Gà Ɓəzla Meslire 7

Bazlam Mbulum ana Etiyen a tsik a

1I dəba ŋa ya, *batsah mala mandəva kuɗa a Mbulum i liwiŋ gà mburma ata ya, a gwaɗa a Etiyen: «Bazlam ana ti tsik aà kər ana, wànà ndzer a?»

2Etiyen a gwaɗa a tar aakaha: «Gà damər gà, nda gà tsir gà, dzum zləm a bazlam gà kwaŋ. Mbulum ana a za dukw tserdze ya, aka pàt à ba ŋgar a Abəraham, batsah tsir kwa, i təv ana ŋgat ika ahəɗ Mezapitamiya. Akahər ana aka da a Haran zukw tsiye, 3a gwaɗar: <Miyak à gwala yak nda ahəɗ yak dze. Ka da aka ahəɗ ana i ti ɗifek a dər a.>*fa* 4I dəba ŋa ya, Abəraham a hitse, a miyak à ahəɗ Kaldiya ata. Dite a da a mendze aka ahəɗ Haran. Aləka i dəba ŋa ya, tsir ŋgar a mət ka, Mbulum a zla ŋgat ika ahəɗ ata ya, a da à ŋgat aka ahəɗ ana kinehe kwa ɗa iɗəm a. 5I fata ka, Mbulum aka vəlar gùvàh màda ŋgar tsa. Ku mege dzidzel kwizikw tekeɗe, aka sasar tsidze. Ama Mbulum a gwaɗar i sida ya ka: <I ta vilek a ahəɗ ata, a kər fit. Dite gà ɓəza gà ɓəza yak tə ndzawa iɗəm i fata. A ne a mekwere tar aà biybiy.> Ama akahər ana a tsikar taŋa ya ka, kəla ŋgar a riŋ ilik zukw tsa. 6Dukw ana Mbulum a tsiker a ka, a gwaɗar: <Gà ɓəza yak ti ti ndze a ika ahəɗ mburma. Ti ne a gà ɓele tar. Tì sèwèr a ter a are mive dərməka faɗ. 7Ama i ta ge a seriye aka gər gà mburma ata ta ge a ter a matawak a. I dəba ŋa ya, ti dere a i fataya, ta giŋ a meslire aka ahəɗ aaha.>*fb* 8Ama ka, Mbulum a ɗifer à masəra ba tar nda təv masàsà ba. I dəba ŋa ya, Abəraham a wa Izak kuɗa. A ge mehinne tsamakər ka, a sàs ŋgat. Aləka i dəba ŋa ya asa, Izak aaha a ta mewe Zakup ka, a sàs ŋgat mbaŋa. Zakup tekeɗe, a sasa gà ɓəza ŋgar ana kurwa gəra sula, ti ne gà tsir kwa ya asa mbaŋa.

9I liwiŋ gà tsir kwa ata kurwa gəra sula ya ka, ti ne iɗəm are a Yasufa ya hinne. Ta kal à ŋgat, tə da à ŋgat aka ahəɗ Ezipt. Ama Mbulum a riŋ mandza ŋa nda ŋgat. 10A mbəl à ŋgat i mesewere are ŋgar ata ya fit dze. A vəlar hwarhwar nda metsehe, dite ka, *Faruna, Əbay batsah ŋa ana i Ezipt ya, mà gəs ŋgat lele, akahər ana ŋgat a riŋ i təv ŋgar a. Əbay ata a ne à ŋgat batsah ŋa ika ahəɗ ata, dite aka gər gà mburma ana i ga i ma ŋgar a tserdze mbaŋa.*fc* 11A te megeha i dəba ŋa ya ka, may batsah ŋa a ge ika ahəɗ Ezipt ata nda ahəɗ Kanan dze. Ama gà tsir kwa ata ta ŋgat dukw mezime asa tsidze.*fd* 12Zakup a tsaraka daw a riŋ i Ezipt ka, a sləraha gà ɓəza ŋgar gà bàba gà tsir kwa ata malahalah ŋa ya, aà masəkəma ŋa. 13Aləka i dəba ŋa ya, ta mbəɗaha gər masula ŋa na ka, Yasufa a ɗif a tar aba, a gwaɗa a tar: <Iye ka, damər kurum.> Dite batsah Əbay ata a sər ka, tar gà gwala Yasufa. 14I dəba ŋa ya, Yasufa a slər mburma aka tsir ŋgar Zakup, aà madara a təv ŋgar a fataya, nda gà mburma ŋgar ana dzik təsəla gəra ə̀zləm a tserdze.*fe* 15Dite gà Zakup ta mah ba, tə da aka ahəɗ Ezipt. Aləka i dəba ŋa ya, a mət riŋ i fata. Gà bàba gà tsir kwa ata tekeɗe, ta mata riŋ i fata mbaŋa. 16Tə ndzakawa məməta tar ka, a Sehem. Ti leyewa tar ka, a gùvàh dive ana Abəraham a səkəm à gà ɓəza Hamur a.*ff*

