Markus 13

Yesuw a ɗif à ga Mbulum batsah ŋa ana

ti ta mbezle a dər mba ya

Mata 24:1-2; Luka 21:5-6

1I təv ana Yesuw a riŋ a dere a i ga Mbulum batsah ŋa ata ya ka, mìsle ŋgiɗ ilik ika magər gà ɓəzla mazazama ŋgat ata, a gwaɗar: «Yweh, yweh, fə̀r aà kur ga batsah ŋa aaha, tìtiw tìtiw a tsahən hinne ya kwaŋ, Əbay. Mazlazla ŋa kaɗəŋ ana, meme.» 2Yesuw a gwaɗar aaka: «Kur ga ŋgwal ŋa aaha ki ge aaka a zlaàzla ya ka, adzəka ka, ta mbezle a dər leheɗ leheɗ mba fit kweleŋ.»

Meme na ki sirekwe a dər ka, gər ahəɗ à ndìv a ya?

Mata 24:3-14; Luka 21:7-19

3Aləka i dəba ŋa ya, gà Yesuw tə tsala aka gər dìyes kwite duwa mayaha gər dizl ɗaf uliviye a riŋ hinne i fata. Tə daha a fata ka, Yesuw a ndza a bəɗ. A ŋgetehe a a ga Mbulum batsah ŋa ata ɗazlzlà lele ika miɗ ŋgar. I fata ka, gà Piyer nda gà Zakup, nda gà Yuhana, nda gà Andire, tar riŋ à gər tar nda gà ŋgat. Tə tsam aà ŋgat bazlam a, ta gwaɗar: 4«Tsik a mər te, ndeɗime na bazlam yak ata kà tsik a, a ta ge a ba ya? Dite meme na mìi sir a dər ka, gər ahəɗ aka à mendìve asa ya?»

5I dəba ŋa ya, Yesuw a dza ba aà metsìkè a tar, a gwaɗa a tar: «Gwim metsehe lele, wura ma ta baza a kurum za tsa. 6Aɗaba gà mburma hinne ti dere a a təv kurum a, ti zle akaba a zləm gà, dite ta gweɗe a kurum a, ku weke: <Iye ka, ŋgat ŋa,> tsaatsa pàrsa. Kamala taŋa ya, ti dzeye a à gà mìsle ŋgiɗ hinne. 7I təv ana kàa tsarakum gà labara gà gùvəl a ɗe a bise, kige tsa a ɗere a i təv diriŋ ŋa ya ka, ka ta gwim magəɗa, arəv ma da aà kurum a tsidze. Aɗaba gà dukw ata ka, say ti dere a dukw ŋgar. Ama mandəvandəv gər ahəɗ ka, aka sle zukw tsa na taŋa ya. 8Gà kwite ŋgiɗ pampam ta ge a gùvəl nda gà biy ŋgiɗ. Gà gawla Əbay ŋgiɗ ta ge a gùvəl nda gà biy ŋgiɗ pam asa. I gà kwite ŋgiɗ pampam ahəɗ a ɓezle a wàkit wàkit. May tekeɗe, a ta ge a hinne asa mbaŋa. Gà dukw ata tserdze ya ka, a live dər aba ya pəra, dite ti sir a dər ka, gər ahəɗ aka à mendìve ya, kamala mawà kəla ana à lèh ahər a, a wir a aà gà məkəs a.

