Mateo 18
18
Ebeni‑ke kitabisabonati?
1Bedoro‑ya hiyari hawa tohe, Yeso‑ya oda da‑daba oda one kamake, Yeso‑ya oda hiyara,
“Neme‑ke ai nafi‑ka hidi kitabote tohawahebona koboneya, ebeni‑ke kiti ba‑basi nabati?” Oda ati namaroni.
2Ewe‑ya Yeso haane, oda teberi‑ya waimarine.
3“Owati amosa dai mitahi. Dai ene amosawahi awiriya, Neme‑ke ai nafi‑ka hidi kitabote tohawahe‑ya dai sawiraboneni. Madehe‑nima dai nawawahiya, dai sawibisaboneni.
4‘Mai‑ka hidi ama·ora, mai‑ka yo‑yose ama·obisineni.’ Madehe ati teni.
Fara madehe‑nima dai niya,
‘Mai‑ka yo‑yose ama·oni.’ Dai ati nibisa,
Neme‑ke ai nafi‑ka hidi kitabote tohawahebona‑ya dai sawebone, hidi kiti ba‑basi ne dai tohawahaboneni.
5‘Owa ene Yeso ya‑yainebonane.’ Dai atibodi ati na,
ewe dai kasomiya, owa‑ya dai kasomaharineni.
6Dai one ati ene owati‑ya ewe nofamareya, hini ene towe manakone wadebonane. Hini ene towe tohi awisareya, yati webote‑ya namidi mai yadihineya, faha webote‑ya bokeya, abeya, yama sibarabone, komene bi‑bidi nibisebonane. Ene towe tohe, hini ene manakone komene nafibisebonane.
7Ka! Bofe‑ya mai wi‑wina mai one ati ihi owati‑ya mai one tokadabara, mai ihi manakone wadani.
8 # 18:8-9 Yama towe ai nokotonihe, ai yehe, ai teme, ai nokobodi na ihi tohi awira, ai atibodi ene tohabisani. Wara hirini kome kita tamine‑ya Yeso ai‑ya kanawatone. Tiwa yehe, tiwa teme na ene yama towe nokotinihe, tiwa yehe, tiwa teme na wisitinakosahi, yama towe‑ya nokotinimaterabonehe. Tiwa yehe ohari, tiwa teme ohari ni‑ya ti·abiya, tikitamiya, ti·abarabone‑kaya kobotina, yama sibabisaraboneni. Tiwa yehe fama, tiwa teme fama ni‑ya ti·abiya, tikitamiya, yama hirini fawaterabone‑kaya tikiya, yama towe tohawahaboneni.
9Tiwa nokobodi one ene yama towe nokotiniya, tiwa noko one sobatinakihi, yama towe‑ya nokotinimarabonehe. Tiwa nokobodi ohari‑ya ti·abiya, tikitamiya, ti·abarabone‑kaya kobotina, yama sibabisaraboneni. Tiwa noko fami‑ya ti·abiya, tikitamiya, wara hirini‑kaya tikiya, yama towe tohaboneni.
Kaneiro fawane tamine
10“Owati dai mitahi.
‘Madehe towe hini tohiya.’ Dai atibodi ati riyahi.
Okobi tabaro‑ya Deoso‑ka yo‑yose madehe‑ya mai kayawateni.
11Bofe‑ya dai wi‑wina Deoso hawine dai watora, dai‑ya okemaroni, dai‑ya okasomabonehe.
12Ai owa‑ka kaneiro mai 100 kana mai toha, ohari fawaneya, mai 99 kana mai naha, owa fawane hidi sibahitine.
13Owati amosa dai mitahi. Kaneiro fawane‑ya wasi, ya‑yaitene. Kaneiro mai one ihi ya‑yaini awire, hiwasi ene ya‑yainibisatene.
14Ai‑ka Abi neme‑ke tabaro‑ya ai nafi winabone Deoso atibodi ati ne, tabaro‑ya madehe one tokara, Deoso yawebonane.
