Marcos 2

Jesúsba bꞌebidꞌa kꞌakua pira ẽã kꞌaya bꞌʉta

(Mateo 9:1-8; Lucas 5:17-26)

1Ewari dããrã ẽãne Jesús wakusa Capernaúm pʉwʉrʉdꞌe edꞌa wãbʉrʉba dedꞌa bꞌʉta ũrĩsidꞌa. 2Aramaʉ̃ta bio bʉredrʉsidꞌa, mawũẽ aradꞌa ẽbasia miã puerta ãĩ bidꞌa. Maʉ̃nerã Daizeze bedꞌeata jarakꞌasia. 3Maʉ̃ne ʉ̃kʉrʉba izhima wesidꞌa kꞌakua pira ẽã kꞌaya bꞌʉta, akꞌopanasia miõ kĩmarẽba. 4Kꞌabana nʉmʉba izhira orra bꞌedꞌa ẽbaera de ʉ̃rʉ̃bemata izhi kꞌobꞌʉ maẽ ewadꞌape izhi tabꞌʉ jirabꞌadꞌe maʉ̃ uriadꞌe ʉra bꞌaebisidꞌa kꞌakua pira ẽã kꞌaya bꞌʉra. 5Ãzhi soidꞌu kꞌobꞌeta Jesúsba ũdui kꞌakua pira ẽã kꞌaya bꞌʉa mawũãsia: Bʉra kꞌazhiruata biodꞌebara mʉãrã bedꞌea ne ẽã bꞌidꞌapʉa.

6Maʉ̃ne ũrãgꞌa Moisédꞌe jarabadata ʉ̃kʉrʉ mama jewedꞌa kꞌobꞌebara ãzhi bitabai krĩcha mawũãsidꞌa: 7¿Naʉ̃ kꞌãrẽã mawũã bedꞌeabʉrʉ? Mawũãrã Daizezema mitia bedꞌeabʉrʉa. ¿Kꞌazhiruata biodꞌebara zhãrã kꞌaiba bedꞌea ne ẽã bꞌʉ bꞌeipe? Awuarabʉrʉ bꞌeya Daizezebʉrʉ.

8Jesúsbara kꞌawuasia ãzhi bitabai mawũã krĩcha kꞌobꞌeta, mawũẽ mawũãsia: ¿Kꞌãrẽã kꞌãwũã krĩcha kꞌobꞌe marã sodꞌera? 9¿Kꞌãrẽta audre borekea jaraidꞌe bꞌʉ kꞌakua pira ẽã kꞌaya bꞌʉaara: Kꞌazhiruata biodꞌebara bedꞌea ne ẽã bꞌidꞌapʉa aita, o piradrʉpe bʉzhi jirabꞌa jiraedape nimibarua aita? 10Kꞌawuaudua, mʉ Beubari Bape bꞌʉbara naʉ̃ druadꞌera zareata erubꞌʉa kꞌazhiruata biodꞌebara zhãrã bedꞌea ne ẽã bꞌʉita. Mobebʉrʉ kꞌakua pira ẽã kꞌaya bꞌʉa mawũãsia: 11Mʉã bʉaa jaraya: Piradrʉrua, bʉzhi jirabꞌa jiraedarua, mobe dedꞌaa wãrũã.

12Mawũãĩ izhira piradrʉpe izhi jirabꞌa jiraedape jõmaʉ̃ daidꞌu wãsia, jõmaʉ̃ba bia akʉdrua Daizeze ibia jara mawũãsidꞌa: Kꞌãwũãrã ũdudꞌakꞌa.

Jesúsba jʉrʉdꞌa Leví

(Mateo 9:9-13; Lucas 5:27-32)

13Maʉ̃ tẽã do jedꞌea õbꞌʉidꞌu Jesús wakusa wãpe zhãrã izhima zebʉsita ũrãgꞌasia. 14Mawũã wãbʉrʉdꞌera ũdusia Leví Alfeo warrata, impuesto widꞌi jewedꞌa bꞌʉta rey Romanebemaĩta impuesto diabada maẽ bꞌasia, maʉ̃ne mawũãsia: Mʉ kꞌaidꞌu bꞌadua.

Mawũãĩ izhira piradrʉpe kꞌaidꞌu bꞌesia.

15Leví dedꞌa Jesús nekꞌobʉrʉdꞌera impuesto widꞌibadata bio, dewaraurã kꞌazhirua omiãrã bawara ãba nekꞌosidꞌa Jesús bawara, izha jʉrʉkuadꞌa bawara, maʉ̃rãbara bioba pẽwã erjiranasia. 16Ũrãgꞌa Moisédꞌe jarabadaba fariseorã bawarauba ũdusidꞌa mawũã nekꞌobʉrʉta impuesto widꞌibada bawara, dewaraurã kꞌazhirua omiãrã bawara, mawũẽ izha jʉrʉkuadꞌaa mawũãsidꞌa: ¿Kꞌãrẽta kꞌãwũã izhira nekꞌo bꞌʉ impuesto widꞌibada bawara, dewaraurã kꞌazhirua omiãrã bawara?