9Ama kurum ka, say ndzum nda metsehe kurum lele. Aɗaba a pat ŋgiɗ ka, ti ta gese a kurum, ti de a à kurum aka miɗ seriye. Ti ta gezlere a kurum i gà ga mahàmà a Mbulum a. Ti ta gese a kurum aka miɗ gà ɓəzla makwàrà mburma nda gà aka miɗ gà Əbay gà bàba ŋana, agəra iye. Kamala taŋa ya, ki gwim a sida gà nda ndzer ŋa ika miɗ tar. 10Aɗaba malahalah ŋa, ələk gər ahəɗ à ndìv a ka, say gà mburma tàa tsaraka bazlam aaha ŋgwal ŋa ya fit dzekwiŋ. 11I təv ana ta gese a kurum aà mada à kurum aka miɗ seriye ya ka, ka tə dzalum gà gər agəra bazlam ana ki ti tsikwim a ter a ya tsa. Ama kàa ndzwimaha ka, ki ti tsikwim a ka, dukw ana Mbulum a ti ɗif a kurum a dər ika miɗ tar i fataya pəra. Aɗaba bazlam ana ki ti tsikwim a ya ka, a dere a ka, i madzala gà gər kurum a tsa. Ama na a ti ɗif a kurum a dər ka, Mezite Mesife Mbulum na à zlèk a kurum a. 12Gà mburma hə̀ndə̀sl hə̀ndə̀sl tì ti dzèye a gà damər dìnde tar a ahər a gà mburma, ta bets a tar. Gà tsir gà ɓəza tekeɗe, ti ta ge a dər kataya mbaŋa. Gà ɓəza ibam, ta hitse a aà gà tsir tar. Ta ge a ter a ɗaf aà mburma, ta bets a tar asa mbaŋa.*fa* 13Gà mburma tserdze, ku weke tekeɗe, ti ne a kurum a are, aɗaba ana kurum gà mburma gà ya. Ama wur ana ədəts aka gəs gəzləŋ, aka simereha haa a pat ana mesife ŋgar à ndìv a ya ka, Mbulum à mbil a dər.»

Mala mene are a Mbulum à pèt akabiŋa

Mata 24:15-28; Luka 17:23; 21:20-24

14Yesuw a gwaɗa a tar: «Aka miɗ mba ka, ki ŋgetwim a a wele ana ta gwa ahər <swalwa ŋa ŋgwala tsa hinne, dite a ne dukw zlaŋgatsak na i təv Mbulum a.> Wele ata a ndze a ka, a təv ana biy mendze ŋgar aɗəm tsiye.*fb* Wur ana a dzeŋge a dukw aaha ya ka, say mà dzar zləm lele. Na gà mburma ana ika ahəɗ Yuda ya, tàa ŋgat a gà dukw ata aka ndzera ka, tə̀ tə̀z ihər ndàra a kwite ya. 15Wura aka ge ika galak ka, ma tarra a bəɗ a, mə val, tsəka, ma da a huɗ ga a ma ŋgar, aà mandzə̀kàra iɗəm gà dukw ŋgar a asa dzekwiŋ tsa. 16Wur ana i gùvàh ŋgar a tekeɗe ka, ma ta mbəɗ gər a ma, aà mandzə̀kàra gà petek ŋgar a asa tsa mbaŋa. 17A pat ata ka, mesewere are batsah ŋana ka, biy gà məkəs ana nda gà huɗ i gər a, kige tsa, mawùr ŋa ana gà ɓəza aà tar a asa mbaŋa. 18Hamum a Mbulum, ələk gà dukw ata ti ndzere a ka, duwa ma ta ŋge a kurum aà sik kamala mivele ana i dùluɓ a tsa. 19Aɗaba mesewere are ata ka, à zè a dər biy na daga à gər ana Mbulum a ge gər ahəɗ haa kinehe ya. Mesewere are ŋgiɗ a riŋ à zè a taŋa ka, a riŋ asa tsa. 20Na mege Əbay Mbulum mà nikiɗ ihər à pat mesewere are ata ya tsa àsla ka, ana ka, wura ilik a mbil a tsidze. Ama a nikiɗ à pat ŋa ka, agəra gà mburma ŋgar ana a pala tar a.

21Na bəla wura aka gwaɗa a kurum: <*Kiristi naha,> kige tsa <araaka> ka, ka ta gəsum bazlam ŋgar tsa. 22Aɗaba taŋa ka, gà na ti ne aba Kiristi ya, nda gà na ti ne aba gà ɓəzla məma à guma Mbulum nda pàrsa ya, ta hitsiŋa. Ta geye a gà dukw mene aà mburma pampam hinne, aà məbàzà dər za a gà na Mbulum a pala tar zləmana, na mege ti sle a ya. 23Ama kurum kinehe ka, gwim metsehe lele, agəra gà dukw ata ti dere a mba ya. Taŋa ka, ndzum dər i zləm, Yàa tsik a kurum aba ya kinehe.»

Meme na *wur ana a dara i təv Mbulum a, a dere a ya?

