Luka 6

Pat mesìfìkà ba i təv Yesuw

Mata 12:1-8; Markus 2:23-28

1A pat mesìfìkà ba duwa ka, gà Yesuw nda gà ɓəzla mazazama ŋgat tə da nda gùvàh dukw duwa kamala daw a. Gà ɓəzla mazazama ŋgat ata ta haɓa dər dukw ata aà ahər manàhà ŋa, ti ndzendziɗera i dzəndzar a, tə zəm. 2Gà *Farisa duwa ta ŋgat a tar aaka ka, ta gwaɗa a tar: «Aàmala na ki gwim a dukw ana məpala ahəm Mbulum a gwa, ki gwim a pat mesìfìkà ba tsiye?» 3Yesuw a tsaraka kataya tsara ka, a gwaɗa a tar: «Wànà kàa dzeŋgwim dukw ana gà Dawda nda gà mburma ŋgar ta ge akahər ata, i təv ana may a wur aà tar a te ibam a? 4Ŋgat ka, a da a ga Mbulum. A daha ka, a zla dukw mezime ana ta vəl aɗaba Mbulum a, a zəm. Dite a vəl asiŋ ŋa a gà mburma ŋgar mbaŋa ya, ku mege dite məpala ahəm Mbulum a vəl vatwa aà mazəma ŋa ka, a gà ɓəzla mandəva kuɗa a Mbulum ɗekɗek tekeɗe ya.» 5I dəba ŋa ya, Yesuw a gwaɗa a tar asa: «Iye, *wur ana a dara i təv Mbulum a, na a kwere a pat mesìfìkà ba ŋa ya seyiŋ.»

Wele duwa makula ahər ŋa

Mata 12:9-14; Markus 3:1-6

6A pat mesìfìkà ba ŋgiɗ duwa asa ka, Yesuw a da a ga mahàmà a Mbulum. A daha, a dza ba aà metsìkè guma ŋgar a mburma. Ama wele duwa a riŋ i ga ata makula ahər mezime ŋa. 7Gà ɓəzla medzeŋge məpala ahəm Mbulum nda gà *Farisa ana riŋ i fataya, tə dza ba aà mesìkwè Yesuw ìzliɗ ìzliɗ lele. Ta gwa: «Wànà wele ata ana, a ge a megemir, a mbil a à mburma a pat mesìfìkà ba aaha ya?» Aɗaba a sàs a tar maŋgata vatwa aà məmàr à bakal. 8Ama Yesuw a sər a taraha aka dukw ana tə dzala ya. I dəba ŋa ya, a gwaɗa a wele makula ahər ŋa ata: «Hitse, dara aka miɗ mburma a faha ya.» Wele ata a hitse, a daha a təv ŋgar aka miɗ mburma a fata. 9Dite i dəba ŋa ya asa, Yesuw a gwaɗa a tar: «Iye ihər i wiz a aà kurum a bazlam ilik. Wànà məpala ahəm Mbulum a vəl vatwa dze ana, aà dukùla na a pat mesìfìkà ba ya? A gwa ana, gwim ŋgwal a mburma a pat mesìfìkà ba ya, tsəna ki gwim tsiye? A gwa ana, mbəlum à mburma ya, tsəna dzeywim à mburma ya?» 10I fataya ka, Yesuw a fara aà tar ə̀ba ə̀ba ə̀ba tserdze. Dite a gwaɗa a wele makula ahər ŋa ata: «Sirikara à ahər yak a təv ga ya.» Wele ata a sìrìk dərraha tsara ka, ahər ŋgar ata a lə̀mbaɗaba lele. 11I dəba ŋa ya, a tsəɓ a gà mburma ana i liwiŋ tar, ti ne are a Yesuw a hinne. Tə dza akaba bazlam ŋgùrà ŋgùrà ŋgùrà i liwiŋ tar. Tə dza ba aà metsìkè dukw ana ta ge a à Yesuw a.

