Gà Ɓəzla Meslire 13

Tə ndzək gà Barnabas nda Sawul aà megemir pam

1Akahər ata ka, gà ɓəzla məma à guma Mbulum riŋ nda gà ɓəzla mesìnìkè à bazlam Mbulum a mburma i liwiŋ gà mburma ana ta gəs Mbulum i kwite Antakiya ya. Tə zal a gà mburma ata ka, Barnabas nda Simeyun ana tə zalar lìviŋ lìviŋ mburma ya, dite nda Lukiyus gà Kirene, nda gà Manayan ana ta gəl akaba tar nda Əbay *Hiridus məma ya, dite nda ga Sawul asa ya. 2A pat duwa, i təv ana tar riŋ tì dze a gurmits a bəɗ a BATSAH kwa ŋa ya, dite tar riŋ ta ge a ndəra asa ya ka, Mezite Mesife Mbulum a gwaɗa a tar: «Ndzəkum iɗəm gà Barnabas nda Sawul a ka, pam, aà megiŋ megemir ana i zal tar dər a.» 3A ta megeha tə ndzək iɗəm gà mburma ata ya ka, ta ge ndəra asa. Dite tə daha, ta hama a Mbulum aɗaba tar. Tə dzaya aka tar ahər. I dəba ŋa ya, gà mburma Mbulum ata i fataya, ta miyak à tar aà megemir ŋa, ta gəs, tə da dər aka miɗ nda maŋgayaba lele.

Gà Barnabas nda Sawul i kwite Kipurus

4Kamala taŋa ya na Mezite Mesife Mbulum a slər gà Barnabas nda Sawul a. Malahalah ŋa ka, tə da a kwite Salukiya. Aləka i dəba ŋa ya, ta hitse i fataya, tə tsala a slə̀làh yam, tə da dər aka ahəɗ ŋa a riŋ malàwàrà ŋa nda yam, tə zalar Kipurus. 5Ti ndzeha a kwite ŋa a riŋ iɗəm i fata, tə zalar Salamis ka, tə dza ba aà metsìkè bazlam Mbulum i gà ga mahàmà a Mbulum gà Yahuda ana a riŋ i fata pampam a. I huɗ mesìweye tar ata tserdze ya ka, tar riŋ nda gà Yuhana Markus. Tə zla dər ŋgat aà ahər, dite mà zlàkawa tar aà megemir ŋa.

6Tə sùwayawa riŋ ika ahəɗ ata malàwàrà ŋa nda yam a, aà kwite aà kwite, tsikw ti ndze a kwite Pafus. Tə daha ka, tàa le aà màhəram duwa a riŋ i fata, tə zalar Baryesuw. Wele ŋa ka, gà Yahuda. A gwaɗawa: «Wày tsəka, i me a ka, à bazlam Mbulum.» 7A ndzawa ka, i tsaka Əbay makwàrà ahəɗ ata, tə zalar Sergiyus Pulus a. Ŋgat ka, a sər duwa hinne, mala metsehe. A zal a gà Barnabas nda Sawul, aɗaba a waya matsaraka bazlam Mbulum ana ti tsik a ya. 8Ama màhəram aaha ndeɗiŋa ya ka, tə zalar Elimas asa, ndaka ahəm girek ka, kamala megweɗe ya, màhəram, a da à melèvekè a təv Əbay aaha. A waya ka, mà dza zləm a bazlam Mbulum gà mburma ata ti tsiker a tsa. 9Ama Sawul ana tə zalar Pul maràhà ŋa i ba nda Mezite Mesife Mbulum a, a səraraha aka dukw ana a ge a ya ka, a fə̀r ahər ɗegìrgìr ser aka miɗ ŋgar. 10A gwaɗar: «A kər wele aaha, wirwir i ba yak ka, hinne, dite mayaha ahəm ibam, hinne asa. Kər na kəla Əbay sitene ya, kər asa na mala mene are a dukw ana ŋgwal ŋa tserdze ya. Wànà ki ta miyek a à welewele dze ana, ndeɗime? Na kà waya mene pàrsa à ndzer ŋa Mbulum a. 11Kinehe ka, tsaraka lele kwaŋ, matsəɓatsəɓ Mbulum ika gər yak, ki ge a guluf, ki ŋget a à vatwa tsa i huɗ mendze zaakwa ya.» Aka ahəm ata tsara ka, tùtùrkùm Elimas aka ge guluf tsara kaɗəŋ. I dəba ŋa ya, a yaha mburma tam tam tam, aà ma gasar ahər. 12Əbay ata a kwere a kwite ata ya, a ŋgat a dukw ana a geba ya tsara ka, a gəs bazlam Mbulum nda gəzləŋ ilik, aɗaba ndzəɗa Mbulum ana a riŋ a tsarakawa ya ka, a zla ihər arəv a hinne, a dzadzar dər.

