Homa 15
15
Kirisito ene‑nima ai ene nahi
1Deoso ati‑ya ai wato ba‑basi na, Deoso ati‑ya mai wato bi‑bidi na, mai dai kasomahi. Hini yama tiwa‑ya kasomi ohare‑bone‑ya nokotiniriyahi. Yama‑ya mai wato bi‑bidi na mai tikasomaharebone, nokotiniharihi.
2Ai owa mai ai kasoma, mai ai ya‑yainihe, Deoso ati‑ya mai wato ba‑basi namakeboneni.
3Kirisito‑nima ai nahi. Kirisito hini ya‑yainebona‑ka yama nokotoni awire, Deoso‑ta ya‑yainebona‑ka yama‑ya Yeso nokotonibise, fare Deoso‑ka yama hani ati dai mitahi.
“Abi Deoso, tiwa‑ya mai kako, owa‑ya mai kako, tiwa‑ya mai wee, owa‑ya mai wee, mai teni.” Deoso‑ka yama hani‑ya Yeso tamine‑ya mai kanahanameteni.
4Ai‑ya mai kanawatabone, Deoso ati‑ya mai kanahanameteni. Yeso hawine‑ya ai yakana, Deoso ati‑ya ai kadika, Deoso tabaro‑ya ai koboni awisariya, ai kobonabone ai atibodi ati na, ai ya‑yaiteni.
5Dai tamine‑ya Deoso‑ya ohiyara, Deoso dai‑ya kasome ene dai atibodi ati fara hinama toha, Yeso Kirisito ati‑mata‑nima dai nabone, oteni.
6Haa‑nima dai niya, dai‑ka hidi i‑di Yeso Kirisito‑ka Abi i‑di Deoso‑ya dai nafi kahiyarawahaboneni.
7Hibati‑ya Yeso Kirisito dai‑ya kayafemari, dai ibi kayafiya, dai ene‑ya mai awiya, Deoso‑ya mai kahiyarawahaboneni.
Deoso‑ka yama amosa ai kayafabone
8Hibati‑ya oda‑ka idi mai‑ya Deoso hiyare,
“Kirisito kobonebonane, Yodeo mai‑ya kasomebonaha.” Deoso ati nemata.
Fare ati‑nima yama nawaha ai watoneni.
9Bara mai‑ya Yeso kasomahari, Deoso‑ya mai kahiyarabone tamine‑ya Dafi hibati‑ya kanahano,
“Bara mai‑ya Deoso tamine okaminiya, mai eyehe Deoso okahiyara, hika wayoma oda hirinaboneni.” Deoso‑ka yama hani‑ya Yeso tamine‑ya Dafi kanahanomatane.
10“Yodeo dai toha, Bara dai toha na, dai ya‑yainahi.” Deoso‑ka yama hani ati nineni.
11“Bara dai toha, Yodeo ai toha na, Deoso‑ya ai nafi kahiyarahi.” Deoso‑ka yama hani ati nineni.
12“Yese‑ka nodi kobonebonane, Bara mai‑ka hidi‑bonaha. Yese‑ka nodi Ati Amosabote‑ya Bara mai nofawahaboneni.” Isa·iya ati nematane, Deoso‑ka yama hani‑ya.
13Dai tamine Deoso‑ya ohiyarateni. Yama‑ya Deoso dai‑ya daanebona ati ne dai nimaniya, Deoso ene dai atibodi dai‑ya ati soma, dai habo siitora, dai ya‑yaina, Deoso‑ka Doni kite ene Deoso ati‑nima yama nabone dai watowahaboneni.
Bara mai‑ya Yeso Kirisito ati okaminabone
14Oka soho dai toha, yama dai wata, dai ene amosa, dai ibi kanawata, dai ene ya‑yai·oneni.
15Dai‑ka yama hani‑bone okanahana, owati kiti ba‑basi na, yama dai watamaro dai kadikamatasaboneni. Deoso owa‑ya kadike, owa‑ya kasomemarine, dai‑ya okanawatabonehe.
