uMaaliko 3

UYeesu akumuponia umuntu isiku ilya Sabaato

(uMataayi 12:9-14; uLuuka 6:6-11)

1UYeesu ahinjila havhili mwi isinagoogi limo, umwo mwáli umuntu wumo we inyoovhe yaakwe yáhataliiye. 2AVhafalisaayi vhahalondolaga idala ilya kumulonjeelela uYeesu. Pe vhahenyaaga inga kuuti amuponie umuntu uyo isiku ilya Sabaato. 3UYeesu ahamuvhuuzya umuntu uyo we inyoovhe yaakwe yáhataliiye ahati, “Yimiliila pahati ipa.” 4Ahavhavhuziilizya aVhafalisaayi ahati, “Vhuli, kulandatana ni ndajizyo izya Moose lili kwoshi lye likwitishilwa kuvhomba pi isiku ilya Sabaato? Kuvhomba inyinza, pamo imbiivhi? Kupoha uvhupuuma, pamo kugoga?” Vhahapuuma, vhahapootwa kumwamula.#3:4 Vhahapuuma, vhahapootwa kumwamula: AVhafalisaayi vháposiitwe kumwamula, mwe pe indajizyo izya Moose zitahahaanaga kuvhomba inyinza pa Sabaato. 5Ahavhazyamila ku vhuhali, ahaswimiililwa, mwe pe avhwenyi uvhugomu uvhwa mooyo gaavho. Ahamuvhuuzya umuntu ula ahati, “Golosya inyoovhe yaaho.” Woope ahagolosya, inyoovhe yaakwe yihapona. 6AVhafalisaayi lwe vhaalola vwe uYeesu amuvhombela umuntu ula, vhahasogola kupanzanya na vhatuuli avha Heelodi#3:6 UHeelodi: Vhaazya mu Ntantiho izya Mazwi aMajeni. vwe kwe vhamugoje uYeesu.

Impuga iya vhantu kufuma intala zyonti yikumulandata uYeesu

7-8UYeesu aheepa penepo pooka na vhasundikwa vhaakwe, ahasogola kwa sumbi uwa Galilaaya, ni mpuga impiti iya vhantu kufuma mu shigavho isha nsi isha Galilaaya, yihamulandata. Avhantu avhinji kufuma intala inyinji, lwe vhiivwa zyonti zye ahazivhombaga, vhahamwinzila kufuma mu Yelusaleemu na mu shigavho isha nsi isha Yudeeya shonti na mu shigavho isha nsi isha Idumaayi na mwi isyila ilya ijenje uYoolodaani na mu nkaaya iya Tiilo ni Siidoni. 9Ahavhavhuuzya avhasundikwa vhaakwe kuuti vhasengaanye ivhooti inga ayiime mwenemwo, lwe akuvhasambiilizya, mwe pe ivhungaana ilya vhantu lihamuviganyaaga. 10Ávhavhuziizye avhasundikwa isho, mwe pe ávhaponiizye avhavhinu avhinji na vhonti avha mpungo vhahabunshilanaga, vhahanzaga kumupalamansya. 11Ulwinji vhonti vhe vháamile ni mpepo inkandamanu, ponti pe vhahamulolaga, vhahagwanga pansi pilongolela lyakwe. Vhahahoolaga kuuti, “Iwe we Mwana wa Mulungu.” 12Ileelo ahavhasoha nkaani kuuti vhatamumanyisyaje ku vhantu.

