʉ bia nʉmeã ẽã. 2Dazhirã abꞌa abꞌakꞌa zhãrãma bia nʉmeãña biadꞌebemane, aramaʉ̃ne soidꞌu bꞌeabidꞌaya. 3Miã Cristosidꞌa izhiitabʉrʉ bia nʉma ẽbasia. Awuarabʉrʉ maʉ̃ẽnabemata zhi bꞌʉmata mawũã bꞌʉa: Zeze, bʉta ikꞌazhirua jaradꞌapeadꞌara mʉ ʉ̃rʉ̃ bꞌaesia. 4Naara kꞌãrẽ bꞌʉdꞌapeadꞌara dazhi ũrãgꞌata bꞌʉsidꞌa, mawũã zhi bꞌʉmabara kꞌãrẽ zrogꞌa wãnigua nʉmabiga bꞌʉa Daizeze ũme bia nʉmeta kꞌawua bꞌeamarẽã. 5Daizezebara kꞌãrẽ zrogꞌa wãnigua nʉmabi bꞌʉbara marãã abꞌaʉ krĩchata diaya Jesucristoba krĩñane. 6Aramaʉ̃ne ãbaʉba nemi abꞌa Daizezeta ibia jaradꞌamarẽã dazhirã Nokꞌo Jesucristo Zezeta.

Bedꞌea biara izhabꞌa judíorã ẽãĩtabema

7Maʉ̃ba marã zhiya bia edaudua, Cristoba dazhirã bia edadꞌa kĩrãkꞌa bꞌeaudua Daizezeta ibia jaradꞌamarẽã. 8Mʉã marãã jaraya, Jesucristora zesia judíorã aribꞌaeita, aramaʉ̃ne kꞌawuabigasia Daizezedꞌebema wãrãta. Aramaʉ̃ne aribꞌaesia zhãrã Ẽdrʉbita Daizezeba zokꞌaya adꞌata ãzhi zhibarirãta bꞌeadꞌaa. 9Aramaʉ̃ne Daizezeta judíorã ẽãba ibia jaradꞌamarẽã izha sozuburia nʉmʉneba. Maʉ̃ẽnabemata zhi bꞌʉmata mawũã bꞌʉa:

Judíorã ẽãne edꞌa mʉã bʉra ibia jaraya, mʉã bʉra ibia jara trʉ̃ãña. (2 Samuel 22:50; Salmos 18:49)

10Dewara mawũã bʉa:

Judíorã ẽãrã sobiaudua judíorã Daizezedꞌe bawara. (Deuteronomio 32:43)

11Dewara mawũã bꞌʉa:

Judíorã ẽãbara jõmaʉ̃ba Daizezera ibia jaraudua, aramaʉ̃ne zhi zromane edaudua zhãrã jõmaʉ̃ba. (Salmos 117:1)

12Dewara Isaíaba mawũãsia:

Iabꞌa Isaídꞌeba zeya, maʉ̃ pirabꞌariya judíorã ẽãta jʉreita, maʉ̃rãbara krĩchadꞌaya izhita. (Isaías 11:10)

13Daizezebara izhita krĩchabi bꞌʉa, mawũẽ marã kꞌãbãẽã sobia adu-a soidꞌu bꞌeabiya, aramaʉ̃ne jipa izhitrʉ krĩcha bꞌeamarẽã Jawurebia zareadꞌeba.

14Mebẽrã, marãnebemata mʉã kꞌawua bꞌʉra marã kꞌãbãẽã biata bꞌea, biodꞌe krĩcha kꞌawua bꞌeba zhiya zhi ũrãgꞌa bꞌedꞌaya. 15Mawũãmina mebẽrã, mʉã marãĩta bedꞌeata jipa jara bꞌʉsia marãba bude bꞌʉdꞌamarẽã, mawũã bꞌʉsia Daizezeba izhi biaba mʉãã chãbꞌaridꞌaba 16Jesucristo nezokꞌata bꞌamarẽã judíorã ẽãta bꞌerãĩta. Mawũẽ mʉãrã bedꞌea biata Daizezedꞌeta jarakꞌa bꞌʉa, sacerdoteba nendʉwʉrʉ Daizezeba krĩñata webari kĩrãkꞌa judíorã ẽãrã aramaʉ̃ne izhima we bꞌʉa izhiita bꞌeamarẽã Jawurebiadꞌeba.

