Mateo 17

Mahi noko‑nima Yeso noko nawahe

1Oda amoni 6 kani‑ya i‑di Bedoro, i‑di Tiyako, Tiyako sohori i‑di Yowaho, mai na, mai‑ya Yeso himane, adami nemehe tati‑ya mai tokomorosa, oda sawi awiramaroni.

2Adami tati‑ya mai kobona, mai noki‑ya Yeso hini wehene‑ya yananihi, mahi wehene‑nima Yeso noko wehene nawahe, hika bora sa‑sawani kita, wahi wadameteni.

3I‑di Mose, i‑di Eriya, mai fama, mai kobona, Yeso‑ya mai hiyarameteni.

4Mai‑ya Bedoro awe, ati yanane,

“Ayo, tiwa‑ya oda sawe, yama sibarini. Dai‑ka wa‑wasa‑ba wama·onaboneni. Tika ohari, Mose‑ka ohari, Eriya‑ka ohari nebonane.” Ati nematane.

5Bedoro hiyaranasa neya, neme sabi wahi wada mai‑ya barikanameteni. Neme sabi‑ya ati kaki,

“Oka Dao amane. Oka Dao onofi nafi, ati dai tokadabahi.” Ati nematane.

6Ati‑ya mai mita, mai wiyarisameteni, mai kakomehero.

7Mai‑ya Yeso boyone,

“Dai nahomisamahi. Dai habo siitoriyahi.” Yeso ati nematane.

8Mai kiikimisama, Yeso ohari‑ya mai awameteni.

9Makobote mai yananamatasa, mai tokofawamiya, mai‑ya Yeso hiyare,

“Adami tati‑ya yama dai awa tamine‑ya dai kaminariyahi. O·abiya, okitamiya, owa kitami hawa tohiya, yama dai awa tamine dai kaminabisaboneni.” Yeso ati nematane.

10Makobote Yeso‑ya mai hiyara,

“Mose‑ka yama hani ati‑ya mai ka‑kamina eya mai ati na,

‘I‑di Eriya koboni dai toheya, Deoso‑ka Ka‑kadika koboni yotobonane.’” Mai ati teni.

11Mai ati‑ya Yeso mite, ati yanane,

“Fara amani. Eriya koboni dai tohebona, yama nafi‑ya nataminawamebonane.

12Owati dai mitahi. Eriya koboni hawa tohe, Eriya‑ya mai watora, mai weeni hikitemarine. I‑di Eriya‑nima dai‑ka Ayo neme‑ke‑ya mai weeni kitaboneni.” Yeso ati nemarine.

13Yowaho Batita tamine‑ya Yeso hiyareya, yama‑ya mai watowahamaroni.

Kayatone‑ya nakitame

14Mai dama mai yorotokani‑kaya Yeso kobone, ai owa Yeso‑ya awe, Yeso noko‑kaya yobati tati‑kaya itemarine.

15“Ayo, oka dao tikasomahi. Oka dao ka‑kana ne. Hini‑ya werekaneya, yifo hirini‑ya sonari, faha‑ya boka, kayatona nofene.

16Tiwa‑ya mai da‑daba mai haa·ona, oka dao‑ya mai kasomabone, mai ihi kitarani.” Maki ati nemarine.

17Yeso ati yanane,

“Ka! Owati dai nofara, dai narabo hawirani. Owati dai wato kanibote nahi. Dai‑ya owa sawi nafimaraboneni. Yetene dai kakamahi!” Yeso ati nemarine.

18Madi towe‑ya Yeso weene, madi towe toke, yetene kitamawahemarine.

19Mai noki beheri‑kaya Yeso‑ya oda da‑daba Yeso‑ya oda hiyara,

“Madi towe oda weena, hini yamata ihi oda ene kitariti?” Oda ati namaroni.

20“Owati dai nofi nafira ihi madi towe kanarene. Owati amosa dai mitahi. Deoso ati‑ya dai nofi i‑isi niya, dai ene kitaboneni. Adami webote‑ya dai hiyariya, dai ati‑nima adami nawahaboneni.

21Deoso‑ya dai hiyari baha, dai tafi fawaniya, madi towe haa‑nima ne kanatene. Deoso‑ya dai hiyari awiriya, dai tafi fawariya, madi towe haa‑nima ne kanaterene.” Yeso ati nemarine.

22Karireya‑ya oda wina, oda‑ya hiyare,

“Dai‑ka Ayo neme‑ke‑ya ai owa daanebona,

23owa‑ya mai nanahababone, o·abiya, mahi 3 toheya, okitamaboneni.” Yeso ati ne, ati ene oda yawawahamaroni.

Deoso‑ka yobe‑ke yinero tamine

24Kafanaho‑ya oda kobona, Deoso‑ka yobe‑ke yinero‑bona‑ya mai ha‑haa Bedoro‑ya mai hiyara,

“Dai‑ya ka‑kanawato Deoso‑ka yobe‑ke yinero‑bona‑ya daanaraniha? Yama anini mahi fame‑ka manakone‑nima yama manakone nineni.” Mai ati namaroni.

25“Yinero‑ya daatene.” Bedoro ati nemarine.

Yobe‑ya Bedoro tokomakiya, Yeso haane,

“Simaho, tiwati omitaboneni. Ebeni‑ke‑ka yinero‑ya hidi webote mai haatiti? Bidi‑ka yinero‑ya haaterene. Mai one mai‑ka yinero‑ya haanibisatene.” Yeso ati nemarine.

26“Fara amani. Mai one mai‑ya yinero‑ya mai haateni.” Bedoro ati nemarine.

“Bidi mai‑ya yinero‑ya mai haaterani.” Yeso ati nemarine.

27“Mai yawariyahi. Faha widi‑ya tikamiya, ka‑kabi korotifiya, aba ohari tikanawasiya, aba ebene‑ya yinero tiwaseboneni. Yama anini mahi 4 kane‑ka manakone‑nima yinero nebonane. Yinero damatiniya, mai‑ya daatiyaho, ai fama ai manakone boneni.” Yeso ati nemarine.

Currently Selected:

Mateo 17: jaaNT

Highlight

Copy