Gà Ɓəzla Meslire 12

Ta kəɗ Zakup, dite ta gəs Piyer a daŋgay asa

1Akahər ata ka, Əbay *Hiridus a dza ba aà mesewere are a gà asiŋ gà mburma Mbulum. 2A kəɗ Zakup, damər Yuhana. A sàs ikəka gər nda màsalamà ya. 3I dəba ŋa ya, a fə̀r mekìɗe ata a kəɗ Zakup ya, a tsahən aà gà Yahuda ka, a daha, a gəs Piyer asa mbaŋa. A gəs ŋgat ka, i huɗ mehinne *megirive Paska ana gà Yahuda ta gìrìv a ya. 4Megìse ata a gəs ŋgat a tsara ka, a tike ŋgat a daŋgay. I dəba ŋa ya, a daha, a dzaya iba gà sliwdze ya faɗ faɗ haa a da faɗ, ta vəlawa ba ahər ŋa, aà makàslà ŋa. Hiridus a sasar ka, i təv ana megirive Paska ata aka ndəv a ka, a ger a seriye aka miɗ mburma tserdze. Ta ŋgeteriŋa. 5I fataya tsara ka, gà mburma ata ibam, ta kaslawa Piyer kuɗa. Ama ka, gà mburma Mbulum ta hamawa a Mbulum tserdze kəla pat nda gəzləŋ ilik agəra Piyer.

Piyer a bera i daŋgay a

6Aləka həvəɗ a ge, dite ndidwe ŋa ana *Hiridus a zle a Piyer, a ger a seriye aka miɗ mburma ya ka, gà sliwdze sula tə daha, ti tike ŋgat aka magər tar lele. Tə dzaw ŋgat nda tsitsirɓe sula. Ama ŋgat ka, a riŋ ika mendze are i liwiŋ gà mburma ata, dite gà ɓəzla makàslà ŋgat ŋgiɗ a riŋ ika biye hərmaga daŋgay ata asa. 7I dəba ŋa ya, zàmma tsəka, gawla Mbulum Batsah kwa ŋana a slalaha a fata, dite təv luvuŋ ata a də̀v dzaydzay parakkà lele. Gawla Mbulum ata a daha, a gəs Piyer ika dzàdzah a, a dàŋgwazla dər. A piɗeke. A gwaɗar: «Hitse tsəma.» A tsikar kataya tsara ka, gà tsitsirɓe ata ta palayarra i ahər a, sùndàl, tə dza a bəɗ. 8I dəba ŋa ya, gawla Mbulum ata a gwaɗar asa: «Mah ba yak, da dza tsàpà yak aka sik.» Piyer a ge dər kataya ka, gawla Mbulum ata a gwaɗar asa mbaŋa: «Tike akaba tùmbùlum yak, dite ka zazam iye.»

9Aləka tə zazamara ba nda Piyer i ga daŋgay ata ya. Ama Piyer aka dzala aka dukw ata gawla Mbulum a ger a ka, ndzer tsa. A gwa i gər ŋgar ka, sunwa na a giŋ a pəra. 10Tə tàwuɗara i təv gà ɓəzla makàslà ŋgat malahalah ŋana ya, dite i təv masula ŋana ya asa. Aləka ti ndze a təv biye ahəm ga ana a mbera a bəra, mahə̀ndə̀kà ŋa iɗəm nda ndzemde ya. Biye ahəm ga ata ka, a hə̀ndə̀k iɗəm ba ya nda ahər ŋgar ŋa, tə dara iɗəm a bəra ya kuɗa. Tar à mede, tar à mede, ti ndze aà vatwa ka, gawla Mbulum ata a miyak à Piyer a fata, a da ihər a.

11Aləka i dəba ŋa ya, Piyer aka sər dukw ana a ɗamar duwa ya kuɗa. A gwa: «Kinehe ka, ndzer kaɗəŋ, pàrsa iɗəm tsa, Mbulum BATSAH kwa ŋa na aka slərra gawla ŋgar a təv ga ya. Gawla ŋgar ata a mbəlara à iye i ahər Əbay Hiridus a, dite aka zlara iye i dukw ana ŋgwal ŋa tsa, zləmana a sàs a gà Yahuda ta giŋ a ya.»

