Roka 14

Sabado‑ya maki‑ya Yeso nakitame

1Sabado‑ya fariseo mai‑ka hidi owa tabaro‑ya Yeso tafebona tokiyomeya, mai kakatomameteni.

2Yeso noko‑ya maki warane waane,

3Mose‑ka yama hani ati‑ya mai ka‑kanawato mai toha, fariseo mai toha, mai na, mai‑ya Yeso hiyare,

“Sabado‑ya ai owa ai nakitama, ai sibarineni?” Yeso ati nematane.

4Mai ati yanarameteni. Maki yehe‑ya Yeso waratone, fai‑ya nakitame, fai‑ya toyosemematane.

5Mai‑ya Yeso hiyaramatase,

“Sabado‑ya dai‑ka bani hodi kowe‑ya soniya, dai idi awirane? Sabado‑ya tika dao hodi kowe‑ya soniya, dai idihari awirane?” Yeso ati nematane.

6Mai ati‑bone‑ya mai watora, mai ati yanani awirameteni.

Kadera amosa tamine

7Mai tafabone, Yeso mai‑ya kakatomematane. Kadera amosa‑ya mai nahoremeteni, mai‑ya mai one kahiyarabonehe. Mai ihi‑ya Yeso awe, mai‑ya kanawatobona, mai‑ya hiyare,

8“Owati dai mitahi. Marina‑ya dai toka, kadera amosabisa‑ya dai nahoririyahi. Maki amosabise‑ya marina hidi haanahariba awane.

9Amosabise koboneya, hidi tiwa‑ya hiyarebona,

‘Soho, amosabise‑ka kadera amani, haro. Kadera one‑ya tiwitaribisahi.’ Hidi ati nebonane.

Mai nafi noki‑ya kadera towe‑ya tiwitareboneni.

10Mai tabori‑ya dai tafabone, kadera towe‑ya dai nahorihi. Hidi dai‑ya ati yananebona,

‘Naki, kadera amosabisa‑ya dai nahoribisahi.’ Hidi ati nebonane.

Hidi ati‑ya mai mita, dai‑ya mai nofaboneni.

11Hini mai‑ya mai kahiyara, Deoso ene mai mai hinofaraboneni. Ai‑ya ai nokotonira, Deoso ene ai‑ya mai kahiyarawahaboneni.” Yeso ati nematane.

12Marina hidi‑ya Yeso hiyare,

“Mai one‑ya tiwati natafiya, tika mai toha, tiwa‑ya mai no‑nofa mai toha, yinero dame‑ya mai kiha mai toha, mai na, mai‑ya haatiriyahi. Mai‑ya haatiniya, tiwa‑ya mai haanahariya, tika yama manakone abi hawa tohaboneni.

13Mai‑ya tinatafabone, mai‑ka yama wadara mai toha, mai hi‑hiyana mai toha, mai ka‑kana mai toha, mai noki wadara mai toha, mai na, mai tinatafabisahi.

14Haa‑nima tiwa ene niya, ya‑yaitinaboneni. Tiwa‑ya mai haanami awiraboneni. Yama faina‑bone‑ya mai ihi amosa mai kitamiya, mai‑ya tisawebone, tiwa ene manakone‑ya Deoso daanebonane.” Yeso ati nematane.

Deoso ai nafi‑ka hidi kitabote tohawahebona

15Mesa‑ya mai nahore, Yeso ati‑ya mai mita, mai‑ka owa hiyare,

“Deoso ai nafi‑ka hidi kitabote tohawahebona‑ya mai tafiya, mai ya‑yainaboneni.” Ati nematane.

16Yeso mai‑ya kanawatobona mai‑ya hiyare,

“Ai owa mai‑ya natafebona mai dami‑ya haanane.

17Makobote mai tafe awi hawa tohiya, hika yo‑yose‑ya yosene, mai‑ya dodiwitibonaha. Hika yo‑yose toke,

‘Dai kamaki kanibote nahi. Yama nafi hawa tohani.’ Ati nematane.

18Fai ati‑ya mai tokadabarani, mai nafi.

‘Fadara okanika, oawawitebone, dai‑ka marinabone‑ya owati toki nofarini.’ Daidi ati nane.

19‘Bowi mai okanika, ai yehe kafama‑nima mai na, yama‑ya mai horona, mai oawabone, mai marinabone mai‑ya owati tokomaki nofarini.’ Owa ati tasane.

