Roka 3
3
Yowaho Batita mai‑ya hiyare
1I‑di Yowaho mai dama mai‑ya hiyare, hika ano tamine okaminaboneni. Ai nafi‑ka hidi webote i‑di Tibiro Sesa tohemata, fare hidi tohe‑ka hika faha fowe 15 tohi‑ya Yowaho‑ya Deoso hiyarematane. Abireni‑ka mai‑ka hidi i‑di Risaniya toha, Yodeya‑ka mai‑ka hidi i‑di Bonisiyo Birato toha, Karireya‑ka mai‑ka hidi i‑di Erodi toha, Itoreya, tirakonitisi na‑ke hidi i‑di Erodi sohori i‑di Firibi toha, mai namaroni.
2Deoso‑ka yama‑bone‑ya mai da‑daa mai‑ka hidi webote i‑di Anasi i‑di Kaifo mai fama mai namaroni. Tabora dami‑ka mai‑ka hidi mai oni hiri·ona, i‑di Yowaho‑ka ano tamine amani. Sakariya bidi i‑di Yowaho‑ya Deoso hiyarematane, kabani‑kaya.
3Deoso ati ene Yodaho Faha‑ya Yowaho tokawahe, mai dama mai‑ya hiyare,
“Dai atibodi yama‑ya kadikiya, eya dai atibodi ati nahi.
‘Deoso, oda ene amosaramaro, oda tikasomahi, oda ene amosawamabonehe.’ Dai ati nahi.
Eya dai atibodi ati niya, Deoso dai ene manakone‑ya haanamarebona, dai‑ya haba·onirisaboneni.” Yowaho Batita ati ne, ati damematane.
4Hibati‑ya Yowaho tamine‑bona‑ya Isa·iya kanahanomatamonane.
“Bofe‑ke mai‑ka owa kabani‑kaya ati yananeya,
‘Ai‑ka Hidi webote hawine‑bona dai namosahi.’ Ati nebonane.
5 # 3:5 Ai atibodi hawine namosabone tamine amani. Faha hawi‑ya wami kayanawahaboneni. Adami tati abiya, wami kariwahaboneni. Hawi ke‑keona hawi daatowiteboneni. Hawi‑ka wami botoroma amosawamaboneni.
6Deoso ai‑ya kasomebona, mai nafi awawahaboneni.” Isa·iya‑ka yama hani ati nineni.
7Yowaho mai‑ya habanirisebona, mai dama mai kamake, mai‑ya Yowaho hiyare,
“Maka ihi‑nima dai ene na, ebeni‑ke ati ene Deoso‑ya dai nayofiniti?
8Dai abarabone dai ati niya, dai ene amosawamiyahi.
‘Abaraho‑ka nodi oda amani. Deoso oda‑ya sarikiterebonane.’ Dai ati riyahi.
Owati dai mitahi. Abaraho‑ka nodi mai one‑bone‑ya Deoso ati wamane‑mana, yati‑ya mai‑ya Deoso wamane nane.
9Awa bono bonora toha, awa bono kabi amosara toha na, ade ai kaana, ai sarikiteni. Fara‑nima Deoso bari‑ya maakani hawa tohane. Dai ene amosawami awiriya, awa kaana‑nima Deoso dai‑ya niwahebonane. Dai‑ya nanahabeya, dai‑ya sarikanebonane.” Yowaho ati nematane.
10“Hini yamata‑nima oda nibati?” Mai dama mai ati nameteni.
11“Tika bora fama toha, ai owa bora‑ya kihare, hika bora ohare‑bone daatiyahi. Tiwa tefe toha, kote daatiyahi, mai tafe wadara mai‑ya.” Yowaho ati nematane.
12Kofeno‑ka yinero‑bona‑ya mai ha‑haa mai kamakemeteni, Yowaho mai‑ya habanirisebonaha.
“Ayo, hini yamata‑nima oda nibati?” Mai ati na,
13“Kofeno‑ka yinero‑bona‑ya dai ha‑haa yama manakone fiyakana‑ya dai haarihi, yinero kote dai kayafarihi nahi.” Yowaho ati nematane.
14“Hini yamata‑nima oda nibati?” Sodado mai ati na,
“Mai‑ka yinero honita dai haariyahi. Mai tamine keyehe‑ya dai hiririyahi. Dai‑ka yama anini manakone nafira, dai yawariyahi, dai ya‑yainibisahi.” Yowaho ati nematane.
15Deoso‑ka Ka‑kadika‑ya mai nafi nimana,
“Yowaho i‑di Deoso‑ka Ka‑kadika tohe awane.” Mai atibodi ati nameteni.
16“Deoso‑ka Ka‑kadika ohi awirini. Faha‑ya dai‑ya haba·onirisabisateni. Kamaki‑bona kitabotebisa amane. Owa‑ta towebisa ama·oni. Amosabote amane. Ati ene Deoso‑ka Doni dai one‑ya sawiwahebonane. Ai nafi‑ya kadikeya, dai one‑ya sarikanebonane.
