Roka 1

Yeso tamine okanahanabone

1Ai one sawi‑kaya yama yanana tamine mai dama mai kanahanamaroni.

2Yeso ene‑ya mai awamaro Yeso ene‑ya mai nokotonihe, ai‑ya mai kanawatowahamaroni.

3Mai ati omita, mai‑ka yama hani okadika, yama owatowahamaroni. Ti·ofiro, tika yama hani‑bone okanahanoneni. Yeso ene tamine okamini amosineni.

4Hibati‑ya Yeso tamine timitemari, tosawari awira tiwatowahabone Yeso tamine okamini amosineni.

Yowaho Batita wadebona

5Yodeya‑ya mai wi‑wina mai‑ka hidi webote i‑di Erodi tohanasa ne‑ka yama tamine okaminineni. I‑di Sakariya i‑di Abiyasi‑ka nodi tohe, Deoso‑ka yama‑bone‑ya mai da‑daa mai‑ka owa tohematane. Sakariya fadi oni i‑di Isabeo toha, i‑di Araho‑ka nodi tohameteni.

6Sakariya fadi‑ya fame mai ihi amosa, Deoso ati‑nima mai ihi nameteni.

7Hibati‑ya mai kahiwara, mai‑ka ewe wadare, bote mai tohikimawahameteni.

8 # 1:8 Deoso‑ka yama‑bone‑ya mai da‑daa abariko 6 kane‑ya hini mai tabori‑ya yama‑ya mai ani, makobote mahi 7 kane‑ya Deoso‑ka yobe‑ya yama‑ya mai aniteni. I‑di Sakariya hika mai eyehe Deoso‑ka yobe‑ya yama‑ya mai anini‑bone‑ka mai‑ka mahi kobonematane.

9Sakariya hika mai eyehe yati bide‑ya werene, mai kiihina, Sakariya oni sone‑ya mai awa, Sakariya‑ya mai yosemeteni, Deoso‑ka yobe‑ya yama mahi amosa‑ya sarikanebonaha.

10Yama mahi amosa sarikanebonaya, Deoso‑ka yobe nokobiri‑kaya mai dama mai nahokosa, Deoso‑ya mai hiyarameteni.

11Yama mahi amosa‑ya Sakariya anineya, Deoso‑ka yo‑yose fodoki, waane, yama mahi amosa a‑amimi‑ka yama wiye wai‑kaya waimatane.

12Deoso‑ka yo‑yose‑ya Sakariya awe, habo siitone, kakomehematane.

13Deoso‑ka yo‑yose ati yanane,

“Sakariya, tiwa habo siitoriyahi. Deoso tiwati‑ya mitane, tika yibote i‑di Isabeo naba tohawahabone, bidi wadeya, oni Yowaho tohayaho.

14Yowaho wadeya, dai ya‑yainaboneni. Yowaho tamine mai himiteya, mai dama mai ya‑yainahareboneni.

15Yowaho Deoso hiyosewahebona, kawi‑ya fawarihi, fino‑ya fawarihi tebonane. Wadi awisareya, Deoso‑ka Doni sawibonane.

16Ati ene Isara·eo‑ka nodi Deoso ati‑ya mai nofamatasaboneni.

17I‑di Eriya ene‑mata‑nima i‑di Yowaho ene namakitasebonane. Mai atibodi‑ya hawa tonihibonane, Deoso‑ya mai nimanabonehe. Yowaho ati ene mai‑ka madehe‑ya mai nofaboneni. Hibati‑ya Deoso ati‑ya mai tokadabaramaro, tika dao ene Deoso ati‑ya mai nofawahaboneni.” Deoso‑ka yo‑yose ati nematane.

18“Oka yibote oda bote tohikima, hini yamata‑nima tiwa ene nibati, tiwati onofabonehe?” Sakariya ati nematane.

19“Kabireo ama·oni. Deoso‑kaya osawiteni. Deoso owa‑ya yosene, ati amosabote tiwa‑ya okaminebonaha.

20Owati tinofara, tiwati fawanaboneni. Tika dao wadeya, tiwati yananamatasaboneni. Owati‑nima yama naboneni.” Kabireo ati nematane.

21Yobe‑ka nokobi‑ya Sakariya‑ya mai nimana,

“Ka! Hini yamata tohimati, Sakariya kamareri?” Mai atibodi ati nameteni.

22Sakariya kame, ati‑ba wadamare, hini yehe‑ya mai‑ya hiyarematane.

“Yobe doro‑ya wada‑nima yama na‑ya Sakariya awane.” Mai atibodi ati nameteni.

23Sakariya‑ka yama anini hawa tohiya, hini tabaro‑ya tokomematane.

24Sakariya amoni fa‑famaraba neya, fadi i‑di Isabeo naba tohawahameteni. Abariko 5 kane‑ya mai one tabori‑ya tokara, hini tamine‑ya kemameteni.

25“Deoso ati ene naba ohawahani. Hibati‑ya naba ohara, owa‑ya mai nofara, Deoso owa‑ya kasome, owa‑ya mai nofawahaboneni.” Isabeo atibodi ati nameteni.

