Marcos 3

Juwua bagu bꞌadꞌa

(Mateo 12:9-14; Lucas 6:6-11)

1Wakusa Jesús edꞌa wãsia de zhi jʉrebada maẽ, mama bꞌasia ũmakĩrã juwua abꞌa bagu bꞌʉta. 2Maʉ̃nerã kĩrãkuitasidꞌa ẽnaʉ̃bada ewade bꞌebii kꞌawuaita, aramaʉ̃ne jidꞌaita. 3Maʉ̃ne Jesúsbara juwua bagu bꞌʉa mawũãsia: Piradrʉpe ẽsadra nʉmedua.

4Mawũãpe mawũãsia: ¿Biara osia bꞌʉka ẽnaʉ̃bada ewadera, o bia ẽãta osia bꞌʉ? ¿Zhãrã kꞌarebasia bꞌʉka, o beubiita bia bꞌʉ?

Mawũãbʉrʉdꞌera ãzhira chupea kꞌobꞌeasia. 5Mawũẽ kĩrũ akʉkuasia, sozuburia ne ẽã so zarea bꞌeba sopuape juwua bagu bꞌʉa mawũãsia: Bʉzhi juwua jirabꞌaridua.

Mawũãĩ izhara jirabꞌarisia, aramaʉ̃ne izhi juwuara bika bꞌesia.

6Mawũẽ fariseorã wãnape Herode pẽwã bꞌe bawara krĩcha jʉrʉsidꞌa Jesús beadꞌaita.

Kꞌabana wãna do jedꞌea õbꞌʉidꞌu

7Maʉ̃ne Jesús do jedꞌea õbꞌʉidꞌu wãsia izha jʉrʉkuadꞌa bawara, maʉ̃nerã kꞌabana kꞌaidꞌu wãsidꞌa Galilea druadꞌeba, Judea druadꞌeba. 8Jerusalénneba, Idumea druadꞌeba, Jordán do kĩrãrẽba, Tiro druadꞌeba, Sidón druadꞌeba. Jesúsba ne bia zromata onʉmʉta ũrĩnape kꞌabana zesidꞌa izhima. 9Mawũẽ izha jʉrʉkuadꞌaa jarasia jãbata erukꞌopanamarẽã kꞌabanaba izhita pẽũsua edadꞌa ẽbamarẽã. 10Kꞌayarãta bio bꞌebikuasi baera kꞌaya bꞌebara izhira pẽũsua edabarisidꞌa tõbꞌaridꞌaita. 11Jaiba Jesústa ũdudꞌai zhãrã kĩrãnema bꞌera izhi kĩrãbita sãkꞌokꞌodꞌe kꞌobꞌebidꞌape bꞌia mawũãsidꞌa: ¡Bʉra Daizeze Warra!

12Mawũãnaĩ Jesúsbara zarea kẽãkuasia mawũã dajada jaradꞌa ẽbamarẽã.

Docera jʉrʉkuape zokꞌakuadꞌa

(Mateo 10:1-4; Lucas 6:12-16)

13Maʉ̃ tẽã Jesús wãrĩzesia kꞌatumaĩnu, mobe izhima trʉ̃kuasia izha krĩñata, mawũẽ zesidꞌa izhima. 14Mobebʉrʉ docera jʉrʉkuasia izhi bawara duanebibʉrʉta zokꞌakuaita miã ũrãgꞌadꞌe. 15Zareata dedꞌekasia kꞌayarãta bꞌebidꞌamarẽã, jaita ãĩ jʉrekuadꞌamarẽã. 16Ãzhira naʉ̃rãã: Simón, Pedrota trʉ̃gadꞌata, 17Jacobo Zebedeo warrata, Juan Jacobo mebeata, maʉ̃rã ũmeta trʉ̃gasia Boanergerãta, maʉ̃ trʉ̃bara jara krĩña bꞌʉa Ba Warrarãta. 18Dewaraurã jʉrʉkuasia Andrésta, Felipe, Bartolomé, Mateo, Tomás, Jacobo Alfeo warrata, Tadeota, Simón Canaán bidꞌata. 19Juda Iscariote Jesús chupea chãbꞌaridꞌata.

