Maroko 16

Yeso kitame

1Sabado nowati‑ya i‑di Mariya Madarena toha, i‑di Yako madi i‑di Mariya toha, i‑di Sarome toha, mai na, yama mahi amosa‑ya mai kanikameteni, Yeso abo‑ya mai ketehebonehe.

2-3Domiko‑ya mai bosakana, yama wahabisari‑ya Yeso temene‑ya mai kobokani awisari‑ya mai ibi hiyara,

“Ebeni‑ke nokobi‑ya seekabati, ai towakiyomi‑bone‑karo?” Mai ati na,

mai kobokana,

4mai noki toka, nokobi‑ya mai awa, yati webote‑ya karotowiti hawa tohameteni.

5Mai towakiyoma, maki yetene‑ya mai awameteni. Mai‑ka kanika‑ya maki itari, bora sawa‑ya weyene, maki‑ya mai awa, mai sotatonameteni.

6“Dai habo siitoriyahi. Yeso Nasare‑ke mai baahikane, abo dai awebona, dai ati na, haa‑ya awimare, kitame, tokane, fori tabaro dai awaho.” Ati nematane.

7“Dai towakamahi. Bedoro toha, Yeso‑ya mai da‑daba mai one toha na, mai‑ya dai hiyariya, eya dai ati nahi.

‘Karireya‑kaya tokebona, dai tokomakihi. Yeso ati‑mari‑nima Karireya‑ya dai awebonane.’ Dai ati niyahi.” Maki ati nematane.

8Mai fanawi habi siitona, mai wawawakana, mai kana kana, mai one‑ya mai hiyari awirameteni.

9(Hibati‑ya Mariya Madarena‑ya madi towe mai 7 kana mai foyamaro, Yeso ati ene madi towe mai kananamaroni. Domiko, yama wahi yanatoni‑ya Yeso kitame, toke, Mariya Madarena‑ya koboni dai tohematane.

10Yeso‑ya mai da‑daba mai ohinasa niya, Yeso kitame tamine‑ya Mariya kamina,

11“Yeso kitameno, oawani.” Mariya Madarena ati na, ati‑ya mai nofarameteni.

12Makobote Yeso‑ya mai da‑daba mai fama, kabani‑ya mai towaka, Yeso‑ya mai kobona, Yeso‑ya mai awa, Yeso noko bare tohematane.

13Yeso‑ya mai da‑daba mai fama mai towakamake, Yeso tamine‑ya mai kamina, mai ati‑ya mai nofarameteni.

14Makobote Yeso‑ya mai da‑daba mai 11 kana mai tafiya Yeso kobone, mai‑ya weene, Yeso kitame tamine‑ya mai one hiyara mai ati‑ya mai nofara, mai habi kita mai‑ya Yeso weenematane.

15Mai‑ya weeni hawa tohe, mai‑ya yose,

“Yama nafi‑ya dai yakanawariya, mai nafi‑ya Deoso ati amosabote tamine dai kaminahi.

16Deoso ati amosabote ati‑ya mai nofa, mai dai habanirisiya, Deoso tabaro‑ya mai saweboneni. Deoso ati amosabote ati‑ya mai nofara, wara hirini‑ya mai‑ya weenebonane.

17Deoso ati amosabote ati‑ya mai nofa owati ihi mai ihi kitaboneni. Mai ihi‑ya mai one awiya,

‘Deoso‑ka mai amani.’ Mai ati naboneni.

Fara mai ati ihi madi towe mai kana, mai one ati‑ya mai hiyara naboneni.

18Iha‑ya mai fawiya, mai kiyarihi, maka mai‑ya wainiya, komarihi, mai kiyana mai‑ya mai boyoniya, mai ihi mai kitama, mai naboneni.” Yeso ati nematane.

19Ai‑ka Ayo Yeso hiyari hawa toheya, Deoso ene neme‑ya tokome, Deoso mano kanika‑ya itariwahematane.

20Yeso‑ya mai da‑daba yama nafi‑ya mai yakanaware, mai‑ya mai hiyaramaroni. Ai‑ka Ayo mai‑ya kasome, mai ihi kitamaroni, mai ihi‑ya mai awiya, mai ati mai hinofabonehe.)

Currently Selected:

Maroko 16: jaaNT

Highlight

Copy