Yeso wadebona

26Isabeo naba tohi‑ke abariko 6 kane‑ya, Kabireo i‑di Deoso hiyose, Nasare Karireya‑ya tokawahematane. Kabireo i‑di Deoso‑ka yo‑yose amane.

27I‑di Mariya Nasare Karireya‑ya wina, maki mai one‑ya siwakarameteni. Mariya i‑di Yose fadi‑bone fai‑ya fami awisarameteni. Yose i‑di Dafi‑ka nodi tohematane.

28I‑di Mariya‑ya Kabireo kobone, fai‑ya hiyare,

“Ya‑yaitinahi. Deoso tiwa‑ya nofe, tiwa‑ya kasomane.” Ati nematane.

29Mariya habi siitona, atibodi yama‑ya dika,

“Hini yamata‑nima yama naba? Deoso owa‑ya nofe, owa‑ya kasomemonane.” Atibodi ati nameteni.

30“Mariya, tiwa habo siitoriyahi. Deoso tiwa kasomi‑ya nofane.” Kabireo ati nematane.

31“Owati timitahi. Naba tihabone, tika dao wadeya, oni haatiyaho. Yeso tebonane.

32 # 1:32 Dafi‑ka nodi hidi kitebona, kiti fawaterebona, Deoso‑ka yama hani ati neni. Fare Yeso tamine amane. Yeso kitatebonane.

‘Deoso kitabote Bidi amane.’ Mai ati teboneni.

Dai‑ka idi i‑di Dafi mai‑ka hidi kitemata, fare‑ka nodi i‑di Yeso tohe, Deoso ene ai nafi‑ka hidi tebonane.

33Yako‑ka nodi dai toha, dai‑ka hidi oharitebona, kiti fawaterebonane.” Kabireo ati nematane.

34“Naba ohabone, hini yamata ihi naba ohibati? Maki owa‑ya ahaterene.” Mariya ati na,

35“Deoso‑ka Doni tiwa‑ya sawibona, Deoso ene kitabote ati ene naba tihaboneni. Deoso Bidi wadeya, mai awiya,

‘Deoso Bidi amane.’ Mai ati naboneni.

36Tika naki i‑di Isabeo bote toha, naba tohaterabone, mai ati na, abariko 6 kane‑ya naba tohawahineni.

37Deoso ene kitabote amane. Yama nafi‑ya watone.” Kabireo ati nematane.

38“Deoso‑ya na‑narifa ama·oni. Tiwati‑nima yama nahi.” Mariya ati na,

Deoso‑ka yo‑yose tokomematane.

Isabeo tabori‑ya Mariya toka

39Makobote Yodeya‑ka adami fota dama‑kaya i‑di Isabeo tabori‑ya Mariya toka kanibote nameteni.

40Sakariya‑ka yobe‑ya Mariya tokiyoma, i‑di Isabeo‑ya hiyarameteni.

41Mariya ati‑ya i‑di Isabeo mita, fai dori‑ya foye ya‑yaine, tainematane. Deoso‑ka Doni ati ene

42i‑di Isabeo ati kita,

“Mariya ya‑yaitinahi. Mai fanawi one‑ya Deoso kasomi bi‑bidi, tiwa‑ya kasomi nafi, tika dao‑ya kasoma nane.

43Amosabote ama·ora, oka Hidi webote madi owa tabaro‑ya kobona, ya‑yai·oneni.

44Tiwati omita, ewe ya‑yaine, owa nabadi‑ya tainane.

45Mariya ya‑yaitinahi. Naba tihi awisari‑ya Deoso ati‑ya tinofamaroni.” Isabeo ati nameteni.

Mariya ati

46Mariya ati yanana,

“‘Deoso amosabote amane.’ Owatibodi ati nineni.

47Deoso owa‑ya kasome ene ya‑yai·oneni.

48Deoso‑ya na‑narifa ama·oni. Owa‑ya mai nofara, Deoso owa‑ya nofe, Deoso ati ene owa tamine‑ya mai hiyarabone,

‘Mariya Deoso hinofi nofani.’ Mai ati nabone,

‘Mariya Deoso hinofi nafemeteni.’ Mai‑ka nodi mai ati namakeboneni.

49Deoso kitabote owa‑ya kasome, amosabote amane.

50Deoso‑ya ai‑ka idi mai nayofina mai‑ya Deoso kasomemata, fare hini ene‑mata‑nima ene nasa ne, Deoso‑ya ai nayofina ai‑ya kasomatene.

51Deoso ene kitabote tohe, mai kitamone mai ati na, mai‑ya kananihimatane.

52Deoso ati ene hidi webote mai kiti fawana, mai one kitara mai kitawahameteni.

53Mai fi‑fimi tohamete Deoso ati ene yamata amosa‑ya mai kaba, mai korimanawaha, mai‑ka yama dama tohamete, Deoso ati ene mai honita tohawama nameteni.