Gà Pul nda Barnabas i kwite Antakiya ana

ika ahəɗ Pisidiya ya

13A ta mege i dəba ŋa ya, gà Pul nda gà màndàla ŋgar tə da i kwite Pafus a, tə tsala a slə̀làh yam, tə da a kwite Perge ana ika ahəɗ Pamfiliya ya. Aləka ti ndzeha a fata ka, Yuhana Markus a miyak à tar a fata, a mbəɗ gər a Yeruzalem. 14Ama gà wele ata ka, ta mah ba i fataya, tə da a Antakiya ana ika ahəɗ Pisidiya ya asa. Aləka pat mesìfìkà ba gà Yahuda a ndzera ka, tə da a ga mahàmà Mbulum gà Yahuda. Tə daha, tə ndza a bəɗ. 15Tə daha ka, mìsle ŋgiɗ a riŋ ilik i magər gà mburma ata i ga Mbulum a, a riŋ a dzeŋge a ter a wakita məpala ahəm Musa nda biy gà ɓəzla məmà à guma Mbulum. Aləka a ndəv aba à bazlam ŋgar ata ya tsara ka, gà bàba ŋa ana a riŋ mandza ŋa ika miɗ mburma i ga Mbulum i fataya, ta wiz bazlam à gà Barnabas nda Pul a, ta gwaɗa a tar: «Gà damər gà, na mifefile kurum a riŋ zaakwa ka, tsikwim a gà mburma aaha mayahaba gər ŋa ya, dite mə mà a taraha arəv.» 16Aləka i dəba ŋa ya, Pul a hitse aà mbulum kaɗəŋ, a zla ahər a mbulum, kamala megweɗe ya taŋa ka, ndzum ɗikɗik. Dite a gwaɗa a tar:

«A kurum gà Yahuda nda gà asiŋ ga mburma ana ɗa i liwiŋ kurum tserdze, ki gwim a magəɗa a Mbulum a. Tsarakum dukw ana i tsik a kurum a ya. 17Mbulum gà gwala kwa gà Isərayel ana a pala ɗa gà tsir kwa ya, aka səkah à tar hinne i təv ana tar riŋ mandza ŋa i slele ika ahəɗ Ezipt ya. Dite i dəba ŋa ya, aka ndzəkara tar i fataya, nda ndzəɗa ŋgar a asa.*fa* 18A dza tar a kusak. Tàa ndza i fata mive dzik faɗ, ama ta gəs ahər ahəm tsa. I dəba taŋa tserdze ka, a bàs gəzləŋ hinne, a kaslawa dər akaba tar.*fb* 19Aka duŋ gà mburma slala təsəla ika ahəɗ Kanan a, dite i dəba ŋa ya, a zla ahəɗ ata, a vəl a gà mburma ŋgar aà ba tar.*fc* 20I dəba taŋa ya asa ka, a dza aɗəm gà ɓəzla mege seriye a liwiŋ gà batsah tsir kwa aaha, dite araha, tsikw a ndze a Samiyel ana mala məma à guma Mbulum a mbaŋa. Ama mive mekwere tar ata tserdze ya, a gaw ba ka, a sle mive dərməka faɗ nda dzik ə̀zləm.

21Aləka i dəba ŋa ya, ta waya batsah Əbay ilik i magər tar na a kwere a tar a. Dite Mbulum a vəl a tar Sawul, kəla Kis ana i gwala Benyamin a. A kwara tar mive dzik faɗ. 22A ta megeha megemir ŋgar ana a ge a ya, a tsahən aà Mbulum tsəka, Mbulum a zla iɗəm ŋgat a, a mburuɗ a tar aɗəm Dawda avukw ŋgat. A ne batsah Əbay i fata. Aləka i dəba ŋa ya, Mbulum a gwa: <Dawda kəla Yasa, ŋgat ka, a tsahən aà iye. Ama a ta ge a dukw ana tserdze a sèsiŋ ŋgat ma ge ya.> «*fd* 23Pul a gwaɗa a tar asa: «Mburma ilik Mbulum a zla i liwiŋ gà gwala Dawda a, Yesuw, a ne à ŋgat mala məmbə̀là à gà Isərayel. A ge dər kataya ka, kamala ana a tsik i sida akahər ata ya. 24Akahər ana Yesuw aka pàt à ba zukw tsiye ka, Yuhana aka tsik bazlam məpəla à bakal a gà gwala Isərayel tserdze, aà ta mbəɗ à gà gəzləŋ tar, dite ka, ti tsilwiɓ à tar a yam. 25I təv ana mendze ŋgar ana ika gər ahəɗ aka à mendìve ya ka, a gwaɗa a tar: <Kə̀ gwaɗum, iye dze ana, weke? Iye ka, wele ana ki vevwim a ya tsa. Ama ŋgat ka, a riŋ a dere a i dəba gà ya mba, iye ka, i sle à aà mezlerra tsàpà i sik a tsa.>