12A ta mesire aaba lele kamala taŋa ya, pàrsa iɗəm tsa kuɗa ka, a gəs vatwa i fataya tsara, a da a bəra Mariya, məmər Yuhana ana tə zalar Markus a. A daha ka, gà mburma a riŋ hinne mayahaba gər ŋa i fata, ta heme a a Mbulum i bəra məkəs ata. 13Piyer a daha, a lak a biye hərmaga. Ama daala duwa a riŋ a ge a megemir i ga i fata, zləm ŋgar Ruda. A daha, a waya mahə̀ndə̀kar i ga ya zləmana. A gwaɗarra a bəra ya: «Kər weke?» Piyer a gwaɗar aakaha: «Iye.» 14A tsaraka mifefile Piyer ata tsara ka, a sər biye ɗa ŋgar, a mbəɗ gər ndàra a huɗ ga. A gəs mehìndìker i ga ya tsa ivaɗ, agəra maŋgayaba ana a ŋgeye a ba ya. A daha, a gwaɗa a gà mburma ata i ga ya: «Piyer i bəra.» 15Gà mburma ata tə tsaraka bazlam ŋgar ata kataya ka, ta gwaɗar: «Ki be a a dala, kəla yà?» Ama a gwaɗa a taraha asa: «Piyer i bəra kaɗəŋ ndzer, pàrsa tsa.» Ta gwaɗar aakaha asa: «A ge a ka, gawla Mbulum ana a kesle a ŋgat a.» 16Ama Piyer ka, ŋgat riŋ hiywe aà malàkàyà a biye hərmaga ata pəra. Aləka tə daha, ta hə̀ndə̀k i ga ata ya tsara ka, ta ŋgat a Piyer kaɗəŋ. Ama ka, a ge a tar ata tserdze ya kamala sunwa ya. 17A ge a tar à ahər kə̀t kə̀t kə̀t, kamala megweɗe ya ka, kà fàfəlum tsa. Dite a dza ba aà maɗàmà a tar meme na Mbulum BATSAH kwa ŋa na a zlara ŋgat i ga daŋgay a. A gwaɗa a tar i huɗ bazlam ŋgar ata ya: «Ɗifwim dərraha a gà Zakup nda gà asiŋ gà damər kwa ana ika vatwa Mbulum a tserdze.» I dəba ŋa ya, a dara i ga ata i Yeruzalem a, a da ba a təv ŋa.

18Aləka mbulum a də̀v ndidwe i mèkwède ka, maàga aka hitse ika magər gà sliwdze gà ɓəzla makàslà ŋgat aaha ndeɗiŋa ya hinne. Ta gwaɗaba ika magər tar: «Naha, Piyer ana, a ne ana, dukùla dziye?» Tə sər dukw ana ta ge a ya tsa. 19Aləka i dəba na ya, Hiridus a slər gà mburma aà mayaha ŋa. Ama gà mburma ata ta ŋgat ɓav tsa. A daha, a tsam aà gà ɓəzla makàslà ŋa. Ama gà mburma ata ibam, tə sər tə̀vəməŋa tsa. I dəba ŋa ya, a vəl vatwa aà məbatsa tar ata. A ta megeha Hiridus tekeɗe, a daba ika ahəɗ Yuda i fataya, a da a Kaysariya, dite a ndza i fata zaakwa.

Məməta *Hiridus ana a mət a

20I dəba ŋa ya ka, Əbay Hiridus a ge arəv hinne aka gà mburma ana i gà Tirus nda Sidun a. Ama gà mburma ata ka, ta waya masəra ba nda gà ŋgat, aɗaba tə dawa aka masəkəma dukw mezime ka, aka ahəɗ ata. Tə dza akaba bazlam ika magər tar, dite tə slər mburma a təv ŋgar. Gà mburma ata tə daha ka, ta gəs masla aà batsah mala sik Əbay ata, zləm ŋgar Bəlastus, aɗaba tə sər ŋgat na ma da a təv ŋgar a ka, dite à gis a bazlam ŋgar a. Aləka Bəlastus a da a təv Əbay ata, a daha, a màr à bazlam tar ata ti tsikeraha ya. 21Əbay tekeɗe, a tike a tarra məpàslà ahər ana, dite ti dere a, tì dze akaba a bazlam ika magər tar lele ya kuɗa. A pat məpàslà ahər tar ata ti tike ya ka, Hiridus a dza akaba petek Əbay ŋgar, dàhàm a ndza dər aka təv mendze ŋgwal ŋana, ika miɗ mburma tserdze, a fàfəl a tar. 22Ama gà mburma ata tserdze ya, ta wideye, ta gwa: «Na à fèfil a ka, mburma tsa, Mbulum na à fèfil a ya.» 23I dəba mifefile tar ata ya tsara ka, gawla Mbulum a dara, a lak a Hiridus, aɗaba ana a zla mezlibe Mbulum nda mezembeɗe ŋa fit aka gər ŋgar a. Əsam a war aba hinne, dite a mət dər.

24I dəba ŋa ya, bazlam Mbulum a ɗe zləm hinne asa. Gà na tə tsarakawa bazlam ata ya, tə sə̀kàhawaha à gà ɓəzla magəsa Mbulum hinne.

25Gà Barnabas nda Sawul tə ndəv à meslire tar i Yeruzalem a ka, ta mbəɗ gər a dəba a Antakiya. Tə zla dər Yuhana ana tə zalar Markus a, aà ahər.

Currently Selected:

Gà Ɓəzla Meslire 12: gnd

Highlight

Copy