Homa 10
10
1Oka soho dai amani. Owati dai mitahi. Isara·eo‑ka mai onofi nafe, Deoso‑ya mai tamine ohiyarateni. Yeso ati‑ya mai nafi nofiya, Deoso tabaro‑ya mai nafi tokabone owatibodi ati nofani.
2Deoso tabaro‑ya mai atibodi toki nofabisa, Deoso hawine sawi‑ya mai watorani.
3Yeso ati‑ya mai nofa‑mani, Deoso mai‑ya ati somawame nane. Hini mai ihi Deoso mai‑ya ati somawamebona mai atibodi ati na. Ai ene Deoso ai‑ya ati somawamatere‑ya mai watorani.
4Mose ati‑ya mai tokadababone mai ati na, Mose ati nafi‑ya mai tokadabara ene Mose ati mai‑ya barikane, Deoso tabaro‑ya mai koboraboneni. Yeso ati‑ya mai nofa, Mose ati mai‑ya barinami awirebona, Deoso mai‑ya ati somawamatene.
Yeso ati ai nofa, ai atibodi abaterabone
5“Owati hinama dai tokadabiya, dai‑ya Deoso ati somawamebonane.” Mose ati nematane.
6Yeso ati ai nofa, Deoso ai‑ya ati somawamane.
“Kirisito ati ai watabone, neme‑ya ai dodimakiho.” Ai atibodi‑ya ai ati riyahi.
7“Kirisito abemata, fara mai aba mai wi‑wina‑ya ai dodimakiho.” Ai atibodi ati rihi teni.
8Yama yaki‑ya Yeso tohare, ati ai nofe, ai atibodi‑ya sawi, tamine ai kaminatene.
9“Yeso oka hidi amane.” Dai ati na,
“Deoso ene Yeso kitamematane.” Dai atibodi ati na,
Deoso‑ka dai tohawaha, Deoso tabaro‑ya dai winaboneni.
10Yeso ati‑ya ai atibodi nofa, Deoso ai‑ya ati somawamatene.
“Yeso oka hidi amane.” Ai ati na,
Deoso‑ka ai tohateni.
11“Yeso ati‑ya mai no‑nofa mai habi siitora, Yeso ati‑nima yama na‑ya mai awawahaboneni.” Deoso‑ka yama hani ati nineni.
12Yodeo mai‑nima Bara mai na, mai‑ka hidi i‑di Yeso Kirisito tohe‑ya mai haana, fara hinama mai‑ya kasomi nafi tene.
13“Yeso Kirisito‑ya mai haana mai‑ya kasomatene, Deoso‑ka mai tohabonehe.” Deoso‑ka yama hani ati nineni.
14Yeso Kirisito ati‑ya mai nofara, Yeso‑ya mai haaterani. Yeso Kirisito tamine‑ya mai mitara, ati mai hinofaterebonane. Yeso Kirisito ati mai hikaminare, ati‑ya mai mitateraboneni.
15Deoso mai‑ya yosere‑mana, Yeso tamine‑ya mai kaminara neni.
“Yeso Kirisito tamine‑ya mai ka‑kamina mai kobona mai ihi ai ya‑yaiteni.” Deoso‑ka yama hani ati nineni.
16Deoso Ati Amosabote‑ya mai kamina, mai ati‑ya mai dami nofara.
“Deoso, tiwati oda kamina, oda ati‑ya mai nofarani.” Isa·iya ati ne, Deoso‑ka yama hani‑ya.
17Deoso Ati Amosabote Yeso tamine‑ya mai kamina, ati mai himiteya, ati mai hinofeba awane.
18Deoso ati‑ya mai nafi mitakarini? Ati mai nafi himitemarine. Yama Deoso wamahinamete‑ya wami nafi‑ya mai awineni.
“Yama wamani Deoso tamine‑ya kaminateni.” Deoso‑ka yama hani ati nineni.
“Deoso kitabote tohe, ai nafi‑ya nofane.” Hika yama wamani ati teni.
19“Deoso ati‑ya Isara·eo‑ka mai mitamete, ati mai hiwatokare? Ati mai hiwatowahane.” Owatibodi ati nineni.
Hibati‑ya Deoso ati‑ya Mose kanahano,
“Bara towe mai‑mone dai ati na, owati‑ya mai nofawahiya, owa dai kayawaboneni. Yama‑ya mai watoramone dai ati na, mai okasomiya, dai yawawahaboneni.” Deoso ati nematane.
20Isara·eo‑ka mai yawabone, mai‑ya i‑di Isa·iya wato, Deoso ati‑ya mai‑ya kaminanasa nane.
“Owa‑ya Bara mai sibara, owa‑ya mai haara, owa ene owa hawine‑ya mai wase, owa‑ya mai watoneni.” Deoso ati nematane.
21Isara·eo mai tamine‑ya Deoso hiyaramatase,
“Mahi‑nima mai haa·ona, owa‑ya mai kamara, mai ime kita, owati‑ya mai tokadabi nofarani.” Deoso ati nematane.
Currently Selected:
Homa 10: jaaNT
Highlight
Share
Copy
Want to have your highlights saved across all your devices? Sign up or sign in