17I təv ana Mbulum aka à mendìve à dukw ana a tsik i sida ya, a Abəraham a ka, gà gwala kwa ta wa ba hinne i Ezipt. 18I dəba ŋa ya, Əbay ata a riŋ asa tsəka, ti tike aɗəm Əbay ŋgiɗ. Ama Əbay ata a sər Yasufa asa tsa. 19A gewa matawak a gà gwala kwa, a sèwèrewa a tar are hinne. A fàr aka tar ndzəɗa aà mandza aba à gà ɓəza ndirkiz a dala ya, dite ta mata.*fg* 20Akahər ata na ta wa Musa ya. Ŋgat ka, ŋgwal kəla lele, a tsahən aà Mbulum. Ta gəl ŋgat kiye makər i ga i bəra tsir ŋgar dzekwiŋ. 21Dite na ti tike aba ŋgat aà gùva dula ya. Ta kaha ŋgat a fata ka, aɗaba Əbay ma sər ahər i ma ka, à kiɗ a ŋgat. Aləka i dəba ŋa ya, dəm Əbay ata a le ahər i fata, a zla ŋgat, a gəs ŋgat kamala kəla ŋgar a.*fh* 22Kərga taŋa ya, a gəl ba, a zla metsehe gà Ezipt lele. A ne batsah ŋa i təv mifefile ŋgar a, nda megemir ŋgar ana a ge a ya tserdze.

23Aləka Musa a ge mive dzik faɗ ka, a gwa: I ta fir a aka gà damər gà ana gwala tar gà Isərayel a. 24I dəba ŋa ya, a ta medeha ka, a ŋgataha a wele duwa gà Ezipt ana à sèwèr a are a mburma ŋgar a. A daha, a yàb aka wele ata, aà mezleke gà mburma ŋgar ata, a kəɗ gà Ezipt ata.*fi* 25A dzala ka, gà damər ŋgar tə sər ka, Mbulum aka vəl a tar ŋgat aà mibe à tar i mesewere are ya. Ama tə sərar aakaha tsa. 26Ndidwe ŋa ka, Musa a le aà gà Isərayel sula, ta gìzl a ba ika magər tar. A sasar zləmana ka, tə sər aaba ahəm. A gwaɗa a tar: <Aàmala na ki gìzlwim a ba ya, gà masla gà, araha kurum ka, nda damər à?> 27Ama wele ana a lah aà maàga ŋa ya, a ləm iɗəm a Musa ya diriŋ, a gwaɗar: <Kər ana, Əbay a? Weke na a tike kər a Əbay, mala magàsà ikaba mər a? 28Wànà a sàsak mekìɗe iye kamala gà Ezipt ana kə̀ kəɗ ndavana ya asa ya yà?> 29Musa a tsaraka bazlam ata kataya tsara ka, a val aka ahəɗ Madiyan. A ndzaba i fata. I dəba ŋa ya, a ŋgat gà ɓəza gà asləka ŋa sula i fata.

30Ama a ge riŋ mive dzik faɗ ka, gawla Mbulum ilik a patar aba i kusak, bise nda kwite Sinay. A patar aba ka, i bagur duwa, akwa iɗəm ŋgaŋŋa.*fk* 31Musa a ŋgataha a dukw ata ka, a ger kamala sunwa ya. A sìrìkaha aà mesèmete dukw ata zləmana ka, a tsarakara iɗəm mifefile Mbulum BATSAH kwa ŋa i akwa ata ya. A gwaɗarra:*fl* 32<Iye ka, Mbulum gà tsir yak Abəraham nda Izak nda gà Zakup.> Musa a tsaraka kataya tsara ka, a dza ba aà medzedzere, a ge magəɗa hinne, a gəs mifìre ahəraha asa tsa. 33I dəba ŋa ya, Mbulum ata a gwaɗarra asa: <Ndzək tsàpà ika sik a, aɗaba təv aka kər iɗəm a ka, təv ŋgwal ŋa ana biy gà ya. 34Yàa ŋgat a mesewere are gà mburma gà ana tì sèwèr a ter a are i Ezipt ya. Yàa tsaraka mandəva kuɗa tar, dite i dara aà məmbə̀là à tar a kuɗa. Dara, i slir a kər a Ezipt.>*fm*