26A kurum gà damər gà ana i gwala Abəraham a, dite nda gà asiŋ gà mburma ana ɗa i liwiŋ tar ki gwim a magəɗa a Mbulum a. Mbulum a slərra bazlam məmbə̀là à mburma aaha a ta mbil a dər à mburma kinehe ya ka, a təv kwa ya. 27Aɗaba kəla pat gà mburma ana i Yeruzalem a, nda gà Əbay tar tserdze tàa sər, Yesuw ka, mala məmbə̀là à mburma tsa, dite tàa tsaraka bazlam gà ɓəzla məma à guma Mbulum ana ti dzeŋgewa a tar a pat mesìfìkà ba ya tsa asa. Ku mege tàa tsaraka tsa tekeɗe ka, ta ge kamala ana ti tsik ahər akahər ata piŋŋe ya, pàrsa iɗəm ɓav tsa. Kamala taŋa ya, ta waya makə̀ɗà ŋgat. 28Ta ŋgat bakal ŋgar tsa tekeɗe ka, tə da a təv Pilatus, tə daha, ta wiz ahər, dite ka, mà kəɗ a tar Yesuw aà dizl magə̀làwà ŋana. 29Ta ge gà dukw ana wakita Mbulum a tsik ahər nda təv Yesuw piŋŋe ya lele ka, ta pə̀lara məməta ŋa aà dizl magə̀làwà ŋa ata ya, tə daha, ti tike ŋgat a dive kuɗa. 30Ama Mbulum aka mbəlara à ŋgat i məməta ya. 31Aləka i dəba ŋa ya, i huɗ mehinne zaakwa ya, Yesuw a pàt à ba ŋgar a gà mburma ana tə zazamara ŋgat i Galile ya, a Yeruzalem a, dite tar ti ne gà ɓəzla sida ŋa, aà metsìkè dukw ana ta ŋgatar a, a gà gwala Isərayel a. 32Mər ŋa maa zla kurumara bazlam ŋgwal ŋana ya, kamala megweɗe ya, dukw ana Mbulum a tsik i sida ya, a gà batsah tsir kwa, a gwa, i ta vile a ya ka, 33aka sle kuɗa i təv kwa ana kinehe gà ɓəza tar a. Məpàslà ahər ata a sle ya ka, nda təv Yesuw ana Mbulum a mbəlara à ŋgat i məməta ya, kamala ana mewetse ŋa a riŋ i wakita dimis sula ya, Mbulum a tsikar, a gwaɗar:

<Kər ka, Kəla gà.

Və̀ɗəna ka, Yàa ne Tsir yak.>*fe*

34Taŋa na Mbulum a tsik daga piŋŋe aɗaba Yesuw ana a mbəlara i məməta ya, dite ka, məməta ŋgar ma ze tsiye. A tsik taŋa ka, daga piŋŋe akahər ata, a gwa,

<i ta vile a kurum a mipise ahəm ŋgwal ŋana lele,

ki ndzwim a dər aà biybiy,

kamala ana i tsik i sida ya, a Dawda a.>*ff*

35Aɗaba taŋa na a riŋ i təv medzeŋge ŋgiɗ pam asa ka, a gwa:

<Ki ta vile a vatwa a mala meslire yak ŋgwal ŋana

aà meze tsa.>*fg*

36Aɗaba Dawda tekeɗe ka, aka ge megemir Mbulum kamala ana Mbulum a waya ya mbaŋa, na akahər ana ar à bəra ya. I dəba ŋa ya, a mət, ti le ŋgat a tsaka gà batsah tsir ŋgar. Aləka ka, a ze, a huslwa. 37Ama wele ana Mbulum a mbəlara à ŋgat i məməta ya ka, aka ze tsa, dite aka huslwa tsa asa mbaŋa. 38Aɗaba taŋa, sərum dər gà damər gà, mər ihər mìi ɗif a kurum a à məpala à bakal kurum ana, dite à pìl a ya ka, nda təv Yesuw. Na bəla kà zazamum ka, məpala ahəm Musa ka, bakal a ndze a ika gər kurum hiywe. 39Ama na kà gəsum Yesuw nda gəzləŋ kurum ka, Mbulum à pìl a kurum a à bakal kurum tserdze. 40Aɗaba taŋa gwim metsehe, aɗaba dukw ana gà ɓəzla məma à guma Mbulum ti tsik a ka, ma ge i təv kurum tsa. Ti tsik piŋŋe akahər ata, ta gwa:

41<A kurum gà mburma ana ki ŋgeywim a ba ka,

nda hala gawla na ika miɗ Mbulum a, dite ka,

ki fìrwim a à gà asiŋ gà mburma ŋgiɗ

kamala za ya mbaŋa ya ka,

dukuməŋa ma ge a kurum kamala sunwa ya,

dite ka dzeywim, aɗaba iye Mbulum

na i ta ge a megemir ata aləka i təv ana

kurum riŋ nda are mba ya.

