Gà Ɓəzla Meslire 11

Piyer a ɗif à dukw ana a ge ba i Yafa ya, a gà mburma

Mbulum ana i Yeruzalem a

1Gà ɓəzla meslire Mbulum nda gà asiŋ gà ɓəzla magəsa Mbulum ana ti ne gà damər tar i Yuda ya, tə tsaraka kataya ka, ku mege gà mburma ana tar gà Yahuda tsiye tekeɗe, ta gəs bazlam Mbulum mbaŋa. 2Aləka Piyer a mbəɗ gər a Yeruzalem ka, gà ɓəzla magəsa Yesuw ana nda gəzləŋ gà gwala gà Yahuda ya, ta palar ahəm. 3Ta gwaɗar: «Wànà kà da a bəra gà mburma ana masàsà ŋa tsiye ana, dukùla na a slek za ya? Dite asa ka, kà zəmawum akaba ɗaf nda gà tar dze ana, meme?» 4Piyer a tsaraka bazlam tar ata kataya ka, a dza ba aà maɗàmà a tar dukw ana a ge ba nda ŋgat a tserdze ya fit. A gwaɗa a tar:

5«Malahalah ŋa ka, a pat duwa, iye riŋ ihər i heme a aà Mbulum i kwite Yafa. I huɗ meheme gà ata ya ka, sunwa a da aka iye. Ama ka, iye riŋ nda are. I ŋgat a dukw duwa kamala petek a, magàsà ŋa ika ahəm a ika ahəm a, duwa iɗəm tùndùluŋŋa i magər ŋa, a tarra i gəza mbulum a təv ga ya. 6I fə̀raha aɗəm lele ka, Yàa ŋgataha aɗəm a gà dukw ana sik à tar faɗ a, nda gà na ta miyek a à mburma tsiye, nda gà asiŋ gà biy ŋgiɗ ana ti de a nda huɗ a, dite nda gà na gwezleviyek à tar a fit. 7I dəba ŋa ya, i tsarakara mifefile duwa i gər ŋa a ɗera aà iye ya, a gweɗiŋ: <Araha, Piyer, kə̀ɗawa gà dukw ata, dite kà papəɗawa.> 8Ama i gwaɗar aakaha: <Awaŋ, a sèsiŋ tsa, Batsah ga ŋa. Aɗaba dukw ana biy mezime tsəka, Yàa mə̀ndzər ilik tsidze, awisl.> 9Ama i dəba ŋa ya, mifefile ŋgiɗ a ɗera aà iye i gər ŋa ya asa ka, a gweɗiŋara: <Ka ta fə̀r aà dukw ana Mbulum a gwa, ŋgwal ŋa ya, kamala ana awisl a tsa.> 10A miniŋ dərra à bazlam ata ya sik makər ka, dukuməŋa a mbəɗ gər a gər ŋa, kuvəl mbulum ata a mà akaba təts asa.

11I dəba ŋa ya, gà mburma makər tə slalaha a ga ana iye iɗəm i fataya tsara. Gà mburma ata ka, tə slərra tar i Kaysariya ya a təv ga ya. Tar ka, gà Yahuda tsa, dite ka, aà madə̀ɗà akaba nda gà tar a tsa. 12Ama Mezite Mesife Mbulum a gweɗiŋ: <Dùm nda gà tar tsəma, ka tə dzala duwa tsidze.> Aɗaba taŋa mì da akaba nda gà mburma ata a bəra Kwarney tserdze. Ama gà ɓəzla magəsa Mbulum, gà asiŋ ana ndilik ti ne gà damər ga i fataya, tə zazam mər mbaŋa. 13Mì daha ka, a ɗama a mər, meme na a ŋgat a gawla Mbulum ilik i ga i ma ŋgar mehìtsè ŋa ya, dite na a gwaɗar ka, slər mburma a Yafa, tə zalaha a Simun ana ti ɗer Piyer a, ma dara ya. 14Dite a ti tsik a gà bazlam ana ki ta mbelwim a dər nda gà mburma ana i ga i ma yak fit a. 15I dəba ŋa ya, i dza ba aà mifefile tsara. I təv ana iye riŋ i tsik a tar bazlam ata ya ka, Mezite Mesife Mbulum a tarra aka tar a tsara, kamala ana a tarra aka kwa malahalah ŋa ya. 16I dəba Mezite Mesife ata i ŋgatar tsara ya ka, dukw ana BATSAH kwa ŋa a tsikewa ya, a mìŋara a gà gər a fataya tsara, kamala ana a gwa: <Yuhana a tsilwiɓ à mburma ka, a yam, ama kurum ka, ti tsilwiɓ à kurum a ka, a Mezite Mesife Mbulum.> 17Aɗaba taŋa nda ndzer, pàrsa iɗəm tsa, Mbulum aka vəl a tar dukw ŋgar kamala ana a vəl a kwa i təv ana kə gə̀sakwa Yesuw Kiristi nda gəzləŋ a mbaŋa. Iye dze ana, weke, na i ŋge a vatwa a Mbulum a?»