35Musa ka, wele ana gà Isərayel ti niw ŋgat, ta gwaɗar ka: <Weke na a tike kər a Əbay mər, a gwaɗak, gasa ikaba mər a dziye ya?> Ama ŋgat ka, Mbulum a zla ŋgat, a ne à ŋgat Əbay, mala məmbə̀là à tar. A slər ŋgat ka, nda ahər gawla Mbulum ata a pàt à ba ŋgar i huɗ bagur ata, akwa iɗəm ŋgaŋŋa ya. 36Musa ata na a bera à gà Isərayel i Ezipt ya ya. A gewa gà dukw mene à mburma ŋgiɗ pampam ika ahəɗ ata aà guva duluv ŋa a riŋ nduzzwa, nda gà i kusak asa mive dzik faɗ.*fn* 37Musa aaha asa na a gwaɗa gà Isərayel ka: <Mbulum a ti slir a kurumehe a mala məma à bazlam ŋgar kamala iye ya. Wele ata ka, a ti slir a ya ka, wura ilik ika magər gà gwala kurum ana ika miɗ mba ya.>*fo* 38I təv ana gà mburma Isərayel ti yahaba gər i kusak aà sik kwite Sinay ka, Musa na mala mazàzə̀ɗà à bazlam gawla Mbulum ana a tsikarra i gər kwite ya, dite na a zazəɗ dərraha a gà gwala kwa ya. Mbulum a ɗerra à bazlam mesife ya, dite na, araha a ndzera a təv kwa ya mbaŋa ya.*fp*

39Ama gà tsir kwa ata ta gəs bazlam ŋgar tsa. Ti yà ŋgat a dala. Ta waya məmbə̀ɗà gər zləmana ka, a Ezipt.*fr* 40Ama ta gwaɗa a Haruna: <Geye a mər dukw ana a ne a mbulum mər, mìi zèmbeɗe a dər a, aɗaba mì sər dukw ana a ge riŋ ba a gər a Musa ana a ndzəkara mər ika ahəɗ Ezipt ya tsa.>*fs* 41Tə daha, ta və̀ɗ dukuməŋa kamala kəla sla ya, ti ne dər mbulum tar, ta vəlar duwa. Ta ŋgaya ba hinne nda dukw ata ta ge nda ahər tar ŋa ya. 42Ta ge dukw ata kataya ka, Mbulum a mbəɗ aba à tar a, dite na tə dza gurmits a bəɗ a gà mawusawus a, kamala ana mewetse ŋa i wakita gà ɓəzla məma à bazlam Mbulum a, Mbulum a gwa:

<A kurum gà mburma Isərayel.

Gà dukw ata kà zleyewumar ɗa mive dzik faɗ

i kusak a ka, a iye tsa.

43Mekiriwe ga petek mbulum *Muluka ata ta kiriw a,

na kà zlawum a, dite ka, kà zazamawum i dəba ya.

Mendzikiɗe ba mawusawus mbulum *Refan ibam,

ka zlawum mbaŋa.

Gà dukw ata ki geywim nda ahər kurum a,

na kà dzàyawumar gurmits a bəɗ a.

Aɗaba taŋa na i dzik a kurum ika ahəɗ aaha ya,

a təv ŋa diriŋ à Babila ya kweleŋ fit.>*ft*

44Gà tsir kwa ka, tar riŋ nda gà ga ana ta kiriw nda petek a i kusak. Mbulum a ndzawa nda gà tar, a tsikewa iɗəm bazlam ŋgar a Musa i fata. Ta kiriw ga petek ata ka, kamala ana Mbulum a waya, a gwaɗa a Musa ka, i ɗifek a dər a.*fu* 45I dəba ŋa ya, gà ɓəza tar tə zazəɗ à mekiriwe ga petek ata. A ta megeha ka, tə zla ahəɗ gà mburma ana Mbulum a də̀gə̀zara iɗəm tar, aɗaba tar ana ti ndze aɗəm a ya. Akahər ata ka, Yesuwa Əbay tar. Tə da akaba aɗəm nda gà ŋgat dze. Tə zla dər a ahər, tə ndza aɗəm a fata nda gà Əbay tar Yesuwa. Ga petek ata a ndza haa a le aà mendze Əbay Dawda ana a ge ɗa ya. 46Ama Dawda ka, mandərkwasla na i təv Mbulum a, a wiz vatwa aà Mbulum, aà màzlàzlàr ga, dite ka, tə̀ zàmbaɗawa iɗəm à ŋgat ana Mbulum Zakup ya. Ama aka vəlar vatwa ɓav tsa.*fv* 47Ga ata na a ta meger aləka ka, Salumun.