Yesuw a pala gà ɓəzla meslire ŋgar kurwa gəra sula

Mata 10:1-4; Markus 3:13-19

12Akahər ata ka, Yesuw a tsəl aka gər dìyes duwa, aà mahàmà a Mbulum. A daha, a həna a bəra, aà mahàmà a Mbulum i fata. 13Aləka mbulum a də̀v tsara ka, a zal a gà ɓəzla mazazama ŋgat, a pala i magər tar a kurwa gəra sula. Dite a ɗe a tar gà ɓəzla meslire ŋgar. 14Zləm gà mburma ata a pala tar a ka, Simun ana a ɗer Piyer a, nda damər ŋgar Andire, Zakup, Yuhana, Filip, Bartelemi, 15Mata, Tumas, Zakup kəla Alfayus, Simun ana a niw bazlam ŋgumna piŋŋe, a waya makwàrà ba tar i gwala ŋgar a, 16Yudas kəla Zakup, dite Yudas Iskariyut, wele ana a ta ge a ɗaf aà Yesuw a.

Yesuw a tsik guma ŋgar a mburma, dite a mbala

à gà ɓəzla dukw məməta

Mata 4:23-25; Markus 3:7-12

17Aləka gà Yesuw nda gà ɓəzla mazazama ŋgat tə tarra i dìyes ata ya, ti ndze aka dàlàbə̀rà duwa fehhè lele ka, tàa le aà gà ɓəzla mazazama ŋgat ŋgiɗ a fata hinne. Gà asiŋ gà mburma ŋgiɗ riŋ i fata hinne asa mbaŋa. Ama i liwiŋ gà mburma ata ka, gà asiŋ ŋa tə dara i Yeruzalem a. Gà biy ŋgiɗ ibam, tə dara i gà asiŋ gà kwite ŋgiɗ ana a riŋ ika ahəɗ Yuda ya, dite nda gà na tə dara i gà kwite Tirus nda Sidun ana aà gùva duluv a. 18Gà mburma ata tə dara ka, aà matsaraka guma Yesuw ana a tsik a ya, dite mə mbala à tar i dukw məməta tar a. Gà na sitene a gasawa tar a tekeɗe, tə dara a təv ŋgar a mbaŋa, a mbala à tar. 19Gà mburma tserdze ti yahawa vatwa aà malə̀mà ahər, aɗaba ndzəɗa ana a dawara i ba ŋgar a ka, a mbalawa à tar fit dze.

Gà meŋgèsle nda mesewere are

Mata 5:1-12

20Aləka i dəba ŋa ya, Yesuw a mbəɗ aba a təv gà ɓəzla mazazama ŋgat ata, a gwaɗa a tar:

«A kurum gà ɓəzla matawak, ŋgayum ba,

aɗaba ki ti ndzwim a nda gà Mbulum

i mekwere ŋgar.

21A kurum ana may a gewa a kurum

kinehe ya ka, ŋgayum ba,

aɗaba Mbulum a ta vile a kurum a

dukw mezime hinne, a slewa a kurum ŋa.

A kurum ana kà tuwawum kinehe ya ka, ŋgayum ba,

aɗaba ki ti sewlwimiŋa.

22A kurum ana gà mburma ta gewa a kurum matawak a,

tə lə̀mawa a kurum aba ya, tə ndavayawa a kurum,

dite ta waya kurum asa tsa, aɗaba ana

kə̀ gəsum iye, wur ana a dara i təv

Mbulum a ya ka, ŋgayum ba.

23A pat ana gà dukw ata tàa le aà kurum a ka,

ndabayum a mbulum, ŋgayum ba,

aɗaba Mbulum a ta vile a kurum a

dukw maya ba kurum i gər ŋa i mbulum ka,

batsah ŋa. Ama sərum dər ka,

gà tsir gà mburma aaha

ti sèwèr a kurum a are ya ka, ta ge ɗa

a gà ɓəzla məma à guma Mbulum

akahər ata ya ka, kataya mbaŋa.

24Ama a kurum gà ɓəzla limana ka,

waya ba kurum a.

Aɗaba kàa mbər meŋgeslwim aka ndəv.

25A kurum ana hitwis i gər kurum,

dukw mezime a slewa a kurum kinehe ya ka,

waya ba kurum a.

Aɗaba may a ta gewa a kurum ŋa.

A kurum gà ɓəzla sawla ana kinehe

ki ŋgeywim a ba ya ka, waya ba kurum a.

Aɗaba ki ti ndzwim a nda madzala gà gər

nda gà tuwa.

26A kurum ana gà mburma ta gweɗe a kurum a,

kurum gà ŋgwal ŋa ya ka, waya ba kurum a.

Aɗaba kərga taŋa ya na gà tsir tar

tə zləbawa ɗa à gà na ta gwaɗawa:

Mər ka, gà ɓəzla məma à guma Mbulum ka,

tsaatsa pàrsa ya.»

