Yeso‑ka yo‑yose mai tamine 22

1“Oka soho dai toha, okobese dai toha na, dai‑ya owa tamine okaminaboneni.” Baoro ati nane.

2“Se! Ai ati‑nima ati nane.” Mai ati na.

Mai ati fawanineni, fai ati‑ya mai mitabonehe.

3“Yodeo ama·oni. Sirisiya‑ya tabora Taso toha‑ya owa‑ya mai nayanamaroni. Yerosare‑ya i‑di Kamari·eo owa‑ya kanawato, Mose‑ka yama hani nafi‑ya owa‑ya kanawatomarine. Fara dai‑nima ona, Deoso ati onofawahamaroni.

4Yeso‑ka hawi‑ya mai sa‑sawi mai‑ya onahaba, mai makidi, mai fanawi na, mai soki·ona, kadeya‑ya mai onafoya onamaroni.

5Deoso‑ka yama‑bone‑ya mai da‑daa mai‑ka hidi mai toha, ai‑ka hidi mai toha na, mai nafi owa‑ya watoneni. Hibati‑ya yama hani‑ya owa‑ya mai daana, Damaso‑ya yama hani owakama, Damaso‑ya mai wi‑wina, Yeso hawine‑ya mai sa‑sawi Yerosare‑kaya mai owakamiya, Yerosare‑ya mai mai kosihinabone onamaroni.

6Damaso‑ya oka, owa koboni yanatoniya, mahi nokorise‑ya neme‑ya yama wahi kita owa‑ya kobonamaroni.

7Yama wahi ihi osa, ati omite,

‘Saoro, Saoro, hini yamata ihi owa‑ya bisitiniti?’ Ati nemarine.

8‘Ayo, eme tiwa oni niti?’ Ona,

‘Yeso Nasare‑ke ama·oni. Owa‑ya bisitineni.’ Ati nemarine.

9Owa‑ya mai sa‑sawi, yama wahi kita‑ya mai awa, mai habi siitonani. Owa‑ya hiyare, ati mai himite ati mai hiwatoremarine.

10‘Ayo, hini yamata‑nima obati?’ Ona,

‘Tiwaamisamiya, Damaso‑ya tikahi. Damaso‑ka tiwa‑ya mai hiyaraboneni. Deoso‑ka yama anitinabone tamine timitaboneni.’ Ati nemarine.

11Yama wahi kita ihi yama oawamara, owa yehe‑ya mai damana, Damaso‑kaya owa‑ya mai towakamaroni.

12Damaso‑ya Ananiya wine, amose, Mose ati‑nima ne, Yodeo mai nafi hinofatene.

13Owa‑kaya kame, wai, owa‑ya hiyare,

‘Soho Saoro, yama tiawahi.’ Ati ne.

Ati ene, owa noko amosawama, Ananiya oawawahamaroni.

14Owa‑ya hiyaramaki,

‘Deoso ai‑ka idi mai‑ya no‑nofa‑mata tiwa‑ya kadike, Deoso‑ka Ka‑kadika amosabote‑ya tiawawaha, ati timitawahene.

15Yama tiawa tamine tihiyara, ati timite ati tamine tihiyarawahebonane mai dami‑ya.

16Hibayata tiwa‑ya mai habanirisahi. Tiwa ene‑maro‑nima tiwa ene namarabone, ai‑ka Ayo haatiniya, Deoso tiwa‑ya ati somawamebonane.’ Ananiya ati nemarine.

17Makobote Yerosare‑ya okomatasa, Deoso‑ka yobe‑ya owitare, Deoso‑ya ohiyara, wada‑nima yama na oawawahamaroni.

18Neme‑ya ai‑ka ayo oawe, owa‑ya hiyare,

‘Tokoma kanibote tinahi. Yerosare‑ya tiwinariyahi. Ahi‑ya mai wi‑wina mai‑ya owa tamine tihiyariya, tiwati‑ya mai nofateraboneni.’ Ati nemarine.

19‘Ayo, tika mai bisi·onamaroni. Tiwa‑ya ai hi‑hiyara‑ke yobe‑ya mai toka, tiwa‑ya mai hiyarabone, mai kosi, mai onafoya, onamaro, yama‑ya mai watoneni.

20Tika soho i‑di Tefaho yati‑ya mai nanahaba, mai‑ya osawe ihi ya‑yai·ona, mai‑ka bora mai tanihina onawadamaroni.’ Ona,

21Owa‑ya hiyare,

‘Tokoma kanibote tinahi. Yama yaki‑ya tiwa oyoseboneni, Bara mai‑ya.’ Ati ne.” Baoro ati nemarine.

22Bara mai tamine‑ya mai mita, mai ati yawa, sodado mai‑ya mai haana,

“Abaho, abaho dai towakamaho.” Mai ati namaroni.

23Mai haani kita, mai‑ka bora‑ya mai tanina, wami hibakori‑ya mai weretomisa namaroni, mai yawaro.

Sodado mai‑ka hidi‑ya Baoro hiyare

24Sodado mai‑ka hidi ati ene sodado mai hiwakamane, hini mai‑ka yobe doro‑ya mai bisihinebonaha.

“Hini yamata ihi mai ati yawiti? Bisi·oneya, owatowaheba awane.” Sodado mai‑ka hidi atibodi ati nemonane.

25Baoro‑ya mai sokina, mai yadihine, mai kosihinebona, sodado mai‑ka hidi owa‑ya Baoro hiyare,

“Homano ama·oni. Owa tamine mai kadiki awisariya, owa kositiniya, tiwa‑ya homano mai ati yawaboneni.” Baoro ati nemarine.

26Baoro ati‑ya sodado mai‑ka hidi owa mite, mai‑ka hidi owa ba‑basi ne‑ya tokome, hidi‑ya hiyare,

“Tiwa noko wadahi. Homano owa i‑di Baoro amane.” Ati nemonane.

27Mai‑ka hidi owa ba‑basi ne i‑di Baoro‑ya kamaki,

“Homano owa amatini?” Mai‑ka hidi ati ne.

“Hehe, homano ama·oni.” Baoro ati ne.

28“Yinero nafi daa·ona, yinero ene homano ama·oni.” Mai‑ka hidi ba‑basi ne ati ne.

“Okobi homano tohemata, homano ama·oni.” Baoro ati nemarine.

29Baoro‑ya mai bisinabone mai habi siitona, mai tokoma kanibote na, homano sokikane ene mai‑ka hidi habo siitonahari ne,

“Owa‑ya mai bisinaba awineni.” Hidi atibodi ati nemonane.

30“Hini yamata ihi Baoro‑ya mai bisinaba amaniti?” Ati ne.

Yama wahi one‑ya Baoro‑ya kakasawame, Yodeo mai‑ka hidi mai toha, Deoso‑ka yama‑bone‑ya mai da‑daa mai‑ka hidi mai toha na, mai‑ya haane, mai kama, mai noki‑ya Baoro‑ya nawaane.

Currently Selected:

Yeso‑ka yo‑yose mai tamine 22: jaaNT

Highlight

Copy