18Gà mburma ata tə tsaraka bazlam Piyer ata kataya tsara ka, ta miyak à mimbètsè ahəm ata ndeɗiŋa ya, tə zàmbaɗa à Mbulum. Ta gwa: «Mbulum aka vəl vatwa a gà mburma ana tar gà Yahuda tsiye, aà məmbə̀ɗà à madzala gà gər tar, dite ta ŋgat ŋgwal mesife ana ndzer a kaɗəŋ mbaŋa.»

Gà mburma ana i Antakiya ya

19Gà asiŋ gà ɓəzla magəsa Mbulum nda gəzləŋ tàa tə̀z i Yeruzalem a. Tə tə̀z ka, aɗaba mesewere are ana a ge a tar ba gər i dəba makə̀ɗà Etiyen ana ta kəɗ a. Gà mburma ata tə tə̀z a ka, gà asiŋ ŋa tə da tsikw aka ahəɗ Finikiya, nda ahəɗ Kipurus, nda gà a kwite Antakiya. Ti tsikewa riŋ bazlam Mbulum i fata. Ama ka, a gà Yahuda ɗekɗek. 20Ama a ta megeha i dəba ŋa ya, gà asiŋ gà ɓəzla magəsa Mbulum ŋgiɗ ana i gà kwite Kipurus nda Kirene ya ka, tə da a kwite Antakiya, dite ti tsikewa ŋgwal bazlam ana a ɗif à Yesuw BATSAH kwa ŋa ya, a gà mburma ana tar gà Yahuda tsiye mbaŋa. 21Ndzəɗa BATSAH kwa ŋa a riŋ nda gà tar, dite gà mburma hinne ta gəs ŋgat nda gəzləŋ, ta mbəɗ à mendze tar ndàra a təv ŋgar.

22Gà mburma Mbulum ana i Yeruzalem a, tə tsaraka dukw ata ka, tə slər Barnabas a Antakiya. 23Aləka a ndzeha a fata, a ŋgat a Mbulum a pise ahəm a gà mburma ata ya ka, a ŋgaya ba hinne, a mà taraha à arəv tserdze, aà megìse tar ana ta gəs BATSAH kwa ŋa ya, ma da aka miɗ aka miɗ nda gəzləŋ ilik, ta miyak dər tsa. 24Ama Barnabas ka, ŋgwal mburma ndzer, maràhà ŋa nda Mezite Mesife Mbulum i ba ŋgar, a gəs Mbulum lele. Aɗaba taŋa, mburma tekeɗe hinne, tə sə̀kàhəha a təv BATSAH kwa ŋa.

25I dəba ŋa ya, Barnabas a da kwite Tarsus, aà mayaha Sawul. 26Aləka a le ahər ka, a zlaha ŋgat a Antakiya. Tə daha, ta ge megemir sula məma mive ilik ika magər gà mburma Mbulum ata i fataya. Ti ɗe à vatwa mazazama Mbulum ana ti zezem a ya, a gà mburma hinne. Gà ɓəzla mazazama Yesuw ana malahalah ŋa a riŋ i fataya, tə zalawa a tar «gà Kiristi» ka, i Antakiya. I dəba ŋa ya, zləm tar a ndà aka gər ahəɗ fit, tə zalawa a tar kataya.

27Akahər ata ka, gà ɓəzla məma à guma Mbulum duwa tə da i Yeruzalem a, tə da a Antakiya. 28Aləka ti ndzeha a fata ka, mìsle ŋgiɗ ilik i liwiŋ tar a, zləm ŋgar Agabus, Mezite Mesife Mbulum i ba ŋgar, a vəlar ndzəɗa, dite a hitse aà mbulum, a gwa: «May batsah ŋa a dere a aka gər ahəɗ a bise. A ge a ika tsèke ŋgiɗ pampam.» Aləka i dəba ŋa ya, may ata a ta medera kaɗəŋ ka, akahər ana ti tike aɗəm Kəlawdiyus, batsah Əbay gà Ruma ya. 29Gà ɓəzla mazazama Yesuw ana i fataya, tə tsaraka kataya tsara ka, tə dza akaba bazlam ika magər tar, ta gwa: «Ku weke a sle aà meslireha a duwa a gà ɓəzla mazazama Yesuw ana ti ne gà damər kwa i Yuda ya, kamala ana a sle a ya.» 30Aləka i dəba ŋa ya, tə daha, ta gaw akaba gà dukw ata a təv ilik ŋa. Tə slər dər gà Barnabas nda Sawul. Tə daha, tə dzaya a gà bàba ŋa ana ika miɗ gà mburma Mbulum ata i fataya.

Currently Selected:

Gà Ɓəzla Meslire 11: gnd

Highlight

Copy