Mawàyà gà ɓəzla mene are

Mata 5:38-48; 7:12a

27Yesuw a gwaɗa a tar i dəba ŋa ya: «Ama iye i gweɗe a kurum ŋa, a kurum ana ki dzwìm a zləm a mifefile gà ya: Wayum gà ɓəzla mene are kurum ivaɗ. Gwim ŋgwal ŋa a gà na ta ge a kurum a matawak a. 28Piswim ahəm a gà mburma ana ti ndeveye a kurum a ya. Dite ka hamum a Mbulum agəra gà na tì sèwèr a kurum are ya mbaŋa. 29Na wura aka lakak aka mahwalum ka, waɗàl mbə̀ɗaraha à biy ŋgiɗ, ma lakək aaka asa. Na wura aka kə̀zala aà kər tùmbùlum ana ika ba yak a ka, ka ta palar ahəm tsa, vəlar aaka gèeriy ŋa ana i huɗ ŋa ya mbaŋa. 30Na wura aka wiz aà kər duwa ka, ka ti niwer dər tsa, vəlar. Kige tsa, na wura aka kə̀zala aà kər duwa ya ka, ka ta wiz ahər tsa. 31Gwim dukw ana a sàs a kurum zləmana gà mburma ta ge a kurum ŋgwal ŋa ya, a gà mìsle ŋgiɗ mbaŋa. 32Na kàa wayum ka, gà mburma ana ta waya kurum a ɗekɗek ana, aàmala na ki dzelwim a ka, Mbulum a ta vile a mər a dukw maya ba asa ya? Aɗaba ku mege gà ɓəzla bakal tekeɗe ibam, ta waya ba kataya mbaŋa. 33Na ki gwim a ŋgwal ŋa ka, a gà na ta ge a kurum ŋgwal ya ɗekɗek ana, aàmala na ki dzelwim a ka, Mbulum a ta vile a mər a dukw maya ba mər asa ya? Aɗaba ku mege gà ɓəzla bakal tekeɗe, masəra ba tar riŋ kataya mbaŋa. 34Na ki vilwim a duwa ka, a gà mburma ana kà sərum dər ka, ta me a kurum a dər aɗəm mba ya ɗekɗek ana, aàmala na ki dzelwim a ka, Mbulum a ta vile a mər a dukw maya ba asa ya? Aɗaba gà ɓəzla bakal tekeɗe ibam, ta vəlawa duwa a a gà ɓəzla bakal ŋgiɗ, dite ta me a ter a dər aɗəm pèt ŋgiɗ kərga biy tar a mbaŋa. 35Ama ka, kataya ivaɗ tsa. Wayum gà ɓəzla mene are kurum. Gwim a tar ŋgwal ŋa, vəlum ahər, ka tə dzalum ka, ti ta me a mər a dər aɗəm a pèt ŋgiɗ tsəna, meme tsa. Dite i dəba ŋa ya, ki ta ŋgetwim a dukw maya ba kurum batsah ŋa, ki ti nwim a gà ɓəza Mbulum ana i gər ŋa ya. Aɗaba ŋgat tekeɗe, a gewa ŋgwal ŋa a gà ɓəzla segeme, nda gà ɓəzla swalwa mbaŋa. 36Mburma tə ndza a kurum are tsehe, kamala Mbulum Tsir kurum ana kà ndzumar are tsehe ya.»

Ka ta mum à bakal a gà mìsle ŋgiɗ tsa

Mata 7:1-5

37«Ka ta mùm à bakal a gà mìsle ŋgiɗ tsa, dite Mbulum tekeɗe, à me a kurum a à bakal tsa mbeete. Ka ta ŋgewim gər a gà mìsle ŋgiɗ tsa, dite Mbulum tekeɗe, a ŋgewe a kurum a gər tsa mbeete asa. Pə̀lum à bakal a gà mìsle ŋgiɗ, dite Mbulum tekeɗe, à pìl a kurum a dər mbaŋa. 38Wayum mburma, vəlum ahər lele, dite Mbulum ibam, a vile a kurum a biy ŋgar. A vile a kurum a ka, ki slwim a aà magəsa ŋa tsa. A rìɓìts a kurum a dər aɗəm lele, à rèh a kurum a dər aɗəm. Dukw ana kàa gwim a gà mìsle ŋgiɗ a ka, Mbulum tekeɗe, à me a kurum a dər aɗəm ka, kamala taŋa ya mbaŋa.»

