Roka 2
2
Yeso wadane
1-2Hibati‑ya tabora nafi‑ka ai oni‑ya Sesa Akosito ati ene hika mai kanahano damamaroni. I‑di Yowaho wadi nowati‑ya ai oni‑ya mai kanahano, fara tamine okaminaboneni. I‑di Kirino Siriya‑ya mai wi‑wina mai‑ka kofenado tohe‑ya ai oni‑ya kanahano daidi tamine amane.
3Ai‑ka idi mai tabori‑ya oda nafi tokomamaroni, ai oni‑ya sodado mai kanahanaro.
4-5 # 2:4-5 Mariya i‑di Yose fadi yokana, Yose‑ka yobe‑ya wina, mai ibi dakorara, i‑di Yeso wadi nowati‑ya mai ibi dakorawahameteni. Nasare Karireya‑ya Yose fadi‑bone eyehe yanane, Bere Yodeya‑ya tokematane, mai oni‑ya sodado mai kanahanabonehe. Bere‑ya Yose‑ka idi i‑di Dafi tabaro tohematane. Mariya‑ya i‑di Yose famanasa reya, Mariya naba tohameteni.
6Bere‑ya Mariya dori kome yananameteni.
7Mai‑ka oteo‑ya Yose fadi eyehe winebona, oteo kibamone mai ati na, yobe one‑ya Yose fadi eyehe wine, Mariya bidi wade, bora ibe‑ya mai kinihikane, bani mai tafe wiye‑ya forimatane.
Deoso‑ka yo‑yose‑ya mai awa
8Bere yakari‑ya yobe awire‑kaya kaneiro mai‑ya mai na‑nawada mai sawe, yama soki‑ya mai nahokosameteni.
9Mai nahokosiya, Deoso‑ka yo‑yose mai noki‑ya fodoki, Deoso wehene sawi ene mai naho‑kaya yama tehewama, mai habi siitonameteni.
10Deoso‑ka yo‑yose mai‑ya hiyare,
“Dai habo siitoriyahi. Yama amosa tamine okaminabone, owati dai mita, dai ya‑yainaboneni. Bofe‑ya dai wi‑wina dai nafi‑ya Deoso kasomebonane.
11Hibayata Dafi tabaro‑mata‑ya ewe wade, dai‑ya Ka‑kasoma‑tebona amane. Deoso‑ka Ka‑kadika amane. Ai‑ka Hidi Webote amane.
12Owati dai nofabone, dai awebona tamine okaminebonane. Ewe dai wasiya, bora ibe‑ya mai kinihikane, bani mai tafe wiye‑ya forine.” Deoso‑ka yo‑yose ati nematane.
13Deoso‑ka yo‑yose wai‑ya Deoso‑ka yo‑yose mai one dama fodomake, Deoso‑ya mai kahiyara,
14“Deoso neme‑ya wine, Deoso amosabote amane. Bofe‑ya dai wi‑wina, Deoso dai‑ya nofe, dai ya‑yainahi.” Mai ati nameteni.
15Neme‑ya Deoso‑ka yo‑yose mai tokoma, mai nowati‑ya kaneiro mai‑ya mai na‑nawada mai ibi hiyara,
“Hima, Bere‑ya ai tokahi. Deoso ati ene tamine ai mite, ai awaho.” Mai ati nameteni.
16Mai toka kanibote na, i‑di Mariya, i‑di Yose, ewe ne‑ya mai awameteni. Bani mai tafe wiye‑ya ewe fori‑ya mai awa,
17mai awi hawa hihe, mai wininama, Deoso‑ka yo‑yose ati‑ya mai kaminameteni, mai dami‑ya.
18Kaneiro mai‑ya mai na‑nawada mai ati‑ya mai mita, mai atibodi yama‑ya kadikameteni.
19I‑di Mariya atibodi yama‑ya kadiki fawani awirameteni.
20Kaneiro mai‑ya mai na‑nawada, mai‑ka kaneiro mai‑ya mai tokomatasa, mai ya‑yaini nafe, yama tamine amosa‑ya mai mita, yama amosa‑ya mai awa na, Deoso‑ya mai kahiyarameteni.
