Homa 6

Ai atibodi bote ati ai tokadabamarabone

1Dai one Deoso ati‑ya mai tokadabi nofara, eya mai ati na awineni.

“Ai ene amosaramaro, ai‑ya Deoso ati somawame, hibayata ai ene towe ba‑basi niya, ai‑ya Deoso ati somawamatasebona, ai ene towe ba‑basi nahi.” Mai ati na awineni.

2Haa‑nima dai ati riyahi, dai ene towe tohamarabonehe. Deoso ene ai atibodi yati toha, ai atibodi bote ai‑ka hidi tohamara, ai atibodi bote ati‑ya ai tokadabamariyahi.

3Yama‑ya dai watokarini? Yeso‑ka ai tohawaha, hibati‑ka ai ene‑nima ai ene namara, ai ene yati tohawaha, Yeso abe‑ka hetarato‑nima ai nabone, ai‑ya mai habanirisa teni.

4Yeso abe, yati hodi‑ya mai hinafoye, Deoso kitabote ene Yeso kitamatasane. Yeso kitame‑ka hetarato‑nima ai na, ai‑ya mai habanirisa, ai waamisama, hibati‑ka ai‑nima ai namaraboneni.

5Yeso Kirisito abe, kitamemata, Yeso‑ka ai tohawaha, makobote ai abano aba, ai kitama, Kirisito abano yati tohe‑nima ai abano yati tohawahaboneni.

6Hibati‑ya ai ene amosara, ai ene Yeso awa‑ya abemata, ati ai nofa, Yeso ene hibati‑ka ai aba, ai yati tohawaha ai‑ya ai watoneni. Hibati‑ka ai‑nima ai namara, ai atibodi bote kiti fawana, ai‑ka hidi tohamara, ai atibodi yati kitawaha, ai ene amosawamaboneni.

7Hibati‑ka ai tohamaro Yeso eyehe ai abamaroni, ai atibodi bote ai‑ya yaditonamarabonehe.

8Yeso abemata ene hibati‑ka ai aba, fare Yeso kitamemata‑nima ai yati tohawaha, ai atibodi yati tohahari na, ai atibodi yati‑ya Kirisito sawitene.

9Yeso abe, kitamemata, abamaterebona ai watoneni.

10Ai ene amosara manakone nafi‑ya Yeso nanahabi ohari, abe kitamemata, Deoso‑ya kahiyaratene.

11Haa‑nima dai atibodi ati nahi.

“Hibati‑ka o·aba, yati ohawaha, owatibodi bote kiti fawana, ati okadabami awiraboneni, Yeso Kirisito‑ka ohawaha, Deoso ati okadabiya, okahiyarebonane.” Dai atibodi ati nahi.

12Dai atibodi bote yama towe‑ya nokotonihemaro, dai‑ka hidi tohamara. Dai atibodi bote ati‑nima dai riyahi.

13Hibati‑ka dai aba, dai yati tohawaha, dai abano kobobona dai daanahi, Deoso‑ya. Dai abano kobobona ene amosaramaro‑nima dai riyahi. Deoso ati kobohina‑nima dai abano kobobona nawahabisahi.

14Dai atibodi bote dai‑ka hidi tohamara. Yama amosara dai nofamariyahi. Mose ati dai‑ka hidi toharihi ne, Deoso‑ta dai‑ka hidi tohabise, Deoso dai‑ya kasomabise, dai‑ya ati somawame, dai ene‑maro‑ya kadikamarebonane.

Deoso‑ka ai toha, Deoso ati ai tokadabahi

15Eya dai one ati na awineni.

“Mose ati ai‑ka hidi tohamareya, ai ene amosara, sibarineni. Deoso ai‑ya ati somawamatene.” Dai one ati na awineni.

Haa‑nima mai ati na Deoso nofaterene.

16Owati dai mitahi. Ai owa ati‑ya ai tokadaba, fare ai‑ka hidi tohatene. Fara‑nima dai na, dai atibodi bote ati‑ya dai tokadabatebone dai ati na, dai atibodi bote dai‑ka hidi tohateni. Dai atibodi bote dai‑ka hidi toha, dai ene amosateraboneni. Dai abiya, Deoso eyehe dai winateraboneni. Deoso ati‑ya dai tokadababisabone dai atibodi ati na, Deoso dai‑ka hidi tohatene. Deoso dai‑ka hidi tohe, dai ene amosawamawahaboneni.

17Deoso ene ya‑yai·oneni. Hibati‑ya dai atibodi bote dai‑ka hidi toha, ati dai tokadabamaroni. Hibayata Deoso ati‑ya dai mita, ati dai nofe, ati dai tokadabawahatene.

18Dai atibodi bote dai‑ka hidi tohamara, dai wahawama, Deoso dai‑ka hidi tohawahe, dai ene amosawamawahaboneni.

19Yama‑ya dai watabone dai‑ya ohiyaraboneni. Hibati‑ya dai atibodi bote dai‑ka hidi toha, dai abano kobobona ene amosara tonafemaroni. Hibayata dai abano kobobona Deoso ati‑ya tokadabahi, dai ene amosi ba‑basi nabonehe.

20Hibati‑ya dai atibodi bote dai‑ka hidi toha, Deoso ati‑ya dai tokadabaramaroni.

21Dai ene‑maro manakone hini yamata‑ya tohibati? Dai ene‑maro manakone dai ababoneni. Hibayata dai ene‑maro dai nofami awira, dai ene‑maro tamine kadikami dai nofarihi nineni.

22Dai ene‑maro dai‑ya yaditonamara, dai manakone abawaha, hibayata Deoso‑ka dai toha, dai ene amosawama, dai manakone amosawamahari na, makobote Deoso tabaro‑ya dai winaboneni.

23Ai ene towe manakone ai ababone, Deoso eyehe ai winateraboneni. Ai‑ka hidi Yeso Kirisito ai manakone‑ya nanahabe ene Deoso ai‑ya ati somawame, hiniya ati somawame, ai anina manakone tohi awirini. Deoso tabaro‑ya ai winabone, ai abamateraboneni.

Currently Selected:

Homa 6: jaaNT

Highlight

Copy