39Yesuw a gwaɗa a tar ndaka bazlam minew ŋgiɗ asa: «Mala guluf ana a sle a aà megese ahər a mala guluf ŋgiɗ a? Awaŋ, a sle a tsa, aɗaba tì dzèwa akaba a a biye sula məma. 40Wur ana ti ɗifer a à metsehe mba ya ka, a sle aà mezè a wele ana a ɗifer a à metsehe ata ya tsa. Ama kəla ka, aka həna à gər a bəɗ, aka dza zləm a metsehe ata lele ka, ta geye akaba à metsehe tar nda wele ata a ɗifer a dər a.» 41A gwaɗa a tar asa: «Aàmala na a sàsak meŋgeteha ka, a pərats ana kwizikw i are damər yak a, tsaatsa i yak ŋa ana iɗəm diŋgwizl dùrgùrəzl a ka, kàa sər ahər tsiye? 42Meme na ki sle aà megweɗe a a damər yak ka: <Aha i zlekere a pərats ata i are yak a> dzekwiŋ a, na tsaatsa i yak ŋa ana iɗəm ka, diŋgwizl a? A kər mala mimbèhè are ata, lah mazlàra diŋgwizl aaha i are yak ŋa ya dzekwiŋ, dite ndzihndzih ki ŋget a vatwa lele, ìndits ki zlere a pərats a kwizikw ŋa ata i are damər yak a kuɗa.»

Gà dizl ɗaf ti sir a aba ka, i mewe tar a

Mata 7:15-20; 12:33-35

43I dəba ŋa ya, Yesuw a gwaɗa a tar asa: «Dizl ɗaf ana ŋgwal ŋa ya ka, ki ŋgilwim a ihər mawà dukw ana ŋgwal ŋa tsiye tsa. Dite dizl ɗaf ana ŋgwal ŋa tsiye ka, ki ŋgilwim a ihər mawà dukw ana ŋgwal ŋa ya tsa asa. 44Aɗaba ku mege dizl ɗaf awara tekeɗe, a sir a aba ka, i mewe ŋgar a. Ki slwim a aà meŋgile mawà gùrùv aà dizl ana adak ihər tsa. Dite ki slwim a aà meŋgile a mawà hàndaza aà hèdìdir a tsa asa. 45Wele ana ŋgwal mburma, a sər ahəm lele ya, a ge a ka, dukw ana ŋgwal ŋa ya mbaŋa. Dite wele ana ŋgwal ŋa tsiye tekeɗe, a ge a ka, dukw ana ŋgwal ŋa tsiye mbaŋa asa. Aɗaba arah mburma a màwa ka, à dukw ana kìɗìŋŋa a dzele a i gəzləŋ ŋgar a.»

Gà ɓəzla mazlazla ga ana ŋgwal ŋa ya, ndəna ŋgwala tsiye

Mata 7:24-27

46Yesuw a gwaɗa a tar i dəba ŋa ya asa mbaŋa: «Aàmala na kà zelewimiŋ <Batsah mər ŋa, Batsah mər ŋa> ya, na kwets ki gwim a dukw ana i tsik a kurum a ya tsa taf a? 47Ama ka, wele ana a dere a a təv ga ya, aka tsaraka bazlam gà, aka ge megemir ŋa lele ana, a ndzikiɗ ba ana, weke? A za araha, i ɗif a kurum a dər, tsarakum kwaŋ. 48A ndzikiɗ ba ka, wele ana a dzèhe a ga ya. A le a biye ŋa, à zlèzlere a iɗəm nda kur a lele, na a mbezle a tsiye. Aləka yam aka dza a bəɗ ka, menènìze a de aɗəm a tsa, a ndze a sahsah lele, a mbezle a tsa, aɗaba mazlazla ŋara i biye ya nda kur a. 49Ama wur ana aka tsaraka bazlam gà, dite ka, aka ge mege megemir ŋa tsəka, a ndzikiɗ ba wele ana a dza ba aà madzàha ga aka ahəɗ kataya, ze mele biye ŋa ya. Aləka i təv ana yam a dara, a dza a bəɗ a ka, ga ata a nànə̀z. A durus, bìrìm a mbazla fit tsara.»

Currently Selected:

Luka 6: gnd

Highlight

Copy