Yeso oni tohawahe
21Hibati‑ya Mariya naba tohi awisari‑ya Deoso‑ka yo‑yose ati‑ya Mariya mitameteni. Ewe amoni 8 kane‑ya Deoso‑ka yo‑yose ati‑nima bidi oni Yeso tohawahe, sowiri tati ataro mai wisihinakosematane.
Deoso‑ka yobe‑ya Yeso‑ya mai towaka
22 # 2:22 Mai fanawi dori wadiya, mai towe toha‑nima mai na mai amoni 33 kani‑ya mai manakone‑bone‑ya mai daaniyahi. Mose‑ka yama hani ati neni. I‑di Mariya amoni kobonameteni, Mose‑ka yama hani ati‑nima towe fawanabonehe. Yerosare‑ya Yeso‑ya mai towakamameteni, Deoso‑ya mai daahinebonaha.
23Deoso‑ka yama hani ati,
“Ewe daidi maki toheya, Deoso‑ya dai daanayaho, Deoso‑ka tohebonaha.” Yama hani ati nineni.
24Deoso‑ka yama hani ati one,
“Dai‑ka ewe manakone‑bona okoko mai fama mai dai daanahi, Deoso‑ya. Okoko mai awiriya, wayomata mai fama mai dai daanibisahi.” Yama hani ati nineni.
Fara Mose‑ka Yama hani ati‑nima Deoso‑ka bani bidi mai‑bone mai‑ya mai daanameteni.
Simiyaho tamine
25Simiyaho tamine timitahi. Yerosare‑ya i‑di Simiyaho sawi, ene amose, Deoso ati‑ya nofematane. Deoso‑ka Ka‑kadika Isara·eo‑ka nodi mai‑ya kasomatebona yama hani ati na, fara‑ya Simiyaho nimanematane. Deoso‑ka Doni Simiyaho‑ya sawimatane.
26Hibati‑ya Deoso‑ka Doni ati‑ya Simiyaho mite,
“Simiyaho, ti·abi awisa tiriya, Deoso‑ka Ka‑kadika tiwebonane.” Deoso‑ka Doni ati nematane.
27Deoso‑ka Doni ati ene Deoso‑ka yobe‑ya Simiyaho tokiyomematane. Yeso badi, Yeso madi, mai na mai kamakemeteni, Mose‑ka yama hani ati‑nima Yeso‑ya mai daanabonehe, Deoso‑ya.
28Yeso‑ya i‑di Simiyaho awe, Yeso‑ya waratone, Yeso‑ya diwane, Deoso‑ya kahiyare,
29“Deoso, tiwa‑ya na‑narifa ama·oni. Tika Ka‑kadika oawebona tinamaro, tiwati‑nima oawawahane. Hibayata o·abiya, yama sibaraboneni. Ya‑yai·oneni.
30Tika Ka‑kadika mai dami‑ya kasomatebona oawane.
31Mai nafi hiawawahebonane.
32Tika Ka‑kadika yama wahi‑nima ne, tiwa hawine‑ya Bara mai‑ya yofikanebonane. Isara·eo‑ka nodi ai toha tika ai amani. Tika Ka‑kadika ene ai ya‑yainaboneni.” Simiyaho ati nematane.
33Yeso tamine‑ya Simiyaho hiyare, ati‑ya Yeso badi, madi, mai na, mai mita, mai atibodi yama‑ya kadikameteni.
34I‑di Simiyaho mai‑ya kasomebona mai tamine‑ya Deoso‑ya hiyare,
“Deoso, mai kasomi tinafihi.” Simiyaho ati ne,
Mariya‑ya hiyare,
“Owati timitahi. Deoso‑ka hawi‑ya mai sawira, tika dao ene Deoso hawine‑ya mai sawiwahabone, mai one amosamone tika dao ene mai atibodi towe mai dami watowahaboneni. Tika dao‑ya mai weenaboneni.