Ai owa ene amosare tamine
15Dai owa ene amosare, ohari tihiyaraho. Ene amosare tihiyare, tiwati‑ya nofeya, yama amosaboneni. Dai ya‑yainaboneni.
16Tiwati‑ya nofareya, dai fama dai towakeya, dai fama dai ati‑ya nofeba awane.
‘Mai fama mai ati fara kafama, mai ati ai nofateni.’ Deoso‑ka yama hani ati nineni.
17Dai ati‑ya nofare, Deoso‑ka dai toha dai yorotokaniya, mai‑ya dai hiyarahi. Makobote, dai dama dai ati yananahi. Dai nafi ati‑ya nofareya, dai owa tohamare‑nima nebonane.
18Owati amosa dai mitahi. Neme‑ya Deoso mai‑ya barikaneya, bofe‑ya mai baritikanahareboneni. Neme‑ya Deoso mai‑ya seekaneya, bofe‑ya mai seetikanahareboneni.
19Deoso‑ya dai hiyara, dai fama dai ati fara kafamiya, yama dai ati kobohina‑ya Deoso daanebonane.
20Owa dai nofa dai fa‑famaraba na, dai yorotokaniya, dai‑ya osaweboneni.” Yeso ati nemarine.
Ai ati somawama tamine
21Bedoro kamaki, Yeso‑ya hiyare,
“Ayo, owa‑ya mai weenadiya, mai‑ya owati somawami 7 kana, sibakarini?” Bedoro ati nemarine.
22“Tiwati somawami 7 toharaboneni. Tiwati somawami 490 kana tohabisahi.
23Neme‑ke ai nafi‑ka hidi kitabote tohawahebona tamine dai mitahi. Mai‑ka hidi webote mai‑ya haane, mai‑ka yama manakone‑ya mai daa kanibote nabonehe.
24Hidi‑ka yo‑yose maki owa‑ya kakame, hika yama manakone nafe, yama anini faha fowe dama manakone‑nima maki‑ka yama manakone nineni.
25Yinero nafire ene hidi yawe, maki‑ka yobe, maki‑ka yama toha, maki abano, fadi, bidi mai toha, mai na, mai one mai‑ya mai‑ya daanebonane, yinero‑ya kayafebonaha.
26Maki kakomehe, yobati‑kaya ite,
‘Oka hidi amatini. Owa daatiriyahi. Hibareya, yama manakone nafi daa·onaboneni.’ Maki ati nane.
27Hidi ati somawame,
‘Hehe, sibaraboneni. Tiwa manakone haa·onamaraboneni.’ Hidi ati nane.
28Maki toke, hika owa‑ya hiyare, hika yama manakone‑ya haane, fara yama anini abariko 4 kane‑ka manakone‑nima hika owa‑ka yama manakone nineni. Hika owa namidi‑ya waratone,
‘Oka yinero‑ba daanama kanibote tinahi.’ Maki ati nane.
29Ai owa yobati‑kaya ite,
‘Hibareya, yama manakone onahababoneni.’ Ati nane.
30Fai ati‑ya nofare, kadeya‑ya hinawaane,
‘Tiwa manakone abiya, tiwa‑ya mai seekanaboneni.’ Maki ati nane.
31Ati ene mai one yawa, mai‑ka hidi narabo‑ya mai kaminani.
32Maki hidi haahine, kame,
‘Towe amatini. Owa haatina, tiwa manakone haa·onamarabone onani.
33Owa ene‑nima tiwa ene na‑mani, sibara neni.’ Hidi ati nane.
34Hidi yawe, kadeya‑ya maki‑ya nawaane. Maki manakone abeya, maki‑ya mai seekanebonane.
35Fara‑nima dai owa‑ya dai ati somawamara, Okobi neme‑ke dai‑ya weenebonane.” Yeso ati nemarine.
Currently Selected:
Mateo 18: jaaNT
Highlight
Share
Copy
Want to have your highlights saved across all your devices? Sign up or sign in
