Yeso‑ka yo‑yose mai tamine 4

I‑di Bedoro i‑di Yowaho mai fama mai‑ya hidi mai waratona

1Mai‑ya i‑di Bedoro, i‑di Yowaho mai hiyariya, Deoso‑ka yama‑bone‑ya mai da‑daa, Deoso‑ka yobe‑ya na‑nawada‑ka hidi, sadoseo mai toha na, Bedoro mai‑ya mai kamakineni.

2Yeso abe, kitame‑nima ai kitamaharebone tamine‑ya Bedoro mai hiyara, mai ati‑ya mai mita, mai yawamoneni.

3Yama soki yanatoni‑ya Bedoro, Yowaho mai fama, mai‑ya mai waratona, kadeya‑ya mai mai hibe, kadeya dori‑ya mai amonamoneni.

4Bedoro mai ati‑ya mai one mita, Yeso ati‑ya mai nofawaha, maki mai dama 5000 mai kana Yeso ati‑ya mai nofawahamoneni.

5Yama wahi one‑ya mai‑ka hidi mai toha, bote mai toha, Mose‑ka yama hani ati‑ya mai ka‑kamina mai toha, mai na, Yerosare‑ya mai yorotokana,

6Deoso‑ka yama‑bone‑ya mai da‑daa mai‑ka hidi i‑di Anasi toha, i‑di Kaifo, i‑di Yowaho, i‑di Aresadiri, i‑di Anasi‑ka mai one toha na, mai eyehe mai yorotokana,

7Mai ati ihi i‑di Bedoro i‑di Yowaho mai‑ya mai kakama,

“Oda bai‑ya dai yoronahi. Dai ati oda mitaboneni. Ebeni‑ke ati kite oni dai hirine, maki‑ya dai nakitamiti?” Mai ati na,

8Deoso‑ka Doni ene i‑di Bedoro habo kite, mai‑ya hiyare,

“Oda‑ka hidi dai toha, bote dai toha, dai na, owati dai mitahi.

9Oda ene amosa, ka‑kakone‑mata oda kasome, kitame tamine‑ya dai haana,

‘Ebeni‑ke ene maki kitamati?’ Dai ati na awineni.

10Owati dai mita, Isara·eo‑ka nodi mai nafi owati‑ya mai mitahari na, yama dai watowahaboneni. Yeso Kirisito Nasare‑ke dai ene baakane, Deoso hinakitamemari, fare oni ene maki kitamawahene.

11 # 4:11 Dafi‑ka wayoma 118:22 Yobe‑ya mai wa‑wama mai‑nima dai na, yobe‑ka yati amosabote‑ya dai nofara, dai ene yati‑ya mai nanahabamaroni. Deoso‑ka yati‑nima Yeso ne, dai nofare, dai ene mai hinahabe, Deoso ene kitame, Deoso‑ka yobe‑ke yati amosabote tohawahene.

12Neme‑ya mai wi‑wina, bofe‑ya mai wi‑wina na, mai ihi tohara, Yeso ohari‑ta ati ai nofa, Deoso‑ka ai tohateni.” Bedoro ati nemarine.

13Bedoro, Yowaho mai fama mai habi siitora, mai‑ya mai awa, Bedoro ati‑ya mai mita, mai ibi hiyara,

“Ka! Ai‑ka esikora‑ya mai sawiramaro, hini yamata ihi yama‑ya mai watowaha? Yeso‑ya mai da‑daba tohamaro, yama‑ya mai watowahani.” Mai ati na.

14Ka‑kakone‑mata kitame, mai yowi‑ya wai‑ya mai awa, mai‑ya mai hiyarami awiramoneni.

15“Dai tokahi.” Mai ati na,

Bedoro ahiyata‑ya mai toka, mai nowati‑ya mai ibi hiyara,

16“Ka‑kakone‑mata kitame‑ya Yerosare‑ya mai wi‑wina mai dami awa, Bedoro mai ihi‑nima ai ene ra, mai tamine‑ya keyehe‑ya ai hiriniya, ai ati‑ya mai nofaraboneni. Hini yamata‑nima ai nibati?

17Yeso tamine‑ya mai one mitarabone, Bedoro mai ai weeniya, mai kakomeheya, Yeso tamine‑ya mai hiyaramaraboneni.” Mai ati namoneni.

18I‑di Bedoro mai mai haahina, mai kakama,

“Yeso tamine‑ya dai hiyaramarihi! Mai dai kanawatomarihi nahi!” Mai ati na,

19Mai ati‑ya Bedoro i‑di Yowaho mai mita, mai ati yanana,

“Deoso ati‑nima dai ati ni awirani. Deoso ati oda tokadabarabone dai ati na, dai ati‑ta oda tokadababisabone dai ati na awineni.

20Yama oda awa, ati oda mita ne, tamine oda hiyarabisaboneni.” Bedoro, Yowaho mai fama mai ati na.

