Gà Ɓəzla Meslire 10

Gà Piyer nda Kwarney

1Wele duwa, zləm ŋgar Kwarney, i kwite Kaysariya. Ŋgat ka, Əbay gà sliwdze gà Ruma duwa. Tə zal a mayahaba gər gà sliwdze ana ŋgat iɗəm a ka, «gà sliwdze Italiya. » 2Ama wele ata ka, a ge magəɗa a Mbulum. Tar nda gà mburma ana i ga i ma ŋgar a tserdze, tə dzar gurmits a bəɗ lele. A zlàkawa gà Yahuda ana gà matawak ŋa ya hinne, a hamawa a Mbulum kəla pat mbaŋa. 3A pat duwa i hawa, dàyday nda ndzemde makər ŋa, sunwa a da aaka. Ama ŋgat a riŋ nda are. A ŋgat a gawla Mbulum parakkà lele. A pə̀tsaha a ga a təv ŋgar a fata. A daha, a gwaɗar: «Kwarney.» 4Ama Kwarney a fə̀r aà gawla Mbulum ata nda gà magəɗa, a gwaɗar: «Kà dara ana, labara là, Batsah ga ŋa?» Gawla Mbulum ata a gwaɗar: «Mbulum aka gəs meheme yak ana kà hamawa a, dite nda mezleke ana kà zlàkawa mburma ya asa. Ama ka, kàa mətsar gər tsa. 5Kinehe ka, slər mburma a Yafa, tə zalaha a Simun duwa tə zalar Piyer. 6Ŋgat a riŋ mandza ŋa i bəra wele duwa, a làmbaɗawa à kwiye, zləm ŋgar Simun. Ga wele ŋa ka, a riŋ à gùva duluv ŋa a riŋ i fata.» 7Gawla Mbulum ata a tsikar aba taŋa ya tsara ka, a da à ŋgat a. Aləka Kwarney a daha, a zal a gà ɓəzla meslire ŋgar sula, dite a sliwdze ilik i liwiŋ gà na ta ger a megemir a asa. Ama sliwdze ata ka, a ge magəɗa a Mbulum. 8A daha, a ɗama a tar dukw ana gawla Mbulum aaha a tsikar a tserdze, dite a slər tar a Yafa.

9Ta mah ba, tə da. Aləka ndidwe ŋana, i təv ana ti de a ya, tàa à mendze a kwite Yafa ya ka, Piyer a tsəl aka gər ga a riŋ i fata dàbàɗàkka, nda magər pat. A daha, a hama aà Mbulum. 10Aləka may a dza ba aà mawura ahər, a sasar mazəma dukw mezime. I təv ana ti derra ɗaf a ka, sunwa a da aaka i fata. Ŋgat a riŋ nda are, à fir a ikaba ya. 11A ŋgataha a kuvəl mbulum, a hə̀ndə̀k ba ikaba ya tùwaŋ, dite a ŋgataha aɗəm a dukw duwa a riŋ a terre a iɗəm a bəɗ a. Dukw ata a ndzikiɗ ba ka, sla petek, magəsa ŋa ika ahəm a ika ahəm a, mawùdàɗà ŋa dər ikaba ya, tùndùlùŋŋa duwa iɗəm i magər ŋa. 12Aləka dukw ata a ndzera ka, gà dukw pampam iɗəm hinne, kamala gà dukw dala ya, nda gà dukw gənaw tserdze, dite nda gà dukw ana ti de a nda huɗ a mbaŋa, dite asa, nda mewe gà dukw ana gwezleviyek à tar tserdze ya. 13Piyer a tsarakara mifefile i gəza mbulum a, a gwaɗarra: «Araka Piyer, kə̀ɗawa gà dukw aka, dite kà papəɗawa.» 14Ama gà dukw ata ka, gà dukw ŋgiɗ iɗəm pampam hinne na a sàs a gà Yahuda tsiye. Aɗaba taŋa, Piyer a gwaɗar aakaha: «Awaŋ Batsah ga ŋa, a sèsiŋ tsa. Yàa papəɗ gà dukw ata kamala naha ya ilik tsa, awisl.» 15Ama mifefile ata a ɗera aà ŋgat a asa ka, a gwaɗarra: «Ka ta fə̀r aà dukw ana Mbulum a gwa, ŋgwal ŋa ya kamala ana awisl a tsa.» 16A minerra à bazlam ata sik makər, dite dukuməŋa a mbəɗ gər a gər ŋa, kuvəl mbulum ata a mà akaba təts asa.