Mata 24:29-31; Luka 21:25-28

24Aləka i dəba ŋa ya, Yesuw a gwaɗa a gà ɓəzla mazazama ŋgat asa: «I təv ana gà mesèwèrè are ata tàa ndəv iɗəm a ka, gà pat nda kiye tì div a asa tsa, a ndze a ziŋziŋ fit kweleŋ. 25Gà mawusawus ibam, ti dzewere a aà mbulum a. Dite gà dukw ana a riŋ madzàvà ŋa aà gəza mbulum a, ti lekeye aaba a gà gər ŋgwir ŋgwìr ŋgwir ŋgwir. 26A pat ata ka, gà mburma ta ŋgetiŋŋa, a iye, wur ana a dara i təv Mbulum a. I dere a ka, nda hulɓukw a, nda ndzəɗa Mbulum a hinne, dite nda mezlibe gà ana ti zlibe a à iye ya. 27I slirre a gà gawla Mbulum a. Ti dere a ka, aà mayaha gər a gà na i pala tar a, daga ara aà zlile mbulum a tserdze.»

Bazlam minew gùrùv ana a wiɗe a ya

Mata 24:32-35; Luka 21:29-33

28Yesuw a gwaɗa a tar asa mbaŋa: «Tsarakum bazlam minew gùrùv aaha kwaŋ. Aɗaba dizl ɗaf gùrùv ka, à gègìriŋa, dite à dze a ba aà mibìzè nda mewiɗe. Agəra taŋa, kurum tekeɗe, ki sirwim a dər ndzer, viye aka à mege. 29Kamala taŋa ya mbaŋa, na kàa ŋgatum a gà mesewere nda gà dukw ata pampam tàa ndzera ka, ki sirwim a dər ndzer, iye, *wur ana a dara i təv Mbulum a, Yàa à meslele bise. 30Iye ihər i gweɗe a kurum a kinehe nda ndzer, pàrsa iɗəm tsa: Gà mburma ana kinehe ya ka, ti ta mete a zukw tsa, say gà dukw ata tàa ndzera dzekwiŋ, dite ta metiŋa. 31Gà kuvəl Mbulum nda gər ahəɗ ka, tì ndìviŋa. Ama bazlam gà ka, à ndìv a tsa, a ndze a aà biybiy.»

Mbulum ilik na a sər pat ana gər ahəɗ à ndìv a ya

Mata 24:36,42-44; 25:14-15; Luka 12:38-40; 19:12-13

32Aləka Yesuw a gwaɗa a tar i dəba ŋa ya asa: «Ama wura a sər pat ŋa, nda ler ŋa ana gà dukw ata ti ndzere a ya tsidze. Ku mege gà gawla Mbulum tekeɗe, tə sər tsa. Ku mege iye ana Kəla ŋgar a tekeɗe, i sər ɓav tsa asa. Say Mbulum Tsir kwa à gər ŋgar ilik na a sər a. 33Gwim metsehe daga aà kinehe ya, ka ndzum are tsa, aɗaba kà sərum pat ŋa tsa.

34A ti ndzikiɗ a ba ka, kalkal mala ga ana a de a a təv a ya. A təv ana à meh a ba ya ka, a miyek a à ga ŋgar a ahər a gà ɓəzla megemir ŋgar. A ɗe a ter a aba à megemir a, ilik ilik tserdze. A gweɗe a ter a: <Gwim ɗa megemir aaha ka, kalkal lele, kamala ana iye ɗa i ma ya.> A gweɗe a a mala makàslà ga ŋgar asa: <Ndza ɗa ka, nda metsehe lele, ka ti ndze are tsa.> Ŋgat ŋa a mah ba, a da tsara. 35Aɗaba taŋa, kurum tekeɗe, ka ndzum are ɓav tsa. Ndzum nda metsehe, aɗaba kà sərum pat ana mala ga à mère a a ma ya tsa. Bəla à mère a ka, ndaàwa, kà sərum tsa. Bəla nda magər həvəɗ, kà sərum tsa asa, bəla medzè melìgire aka bur ide, bəla nda mèkwède aka pat ana à mbizere a ya, gərəŋ gərəŋ kà sərum tsa asa mbaŋa. Ama ki ndzwim a ka, nda metsehe lele, tsəka, 36aka wiyere aba ya paf ka, ma ti le aà kurum aka mendze are tsa. 37Bazlam ata i tsik a ka, a kurum ɗekɗek tsa. I tsik ka, ku a weke: Kaslum ba kurum, ndzum nda metsehe lele.»

Currently Selected:

Markus 13: gnd

Highlight

Copy