17Mʉrã Jesucristodꞌeba sobia bꞌʉa Daizezedꞌebemata aribꞌae nʉmʉba. 18Mʉrã ne awʉrʉdꞌera bedꞌeaidꞌe bꞌʉ ẽã, awuarabʉrʉ jaraidꞌe bꞌʉa Cristoba mʉneba odꞌata, aramaʉ̃ne judíorã ẽãba Daizezedꞌebemata aribꞌaedꞌamarẽã mʉ ũrãgꞌadꞌeba mʉã kꞌãrẽ odꞌadꞌeba. 19Mʉãrã ũdudꞌakꞌa zromata okuasia Jawurebia Daizezedꞌe zareadꞌeba. Aramaʉ̃ne Jerusalénneba Ilírico druaidꞌu jõmaʉ̃ã jarasia bedꞌea biata Cristodꞌera. 20Aramaʉ̃ne mʉãrã Cristodꞌebema bedꞌea biara jara krĩña bꞌʉa Cristodꞌebema jaradꞌakꞌa maẽ, aramaʉ̃ne jara ẽbaita zhãrãba jara bꞌʉ maẽ. 21Awuarabʉrʉ mʉã krĩña bꞌʉra zhi bꞌʉmata mawũã bꞌʉa:

Izhidꞌebemata jaradꞌakꞌa maẽrã kꞌawuadꞌaya. Izhidꞌebemata ũrĩnakꞌa maẽrã sãwũãta kꞌawuadꞌaya. (Isaías 52:15)

Pablo wãĩta krĩchadꞌa Romaĩnu

22Maʉ̃ kꞌarea Cristodꞌebema bedꞌea biata jara bꞌʉba mʉrã tʉma bio ba marãma wãĩrã. 23Mawũãmina idꞌibai sãma zhi jaragꞌaira ne ẽã naʉ̃ druadꞌera, mawũẽ marãma wã krĩña bꞌʉta año bio babʉrʉba, 24mʉta España druaedꞌa wãbʉrʉdꞌera wãña marãma. Mʉ berabꞌari wãba mʉã marã ũdu krĩña bꞌʉa, aramaʉ̃ne baʉcha marãba kꞌarebadꞌaya mʉ maĩnu wãĩta bꞌʉsridꞌa kꞌobꞌape marã bawara. 25Mawũãmina kꞌãwũãwedꞌara mʉrã Jerusalénʉẽna wãña, kꞌarebata edeya mebẽrãĩta. 26Mebẽrã Macedonia druadꞌebemabara Acaya druadꞌebemabara bia obʉdata plata diabuebʉda mebẽrãnebema zuburia bꞌerãĩta Jerusalénne. 27Mawũã odꞌaira ãzhima bigata judíorã mawũã kꞌarebadꞌaidꞌe bꞌasia. Judíorã ẽãba Daizezedꞌebema biata judíorãneba jidasidꞌabʉrʉ ãzhabidꞌa kꞌarebadꞌaidꞌe bꞌʉa dazhi kꞌãwũneta biadꞌeba. 28Mawũẽ mʉãrã maʉ̃ta aribꞌaebʉrʉta maʉ̃ platara chãbꞌarikuape mʉrã marã maẽ berabꞌariya wãta España druaedꞌa. 29Mʉã kꞌawua bꞌʉa mʉ marãma wãbʉrʉdꞌera mʉrã marãĩta ne biaba bira jũẽña bedꞌea biata Cristodꞌeba.

30Mawũãmina mebẽrã, mʉrã marãã zuburia bedꞌeaya, dazhirã Nokꞌo Jesucristodꞌeba Jawurebiadꞌeba zhi kʉãgꞌa bꞌedꞌeba mʉrã kꞌarebaudua mʉbari zhiwidꞌi Daizezea. 31Mʉrã aramaʉ̃ne bĩ ẽã obi ẽbamarẽã Jesúsdꞌebema ĩjã ẽã bꞌeta Judeadꞌe bꞌea, aramaʉ̃ne plata mebẽrã Jerusalénne bꞌeirãĩta mʉã edeita bia jidadꞌamarẽã. 32Aramaʉ̃ne Daizezeba krĩñabʉrʉ marãma sobia jũẽpe ẽnaʉ̃ña marã maẽ.

33Daizeze dazhi adu-a bꞌabi bꞌʉra nʉmaña marã jõmaʉ̃ bawara. Amén.

Currently Selected:

Romanos 15: cto

Highlight

Copy