Romanos 14

Bia kꞌawua ẽã ĩjã bꞌedꞌebema

1Bia edaidꞌe bꞌʉa bia kꞌawua ẽã ĩjã bꞌʉra, mawũãmina bĩ ẽã bedꞌeaidꞌe bꞌʉ ẽã izhi krĩcha ʉ̃rʉ̃rã. 2Iabꞌaʉma ne jõma kꞌosia bꞌʉa, waya dewaraubara bia kꞌawua ẽã ĩjã bꞌʉbara bari kꞌo bꞌʉa ne udꞌebemata. 3Ne jõma kꞌo bꞌʉbara bĩ ẽã jaraidꞌe bꞌʉ ẽã ne jõma kꞌo ẽãrã, ne jõma kꞌo ẽãbara ne jõma kꞌo bꞌʉra jara nʉmaĩne bꞌʉ ẽã Daizezeba jidadꞌaba. 4¿Bʉra kꞌaipe nezokꞌa awʉrʉdꞌeta jara nʉmaĩrã? Zhibaribʉrʉ jaraya bia nʉmʉta o bꞌaebʉrʉta. Mawũãmina jipa nʉmaña Nokꞌo Daizezera zhi zromaneba jipa nʉmabiita.

5Iabꞌaʉma ewari abꞌara biga dewarabema ewari kꞌãñabara, waya awʉrʉma abꞌarika ewari jõma. Abꞌa abꞌakꞌa bꞌeaudua mazha krĩcha bꞌʉdꞌe. 6Ewarita zhi wuagꞌa bꞌʉbara Daizezeita obꞌʉa. Ewarita zhi wuagꞌa ẽãbara Daizezeita o ẽã. Ne jõma kꞌo bꞌʉbara Daizezeita kꞌo bꞌʉa zhibia ji bꞌʉba Daizezea. Ne jõma kꞌo ẽãbara Daizezeita kꞌo ẽãta abꞌarika zhibia ji bꞌʉa Daizezea.

7Dazhira miõta dazhikusaita bꞌʉ ẽã, miõta dazhikusaita beu ẽã. 8Dazhita bꞌebʉrʉ Nokꞌoita bꞌea. Dazhita beukuara Nokꞌoita beukuaya. Mawũẽ bꞌeta o beukuata Nokꞌoita bꞌea. 9Cristora maʉ̃ kꞌarea beudꞌata piradrʉpe wakusa zokꞌai bꞌesia, aramaʉ̃ne bꞌesia beukuadꞌa Nokꞌota zokꞌai bꞌe Nokꞌota.

10Mawũẽ bʉara, ¿kꞌãrẽã jara nʉmaĩpe bʉ mebeara? O bʉara, ¿kꞌãrẽã bĩ ẽã jara nʉmaĩpe bʉ mebeara? Dazhira jõma kĩrãbita nʉmeãña Cristoba kꞌawua oi maẽ. 11Maʉ̃ẽnabemata zhi bꞌʉmata mawũã bꞌʉa:

Mʉrã bꞌʉa, mʉrã Nokꞌoba wãrãta jaraya, mʉ kĩrãbita zhãrã jõma sãkꞌokꞌodꞌe kꞌobꞌeaya, jõmaʉ̃ba jaradꞌaya mʉrã Daizezeta. (Isaías 45:23)

12Aramaʉ̃ne dazhara abꞌa abꞌaʉba Daizezea jaradꞌaya dazhidꞌebemata.

13Maʉ̃ba ya wueta zhiya zhi jaradꞌa ẽã, awuarabʉrʉ krĩchaudua tẽnedrʉbidꞌa ẽbaita o bꞌaebidꞌa ẽbaita mebeata. 14Nokꞌo Jesúsdꞌeba mʉã kꞌawua bꞌʉra miã kꞌãrẽta ne mitiara ne ẽã izhikusara. Mawũãmina iabꞌaʉ krĩchama kꞌãrẽta ne mitiabʉrʉ izhima mawũã bꞌʉa. 15Mawũãmina zhikodꞌeba bʉ mebeata bʉa sopua ora, ya bʉra nimi ẽã zhãrã kʉãgꞌai bꞌʉdꞌe. Maʉ̃ba bʉ zhikoba jarita aduabirãrũã maʉ̃bari Cristo beudꞌata. 16Aramaʉ̃ne marãta bĩ ẽã jarabirãũdua kꞌãrẽ obʉdara marãma bigadꞌeba. 17Daizezeta Nokꞌodꞌebemata nʉmaĩrã zhikodꞌeba kꞌãrẽ dobadadꞌeba nʉma ẽã, awuarabʉrʉ maʉ̃ne nʉmaña kĩrãẽpa bꞌʉdꞌeba, adu-a bꞌʉdꞌeba, sobia bꞌʉdꞌeba Jawurebiadꞌeba. 18Aramaʉ̃ne Cristoba jara bꞌʉta aribꞌae bꞌʉra Daizezema biga, zhãrãma biga.

19Maʉ̃ba adu-a bꞌeaidꞌebemane nʉmeãña, zhiya zhi ũrãgꞌa soidꞌu nʉmeãña. 20Daizezeba zhãrã bia erunʉmʉta ãrĩrãrũã zhikoba. Wãrãnebai ne jõma nene ẽã. Mawũãmina biga ẽã kꞌãrẽ kꞌobʉrʉba awʉrʉrãta bꞌaebiira. 21Audre biga nezhara kꞌo ẽbaita, miã vino do ẽbaita, miã kꞌãrẽta o ẽbaita bĩ ẽã obʉrʉba bꞌaebii kꞌãñabara bʉ mebeata. 22¿Kꞌãrẽrã kꞌoidꞌe bꞌʉka o kꞌo ẽbaidꞌe bꞌʉka bʉ krĩchama? Mawũãbʉrʉ bʉzhibitabai nʉmadua Daizeze kĩrãbita. Sobia bꞌaya izhikusa bedꞌea bara ẽãrã izhima bigaba. 23Mawũãmina iabꞌaʉba kꞌãrẽ izhima kꞌo bꞌe ẽãta kꞌora izhikusa bedꞌea baraya bigata o ẽãba izhi krĩchama. Jõma kꞌãrẽ dazhi krĩchama biga ẽãta obʉrʉra kꞌazhirua.

Currently Selected:

Romanos 14: cto

Highlight

Copy