35 # 2:35 Yama kobonabone i‑di Yeso mai hinahabebona tamine amane. Yama kobonaboneni, mai atibodi ati‑ya ai watowahabonehe. Koboni‑ya tika yawa kitaboneni.” Simiyaho ati nematane.
36Simiyaho hiyari hawa toheya, Ana kamakemeteni. Ase‑ka nodi amani. I‑di Fanoeo bide amani. Deoso ati‑ya mi‑mita amani. Bote tohawahameteni. Hibati‑ya fanamete, ano 7 kane‑ya maki abe,
37i‑di Ana hasinibisa, hika ano 84 tohameteni. Deoso‑ka yobe‑ya i‑di Ana sawi fawara, yama tehe‑ya Deoso‑ya hiyara, yama soki‑ya Deoso‑ya hiyara, tafi nafira, Deoso‑ya kahiyarameteni.
38I‑di Ana kamake, Yeso‑ya awa, ya‑yaina, Deoso‑ya kahiyarameteni. Deoso ati ene Yerosare‑ya Bara mai kayafamarabone, Deoso‑ka yama hani ati na, yama hani ati‑ya mai nimana, fara mai‑ya Yeso tamine‑ya i‑di Ana kaminameteni.
Nasare‑kaya mai tokoma
39Deoso‑ka yama hani ati‑nima mai ihi hawa toha, hini mai tabori‑ya mai tokomawaha, Nasare Karireya‑ya mai tabori tohameteni.
40Yeso yane, kitawahe, yama‑ya watowahematane. Yeso‑ya Deoso nofe, Yeso‑ya kasomematane.
Deoso‑ka yobe‑ya Yeso mai‑ya hiyare
41 # 2:41 Ka‑kariwa feriado oni amani. Ka‑kariwa koboni‑nima Yerosare‑ya mai dama mai tokameteni. I‑di Yose i‑di Mariya mai fama, mai‑ka madehe eyehe Yerosare‑ya mai tokaharemeteni.
42I‑di Yeso‑ka ano 12 tohawahiya, ka‑kariwa kobonami yanatoniya, Yerosare‑ya mai tokomatasameteni, mai tafabonehe.
43Ka‑kariwa‑ka mahi 7 kane hawa toheya, hini mai tabori‑ya mai tokoma, Yeso‑ta Yerosare‑ya towakose, badi, madi mai na Yeso‑ya mai watomarameteni.
44“Ai dama ai one‑ya Yeso sawi awane.” Badi, madi, mai atibodi ati nameteni.
Yama soki‑ya Yeso‑ya mai sibanameteni.
45Yeso‑ya mai wasira, Yerosare‑ya mai winitokanamameteni, Yeso‑ya mai sibanabonehe.
46Mahi 3 kane‑ya Deoso‑ka yobe‑ya mai hiwasiwamematane. Deoso ati‑ya mai ka‑kanawato mai‑ya dabe, mai ati‑ya mite, mai‑ya hiyarematane.
47Yeso ati‑ya mai mita,
“Ka! Yeso yama‑ya watone.” Mai atibodi ati nameteni.
48I‑di Yose fadi‑ya fame, Yeso‑ya mai awa, mai atibodi yama‑ya kadikameteni. Yeso‑ya madi hiyara,
“Hini yamata ihi fawatiniti? Tiwa‑ya abi oda sibana, tiwa ene oda‑ka yama yofinani.” Madi ati nameteni.
49“Okobi noko·onihe, Okobi‑ka yobe‑ya osawe, hini yamata ihi owa‑ya sibatiniti?” Yeso ati nematane.
50Yeso ati‑ya mai watorameteni.
51Nasare‑kaya Yeso badi, madi mai na mai eyehe tokome, mai ati‑ya tokadabematane. Yeso ati‑ya Mariya atibodi kadiki fawani awirameteni.
52Yeso yetene tohawahe, yama‑ya watowahematane. I‑di Yeso‑ya Deoso nofi nafi, Yeso ati‑ya mai dama mai nofameteni.
Currently Selected:
Roka 2: jaaNT
Highlight
Share
Copy
Want to have your highlights saved across all your devices? Sign up or sign in
