Mateo 16
16
Yeso ene kite‑ya mai awabone mai ati na
1Fariseo mai toha, sadoseo mai toha na, mai kamake,
“Yeso, Deoso‑ka tihamone tina, neme‑ya tiwa ene kitabote oda awaboneni.” Mai ati namaroni, Yeso‑ya mai weenabonehe.
2“Mahi toke‑ya neme‑ya dai kiina, neme mawa tona,
‘Yama amosaminaboneni.’ Dai ati teni.
3Yama wahabisari‑ya neme‑ya dai kiina, neme mawa, neme sabi soki na,
‘Faha kakeboneni.’ Dai ati teni.
Neme‑ka yama kiini dai wata, Deoso ene‑ya dai awa, yama‑ya dai watorani.
4Towe dai amani. Deoso ati dai tokadabara, hiniya owa ene kitabote dai awabone dai ati na, dai ati‑nima oteraboneni. Yama dai awabone dai ati na, i‑di Yona ene‑mata‑nima yama na dai awabisaboneni.” Yeso ati ne, tokomemarine.
Fariseo mai‑ka femeto tamine
5Oda‑ka baho‑ya oda ati kadamowamamaroni. Faha kowani‑kaya oda kobona, Yeso ati yanane,
6“Dai noko wadahi. Fariseo mai toha, sadoseo mai toha na, mai‑ka femeto‑ya dai arabanahi.” Yeso ati nemarine.
7“Ai‑ka baho awira tamine‑ya Yeso hiyarane.” Oda ibi hiyara, oda ati namaroni.
8Oda ati‑ya Yeso wato, oda‑ya hiyare,
“Ka! Owa ene kitaramone dai atibodi ati na awineni. Baho yokana tamine‑ya ohiyari awirani.
9Yama dai wato kanibote rani. Owa ene dai awa, 5.000 mai kana baho 5 kana‑ya mai onatafa, mai korimana, hisiri kiba dama hasina, tamine‑ya dai ati kadamowama awineni.
104.000 mai kana, baho 7 kana‑ya mai onatafa, mai korimana, hisiri kiba dama hasina, tamine‑ya dai ati kadamowama awineni.
11Yama dai watora, baho yokana tamine‑ya ohiyari awirani. Fariseo mai toha, sadoseo mai toha na, mai‑ka femeto‑ya dai arabanahi.” Yeso ati nemarine.
12 # 16:12 Femeto dodama‑nima fariseo mai ati towe dodamateni. Fara Yeso mai‑ya kanawatomatamonane, fariseo mai ati‑ya mai nofarabonehe. Makobote yama oda watowaha, femeto yokana tamine‑ya Yeso hiyari awire, mai ati tamine‑ya Yeso hiyarabisane.
Kirisito i‑di Deoso Bidi amane
13Sesareya Firibo‑ya oda kobona, oda‑ya hiyare,
“Dai‑ka Ayo neme‑ke tamine‑ya mai hiyara, eme mai ati niti?” Yeso ati ne,
14“‘Yowaho Batita amane.’ Mai one ati nihi,
‘I‑di Eriya amane.’ Mai one ati nihi,
‘Yeremiya amane.’ Mai one ati nihi,
‘Deoso ati‑ya mai mi‑mita‑mete mai‑ka owa amane.’ Mai one ati nihi teni.” Oda ati namaroni.
15“Dai‑ta eme dai ati niti?” Yeso ati nemarine.
16“Deoso‑ka Ka‑kadika amatini. Deoso yokana Bidi amatini.” Simaho Bedoro ati nemarine.
17“Simaho, Yona bidi amatini. Ya‑yaitinahi. Owa tiwatobisineni. Bofe‑ka mai ihi tohi awira, Okobi neme‑ke ene yama tiwatowahani.
18Owati timitahi. Tiwa oni Bedoro toha, yati oni‑ya weyetineni. Okobi yati webote‑nima ne, Okobi ene oka mai damawahabone, mai tosiyoteraboneni.
19 # 16:19 Deoso‑ka safi Bedoro‑ya daanabone Yeso ati ne, Bedoro‑ya Yeso yosene, hika mai hinawadabonehe. Deoso‑ka safi tiwa‑ya daa·onabone, neme‑ya Deoso mai‑ya barikaneya, bofe‑ya mai baritikanahareboneni. Neme‑ya Deoso mai‑ya seekaneya, bofe‑ya mai seetikanahareboneni.
20Deoso‑ka Ka‑kadika ama·oni. Hiniya owa tamine dai hiyarariyahi.” Yeso ati nemarine.
Yeso abebona tamine‑ya hiyare
21Yeso abebona, hini tamine‑ya hiyare,
“Yerosare‑ya ai tokaboneni. Yodeo mai‑ka hidi mai bi‑bidi na mai toha, Mose‑ka yama hani ati‑ya mai ka‑kamina mai toha, Deoso‑ka yama‑bone‑ya mai da‑daa mai‑ka hidi mai toha, mai na, dai‑ka Ayo neme‑ke ati‑ya mai nofarabone, mai weeni hikitebona, mai hinahabeya, mahi 3 tohe‑ya okitamaboneni.” Yeso ati nemarine.
22Ahiyata‑ya Yeso‑ya Bedoro towake, fai‑ya weene,
“Ayo, haa‑nima tiwati riyahi. Tiwati‑nima yama ni awiteraboneni.” Bedoro ati nemarine.
23Bedoro‑ya Yeso hiyarebona, tonokowame, ati yanane,
“Satanasi ati‑nima tiwati nineni. Owa‑ya tiwati baririyahi. Deoso‑ka yama nokotini awira, hini tiwatibodi ati‑ya nokotinibisineni.” Yeso ati nemarine.
24Yeso‑ya oda da‑daba oda‑ya Yeso hiyaramaki,
“Owa‑ya dai ati daba, dai‑ka yama dai nokotoniriyahi. Owa‑ya dai dabiya, owa‑ya mai nanahababone‑nima dai‑ya mai nanahabahareba awineni.
25 # 16:25 Yeso‑ya dai nofa dai‑ya mai nanahabiya, Deoso tabaro‑ya dai ya‑yainaboneni. Yeso ati‑ya mai tokadabara, mai ohinaboneni. Owa‑ya dai nofa dai‑ya mai nanahabiya, dai abaraboneni. Oda abariyahi dai ati niya, owati‑ya dai tokadabara, dai ababoneni.
26Yama dama‑ya mai kihamaro mai abiya, mai‑ka yama mai‑ya kasomateraboneni. Owati‑ya mai nofara yama hirini‑kaya mai sawiwahaboneni. Yinero‑ya ai atibodi manakone abaterani.
27Deoso‑ka yo‑yose mai eyehe okomatasabone, Okobi wehene owa‑ya sawibonane. Bofe‑ka dai ene‑nima dai ene manakone na daa·onaboneni.
28Owati amosabote dai mitahi. Dai one abi awisari‑ya dai‑ka Ayo neme‑ke kiti yananebona dai one awaboneni.” Yeso ati nemarine.
Currently Selected:
Mateo 16: jaaNT
Highlight
Share
Copy
Want to have your highlights saved across all your devices? Sign up or sign in