17Piyer a gwa i gər ŋgar: Wànà maslàla sunwa dukùla na taŋa a ɗemiŋ duwa dze ya? Ama akahər ana ar ihər a dzele a gà gər dukw ata a ɗamar duwa ya ka, gà mburma ana Kwarney a sləraha tar a ka, tàa ŋgat a ga ata Simun iɗəm a kuɗa. Tə daha, ta hitse aka biye hərmaga ŋa. 18Ta wizeha ŋgat aà mbəlakw a riŋ i ga i fata, ta gwaɗar: «Wànà Simun ana tə zalar Piyer ana, ar ɗa ana, i faha ya?» 19Ama Piyer ka, ar à madzala gà gər dukw ata a ɗamar duwa ya hiywe pəra. I huɗ madzala gà gər ŋgar ata ya ka, Mezite Mesife Mbulum a gwaɗar: «Araha, gà mburma naka makər ti yehe a kər. 20Tar a təv tar a bəɗ, kà dəɗ aka tar, ka dum dze. Magəɗa ma gik tsa, aɗaba iye na a sləraha tar a.» A tsikar kataya ka, aɗaba wele ata a sləraha tar nda gà ɓəzla meslire ŋgar ata tserdze ya ka, tar ka, gà Yahuda tsa. 21Piyer a tsaraka kataya tsara ka, a taraha a təv gà mburma ata, a gwaɗa a tar: «Iye ka, wele ana ki yehwim a ya, Kà dumar ana, meme?» 22Ta gwaɗar aakaha: «Na a gwaɗa a mər, dum ka, Əbay gà sliwdze duwa, zləm ŋgar Kwarney. Wele ŋa ka, ŋgwal mburma lele, magəɗa Mbulum i ba hinne. Dite gà Yahuda tserdze ta waya ŋgat ka, lele mbaŋa. Gawla Mbulum ilik na a gwaɗar, ma zalakaha a təv ŋgar, dite ma tsaraka dukw ana ki tsiker a ya.» 23Ama Piyer a tsaraka kataya ka, a da à tar a ga, a vəl a tar təv mehinne, ta həna i fata.

Aləka i mèkwède ŋana ka, ta mah ba, tə da nda gà ŋgat tserdze kuɗa. Gà asiŋ gà ɓəzla mazazama Yesuw ana ti ne gà damər ŋgar i Yafa i fataya, tə dəɗ aka tar mbaŋa asa. 24Ndidwe ŋana ka, ti ndze a Kaysariya kuɗa. Tə daha, tə da a bəra Kwarney. Ama Kwarney ka, aka yaha riŋ aba gər a gà gwala ŋgar a, nda gà masla ŋgar a tserdze i ga i ma ŋgar, ta veve a riŋ ŋgat i bəɗ rim rìm rim. 25Aləka i təv ana Piyer a ndze a ma ŋgar, a hitse aka biye hərmaga ya ka, Kwarney a dara a təv ŋgar i ga ya. A dara, a kal aba aka sik ŋgar. A ger wusa nda mezembeɗe. 26Ama Piyer a gəs ŋgat i ahər a, a gwaɗar: «Hitse aà mbulum, iye ka, mburma məfara ŋa kamala kər a mbaŋa.» 27I dəba ŋa ya, ta fèfil a dər aà vatwa ya, ta patsa dər akaba a ga nda Kwarney. Tə daha ka, Piyer a ŋgat a gà mburma ata i ga ata ya hinne mayahaba gər ŋa. 28A gwaɗa a tar: «Kurum kà sərum ka, fəla mər aka pala ahəm aà malə̀mà akaba nda gà mburma ana gà Yahuda tsiye, kige tsa aà məpə̀tsà a ga a ma ŋgar a. Ama kinehe ka, Mbulum a gweɗiŋ, i ta fir a aà mìsle ŋgiɗ ilik ika miɗ gà, kamala ana ŋgwal ŋa tsiye, kige tsa kamala ana awisl a tsa. 29Aɗaba taŋa kà zelwimiŋ ka, Yàa niwera tsa, Yàa dara bise. Ama i dara ka, a sèsiŋ mesire dər ka, aàmala na kà zelwimiŋ dze ya?»

30Kwarney a gwaɗar aakaha: «Iye na a zalak a, aɗaba a pat duwa kərga naha ya, aka həna kinehe ka, makər pəra, iye riŋ i heme a aà Mbulum i ga i faha, aka pat ana a lak à gər dàyday nda ndzemde makər ŋa ya. Wele duwa nda gà petek tizlzlè ŋa a daha aka miɗ gà. 31A gweɗiŋ: <Kwarney, Mbulum aka tsaraka gà meheme yak ana kà hamawa a, dite nda mezleke yak ana kà zlàkawa gà ɓəzla matawak a asa. Ama ka, aka mətsar gər tsa. 32Kinehe ka, slər gà mburma a Yafa, tə zalaha a Simun duwa tə zalar Piyer. Ŋgat a riŋ mandza ŋa i bəra wele duwa a làmbaɗawa à kwiye, zləm ŋgar Simun. Ga wele ŋa ka, a riŋ à gùva batsah duluv ŋa a riŋ i fata.> 33Aɗaba taŋa na i slər aka kəraha mburma tsara ya. Ama kər tekeɗe ka, kàa gasa aba tsa, kàa dara tsara kaɗəŋ. Kinehe ka, mər tserdze mayahaba gər ŋa ika miɗ Mbulum, mìi veve a matsaraka dukw ana BATSAH kwa ŋa a gwaɗak, ti tsik a mər a, mìi tserekiŋa.»

