Hechos 13

Bernabé, Saulo wãnapeadꞌa Daizeze bedꞌeata jaradꞌe

1Mebẽrã Antioquía pʉwʉrʉdꞌe bꞌe maẽ bꞌeasia Daizezeba bedꞌeata jarabibarirãta, miã ũrãgꞌabadata: Ãzhira bꞌeasia Bernabéta, Simónta, Simón abꞌaʉta Níger basia, Lucio Cirene pʉwʉrʉdꞌebemata, Manaén rey Herode ũme waridꞌata, Saulota bꞌeasia. 2Ewari abꞌa mebẽrã Daizeze ibia jara nekꞌo ẽã zhiwidꞌi tabꞌʉdꞌe Jawurebiaba mawũãsia: Bernabéta, Saulota mʉĩta bꞌʉudua, kꞌãrẽ obigaita mʉã jʉrʉkuabʉrʉa.

3Aramaʉ̃ne nekꞌo ẽã zhiwidꞌi tabꞌape ãzhi ʉ̃rʉ̃ juwua bꞌʉkua zhiwidꞌisidꞌa, mobe buegasidꞌa.

Daizeze bedꞌeata jaradꞌapeadꞌa Chipredꞌe

4Ãzhira aramaʉ̃ne Jawurebiaba zokꞌakuabʉrʉba edꞌaa wãsidꞌa Seleucia pʉwʉrʉedꞌa. Mamaʉ̃ba barcodꞌe kĩrãrã wãsidꞌa dodꞌu Chipreidꞌu. 5Pʉwʉrʉ Salaminaĩnu jũẽbʉdadꞌera Daizeze bedꞌeata jarasidꞌa de zhi jʉrebadata nʉme maẽ judíorãneta. Maʉ̃nerã Juan erupanasia ãzhi kꞌarebata.

6Maʉ̃ dodꞌuta jõma berabꞌari Pafo pʉwʉrʉidꞌu jũẽbʉdadꞌera ũdusidꞌa jaibanata, sewata Daizezeba bedꞌeata jarabibaridꞌe bꞌʉta judíota Barjesús basia. 7Izhira bꞌasia nokꞌo Sergio Paulo ũme, nokꞌora krĩcha maẽ bigau basia. Maʉ̃bara Bernabéta, Saulota trʉ̃pe ũrĩ krĩña kꞌobꞌasia Daizeze bedꞌeata. 8Mawũãmina idaribiga ẽbasia Elima jaibanaba. Griego bedꞌeadꞌera maʉ̃ basia izhi trʉ̃rã. Aramaʉ̃ne ĩjãbi ẽbaita nʉmasia nokꞌoa. 9Mawũẽ Saulo abꞌaʉta Pablobara Jawurebiaba bira bꞌʉba akʉ, 10mawũãsia: ¡Bʉra ne jõmaʉ̃ne zhãrã sewamiã, ne jõmaʉ̃ne bia ẽã omiã, bʉra ãtõmiã warra, bʉara jõma krĩña ẽã biara! ¿Bʉara idaribi ẽã nʉmaĩka wãrã bedꞌeata Daizezedꞌera? 11Kꞌõbebai bʉra Daizezeba jidabʉrʉa, bʉra daʉbꞌerreaya, aramaʉ̃ne ʉ̃madaura ũdu ẽbaya ewari ʉ̃kʉrʉ.

Aramaʉ̃ta izhima pãrĩgu paisosoa totosia. Mawũẽ aribai bʉrga jʉrʉsia iabꞌaʉba erbꞌari edemarẽã juwuadꞌeba. 12Nokꞌobara mawũã berabꞌaribʉrʉta ũdupe ĩjãsia bigadꞌeba ũrãgꞌa Nokꞌo Jesúsdꞌera.

Daizeze bedꞌea jaradꞌapeadꞌa Antioquíadꞌe

13Pafo pʉwʉrʉdꞌeba barcodꞌe bꞌarikuape Pablora izhi kꞌaidꞌu bꞌe bawara jũẽkuasia Perge pʉwʉrʉedꞌa, maʉ̃ pʉwʉrʉra Panfilia druadꞌebema. Mawũãmina Juanbara ãzhira ãmaẽkuabʉrʉta jẽrũya zesia Jerusalénʉẽna. 14Jarirã Pergedꞌebara jũẽkuasia Antioquía pʉwʉrʉedꞌa, maʉ̃ pʉwʉrʉra Pisidia druadꞌebema. Ãzhira de zhi jʉrebada maẽ ẽnaʉ̃bada ewade edꞌa wãpe jewedꞌasidꞌa. 15Moisé ũrãgꞌata ledꞌape, Daizezeba bedꞌeata jarabibarirã bedꞌeata ledꞌape, de zhi jʉrebada maẽ nokꞌorãbara zhãrãta zokꞌasidꞌa mawũãnamarẽã: Mebẽrã, marãba zhãrã ũrãgꞌai bedꞌeata erupanʉbʉrʉ bedꞌeaudua.