21Mai ati‑ya mai mita, mai atibodi yama‑ya dika,

“Bedoro mai ati ihi ka‑kakone‑mata kitame‑ya mai dami awa, Deoso‑ya mai kahiyarineni. I‑di Bedoro mai ai kosiniya, ai‑ya mai dami weenaba awineni.” Mai atibodi ati na,

I‑di Bedoro, i‑di Yowaho mai‑ya mai hiyara,

“Yeso tamine dai hiyaramatasiya, dai oda bisinaboneni.” Mai ati na,

mai mai seehikana, hini mai tabori‑ya mai towakamineni.

22Hibati‑ya ka‑kakone‑mata yakatere, bote tohe, hika faha fowe 40 kana fiyakana, Deoso ene yakanawahemonane.

Yeso‑ka mai habi kitabone, Deoso‑ya mai hiyara

23Mai mai seehikana mai‑ka no‑nofa mai‑ya mai towakama, Deoso‑ka yama‑bone‑ya mai da‑daa mai‑ka hidi, mai‑ka bote mai toha na, mai ati‑ya Bedoro mai kaminamaroni.

24Mai ati‑ya mai mita, Deoso‑ya mai hiyara,

“Abi Deoso, hini tiwa ene neme‑ya wama, wami‑ya wama, faha‑ya wama, faha abe‑ya wama tinameteni.

25Hibati‑ya ai‑ka idi i‑di Dafi Tiwa‑ya na‑narifa‑ya Tika Doni hiyare, Tiwati‑ya kaminematane,

‘Hini yamata‑bone Bara mai ati hama? Deoso‑ya mai ati bisina, mai ati honita tohabisineni.

26Bofe‑ya mai wi‑wina mai‑ka hidi mai yorotokana, Deoso, Deoso‑ka Ka‑kadika ne‑ya mai ati nabohani.’ Deoso‑ka Doni ati ne, ati‑ya Dafi kanahanomatane.

27Abi Deoso, Dafi ati‑nima ahi‑ya sidadi‑ya ai wi‑wina i‑di Erodi, i‑di Bonisiyo Birato, Bara mai toha, Yodeo mai toha na, Tiwa‑ya na‑narifa i‑di Yeso tikadikemata‑ya mai kaka, mai yorotokana,

28Tiwatomata‑nima mai ihi nawahani. Tika Dao‑ya mai weenabone tinamete, Tika Dao‑ya mai weenawahani.

29Abi Deoso, mai ati timitahi. Tiwa‑ya oda na‑narifa, oda‑ya mai bisinabone mai ati na, tiwati oda kamina, oda tikasomahi, oda habo kitabonehe.

30Tiwa yehe daatite, mai‑ya tinakitamabonehe. Tiwa ene kita‑ya mai awa, tiwa‑ya na‑narifa amosabote i‑di Yeso tamine oda kamina, yama‑ya mai awaramaro, yama‑ya mai awiyahi.” Mai ati namoneni.

31Deoso‑ya mai hiyari hawa toha, mai yorotokani‑ke yobe henene, Deoso‑ka Doni mai nafi‑ya sawi ene Deoso ati‑ya mai kamina, mai habi siitonami awiramoneni.

Yeso‑ka mai hinama‑ya yamata‑ya mai ebena

32Yeso ati‑ya mai no‑nofa mai atibodi fara hinama toha,

“Owa hare oka yama tohi awirini. Ai nafi‑ka yama amani.” Mai nafi ati teni.

33Ai‑ka Ayo i‑di Yeso kitami tamine‑ya Yeso‑ka yo‑yose mai hiyara, mai ihi kita dama, mai dami‑ya Deoso kasomane.

34-35Mai‑ka yama kaba tosiyora, yobe‑ya mai kiha, yobe‑ya mai daana, yinero‑ya mai kanika, yinero‑ya mai kakama, i‑di Yeso‑ka yo‑yose mai‑ya yinero‑ya mai daana, yama‑ya mai kihara, mai‑ka yama‑bone‑ya mai kanikateni. Fadara‑ya mai kiha, fadara‑ya mai daana, yinero‑ya mai kanika, Yeso‑ka yo‑yose mai‑ya yinero‑ya mai daanamoneni.

36-37I‑di Yose hika fadara‑ya daane, yinero‑ya kanike, Yeso‑ka yo‑yose mai‑ya yinero‑ya daanemarine. Refi mai‑ka owa i‑di Yose tohe, tabaro oni Sibe tohe, yara mai‑ka ha‑haa Yose toha, Yeso‑ka yo‑yose mai‑ka ha‑haa Banabe toha, ai ati‑ya ‘Ai‑ya ka‑kasoma’ tohene.

Currently Selected:

Yeso‑ka yo‑yose mai tamine 4: jaaNT

Highlight

Copy