Mitia bedꞌeadꞌapeadꞌa Jawurebiama

(Mateo 12:22-32; Lucas 11:14-23; 12:10)

20Maʉ̃ tẽã ãzhira dedꞌaa zebʉrʉdꞌera zhãrãbara wakusa bʉredrʉsidꞌa, mawũẽ izha jʉrʉkuadꞌa bawara ãzhira miã nekꞌo bꞌedꞌa ẽbasia. 21Zhi mebẽrãba ũrĩbʉdadꞌera ededꞌaita zesidꞌa kĩrãne bꞌʉ ẽãta jara bꞌeba.

22Waya ũrãgꞌa Moisédꞌe jarabadata Jerusalénneba zedꞌapeadꞌabara Beelzebúta erubꞌʉa asidꞌa, mawũẽ jai duanu nokꞌo zareadꞌeba jaira ãĩ jʉrekua bꞌʉa asidꞌa.

23Mawũẽ Jesúsbara trʉ̃kuape ne jarakꞌa mawũãsia: ¿Ãtõmiãbara sãwũã ãĩ jʉrekuaipe jai izha jʉre nʉmʉrã? 24Abꞌaʉ druadꞌebemata ãzhirãĩnu zhõ duanerã maʉ̃ druadꞌebema jõña. 25Abꞌaʉ dedꞌabemata ãzhirãĩnu zhõ duanerã abꞌaʉ dedꞌabemata bꞌera jõña. 26Aramaʉ̃ kĩrãkꞌa ãtõmiãta jai izha jʉre nʉmʉ bawara zhõ nʉmerã ari zarea nʉma ẽã awuarabʉrʉ jõña.

27Ũmakĩrã mesẽrãta bꞌʉ dedꞌara izhi netata zrʉgaira miõta edꞌa wã bꞌe ẽã naara izhita jʉ̃ ẽbʉrʉ, jʉ̃bʉrʉtrʉ izhi dedꞌa ne nʉmʉrã zrʉga bꞌeya. (Aramaʉ̃ kĩrãkꞌa ãtõmiã mʉãrã edre nʉmʉkꞌãrĩba jaira ãĩ jʉrekua bꞌʉa.)

28Mʉã wãrĩnu marãã jaraya, kꞌazhirua bio odꞌata ne baridudꞌe mitia bedꞌeadꞌata zuburia bedꞌeara Daizezebara bedꞌea ne ẽã bꞌʉya zhãrã bꞌera. 29Mawũãmina Jawurebiaba otabeta ãtõmiãba osia abʉrʉdꞌeba Jawurebiama mitia bedꞌeabʉrʉra Daizezebara bedꞌea ne ẽã bꞌʉ ẽã, awuarabʉrʉ jipa bedꞌeata bara bꞌʉya.

30Jesúsbara maʉ̃ta jarasia ũrãgꞌa Moisédꞌe jarabadabara jarasidꞌa baera izha jaita erubꞌʉta.

Kꞌobꞌeadꞌa Jesús papata zhi mebẽrãta

(Mateo 12:46-50; Marcos 3:21; Lucas 8:19-21)

31Maʉ̃ẽna zesidꞌa zhi mebẽrãta zhi papata, mobe ewaradꞌe kꞌopanepe trʉ̃ne zokꞌasidꞌa. 32Mawũẽ zhãrã izhi bʉredrʉ jewedꞌa kꞌobꞌebara Jesúa mawũãsidꞌa: Bʉ papata bʉ mebẽrãta ãĩ kꞌopanʉã, bʉta jʉrʉ panʉã. 33Mawũãnaĩ izhara mawũãsia: ¿Marãma kꞌaipe mʉ papa, kꞌairãpe mʉ mebẽrã?

34Mawũãpe izhi bʉredrʉ jewedꞌa kꞌobꞌeta akʉpe mawũãsia: Za kꞌopanʉã mʉ papa, mʉ mebẽrã. 35Daizezeba krĩñata obꞌeta maʉ̃ta mʉ mebea, mʉ nawekꞌaua, mʉ papaa.

Currently Selected:

Marcos 3: cto

Highlight

Copy