Bazlam Piyer ana a tsik i bəra Kwarney a

34Piyer a gəs a tar aakaha, a gwaɗa a tar: «Ama kinehe ka, Yàa sər kuɗa. Mbulum ka, a wala ikaba mburma ya tsa. 35A waya mburma tserdze, ku mege gà dukùla tekeɗe. Ama kə̀la ka, say na ŋgat riŋ a ge a magəɗa a Mbulum nda mege gà dukw ana ŋgat a riŋ a ge a ndaka vatwa ŋa ya. 36Kà sərum bazlam ana Mbulum a sləraha a gà mburma Isərayel, dite a zla a taraha bazlam ŋgwal ŋa ana a vile a ter a matasla yam a gəzləŋ zayya lele, nda ahər Yesuw Kiristi ya, aɗaba ana ŋgat a ne Batsah ŋa i liwiŋ gà mburma tserdze ya. 37Kà sərum dukw ana a lah mege ba i Galile ya, dite a zazəɗ a Yuda asa ya. Ama gà dukw ata ta ge ba ka, i dəba bazlam metsìlwìɓè à mburma a yam Yuhana ana a tsik a. 38Kàa tsarakum, meme na Mbulum a rah à Mezite Mesife nda ndzəɗa ŋgar aka gər Yesuw gà Nazaret a. Ama ka, Yesuw a sùwayawa ika ahəɗ gà Yahuda tserdze nda mege ŋgwal ŋa a mburma, a mbala à gà na Əbay sitene a kwere a tar a tserdze mbaŋa, aɗaba ka, Mbulum a riŋ nda gà ŋgat. 39Mər ka, mì ne gà ɓəzla sida gà dukw ana a ge i Yeruzalem, nda gà ika ahəɗ ata asa ya. Ta kəɗ ŋgat aà dizl magə̀làwà ŋa. 40Ama i huɗ mehinne makər a ka, Mbulum a mbəl à ŋgat i məməta ya. A vəlar vatwa aà məpàtà à ba ŋgar nda mesife ika miɗ mburma. 41Ama ka, a gà mburma ana tserdze ya tsa, na a pàt a tar aba ya, say a mər gà mburma ana Mbulum a lah mipele mər, mì ne gà ɓəzla sida ŋgar akahər ata ya. I dəba mimbile ŋgar ana a mbəlara i məməta ya ka, mì zəmawa akaba ɗaf nda masà duwa tserdze nda gà ŋgat. 42Ŋgat na a gwaɗa a mər ka, tsikwim bazlam ŋgwal ŋa aaha a gà mburma ya, dite ka ɗifewim a tar dər ŋgarra lele. Iye na Mbulum a tike iye aà mege seriye gà mburma ana tar riŋ nda are ya, dite nda gà na tàa mata ya asa mbaŋa. 43Gà ɓəzla məma à guma Mbulum tserdze tə ɗə̀v zləm a dukw ana a ta ge a a ba ika miɗ mba ya. Ti tsik ahər: <Wur ana aka gəs ŋgat nda gəzləŋ daga à kinehe ya ka, a ŋget a məpəla à bakal nda zləm ŋgar.> «*fa*

Gà mburma ana gà Yahuda tsiye, ta ŋgat Mezite

Mesife Mbulum mbaŋa

44Akahər ana Piyer a riŋ a tsik a ter a bazlam ata mba ya ka, Mezite Mesife Mbulum a tarra aka gà mburma ana riŋ ti dze a zləm a mifefile ŋgar ata tserdze ya. 45Ama gà ɓəzla magəsa Yesuw ata nda gəzləŋ, tar gà gwala gà Yahuda, tə da akabara nda gà Piyer i Yafa tserdze ya ka, tar riŋ i fata mbaŋa. Aləka ta ŋgat a dukw ata, Mbulum a vəl Mezite Mesife a gà mburma ana gà Yahuda tsiye ka, a ge a tar kamala sunwa ya. 46Tə sər Mbulum a vəl a tar Mezite Mesife ŋgar ka, agəra ana ta fèfil a ndaka gà ahəm ana gà mburma ata tə tsaraka riŋ i fata tsiye, dite tar riŋ ti zlibe a à Mbulum ana a za dukw tserdze ya. Ama Piyer a gwaɗa a tar: 47«Kinehe ana, dukùla na a pele a ahəm a gà mburma aaha, aà metsìlwìɓè à tar a yam dze ya, na tàa ŋgat Mezite Mesife Mbulum kamala kwa ya mbaŋa ya?» 48I dəba ŋa ya, a gwaɗa a tar asa: «Tsilwiɓwim à tar a yam nda zləm Yesuw Kiristi.» Dite i dəba ŋa ya, gà mburma ata ta ger kamkam, ta gwaɗar: «Ndza i təv mər mehinne zaakwa te.»

Currently Selected:

Gà Ɓəzla Meslire 10: gnd

Highlight

Copy