48Ama ku mege kataya tekeɗe ka, Mbulum ana ika gər gà dukw tserdze ya ka, a ndze a ga ana gà mburma ta ge ya tsa. Kərga na Mbulum a tsik nda ahər mala məma à guma ŋgar Ezaya, a gwa:

49<Təv ana i gər ŋa ya ka, təv mendze gà.

Dite gər ahəɗ ka, təv sik gà.

Ga awara dze ya, na ki gwimiŋ a ivaɗ a?

Kà dzalum i gər kurum dze ana,

i ndzewe a i fataya?

50Iye tsiye, na i ge dukw tserdze ya?> «*fw*

51I dəba ŋa ya, Etiyen a gwaɗa a tar asa: «A kurum, gà mburma ana kà nwim à ba gà ɓəzla mandakazləm a, ki ŋgwim vatwa a bazlam Mbulum ana a de a a gəzləŋ kurum a. Kà ràrə̀ɗum a zləm kurum, a sàs a kurum metsereke tsa. Ki delewwim a aba Mezite Mesife Mbulum i təv kurum a. Kàa gwim kamala gà tsir kurum a. 52Gà ɓəzla məma à guma Mbulum awara na gà tsir kurum tàa sèwèr a tar are tsiye? Tàa bats gà mburma ana ti ɗif a tar à mede mala meslire ŋgar ndzer ŋa na a dere a ika miɗ a. Ama kinehe ka, ŋgat ŋa kuɗa na ki gwim ahər ɗaf, dite kə̀ kəɗum ŋgat a. 53Kurum ka, Mbulum a vəl a kurum məpala ahəm ŋgar nda ahər gà gawla ŋgar. Ama kurum ŋa ka, a sàs a kurum magəsa ŋa tsa.»

Makə̀ɗà Etiyen ana ta kəɗ ŋgat a

54Gà mayahaba gər mburma ata tə tsaraka bazlam ŋgar ata kataya tsara ka, ta ge arəv hinne. Ta papaɗa ikaba ahər a, nda təv Etiyen a. 55Ama Etiyen ana maràhà ŋa nda Mezite Mesife Mbulum a, a fə̀r ndàra a gər ŋa. A ŋgataha a ndzəɗa Mbulum ana a za dukw tserdze ya, dite a ŋgataha a Yesuw a riŋ mehìtsè ŋa ika tsèke ahər mezime Mbulum mbaŋa. 56A gwaɗa a tar: «Tsarakum, araaka, iye riŋ i ŋgetehe a a gəza mbulum mahə̀ndə̀kà ŋa ikaba ya, dite Yesuw, *wur ana a dara i təv Mbulum a, a riŋ mehìtsè ŋa ika tsèke ahər mezime ŋgar.» 57I fataya tsara ka, ta wideye hinne, dite tə dzaya dər ahər a zləm, aɗaba a sàs a tar metsereke bazlam ŋgar tsa. Ta wideye aka ŋgat hùrùm fit, tswip tswip tswip tswip ti yabaya aaka. 58Ta sapara ŋgat i huɗ kwite ata ya, tə da à ŋgat ndàra a dala ŋana. Tə daha, tə ndzək ikaba gà petek tar a, tə dza ba aà makàlàwà ŋgat nda kur. Ta waya makə̀ɗà ŋgat a biye. Gà taŋa ta kalawa ŋgat a, ta miyak aba à gà petek tar a fata a təv wele duwa a riŋ gawla ŋa, zləm ŋgar Sawul, dite aà makàslà a tar. 59Ama Etiyen a riŋ a heme a a Mbulum, na tə dza ba aà makàlàwà ŋgat nda kur a. I huɗ meheme ŋgar ata ya ka, a gwa: «Yesuw Batsah ga ŋa, araha, i mìt a ka, zla mesife gà a təv yak te.» 60I dəba ŋa ya, a dza gurmits a biye, a wideye dər nda magala hinne. A gwa asa: «Batsah ga ŋa, ka ta miyak à bakal ŋa aka gər tar tsa.» A tsik aba bazlam ata ya tsara ka, a mət.

Currently Selected:

Gà Ɓəzla Meslire 7: gnd

Highlight

Copy