16Mawũãnaĩ Pablobara piradrʉpe chupeadꞌamarẽã juwuaba jarape mawũãsia: Marã israelitarãba ũrĩũdua, judío ẽãta Daizeze wawia bꞌeba ũrĩũdua: 17Daizeze za Israel bꞌedꞌebara dazhirã zhibarirã bꞌeadꞌara jʉrʉkuasia, mobe Egipto druadꞌe ãĩbemata bꞌedꞌe eababipe izhi zareaba ãĩ edekuasia mamaʉ̃bara. 18Kĩrãẽpa duanu ẽã bꞌeta Daizezebara cuarenta año zrogꞌasia drua drudrua tabꞌʉ maẽ. 19Mobe zhãrã bedꞌea awuara bꞌeta siete nʉmʉta beakuasia Canaán druadꞌe, aramaʉ̃ne dedꞌekasia maʉ̃ druata. 20Egiptoedꞌa wãnapeadꞌadꞌeba mawũã drua jidasidꞌaidꞌura basia cuatrociento cincuenta año, mobebʉrʉ Daizezebara nokꞌorãta dedꞌeka nʉmʉkꞌãrĩsia Samuel izha bedꞌeata jarabibari bitabai. 21Maʉ̃ tẽã widꞌisidꞌa reyta, mawũẽ Daizezebara dedꞌekasia Saúl Cis warrata, Benjamínneba uruta reyta bꞌamarẽã cuarenta año. 22Maʉ̃ ãĩ bꞌʉpe reyta bꞌʉsia Davita, maʉ̃nebema izhara mawũãsia: Mʉãrã ũdubʉrʉa David Isaí warra mʉ soba krĩñane bꞌʉta, naʉ̃bara jõma oya mʉã krĩñata. 23Davidꞌeba uruta izha jaradꞌadꞌe Daizezebara Jesús bꞌʉsia Israel bꞌe Ẽdrʉbita. 24Jesús zei nawedꞌa Juanbara jarasia buru kꞌoebʉdaba kꞌazhiruara ãmape Daizezeta pẽwãnamarẽã, mawũã jarasia Israel bꞌe jõmaʉ̃ã. 25Juanbara izha onʉmʉta jõbibodꞌodꞌera mawũãsia: ¿Marãbara mʉrã kꞌaita krĩcha bꞌe? Mʉrã zhãrã Ẽdrʉbita bꞌʉ ẽã. Mawũãmina iabꞌa mʉ kꞌaidꞌu urua, nezokꞌaba obari kĩrãkꞌara mʉãrã ẽnaĩne bꞌʉ ẽã maʉ̃ba jẽrũne jʉ̃ bꞌʉra.

26Mebẽrã, marã Abrahamneba uruta bꞌema, judío ẽãta marãne edꞌa bꞌeta Daizeze wawia bꞌema maʉ̃ bedꞌeata zokꞌasia ẽdrʉidꞌebemata. 27Jerusalénne bꞌebara nokꞌorã ãzhidꞌe bawarauba kꞌawuadꞌa ẽbasia Jesúsdꞌebema sãwũãta, Daizezeba bedꞌeata jarabibarirãba Jesúsdꞌebema jaradꞌapeadꞌata ewari ẽnaʉ̃badaza le bꞌesidꞌa sãwũãta kꞌawuadꞌa ẽbasia. Aramaʉ̃ne maʉ̃rãba jaradꞌapeadꞌata arimaẽ berabꞌaribisidꞌa beabibʉdaba. 28Kꞌãrẽã beadꞌaira ne ẽãne Pilatoa jarasidꞌa beabimarẽã. 29Izhi ʉ̃rʉ̃bemata bꞌʉ tabꞌeta jõma arimaẽ berabꞌaribʉrʉdꞌera, cruzdꞌebara udꞌaa bꞌaebidꞌape tabꞌʉsidꞌa peña zobꞌeata beuwãrã wuagꞌaita nʉmʉ maẽ. 30Mawũãmina Daizezebara beudꞌata piradrʉbisia. 31Izhira ewari bio zhi ũdubigasia izhi bawara wãrĩzekuadꞌaa Galileadꞌeba Jerusalénʉẽna, idꞌira maʉ̃rãba izhidꞌebemata jara bꞌea zhãrã bꞌea.