54Isara·eo‑ka nodi ai toha, Deoso‑ya ai na‑narifa ai amani. Deoso ai‑ya nofe, ai‑ya kasomatene.

55Ai‑ka idi i‑di Abaraho‑ya Deoso hiyare,

‘Tiwa, tika nodi mai na, dai‑ya okasomateboneni.’ Deoso ati nematane.

Fare ati‑mata‑nima ene nane.” Mariya ati nameteni.

56Abariko 3 kane‑ya i‑di Isabeo tabori‑ya i‑di Mariya wina, makobote hini tabori‑ya tokomameteni.

Yowaho Batita wadane

57I‑di Isabeo dori kome yanana, bidi wadawahematane.

58Isabeo‑ya Deoso kasomi nafi tamine‑ya mai mita, i‑di Isabeo‑ka mai toha, i‑di Isabeo yakari‑ya mai wi‑wina mai toha, mai na, mai ya‑yainameteni.

59Bidi wade amoni 8 kane‑ya mai tokomakemeteni, sowiri tati ataro mai wisihinakose‑ya mai awabonehe.

“Badi oni‑ya weyenaho.” Mai ati nameteni.

60“Badi oni‑ya weyeterebonane, Yowaho tohebonane.” Madi ati nameteni.

61“Yowaho oni‑ya tika mai one weyeterani.” Mai ati nameteni.

62Badi‑ya mai haana,

“Eme tika dao oni nabati?” Mai yahi ati nameteni.

63Hini yehe‑ya bebeo‑nima na‑ya haane, bebeo‑nima na‑ya mai daahine, oni hikanahano,

“I‑di Yowaho tohane.”

“Se! Yowaho oni tohabarama?” Mai atibodi ati nameteni.

64Bidi oni‑ya kanahano hawa toheya, ati yananamawahe, Deoso‑ya kahiyarematane.

65Tamine mai himite, Sakariya‑ka yobe yakari‑ya mai wi‑wina mai habi siitonameteni. Yodeya‑ka adami webote dami‑kaya mai wi‑wina Yowaho tamine‑ya mai ibi hiyarameteni.

66Yowaho‑ya Deoso kasome tamine‑ya mai mita, mai atibodi yama‑ya kadika,

“Hini yamata‑nima ewe tebamanati?” Mai atibodi ati nameteni.

Yama kobonabone tamine‑ya Sakariya hiyare

67Deoso‑ka Doni ene Yowaho badi i‑di Sakariya ati yanane,

68“Deoso ene amosabote amane. Isara·eo‑ka nodi ai toha, Deoso‑ka ai amani. Deoso ai‑ya kasomamatasane.

69 # 1:69 Dafi‑ka nodi i‑di Yeso amane. Deoso ati ene Dafi‑ka nodi kobone, kitabotebona, ai‑ya kasomebonane.

70Fara Deoso ati‑ya mai mi‑mita‑mete mai ati‑mete‑nima yama naboneni.

71Ai‑ya mai watikana, ai‑ya mai ka‑kako mai‑ya ati barinebonane.

72Ai‑ka idi mai‑ya Deoso nofe, ai‑ya kasomebona ati ne, hini ati‑nima ai‑ya kasomebonane.

73Ai‑ka idi i‑di Abaraho‑ya Deoso hiyare,

‘Owati abateraboneni.

74Tika nodi mai‑ya okasomabone, mai‑ya mai one bisinamarabone, tika nodi owa‑ya mai narifabone, mai habi siitonamaraboneni.

75Mai ihi amosabone, owati‑ya mai tokadababone, yama maakani awiraboneni.’ Deoso ati nemata,

fara yama yananaboneni.” Sakariya ati nematane.

76Sakariya hini bidi ene tamine‑bona‑ya hiyare,

“Ewe, ai‑ka hidi webote kamakibona, ai atibodi hawine‑ya hawatiniwahaboneni. Fara ihi

‘Deoso Kitabote ati‑ya mi‑mita amatini.’ Mai ati naboneni.

77Deoso‑ka ai toha ai‑ya kasomebona, ai ene towe manakone‑ya Deoso haanamaterebona tamine‑ya tihiyarawahaboneni.

78 # 1:78 Neme‑ke mahi wehene‑nima ne i‑di Yeso tamine amane. Mahi wehene ene hawi ai wato, Yeso ene Deoso hawine ai watowahani. Deoso ai‑ya nofi nafi, Neme‑ke mahi wehene‑nima ne kiseya, ai‑ya nofi nafibonane.

79Yama soki‑ya mai naha mai kome fawaterabone‑ka hawi‑ya mai sawi, Deoso Bidi ene Deoso ati somebona‑ka hawi ai watowahaboneni.” Sakariya ati nematane.

80Ewe yanawahe, Deoso ati‑ya nofi nafiwahematane. Isara·eo‑ka nodi mai‑ya Yowaho hiyari awisare, tabora awiri‑ya ohari winematane.

Currently Selected:

Roka 1: jaaNT

Highlight

Copy