16Owa‑ya Deoso yosemarine, Bara dai‑ya Yeso Ati Amosabote okaminabonehe. Yeso ati dai nofiya, Deoso‑ka Doni dai‑ya hawa toniya, Deoso‑ya dai‑ya daa·oniya, dai‑ya kayafawahebonane.
17Deoso ati‑nima ona, Yeso Kirisito ati dai‑ya okamina, owa ene ya‑yai·oneni.
18Kirisito ene Bara dai‑ya ohiyara, owa ene dai awa, Yeso ati dai nofawaha, fare tamine okamini oharibonane.
19Yeso Kirisito owa‑ya kasome, Deoso‑ka Doni ene owa ene kita‑ya mai awamaroni. Yerosare‑ya mai wi‑wina, Iririko‑ya mai wi‑wina, hawi bai‑ya mai wi‑wina, mai na, owa ene‑ya mai awa, owati‑ya mai mita, mai namaroni. Deoso ati‑nima owa ene na, Yeso Kirisito ati‑ya mai dami mitamaroni.
20Yeso Kirisito ati‑ya mai mitaramaro mai‑ya ohiyarabisabone owatibodi ati nineni, Yeso Kirisito ati‑ya mai one kaminamete, mai nowati‑kaya owatibodi tokomaki nofarineni.
21“Kirisito tamine‑ya mai mitaramaro tamine mai himitawahebonane. Mai‑ya Kirisito tamine‑ya mai kaminaramaro, ati mai himiteya, ati mai hiwatowahebonane.” Deoso‑ka yama hani ati nineni.
Dai tabaro‑ya okabone
22Yeso Kirisito ati‑ya mai dami mitara mai ohiyara mai ihi dai tabaro‑ya toka kanibote oni awirani.
23Ahiyata‑ka oka yama anini hawa tohawaha, dai tabaro‑ya okabone onamaro dai tabaro‑ya owati tokasa nineni.
24Esibaniya‑ya okabone, dai tabaro‑ya kobo·oniya, dai‑ya ohiyaraboneni. Ai ibi hiyaranadiya, Esibaniya‑ya okabone, owa dai kasomaba awineni.
25Hibayata Yerosare‑ya okaboneni, Deoso ati‑ya mai no‑nofa mai‑ka yinero‑bona owakamabonehe.
26Masedoni‑ya mai wi‑wina, Akaiya‑ya mai wi‑wina mai na, yinero‑ya mai daanineni. Yerosare‑ya Yeso ati‑ya mai no‑nofa mai‑ka yamata tosiyo yanana, mai‑ya mai kasomabonehe.
27Yinero‑ya Bara mai daana, mai ya‑yainineni. Hibati‑ya Deoso ati‑ya Yodeo mai miti baha, makobote Yodeo mai ihi Deoso ati‑ya Bara mai mitamake, Yodeo mai‑ya Bara mai kasomamake, mai ihi amosineni.
28Yerosare‑ya mai wi‑wina mai‑ka yinero‑bona owakami hawa ohiya, Esibaniya‑ya okomakiya, dai tabaro‑ya owa amoni fa‑famaraba nabone owatibodi ati nineni.
29Dai tabaro‑ya kobo·oniya, Kirisito ai‑ya kasomi ba‑basi nebona owatibodi ati nineni.
30Oka soho dai toha, Yeso Kirisito ai‑ka ayo toha ne, Deoso‑ka Doni ene ai ibi nofa, owa‑ya dai kasoma, owa tamine Deoso‑ya dai hiyarahi.
31Yerosare‑ya okiya, Yodeya‑ya mai wi‑wina Yeso ati‑ya mai nofara owa‑ya mai watarabone, Yeso ati‑ya mai no‑nofa mai‑ka yinero‑bona owakameya, mai kayafabone dai ati nahi.
32Fara haa‑nima dai ati niya, Deoso owa‑ya kasomeya, dai tabaro‑ya kobo·oniya, dai oawiya, owa‑ya dai kasoma, ya‑yai·onaboneni.
33Deoso ai atibodi ati‑ya na‑nasoma dai‑ya sawiyaho. Feye amani.
Currently Selected:
Homa 15: jaaNT
Highlight
Share
Copy
Want to have your highlights saved across all your devices? Sign up or sign in
