Yeso‑ka yo‑yose mai tamine 23
23
1Yodeo mai‑ka hidi mai‑ya Baoro kakatome, ati yanane,
“Ayo, Soho, owati dai mitahi. Owa‑ya Deoso kakoterebonane, owa ene amosateni.” Baoro ati nemarine.
2Deoso‑ka yama‑bone‑ya mai da‑daa mai‑ka hidi Ananiya ati ene Baoro bono‑ya mai batanarineni.
3Baoro ati yanane,
“Deoso tiwa‑ya batanaharibona, tiwati‑nima tiwa ene toharani. Mose ati‑nima tiwa ene nabone tina, Mose ati‑nima tiwa ene toharani. Mai ati sibara toha, mai batatiriyahi, Mose ati ne. Owati sibara toha, tiwa ene owa‑ya mai batana, tiwa ene towe tohani.” Ati nane.
4Ahiyata‑ya mai naha, Baoro‑ya mai hiyara,
“Deoso‑ka yama‑bone‑ya mai da‑daa mai‑ka hidi weetiriyahi.” Mai ati na.
5“Se! Deoso‑ka yama‑bone‑ya mai da‑daa mai‑ka hidi webote‑no owatore‑ya wee·onani. Deoso‑ka yama hani ati ihi ai‑ka hidi ai weeterani.” Baoro ati nemarine.
6Baoro mai‑ya kiine, mai one fariseo toha, mai one sadoseo toha na, mai‑ya Baoro haane,
“Ayo, soho, owati dai mitahi. Fariseo ama·oni. Okobi fariseo tohemarine.
‘Ai owa abe, kitamane.’ Ona,
fara owati ihi owa‑ya mai bisinaboneni.” Baoro ati nemarine.
7Baoro ati‑ya mai mita, mai ibi weena, fariseo mai‑ya sadoseo mai wee, sadoseo mai‑ya fariseo mai weenahari namoneni.
8Sadoseo mai ati,
“Ai aba, ai kitamaterani. Ai abi ohariteni. Deoso‑ka yo‑yose mai awirihi, madi mai awirihi teni.” Mai ati teni.
Fariseo‑ta mai ati,
“Ai aba, ai kitamateni. Deoso‑ka yo‑yose mai toha, madi mai toha, mai teni.” Fariseo mai ati teni.
9Mai ibi hiyara,
“Ati sibare, Deoso‑ka yo‑yose ati‑ya mitate awane. Ai weerayaho. Deoso ai‑ya bisirayaho.” Fariseo mai one Mose‑ka yama hani ati‑ya mai ka‑kamina mai ati namaroni.
10Mai ibi weeni fawara,
“I‑di Baoro‑ya mai nabohibaka amani.” Sodado mai‑ka hidi atibodi ati ne.
Sodado mai‑ya yose,
“I‑di Baoro dai dodimakiya, dai kakamaho. Ai‑ka yobe‑ya mai hinaboharayaho.” Ati nemarine.
11Yama soki‑ya Yeso kaki, Baoro fowari‑kaya wai, Baoro‑ya hiyare,
“Baoro, tiwa habo kitahi. Yerosare‑ya owa tamine tihiyaramaro, makobote Homa‑kaya owa tamine tihiyaramakeboneni.” Yeso ati nemonane.
Baoro‑ya mai ati nanahaba
12Yama wahabisari‑ya Yodeo mai yorotokana, mai ibi hiyara,
“Baoro ai nanahabahi. Baoro ai nanahabi awiriya, ai tafamarihi, faha ai fawamarihi, ai naboneni. Baoro ai nanahabi hawa tohiya, ai tafama, faha ai fawama, ai naboneni.” Mai ati namoneni.
13Haa‑nima 40 mai fiyakana, mai ati nineni.
14Deoso‑ka yama‑bone‑ya mai da‑daa mai‑ka hidi mai toha, Yodeo mai‑ka hidi mai toha na, mai‑ya mai toka, mai‑ya mai hiyara,
“Hini oda‑ya oda ati barina, Baoro oda nananahabi awiriya, oda tafamaraboneni.
15Sodado mai‑ka hidi dai haaniya,
‘Baoro tiwakamahi, ati oda mitamatasebonaha.’
Dai ati niya, Baoro‑ya kakameya, hawi‑ya oda kemoya, kameya, oda nanahabebane.” Mai ati namoneni.
16Mai‑ya mai kemabone mai tamine‑ya Baoro‑ka bidimi mite, kadeya‑ya tokomaki, Baoro narabo‑ya hika bidimi kaminane.