20‘Hibayata ofana, mai marinabone mai‑ya owati tokomaki nofarini.’ Owa ati tasane.

21Hidi‑ka yo‑yose kame, mai ati‑ya kaminamane. Hidi yawe, hika yo‑yose‑ya yosematase,

‘Sidadi nafi‑ya tikamiya, yama‑ya mai kihara mai toha, mai hi‑hiyana mai toha, mai noki wadara mai toha, mai ka‑kakona mai toha, mai na, mai tiwakamiyahi, mai tafabonehe.’ Hidi ati nane.

22Fai‑ya toke, mai‑ya kakame, ati yanane,

‘Ayo, tiwati‑nima ona, mai haa·ona, mai owakama, tika yobe kibarane.’ Hidi‑ka yo‑yose ati nane.

23Hidi‑ka yo‑yose‑ya yosetase,

‘Hawi‑ya mai one yakana mai toha, mai‑ka yobe oharine‑ka mai toha, mai na, mai‑ya haatiyahi, ai marini‑ya mai kamakebonehe. Oka yobe kibayaho.

24 # 14:16-24 Yama dama‑ya mai nokotonihe, Yeso ai nafi‑ka hidi kitabote tohawahe‑ya mai sawiraboneni. Yeso ati‑ya mai tokadaba mai sawibisaboneni. Fara hibati‑ya mai haa·ona, mai kaki nofara, owa tefe‑ya mai kabateraboneni.’ Hidi ati nane.” Yeso ati nematane.

25Yeso yananeya, mai dama mai tokomakemeteni. Yeso mai‑ya hiyare,

26“Oka dai tohabone dai ati na, owa‑ya dai nofi nafibisahi. Tika abi, tika ami, tika yibote, tika madehe, ayo, soho, adi, asima, mai na, mai dai nofi bi‑bidi, owa‑ya dai nofi nafibisahi. Hini dai‑ya dai nofi bi‑bidi, owa‑ya dai nofi nafibisahi. Owa‑ya dai nofi nafibisariya, oka dai tohi awiraboneni.

27‘Owa‑ya mai ati nanahaba yama sibarini. Yeso‑ya da‑daba ohabisaboneni.’ Dai ati nahi.

Haa‑nima dai ati ni awiriya, oka dai tohi awiraboneni.

28Yobe nemehe ai wamanabone, yobe manakone ai kadiki baha, ai‑ka yinero ai kadikamaki, manakone ai kiha, yama sibarini, manakone kote ai kihara, yobe ai wamaterani.

29 # 14:29 Tamine yokana timitahi. Yeso ai dababone, ai‑ya mai weeniya, hawi bai‑ya ai maakariyahi. Yobe manakone‑ya mai kadikara, yinero tosiyo ene yobe wamani bai‑ya mai maakana, mai‑ya mai hahakanaboneni.

30‘Yobe nemehe‑ya wamanebona ati ne, yinero tosiyo, yobe hawa tohaterebonane.’ Mai ati naboneni, mai hahahikaneya.

31Sodado mai‑ka hidi webote, hika sodado mai 10.000 mai kana mai toha, hidi webote owa kamakimona, hika sodado mai damabisa, 20.000 mai kana mai tohanineni. Mai kamaki tamine‑ya hidi webote mite,

‘Mai dama mai kamakemone, ai fa‑famaraba na, ai kitaba awineni.’ Atibodi ati nebonane.

32‘Mai dama mai toha oda‑ya mai bisinibisaba awineni.’ Hidi atibodi ati neya,

hidi owa aka‑ya tohasa neya, hika mai one‑ya yosebona,

‘Mai‑ka hidi‑ya dai tokahi. —Hini yamata‑nima manakone nibati, tiwati somawami‑bone‑karo?—’ Dai ati niyahi.” Hidi ati nebonane.

33Dai‑ka yama nafi dai saatokasara, oka dai tohi awiraboneni.

34Sao ihi ai tefe kabi amosa, faha ihi abiya, amosawamaterani.

35Sao ati kasira awa bono mate‑ya ai ketehera, yamata ade‑ya kasomaterani. Hiniya ai weretowititeni. Owati dai mita owati dai tokadabahi.” Yeso ati nematane.

Currently Selected:

Roka 14: jaaNT

Highlight

Copy