Homa 5

1Yeso ati‑ya ai no‑nofa Deoso ai‑ya ati somawame, ai‑ka Ayo i‑di Yeso Kirisito ai manakone‑ya nanahabe ene ai manakone wadamara, Deoso ai‑ya ati yawamare, ai‑ya ati somatene.

2Deoso‑ya ai tamine‑ya Yeso Kirisito hiyare,

“Abi, tika mai tiawahi. Mai manakone onahaba, owati‑ya mai nofawaha, tika dao mai tohawahani.” Ati tene.

Deoso ai‑ya kasomi fawatere, tabaro‑ya ai winamakebone, ai ya‑yainineni.

3Hibayata Yeso ati‑ya ai no‑nofa, Yeso ati‑ya mai nofara ai‑ya mai kaka, ai‑ya mai bisi na, fara mai ihi ai yawara ai ya‑yainibisa, ai komene ene ai habo kiti ba‑basi nabone ai watoneni.

4Ai habo kita, ai yawara, ai ene sibarabone Deoso ati ne. Deoso ene ai habo kita, Deoso amosabote tabaro‑ya ai kobonabone yama ai nimana, ai ya‑yainaboneni.

5Deoso tabaro‑ya ai winabone yama ai nimana, Deoso‑ka Doni ai atibodi‑ya wine ene Deoso ai‑ya nofi nafi ai wato, ai‑ya nofi fawaterebonane.

6Hibati‑ya Deoso ai watora, ai ene towe tonafe, ai‑ya ai kasomi watora, Deoso ati ai nofi awisarihi niya, Deoso ati‑nima Kirisito abematane, ai manakone‑ya nanahabebonaha.

7Ai owa ene amosabote‑ya mai nanahababone mai ati niya,

“Dai nanahabarayaho. Owa‑ta o·ababisahi.” Ai owa ati neba awane.

Mai ihi amosara mai ababone mai ati na,

“Mai abarabone owa‑ta o·ababisaboneni.” Ai ati terani.

8Ai ene‑nima Deoso ene ni awire, ai ene amosara, ai ababone, Deoso ai‑ya nofi nafi ene Bidi i‑di Yeso Kirisito‑ta ababisane, ai manakone‑ya nanahabebonaha.

9Yeso abe, emene tokafodo ene Deoso ai‑ya ati somawame, Yeso ene Deoso ai‑ya ati yawamaterebonane.

10Deoso ai nofasa riya, Deoso Bidi abe, ai manakone‑ya nanahabematane. Deoso Bidi abe ene ai‑ya ati somawame, Bidi kitame ene ai‑ya weenamarebona, hini tabaro‑ya ai winabone ai watoneni.

11Makobote Deoso tabaro‑ya ai winabone, hibayata ai‑ka Ayo i‑di Yeso Kirisito ene Deoso ai‑ya ati somawame, ai ya‑yainawahani.

Adaho ene ai aba, Kirisito ene ai abamara

12Hibati‑ya Deoso ati‑ya ai‑ka idi i‑di Adaho tokadabare, hini ene abematane. I‑di Adaho ene ai nafi abaharebone, i‑di Adaho‑ya ai foyamete, fare Deoso ati‑ya i‑di Adaho tokadabare, Deoso ati ai tokadabaharirameteni.

13Hibati‑ya Deoso ati‑ya i‑di Mose kanahano awisareya, mai nafi ihi amosaramete. Mai ihi‑ya Deoso kadiki awisarematane.

14I‑di Adaho nowati‑ya i‑di Mose ati awisareya, mai nafi abameteni. Deoso ati‑ya i‑di Adaho mite, Deoso ati‑ya tokadabare. Deoso ati‑ya mai mitara, mai abaharemeteni. Ai a‑ababone‑ke i‑di Adaho amane. Ai abari‑bone‑ke ai owa kamakibisematane.

15I‑di Adaho amosare ene ai nafi ababone Deoso ati ne. Ai‑ya Deoso nofe, ai abarabone, hini Bidi‑ya daanane, ai manakone‑ya nanahabebonaha. I‑di Adaho manakone‑ya nanahabe, ai nafi manakone‑ya nanahabane, Bidi ati ai nofeya, ai abarabone, ai‑ya Deoso ati somawamabisane. I‑di Adaho ene amosare ene‑ya i‑di Yeso Kirisito ene amosi fiyakane, ai nafi manakone‑ya nanahabane, ai abarabonehe.

16I‑di Adaho ene towe ohari manakone ai nafi ababone Deoso ati nematane. Adaho ene‑ya Yeso Kirisito ene fiyakane, Yeso Kirisito ene ai dami manakone aba ene Deoso ati somawame, ai ene amosa‑nima ai na, Deoso ai‑ya awawahane.

17I‑di Adaho ene ai nafi abano ababone ai wato, Deoso ai‑ya nofe, Bidi‑ya daanane, ai manakone‑ya nanahabebonaha. Hibayata Yeso ati ai nofiya, Deoso ai‑ya ati somawameya, Yeso Kirisito ene‑nima ai ene na‑ya Deoso awabisatene. Yeso ene ai abano yati neme‑ya winabone ai wato, Yeso eyehe ai nahabone ai watohari nineni.

18I‑di Adaho ohari ene amosare, ene ai nafi ababone Deoso ati ne, Yeso Kirisito ohari ene amose, abematane, Deoso ai‑ya ati somawamabisebonaha. Ai abami awirabone, ai atibodi yati ai kayafabisamaroni.

19Adaho i‑di Deoso ati‑ya tokadabare ene ai nafi ene towe toha, Yeso Kirisito Deoso ati‑ya tokadabe ene Deoso ai nafi‑ya ati somawame, ai‑ya awe, Yeso ene amose‑nima ai ene na ai‑ya awabisane.

20Deoso ati i‑di Mose hikanahanomata, ati ai tokadabare, ai ene amosara manakone tonafe, Deoso ai‑ya kasomare‑mana, ai aba neni. Ai ene amosara manakone‑ya Yeso nanahabe, ai ene manakone‑ya fiyakanematane.

21Ai ene towe manakone ai nafi ababone Deoso ai‑ya kasome, ai‑ka Ayo Yeso Kirisito ene amosabote ene ai‑ya Deoso ati somawame, Yeso ene amose‑nima ai ene na, Deoso ai‑ya awawahe, Deoso tabaro‑ya, ai nafi winawahaboneni.

Currently Selected:

Homa 5: jaaNT

Highlight

Copy