32Daibidꞌa maʉ̃ bedꞌea biata marãã jara panʉã Daizezeba jaradꞌata dazhirã zhibarirã bꞌeadꞌaa. 33Maʉ̃ Daizezebara dazhirã ãzhi warrarãĩta aribꞌaebʉrʉta beudꞌata piradrʉbisia Jesúra. Maʉ̃ta zhi bꞌʉmata Salmo ũmene mawũã bꞌʉa: Bʉra mʉ Warra, mʉã bʉra bꞌidꞌapʉa idꞌi. 34Beudꞌata piradrʉbibʉrʉba bꞌerawakꞌata bꞌaira mawũãsia: Mʉã marã sozuburiaya mʉã sozuburiaita jaradꞌa kĩrãkꞌa Davita. 35Maʉ̃neba dewara Salmo awʉrʉdꞌe mawũã bꞌʉa: Mʉrã bʉ nezokꞌa kĩrãẽpa bꞌʉra bꞌerawabi ẽã. 36Wãrãnebai Davidbara zhãrã izhi ewaridꞌebema aribꞌaesia Daizezeba krĩñane, maʉ̃ne beupe wuagꞌasidꞌa zhibarirã bꞌeadꞌa bawara, aramaʉ̃ne bꞌerawasia. 37Mawũãmina jari beudꞌata Daizezeba piradrʉbidꞌara bꞌerawa ẽbasia. 38Mawũẽ mebẽrã naʉ̃ta kꞌawuaudua: Marãã jara panʉã Daizezebara Jesúsdꞌeba bedꞌea ne ẽã bꞌʉita kꞌazhiruata biodꞌeba. 39Moisé ũrãgꞌadꞌebara bedꞌea ne ẽã duane bꞌe ẽãta, Jesúsdꞌebara bedꞌea ne ẽã duaneña jõma izhidꞌebemata ĩjãbʉdara. 40Mawũẽ kĩrãkuitaudua marã ʉ̃rʉ̃ ze ẽbamarẽã Daizezeba bedꞌeata jarabibarirãba mawũãnapeadꞌata:

41Kĩrãkuitaudua marã Mʉta seribidꞌa ẽãrã, peraudua, marã nebaya, marã bꞌe ewade Mʉã kꞌãrẽ obʉrʉra marãbara ĩjãna ẽbaya iabꞌaʉba marãã jarabʉrʉra. (Habacuc 1:5)

42Pablota Bernabéta de zhi jʉrebadata judíorãne maẽba wãbʉdadꞌera, zhãrã zuburia bedꞌeasidꞌa dewara ewari ẽnaʉ̃badata zeidꞌebidꞌa jaradꞌamarẽã maʉ̃nebemata. 43Ãba nʉmanata ẽzoabʉdadꞌera, judíorãnebema bioba dewaraurã judío bape bꞌeba pẽwã jʉ̃drʉsidꞌa Pablora Bernabéra. Mawũẽ ãzhara jarasidꞌa ĩjã bꞌeamarẽã izhi biaba ãzhi kʉãgꞌata Daizezebara.

44Dewara ewari ẽnaʉ̃badadꞌera pʉwʉrʉdꞌebema jõma ãba zedꞌade basia bedꞌeata ũrĩnaĩta Daizezedꞌeta. 45Mawũãmina judíorã nokꞌorãba kꞌabanata ũdudꞌai kꞌãbãẽã bĩ ẽãbʉdaba jarasidꞌa Pabloba jarabʉrʉra mawũã ẽãta, aramaʉ̃ne bĩ ẽã jarasidꞌa.

46Mawũẽ Pablobara, Bernabébara wãnigua mawũãsidꞌa: Wãrãnebai marãã naara jaradꞌaita bara basia Daizeze bedꞌeara. Mawũãmina seribidꞌa ẽãba marãĩtabemata krĩchadꞌa ẽã Daizeze ũme bꞌai jõ ẽãrã, mawũẽ daira wãnaña judío ẽãta bꞌema. 47Dai maʉ̃ kꞌaudꞌa panaĩrã Daizezebara mawũãsia:

Mʉã bʉra ʉ̃nata bꞌidꞌapʉa mʉnebemata kꞌawuadꞌamarẽã judío ẽãta bꞌeba, bʉra aramaʉ̃ne ẽdrʉdꞌaidꞌebemata nʉmaña drua jõmaʉ̃ maẽ. (Isaías 42:6; 49:6)

48Judíorã ẽãba maʉ̃ta ũrĩnaĩ sobia biga asidꞌa Daizeze bedꞌeara, aramaʉ̃ne jõmaʉ̃ba ĩjãsidꞌa Daizeze ũme bꞌai jõ ẽã bꞌeaita bꞌeadꞌabara. 49Aramaʉ̃ne Daizeze bedꞌeara jarasidꞌa maʉ̃ drua jõma. 50Mawũãmina judíorã wũẽrãrãã bedꞌeasidꞌa judío bape zhi zromata bꞌe bawara, bedꞌeasidꞌa nokꞌorã pʉwʉrʉdꞌebema bawarabidꞌa. Aramaʉ̃ne Pablo ʉ̃rʉ̃, Bernabé ʉ̃rʉ̃ bedꞌeata obibʉdaba maʉ̃rã jʉretasidꞌa ãzhi druadꞌebara. 51Mawũẽ ãzhi Daizezeba pua kꞌawua oidꞌebemata maʉ̃rãbara egoro jarra ãzhi jẽrũnebema niãwesidꞌa, mobe zesidꞌa Iconio pʉwʉrʉedꞌa. 52Jesúsdꞌebema ĩjã bꞌera kꞌãbãẽã sobia bꞌeta erunʉmasia Jawurebiaba.

Currently Selected:

Hechos 13: cto

Highlight

Copy