Romanos 16

Saludo diabuekuadꞌa

1Mʉã marãã jaraya, wũẽrã Febe dazhirã mebeara bia nʉmʉã, izhira mebẽrã aribꞌaebarita bꞌʉa Cencrea pʉwʉrʉdꞌe. 2Nokꞌo Cristodꞌeba bia edaudua, Cristodꞌebemata bꞌera mawũã edadꞌai bꞌʉdꞌe edaudua. Ne baridudꞌe kꞌarebaudua kꞌãrẽ nesidꞌabʉrʉdꞌera, izhara kꞌarebasia biota, kꞌarebasia mʉsidꞌa.

3Saludo diaudua Priscila dewara Aquila, ãzhira mʉ kĩrãkꞌa Jesucristodꞌebema kꞌaudꞌa panʉã. 4Ãzhira mʉ kꞌarea bebudꞌe panasia, maʉ̃ kꞌarea ãzhaara bari mʉãbʉrʉ zhibia dia bꞌʉ ẽã, awuarabʉrʉ dewara zhibia ji panʉã mebẽrã jõmaʉ̃ba judíorã ẽãba. 5Dewara saludo diaudua mebẽrã ãzhi dedꞌa zhi jʉrebadata. Saludo diaudua Epeneto mʉ ne kʉãgꞌata, Acaya druadꞌera izhabʉrʉ naara ĩjãsia Cristodꞌebemata. 6Saludo diaudua María, izhira biodꞌe kꞌãrẽ obꞌʉa marãne edꞌa. 7Saludo diaudua Andrónico dewara Junia, ãzhira mʉ ʉrerãta panʉã, mʉ bawara panasia cárceldꞌe, ãzhira bia jara panʉã Jesúsba zokꞌakuadꞌabara. Ãzhara Cristodꞌebema ĩjãsidꞌa mʉ nawedꞌa. 8Saludo diaudua Amplia mʉ ne kʉãgꞌata Nokꞌo Cristodꞌeba. 9Saludo diaudua Urbano, izhira dazhirã kĩrãkꞌa Jesucristodꞌebema kꞌaudꞌa bꞌʉa. Dewara saludo diaudua Estaqui mʉ ne kʉãgꞌata. 10Saludo diaudua Apele, izhira bia nʉmʉã Cristodꞌebemane. Saludo diaudua Aristóbulo dedꞌa bꞌera. 11Saludo diaudua Herodión, izhira mʉ ʉreta bꞌʉa. Saludo diaudua Narciso dedꞌa bꞌera, ãzhira Nokꞌo Cristodꞌebemane bꞌea. 12Saludo diaudua Trifena dewara Trifosa, ãzhira biodꞌe Nokꞌo Cristodꞌebema kꞌaudꞌa bꞌea. Saludo diaudua mʉ ne kʉãgꞌa mebea wũẽrã Pérsida, izhira biodꞌe Nokꞌo Cristodꞌebema kꞌaudꞌa bꞌʉa. 13Saludo diaudua Rufo Nokꞌo Cristoba jʉrʉdꞌara, saludo diaudua zhi papasidꞌa, mʉĩtabidꞌa izhira mʉ papa kĩrãkꞌa bꞌʉa. 14Saludo diaudua Asíncrito, Flegonte, Herma, Patroba, Herme, dewara saludo diaudua mebẽrã ãzhi bawara bꞌea. 15Saludo diaudua Filólogo, Julia, Nereo, saludo diaudua zhi nawekꞌaua, dewara Olimpaa, jõmaʉ̃ã saludo diaudua Cristodꞌebema ãzhi bawara bꞌea.

16Zhiya saludꞌaudua Daizezedꞌeba kʉãgꞌa. Jõmaʉ̃ba saludo diabuebʉda mebẽrã Cristodꞌebemabara.

17Mebẽrã, mʉã marãã jaraya, kĩrãkuitaudua zhãrãta awuara krĩchabi bꞌe kꞌareara, aramaʉ̃ne bꞌaebi bꞌeta ũrãgꞌata ãña jara bꞌea marãba kꞌawadꞌapeadꞌa kꞌãñabara. Ãzhi bawara arãũdua. 18Mawũã bꞌebara aribꞌae duanu ẽã dazhirã Nokꞌo Jesucristodꞌera, awuarabʉrʉ aribꞌae bꞌea ãzha krĩñata. Aramaʉ̃ne bedꞌea bia nʉmeba zhãrã sota sewa bꞌea borekea zhi sewabi bꞌeta. 19Cristodꞌe bedꞌea biara marãbara aribꞌae bꞌeta jõmaʉ̃ba kꞌawua bꞌeba mʉrã sobia bꞌʉa marã kꞌarea. Mawũãmina mʉã krĩña bꞌʉa marã krĩcha banata bꞌeaita biata oita, bia ẽãta o ẽbaita. 20Daizeze dazhi adu-a bꞌabi bꞌʉbara dããrã ẽãne panchi kꞌobꞌʉya ãtõmiã marã jẽrũ edre. Izhi biadꞌebema dazhirã Nokꞌo Jesucristodꞌera nʉmaña marã bawara.

21Marãã saludo diabuea Timoteoba, izhira mʉ kĩrãkꞌa Cristodꞌebema kꞌaudꞌa bꞌʉa, mʉ ʉrerãbidꞌa saludo diabuebʉda Lucioba, Jasónba, Sosípaterba.

22Mʉrã Tercioa, mʉrã naʉ̃ kꞌarta Pablodꞌeta bꞌʉ nʉmʉba marãã saludo diabuea Nokꞌo Jesucristodꞌeba.

23Marãã saludo diabuea Gayoba, mʉrã izhi dedꞌa bꞌʉkꞌãrĩã, izhi dedꞌa zhi jʉrebibaria mebẽrãsidꞌa jõma. Marãã saludo diabuea Erastoba, izhira plata naʉ̃ pʉwʉrʉdꞌebema wuagꞌabaria, saludo diabuea mebea Cuartoba.

24Izhi biadꞌebema dazhirã Nokꞌo Jesucristodꞌera nʉmaña marã jõmaʉ̃ bawara. Amén.

Daizeze ibia jara jõbidꞌa

25Daizezebara marã jipa nʉmabi bꞌeya bedꞌea biata mʉã jaradꞌaba Jesucristodꞌebemata, mawũã nʉmabigaira izha kꞌawuabisia kꞌawuabi ẽã bꞌadꞌata ewari na wedꞌauba. 26Mawũãmina idꞌibai kꞌawuabisia, aramaʉ̃ne izha bedꞌeata jarabibarirãba jaradꞌapeadꞌata zhi bꞌʉmaneba, izhi Daizeze bꞌai jõ ẽã bꞌʉ ũrãgꞌadꞌeba zhãrã jõmaʉ̃ã kꞌawuabi nʉmʉã aribꞌaedꞌamarẽã Jesucristodꞌebema ĩjãĩrã. 27Daizeze abꞌabai bꞌʉbara ne jõma kꞌawua bꞌʉa, izhira Jesucristodꞌeba ibia jaradꞌaya ewariza. Amén.

Currently Selected:

Romanos 16: cto

Highlight

Copy