17Sodado mai‑ka hidi owa‑ya i‑di Baoro haane,
“Tika hidi‑ya oka bidimi tiwakamahi, hiyarebonaha.” Baoro ati nane.
18Baoro‑ka bidimi‑ya sodado towake, hidi‑ya hiyare,
“Baoro sokine ati ene hika bidimi owakamani, ati timitebonaha.” Ati nane.
19Baoro‑ka bidimi yehe‑ya sodado mai‑ka hidi damane, mai awiri‑kaya fai‑ya towakame,
“Tiwati omitahi.” Ati ne.
20“Yodeo tiwa‑ya mai haanaboneni.
‘Mahi owa‑ya Baoro tiwakamahi, tamine oda miti ba‑basi nebonaha.’ Mai ati naboneni.
21Mai ati tinofariyahi. Hawi‑ya 40 mai fiyakana mai kemabone, mai ibi hiyara mai ati nani. Mai tafamarihi, faha‑ya mai fawamarihi ni‑ya, Baoro‑ya mai nabohiya, mai tafama, faha‑ya mai fawama naboneni. Hawi‑ya tiwa‑ya mai kema, tiwa‑ya mai nimanineni.” Baoro‑ka bidimi ati nemonane.
22Ati‑ya mite,
“Sibarabani. Tiwa tabaro‑ya tikamahi. Owa narabo tikamina, mai one‑ya tihiyarariyahi.” Sodado mai‑ka hidi ati nemonane.
I‑di Feri‑ya Baoro tokawahe
23Sodado mai‑ka hidi mai bi‑bidi na mai fama mai‑ya haane,
“Dai‑ka sodado mai 200 kana mai dai haaniya, yama‑ya mai nimaniyahi. Sesareya‑ya mai tokabone, Sodado mai 70 kana kafaro‑ya itari‑ya mai dabiyahi. Sodado mai one 200 kana wabise‑ya mai aka, mai‑ya mai daba nahi. Yama soki 9 ora‑ya dai tokaboneni.
24Kafaro owa dai nasawi, mese‑ya i‑di Baoro itari‑ya. Ai‑ka kofenado i‑di Feri‑ya i‑di Baoro dai towakamahi, Baoro‑ya mai nanahabariyahi.” Sodado mai‑ka hidi ati ne.
25Feri‑ka yama hani‑bone‑ya kanahano,
26“Ayo Feri, tika soho i‑di Karaodio Risiyasi ama·oni. Oka yama hani tikadikiyahi.
27Hibati‑ya Baoro‑ya Yodeo mai wata, mai hinahabebona, Baoro homano‑mona tamine omite, oka sodado mai hiwakamane, mai hinahabarebonaha.
28Yodeo mai‑ka hidi mai one‑ya Baoro owakama, mai‑ya ohiyara,
‘Hini yamata ihi Baoro‑ya dai watiti?’ Ona.
29‘Mose ati‑ya Baoro nofarene.’ Mai ati na,
‘Haa‑nima ne, towe tohi awire, sibarane. Haa‑nima ne, ai sokirihi, ai nanahabarihi tene.’ Owatibodi ati nani.
30Yodeo hawi‑ya hini mai‑ya mai tamine kemani, Baoro‑ya mai nanahababonehe. Hawi‑ya mai nahamone, mai tamine omita, tiwa‑ya Baoro oyoseni. Makobote fai‑ya mai ka‑kako tiwa‑ya mai oyosebani, mai ati timitabonehe. Feye amani.” Sodado mai‑ka hidi‑ka yama hani ati nineni.
31Sodado mai‑ka hidi ati ene Baoro‑ya sodado mai towakamineni. Yama soki‑ya mai hiwakame, Atibatide‑ya mai kobonineni.
32Yama wahabisari‑ya Atibatide‑ya sodado mai one wininama, kafaro mai toha, kafaro mese‑ya Baoro itarine mai tokomineni.
33Sesareya‑ya mai kobona, kofenado‑ya yama hani‑ya mai daa, Baoro‑ya mai daa, mai nineni.
34Yama hani‑ya kofenado kadike,
“Ebeni‑ya tiwa tabaro toha titi?” Kofenado ati ne.
“Sirisiya‑ya owa tabaro tohani.” Baoro ati ne.
35“Tiwa‑ya mai ka‑kako mai kamakiya, tiwati omita, mai ati omita onaboneni.” Kofenado ati ne.
Erodi‑ka yobe‑ya Baoro‑ya mai nafoyawahineni.
Currently Selected:
Yeso‑ka yo‑yose mai tamine 23: jaaNT
Highlight
Share
Copy
Want to have your highlights saved across all your devices? Sign up or sign in
