Homa 7
7
Ai aba, Mose ati ai‑ya barinamare
1Oka soho dai amani. Owati dai mitahi. Ai‑ka hidi mai ati‑ya mai kamina, mai ati mai hikanahano hina, mai ati ai tokadabara, ai‑ya mai wee, yama manakone‑ya mai haana, mai dai watoneni. Ai abiya, ai‑ya mai weenamarihi, yama manakone‑ya mai haanamarihi, mai teni.
2Mai fanawi tamine‑ya i‑di Mose kanahanomatane.
“Mai fanawi fana, mai‑ka yibote ohari‑ya mai famabisahi.” Mose‑ka yama hani ati nineni.
Mai‑ka yibote abeya, maki owa‑ya mai famawahiya, mai sibarineni. Mai‑ka yibote abeya, maki owa‑ya mai ati famawaha, Mose‑ka yama hani mai‑ya ati barini awirani.
3Mai‑ka yibote abi awire, maki owa‑ya mai famawaha, towe mai amani. Mai‑ka yibote abeya, maki owa‑ya mai famawahiya, towe mai tohi awirani.
4Soho, owati dai mitahi. Yeso ati dai nofawahiya, hibati‑ka dai aba, Mose ati dai‑ya barinami awire. Yeso Kirisito kitamemata, fare hika dai tohawaha, dai yati tohawaha, Deoso‑ka yama anini amosa dai aninaboneni.
5Hibati‑ya ai atibodi bote ati ai tokadaba, Mose ati‑ya ai mita, ati ai tokadabi nofare, ai ene amosara tonafe, hini ai ene ai ababoneni.
6Hibati‑ya Mose ati ai‑ka hidi tohemari, hibayata Yeso ati ai nofawaha, hibati‑ka ai abawaha, hibayata Deoso ai‑ka hidi tohawahe, ai atibodi yati‑ya Deoso‑ka Doni sawiwahene, ai‑ya kasomebonaha.
Mose‑ka yama hani ai kadika, ai ene amosara ai wato
7“Deoso ati‑ya i‑di Mose kanahano ati kasirone.” Onamone dai ati na.
Ati kasiro awire, ati amosabisane. Deoso ati i‑di Mose hikanahanomata ai kadikiya, ai ene amosara ai watoteni. Hibati‑ya mai‑ka yama‑ya owatibodi ati kayafa,
“Yama sibarini.” Owatibodi ati na,
owa‑ya weeramaroni. Makobote Deoso ati okadika,
“Mai‑ka yama‑ya dai atibodi ati kayafariyahi.” Deoso‑ka yama hani ati na.
Okadika, owa‑ya owatibodi weenawahateni.
8Mai‑ka yama‑ya owatibodi bote ati kayafa, owa ene sibarabone onamaroni.
“Mai‑ka yama‑ya dai atibodi ati kayafaraboneni.” Deoso ati ne.
Makobote mai‑ka yama oawa, fara‑ya owatibodi bote ati kayafi ba‑basi nawahani.
“Deoso owa‑ya ati barini awire‑mana, owatibodi owa‑ya weera neni.” Oneni.
9Hibati‑ya Deoso ati i‑di Mose hikanahanomata, ati nafi owatora.
“Owa ene sibarini.” Owatibodi ati namaro,
Makobote Deoso ati owato ba‑basi ona,
“Mai‑ka yama‑ya tiwatibodi kayafariyahi.” Ati ne,
Mai‑ka yama‑ya owatibodi kayafabisa, owatibodi ati amosara owatowaha, fara ihi o·ababone, Deoso owa‑ya sawire owatowahani.
10Mose‑ka yama hani ati okadabiya, owa‑ya kasomabone ona, i‑di Mose‑ka yama hani ati nafi okadabara, o·ababone, owa‑ya owatowahineni.
11Owatibodi bote owa‑ya keyeheteni. Mose‑ka yama hani‑ya tokadababone ati na, Mose ati‑ya tokadabara ihi o·ababone owatowahani.
12Mose‑ka yama hani ati amosa, Deoso ati yokana amane. Ati tosawariterene, ati amosatene.
13Yama hani ati amosa ihi o·ababone dai ati na awineni. Yama hani ati ihi tohi awirini. Yama hani ati amosabisa, owa ene‑ta amosara, hini owa ene o·ababoneni. Owa ene amosara owatowaha, Mose‑ka yama hani ati ihi owa ene towe na‑nafi tohamaro owatowahineni.
14Deoso‑ka Doni ene Deoso ati‑ya Mose kanahanomata, ati amosane, owatibodi bote Deoso ati‑ya tokadabi nofara, owatibodi bote towe owa‑ya yose, ati okadabanasa oneni.
15Owatibodi bote ati okadabamarabone ona, owatibodi bote ene owa ene towe tohasa na, yama amosa onabone ona, yama amosa oni awira. Owa ene towe okakoneni.
16Owa ene towe owato, Mose‑ka yama hani ati amosa owatohari oneni.
17Owa ene towe tohasa na, owatibodi yati ene tohi awirani, owatibodi bote owa‑ya foyasa na ene tohani.
18Owatibodi bote yama amosa‑ya nofara. Yama amosa onofabisa, yama amosa‑ya owatonasa oni awirani.
19Yama amosa onabone ona, yama amosa‑ya oni awisa orani. Yama towe‑ya orabone ona, yama towe‑ya onasa oneni.
20Yama amosa‑ya onofa, yama towe‑ya owatibodi bote nofasa na, fara owa ene amosara owatibodi yati ene tohi awirani. Owatibodi bote ene tohabisani.
21Yama amosa onofa‑ya owatibodi bote nofara. Yama amosa onofabone ona, owatibodi bote ene yama amosa oni awirani.
22Deoso ati owatibodi yati nofi nafineni.
23Owatibodi bote owa‑ya foyasa na, owatibodi yati‑ya weeteni, owatibodi bote ati‑nima onabonehe.
24Towe ama·oni. O·ababone, ebeni‑ke owa‑ya kasomabati, owatibodi bote ati okadabamarabonehe?
25Ai‑ka Ayo i‑di Yeso Kirisito owa‑ya kasomebonane. Yeso ene owatibodi yati tohawaha, Deoso‑ya owatibodi yati nokotoni teni. Deoso ene ya‑yai·oneni. Owatibodi yati‑ya Deoso ati okadaba, owatibodi bote yama towe‑ya nofasa nineni.
Currently Selected:
Homa 7: jaaNT
Highlight
Share
Copy
Want to have your highlights saved across all your devices? Sign up or sign in
