Gà Ɓəzla Meslire 6

Ta pala gà mburma təsəla aà mazlàkà gà ɓəzla

meslire Mbulum

1Akahər ata ka, gà ɓəzla magəsa Yesuw nda gəzləŋ tar riŋ ti sìkèh a gà Yahuda ana ta fèfil a ndaka ahəm girek a ka, ta mbetsebe a ahəm hinne nda matsəɓatsəɓ nda gà Yahuda ana i ma ika dizl a. Ta gwaɗawa ka: Gà madakwa gà məkəs mər ta ŋgatawa dukw mezime ana tə dzayawa a tar a lele tə tsa. 2I dəba ŋa ya, gà ɓəzla meslire Mbulum ana kurwa gəra sula ya, ti yaha gər a gà asiŋ gà ɓəzla mazazama Yesuw ŋgiɗ tserdze. Ta gwaɗa a tar: «Mìi mìts a aà metsìkè bazlam Mbulum a, dite mìi dzèye a iba dukw mezime a mburma ya ka, a tsahən tsa. 3Aɗaba taŋa, gà damər gà, palum mburma təsəla ika magər kurum a, gà ɓəzla metsehe ana tàa rah nda Mezite Mesife Mbulum lele, wirwir i ba tar tsiye. Ka vəlakwa a tar megemir ŋa a ahər tar, ta ge. 4Dite i dəba ŋa ya, mìi sle a aà meŋgete vatwa kəla pat, aà mahàmà Mbulum nda metsìkè bazlam ŋgar kuɗa.»

5Ama bazlam tar ata a da a gər a gà mburma tserdze. Tə daha, ta pala gà mburma ata. Malahalah ŋa ka, tə zla Etiyen, wele ana a gəs Mbulum lele, maràhà ŋa nda Mezite Mesife ŋgar a. Dite tə ndzək gà Filip nda gà Purukwar, nda gà Nikanur, nda gà Timun, nda gà Parminas, dite nda gà Nikwalas gà slele ana i kwite Antakiya, akahər ata a zazam matawala dukw gà Yahuda ya. 6Aləka i dəba ŋa ya asa, tə ndzəkaha tar a təv gà ɓəzla meslire Mbulum ata. Tə daha ka, gà mburma ata tə dzaya aka tar ahər. Ta hama aà Mbulum agəra tar.

7Bazlam Mbulum a ɗe zləm hinne. Gà ɓəzla mazazama Yesuw tə səkah hinne i Yeruzalem, dite gà ɓəzla mandəva kuɗa a Mbulum hinne ta gəs Yesuw nda gəzləŋ tar mbaŋa.

Magəsa Etiyen ana ta gəs a

8Ama Mbulum a pise ahəm a Etiyen, a vəlar ndzəɗa, dite a gewa gà dukw mene à mburma hinne nda gà dukw ŋgiɗ pampam ika magər gà mburma. 9Ama ka, gà asiŋ ŋa ta gəs bazlam ŋgar tsa. Tar ka, gà na i ga Mbulum ana tə zalar «ga Mbulum gà ɓele ana tàa pəl à tar a. » Ta gaw ba nda gà Yahuda ana tə dara i Kirene ya əŋgal, dite gà na tə dara i Aleksandiriya ya əŋgal asa, dite nda gà asiŋ gà Yahuda ana tə dara i Kilikiya ya, nda gà na ika ahəɗ Asiya ya mbaŋa. Tə dza ba aà mimbètsèba ahəm nda gà Etiyen. 10Ama Etiyen a be tar nda bazlam, aɗaba Mezite Mesife Mbulum na a vəlar metsehe aà mifefile kataya ya.

11I dəba ŋa ya, ta vəl gwarwa a gà mburma, dite gà mburma ata ta gwa ka: «Maa tsaraka bazlam aà Etiyen a, aka tsik dukw ana ŋgwal ŋa tsiye, aà gà Musa nda Mbulum.» 12Tə dza ahər gà asiŋ gà mburma ŋgiɗ nda gà bàba ŋa ana ta kwere a gà Yahuda ya, dite nda gà ɓəzla medzeŋge məpala ahəm Musa asa mbaŋa. Gà mburma ata tə daha, ta gəs Etiyen, dite tə da à ŋgat aka miɗ mayahaba gər mburma. 13Tə ndzəkaha gà ɓəzla masàsà à ŋgat pàrsa ata mbaŋa. Gà mburma ata ta gwa: «Wele aaha ka, a tsikewa dukw ana ŋgwal ŋa tsiye, aà batsah ga Mbulum kwa aaha, dite aà məpala ahəm Musa asa. 14Mì tsaraka à ŋgat a ka, Yesuw gà Nazaret aaha a ta mbezle a à batsah ga Mbulum aaha, dite a ta mbìɗ a à matawala dukw ana Musa a gwa, zazamum a.»

15Gà mburma ana mandza ŋa i bəɗ i təv mayahaba gər tar ata ti yahawa ba aɗəm gər tserdze ya ka, ta màha à are aka Etiyen ba bà ba ba. Ta fə̀r ahər ka, yemere ŋgar twiy twiy twiy à div a kamala gawla Mbulum a.

Currently Selected:

Gà Ɓəzla Meslire 6: gnd

Highlight

Copy