17Maʉ̃ta ũrĩpe Jesúsbara mawũãsia: Bika bꞌebara nesidꞌa duanu ẽã zhãrã bꞌebi bꞌʉra, awuarabʉrʉ nesidꞌa bꞌea kꞌayarãbʉrʉ. Aramaʉ̃ kĩrãkꞌa mʉãrã jʉrʉdꞌe ze ẽbasia ãzhikusa biata bꞌeta, awuarabʉrʉ Ẽdrʉbigaita jʉrʉdꞌe zesia kꞌazhirua omiãrãta.

Widꞌidꞌapeadꞌa nekꞌo ẽã zhiwidꞌi bꞌedꞌebemata

(Mateo 9:14-17; Lucas 5:33-34)

18Juanba jʉrʉkuadꞌata, fariseorãba jʉrʉkuadꞌata nekꞌo ẽã zhiwidꞌi bꞌeasia. Maʉ̃ne zhãrã ʉ̃kʉrʉ wãpe Jesúa widꞌi mawũãsidꞌa: ¿Kꞌãrẽneba Juanba jʉrʉkuadꞌara, fariseorãba jʉrʉkuadꞌara nekꞌo ẽã zhiwidꞌi bꞌedꞌe, bʉa jʉrʉkuadꞌara nekꞌo ẽã zhiwidꞌi duanu ẽpe?

19Mawũãnaĩ Jesúsbara mawũãsia: ¿Zhãrã juwua jida nʉmʉne kꞌobꞌera nekꞌo ẽã duanaĩne bꞌʉka wadꞌi ãzhi bawara kꞌobꞌʉdꞌera zhũmakĩrãta? Wadꞌi kꞌobꞌʉdꞌera nekꞌo ẽã duanaĩne bꞌʉ ẽã. 20Mawũãmina ewarita zeya zhũmakĩrã ãzhi maẽbara ededꞌaita, maʉ̃ ewadebʉrʉ nekꞌo ẽã zhiwidꞌi bꞌeaya. (Aramaʉ̃ kĩrãkꞌa mʉta edebʉdadꞌebʉrʉ mʉã jʉrʉkuadꞌara nekꞌo ẽã zhiwidꞌi bꞌeaya.)

21Miõba wuata zhiwidꞌibara remenda ẽã wua soreta. Mawũã ora wua zhiwidꞌira bagubʉrʉba wuaabʉrʉ kꞌõãbiya. 22Miõba vino zhiwidꞌi oma tʉdꞌa ẽã ne e omata zhi sorerãnerã. Mawũã ora vino zhiwidꞌi omabara ne e oma kꞌõgꞌozoabʉrʉba vino wea wãña, aramaʉ̃ne ne e oma ãrĩkuaya. Mawũãmina vino zhiwidꞌi oma ne e oma zhiwidꞌirãnerã tʉsia bꞌʉa. (Maʉ̃bara Jesúsbara jara krĩñasia izhi ũrãgꞌara zõrãrãwedꞌabema krĩcha ũme ãba jara ẽãta ãrĩ ẽbaita.)

Trigota zhi kʉ̃mʉne ẽnapeadꞌa

(Mateo 12:1-8; Lucas 6:1-5)

23Trigota u tabꞌʉ maẽ Jesús berabꞌarisia ẽnaʉ̃bada ewade, maʉ̃ne izha jʉrʉkuadꞌabara erjiranuba trigota zhi kʉ̃mʉne ẽsidꞌa. 24Mawũẽ fariseorãbara mawũãsidꞌa: ¿Akʉdua, ẽnaʉ̃bada ewadera kꞌãrẽã okꞌopanʉ kꞌãrẽ oidꞌe bꞌʉ ẽãrã?

25Mawũãnaĩ Jesúsbara mawũãsia: ¿Marãbara ledꞌakꞌa kĩrãkꞌa duanu ẽka rey Davidba odꞌara izhi jarrasidꞌe izhi ũme duanu bawara? 26Daizeze dedꞌa edꞌa wãsia Abiatar sacerdote wagꞌauta bꞌasidꞌe, mobe kꞌosia pan Daizezeita bꞌʉbadata, maʉ̃ kꞌoidꞌe bꞌa ẽbasia, awuarabʉrʉ kꞌoidꞌe bꞌasia sacerdoterãbʉrʉ, maʉ̃ta diasia izhi bawara bꞌea.

27Mawũãpe dewara mawũãsia: Ewari ẽnaʉ̃badara osidꞌa zhãrã biaitabemata, zhãrã odꞌa ẽbasia ewari ẽnaʉ̃badata aribꞌae nʉmaĩta. 28Maʉ̃ẽnabema mʉ Beubari Bape bꞌʉra ewari ẽnaʉ̃bada Nokꞌoa.

Currently Selected:

Marcos 2: cto

Highlight

Copy