Hechos 12

Jacobo beadꞌape Pedro bꞌʉsidꞌa cárceldꞌe

1Maʉ̃ ewadera rey Herodebara mebẽrã ʉ̃kʉrʉ jidasia zuburia okuaita. 2Jacobora kuchoba beabisia Juan mebeata. 3Maʉ̃ta judíorãma bigata kꞌawuape jidabisia Pedrosidꞌa. Maʉ̃ ewadera fiesta pan ne oreguea ne ẽã kꞌobada ewari basia. 4Mawũã jidabipe bꞌʉsia cárceldꞌe. Mobe soldaorã dieciseia chãbꞌarisia zhiya kĩmarẽba trokꞌa akʉdꞌamarẽã. Izhara kꞌawua oita ãĩ edape zhãrãã ũdubigaita krĩchasia fiesta tẽã. 5Aramaʉ̃ne Pedrora akʉ bara bꞌesia cárceldꞌe. Mawũãmina mebẽrã Daizezea zhiwidꞌi taudꞌa ẽbasia izhibari.

Pedro ángelba ẽdrʉbidꞌa cárceldꞌeba

6Herodebara kꞌawua oita nrũẽma ãĩ edaidꞌera, maʉ̃ diamasera Pedrora soldaorã juwuama jʉ̃ kꞌãĩ bꞌasia soldaorã ũme ẽsadra, aramaʉ̃ne jʉ̃ bꞌasia cadena ũmeba, maʉ̃ne soldaorã dewaraurãbara puerta kĩrãbita akʉ bara bꞌasia cárcel nʉmʉrã. 7Maʉ̃ne Daizeze ángelta zebʉrʉba ʉ̃nasia cárceldꞌera. Pedrora orrodꞌe tõbꞌari ʉ̃rʉ̃ma mawũãsia: ¡Meserã piradrʉrua! Maʉ̃ daucha cadena ẽneguezoasia juwuadꞌebara. 8Ángelbara mawũãsia: ¡Wua jʉ̃tape sandalia jʉ̃tadua! Mawũãĩ izhara aribꞌaetasia. Mawũẽ mawũãsia: ¡Bʉzhi wua ãnebꞌaripe mʉ kꞌaidꞌu zerua!

9Mawũãĩ Pedro ángel kꞌaidꞌu jʉ̃drʉsia ángelba okꞌobꞌʉra wãrã kꞌawua ẽãta, awuarabʉrʉ krĩchasia ũdu kꞌobꞌʉta kꞌãĩmokꞌaradꞌe kĩrãkꞌa. 10Soldaorãba akʉ nʉme maẽ naarabemata berabꞌaridꞌape zhi ũmeta berabꞌaribʉdadꞌera puerta hierroidꞌu zesidꞌa ãĩ wãbadaidꞌu, maʉ̃ ewa totosia izhi dobꞌa. Aramaʉ̃ne ãĩ tupuepe odꞌe taidꞌadꞌe ángel nebasia izhi maẽbara.

11Mobebʉrʉ Pedrobara kꞌawuape izhikusa mawũãsia: Idꞌibʉrʉ mʉãrã kꞌawuabʉrʉa, mʉrã wãrãne Daizezebara izhi ángelta zokꞌape ẽdrʉbibʉrʉa Herode juwuadꞌeba, aranaʉ̃ne ẽdrʉbibʉrʉa judíorãba bĩ ẽã oita krĩcha nʉmeneba.

12Mawũã kꞌawuape María dedꞌa zesia Juan papa maẽ, Juan abꞌaʉta Marco basia. Bio mama zhi jʉre duanasia zhiwidꞌi. 13Pedroba puerta maẽba drogꞌoadꞌeba trʉ̃bʉrʉdꞌera kꞌai kꞌawuaita akʉdꞌe zesia ãwũẽrã Rode abadaba. 14Maʉ̃bara Pedro nemita kꞌawuai sobiaba ewa ẽbasia puertara, awuarabʉrʉ edꞌa wãẽbape jarasia Pedro kꞌobꞌʉta puerta maẽ. 15Jarirãbara mawũãsidꞌa: Bʉra kĩrãne bꞌʉ ẽã.

Mawũãnaĩ izhara wãrĩnu izhia asia. Mawũãĩ jarirãbara mawũãsidꞌa: ¡Mobera ángel izhi akʉbaria!

16Maʉ̃ne Pedrobara ari trʉ̃ nʉmasia. Aramaʉ̃ne ewabʉdadꞌe ũdudꞌai bia akʉdruasidꞌa. 17Maʉ̃ne izhara chupeadꞌamarẽã juwuaba jarape nebʉrʉsia Daizezeba sãwũã ẽdrʉbita cárceldꞌeba. Mobe mawũãsia: ¡Maʉ̃ta kꞌawuabiudua Jacoboa dewara mebẽrãã!

Mawũãpe wãbʉrʉta wãsia ẽjũã awʉrʉedꞌa.

18Ʉ̃nadrʉbʉrʉdꞌera soldaorã ãzhirãĩnurã kꞌawua ẽãsidꞌa kꞌawuadꞌa ẽãba sãwũãnata Pedrora. 19Herodebara jʉrʉbigabʉrʉdꞌe ũdudꞌa ẽbai, soldaorã zhi akʉ nʉmeãnaa widꞌikape edebigasia beadꞌe. Maʉ̃ tẽã Judea druadꞌeba edꞌaa wãsia Cesarea pʉwʉrʉedꞌa, mobe bꞌesia mama.

Herode beudꞌa

20Maʉ̃ ewadera Herode kĩrũ bꞌasia Tiro pʉwʉrʉdꞌebema bawara, Sidón pʉwʉrʉdꞌebema bawara, maʉ̃ kꞌarea maʉ̃rã krĩchasidꞌa bedꞌeadꞌe wãnaĩta izhima. Mawũẽ rey Herodeba Blasto nokꞌo zromata bꞌʉkꞌãrĩ bawara bedꞌeasidꞌa jaramarẽã adu-a bꞌeaita, mawũã osidꞌa zhikora eda bꞌeba rey druadꞌe. 21Zedꞌamarẽã jaradꞌa ewarita arababʉrʉdꞌera, Herodebara izhi rey wuata jʉ̃pe izhi buguedꞌe jewedꞌape bedꞌeasia. 22Maʉ̃nerã zhãrãbara nemi jĩgua mawũãsidꞌa: ¡Naʉ̃ dai zezeta bedꞌea kꞌobꞌʉa, beubarita bedꞌea kꞌobꞌʉ ẽã! 23Audre ẽãne ángel Daizezedꞌeba kꞌayabisia Daizezetrʉ zhi zroma a ẽãneba. Aramaʉ̃ne beusia kiba kꞌo.

24Maʉ̃nerã Daizeze bedꞌeara wuaabʉrʉ jara wãbʉdaba zhi ĩjã bꞌera eaba wãsia.

25Bernabébara Saulobara ãzha kꞌãrẽ oi bꞌʉra aribꞌaedꞌape Jerusalénnebara jẽrũya wãsidꞌa, maʉ̃nerã ãzhi bawara edesidꞌa Juanta, maʉ̃ abꞌaʉta Marco basia.

Currently Selected:

Hechos 12: cto

Highlight

Copy