Mege megemir ata i ge a ya ka,

a sàs a kurum magəsa ŋa tsa,

ku mege ti ɗif a kurum dər tekeɗe ya.> «*fh*

42Aləka i təv ana gà Pul nda Barnabas tə ndəv à mifefile tar ata ya ka, tə dara i ga mahàmà aà Mbulum a. Gà mburma ata i fataya, ta gwaɗa a tar: «Mbə̀ɗumara gər a a pat mesìfìkà ba ŋgiɗ a, ka tsikwim a mər guma aaha asa.» 43I dəba mayahaba gər tar ata ya ka, gà mburma hinne i liwiŋ gà Yahuda ya, nda gà na tə zazam fəla tar a, tə dəɗ aka gà Pul nda Barnabas. Aləka ga mburma ata sula ya, ta mà a taraha à arəv, dite ta gəs ŋgwal ŋa Mbulum ana a ge a ter a ya ɓəŋɓəŋ lele, ta miyak dər tsa.

44Ələk a pat mesìfìkà ba ata a ndzera ya ka, matalakwa gà mburma ata i kwite ata ya fit na tə daha aà matsaraka bazlam Mbulum BATSAH kwa ŋa ya. 45Ama gà Yahuda ana i fataya, ta ŋgat a mayahaba gər gà mburma ata ka, a tsahən aà tar tsa, ta ge aka ter a are. Ta bets a ba nda arəv kweleŋ. Ta mbetse ahəm aka dukw ana Pul a tsiker a tsara ya, nda mandàvàyàr pìslìɗìɗe. 46I dəba ŋa ya, gà Pul nda Barnabas ta gwaɗa a tar parakkà aà are: «Ana ka, mìi lèh a aà metsìkè a bazlam Mbulum ka, a kurum ana gà Yahuda ya dzekwiŋ. Ama kinehe ka, mìi de a dər a təv gà mburma ana tar gà Yahuda tsiye, aɗaba ana kàa niwwim a, bəla kà dzalum ka, kurum riŋ meŋgete mesife ana à ndìv a tsa aà biybiy a ide tsiye ya. 47Aɗaba dukw ana Mbulum BATSAH kwa ŋa na a tsik a mər a ka, araha. A gwa:

<Yàa dza kurum kamala dzaydzay a aka miɗ

gà asiŋ gà mburma ana tserdze tə sər iye tsiye,

dite ka, kà ndzəkum a taraha bazlam

məmbə̀là à mburma ana dite ta mbil a dər,

ku mege a ŋga, aà zlile mbulum

ika gər ahəɗ tserdze ya.> «*fi*

48Aləka gà mburma ana tar gà Yahuda tsiye, tə tsaraka mifefile ata ka, ta ŋgaya ba hinne, dite tə dza ba aà mazàmbàɗà à bazlam Mbulum BATSAH kwa ŋa. Ama gà mburma ana Mbulum a pala tar, a vile a ter a mesife ana à ndìv a tsa aà biybiy ya ka, ta gəs bazlam ata nda gəzləŋ ilik tsara.

49Kamala taŋa ya, bazlam Mbulum a ɗe zləm ika ahəɗ ata hinne. 50Ama gà Yahuda ana i fataya, tə slər gà ŋgwal gà bàba gà məkəs ana i magər tar ti ne gà Yahuda ya, nda gà ŋgwal gà mburma ana i kwite ata ya tserdze, aà gà Pul nda Barnabas. Tə daha, ti sèwèr a tar are hinne, tə dəgəz tar ika ahəɗ ata ya fit. 51I dəba ŋa ya, gà mburma ata sula ya ka, tə daha, tə tatakw a tar aba ahəɗ tar à tsàpà tar a, kamala megweɗe ya ka, mi be a kurum à ɗaf i təv dukw ana a dere a ika miɗ mba ya. Dite tar ŋa, tə daba a Ikuniya. 52Ama gà ɓəzla mazazama Yesuw ana ti ze riŋ i kwite Antakiya i fataya, ta ŋgaya ba hinne, aɗaba ana tar maràhà ŋa nda Mezite Mesife Mbulum ana i ba tar a.

Currently Selected:

Gà Ɓəzla Meslire 13: gnd

Highlight

Copy