17Tiriko atori abi hawa toha, atori ai sarikana‑nima mai ihi amosara mai‑ya sarikanebona, yama hirini fawateraboneni. Tiriko noki ai kayafi‑nima mai ihi amosa mai‑ya kayafebonane.” Yowaho ati nematane.
18Deoso ati amosabote tamine‑ya mai‑ya hiyare, mai‑ya hiyari damematane.
19Karireya‑ka mai‑ka hidi i‑di Erodi tohe, ene towe dame, anidi fadi i‑di Erodiasi‑ya famawahematane. Ene towe dama ihi i‑di Yowaho weehinematane.
20Makobote Erodi Yowaho‑ya kadeya‑ya nafoye, ene towe tohamatasematane.
Yowaho Yeso‑ya habanirise
21Yowaho mai‑ya habanirise, Yeso‑ya habanirisahari nematane. Deoso‑ya Yeso hiyare, neme‑ya Deoso seekanematane.
22Yeso‑ya Deoso‑ka Doni kise, wayomata awi‑nima Deoso‑ka Doni awinematane. Neme‑ya ati kaki,
“Oka Dao amatini. Tiwa onofi nafineni. Tiwa ene amosa ene ya‑yai·oneni.” Ati nematane.
Yeso‑ka idi mai oni
23Yeso‑ka ano 30 tohiya, mai dami‑ya hiyarawahematane.
Yeso badi‑mona i‑di Yose tohematane. Yose badi i‑di Eri tohe,
24Eri badi i‑di Matate tohe, Matate badi i‑di Refi tohe, Refi badi i‑di Meoki tohe, Meoki badi i‑di Yanai tohe, Yanai badi i‑di Yose tohe,
25Yose badi i‑di Matatiya tohe, Matatiya badi i‑di Amosi tohe, Amosi badi i‑di Naho tohe, Naho badi i‑di Esiri tohe, Esiri badi i‑di Nakai tohe,
26Nakai badi i‑di Maate tohe, Maate badi i‑di Matatiya tohe, Matatiya badi i‑di Semei tohe, Semei badi i‑di Yoseki tohe, Yoseki badi i‑di Yoda tohe,
27Yoda badi i‑di Yohana tohe, Yohana badi i‑di Resa tohe, Resa badi i‑di Sorobabeo tohe, Sorobabeo badi i‑di Saratieo tohe, Saratieo badi i‑di Neri tohe,
28Neri badi i‑di Meoki tohe, Meoki badi i‑di Adi tohe, Adi badi i‑di Kosaha tohe, Kosaha badi i‑di Eomadaho tohe, Eomadaho badi i‑di Ere tohe,
29Ere badi i‑di Yosowe tohe, Yosowe badi i‑di Eriesa tohe, Eriesa badi i‑di Yorini tohe, Yorini badi i‑di Matate tohe, Matate badi i‑di Refi tohe,
30Refi badi i‑di Simiyaho tohe, Simiyaho badi i‑di Yoda tohe, Yoda badi i‑di Yose tohe, Yose badi i‑di Yona tohe, Yona badi i‑di Eriaki tohe,
31Eriaki badi i‑di Mereya tohe, Mereya badi i‑di Mena tohe, Mena badi i‑di Matata tohe, Matata badi i‑di Nataha tohe, Nataha badi i‑di Dafi tohe,
32Dafi badi i‑di Yese tohe, Yese badi i‑di Obedi tohe, Obedi badi i‑di Bowasi tohe, Bowasi badi i‑di Sera tohe, Sera badi i‑di Nasomi tohe,
33Nasomi badi i‑di Aminadabi tohe, Aminadabi badi i‑di Araho tohe, Araho badi i‑di Arani tohe, Arani badi i‑di Esiro tohe, Esiro badi i‑di Feresi tohe, Feresi badi i‑di Yoda tohe,
34Yoda badi i‑di Yako tohe, Yako badi i‑di Isaki tohe, Isaki badi i‑di Abaraho tohe, Abaraho badi i‑di Tera tohe, Tera badi i‑di Na·o tohe,
35Na·o badi i‑di Seroki tohe, Seroki badi i‑di Haka·o tohe, Haka·o badi i‑di Bereki tohe, Bereki badi i‑di Ebere tohe, Ebere badi i‑di Sera tohe,
36Sera badi i‑di Kaina tohe, Kaina badi i‑di Arafasadi tohe, Arafasadi badi i‑di Seme tohe, Seme badi i‑di Nowe tohe, Nowe badi i‑di Rameki tohe,
37Rameki badi i‑di Matosare tohe, Matosare badi i‑di Enoki tohe, Enoki badi i‑di Yaradi tohe, Yaradi badi i‑di Marareo tohe, Marareo badi i‑di Kaina tohe,
38Kaina badi i‑di Inosi tohe, Inosi badi i‑di Seti tohe, Seti badi i‑di Adaho tohe, Adaho badi i‑di Deoso tohematamonane.
Currently Selected:
Roka 3: jaaNT
Highlight
Share
Copy
Want to have your highlights saved across all your devices? Sign up or sign in