UYeesu akusevha avhatumwa 12

(uMataayi 10:1-4; uLuuka 6:12-16)

13UYeesu ahazuvha pi igamba, ahavhiita vhe ahavhanzaga, vhoope vhahamulandata. 14Ahavhasevha avhantu 12, ahaavhapa izina ilya vhatumwa. Ávhasevile kuuti vhavhanje pooka nawo nu kuuti avhasonteelezye kukumusya izwi lyakwe. 15Havhili vhiime na maha aga kwefwa impepo inkandamanu. 16Ivha 12 amazina gaavho ge gano: uSiimoni (ahamwita izina ilya Peeteli), 17uYaakobu nu munine waakwe uYoohani, avhaana vha Zebedaayi (uYeesu ahaavhapa izina ilya Bowanalige, kwe kuuti, “AVhaana avha Kujilima”). Avhamwavho, 18wu Andeleeya nu Fiilipo nu Batolomaayo nu Mataayi nu Toomasi nu Yaakobu uwa Alufaayo nu Tadaayo nu Siimoni we ahayikungulaga kulwila insi yaakwe,#3:18 USiimoni we ahayikungulaga kulwila insi yaakwe: IShiyunaani shikuti uSiimoni uMukananaayo. 19nu Yuuda uwa ku Kaalyoti, we pisinda ámwaniliiye uYeesu.

UYeesu ali na maha kuluusya amaha aga Belizabuuli

(uMataayi 12:22-32; uLuuka 11:14-23; 12:10)

20Lwe uYeesu agaluha kuhaaya pooka na vhasundikwa, ivhungaana lihamuvhungatila havhili. Uweene na vhasundikwa vhaakwe vhahapootwa nu kulya ishaakulya, mwe pe imbombo iya kuvhavhombela avhantu yáali mpiti. 21Avhanine avha Yeesu vhívuuye ku vhantu kuuti uYeesu alalusile, pe vhahati vhasogole vhamunyatule.

22Avhasambiilizi avha ndajizyo izya Moose vháfumile ku Yelusaleemu vhahafiha kwa Yeesu, vhahati, “Alemwilwe nu Belizabuuli#3:22 Belizabuuli lizina ilyamwavho ilya Seetano we mupiti uwa mpepo inkandamanu. Izina ili lyáfumiliine ni izina ilya Baali-Zebuubu. Izina ilyo lizina ilya mpepo yimo ye insi impalamani na Vhaisilayeeli vhahayipuutaga fwe wu mulungu waavho. umupiti uwa mpepo inkandamanu. Akushimbizya impepo inkandamanu ku maha aga Belizabuuli!” 23UYeesu ahavhiita, ahayanga navho ku miivhi ahati, “Nalyoli uSeetano angayeefwa wuuyo weeka? 24Inga avhantu avha vhumwene vhwoka vhakulwa, uvhumwene uvhwo vhukunanjiha. 25Vhoope avhantu avha mu nyumba yooka inga vhanda kulwa vhuuvho vheeka, inyumba iyo yikunanjiha. 26Woope uSeetano inga akulwa nu Seetano, uvhumwene vhwakwe vhutangajendeelela, vhukunanjiha. 27Umuntu atanginjila kupumula ivintu mu nyumba iya muntu uwa maha ishisita kumukunga suuti. Ileelo inga amukunga suuti umuntu uwa maha uyo, pe angapumula vwe vili mu nyumba yaakwe.

28“Nalyoli nkuvhavhuuzya kuuti, avhantu vhaliswilwa uvhutalamalandu vhwonti nu musaamu wonti, 29ileelo we akumusaamula uMupepo uMufinjile te ahaswilwe naalumo, uvhutalamalandu uvhwo vhuliivha vhwa shiima.” 30Áyanzile vhwevhulo, mwe pe vhátili, “Ali ni mpepo inkandamanu.”

Unyina na vhanine avha Yeesu

(uMataayi 12:46-50; uLuuka 8:19-21)

31Unyina na vhanine avha Yeesu vhahafiha, vhahimiilila panzi, vhahamusonteelezya umuntu kumwita. 32Ivhungaana lye lyátendiime kumuzyunguula lihamuvhuuzya lihati, “Umaayi waaho na vhanine vhaaho vhali panzi, vhakukulondola.” 33Ileelo uYeesu ahavhaamula ahati, “Umaayi waane na vhanine vhaane vhe vha naanu?” 34Ahavheenya vhe vhátendiime kumuzyunguula imbazu zyonti ahati, “Ivha vhe vhamaayi vhaane na vhanine vhaane. 35Umuntu wonti we akuvhomba zye uMulungu akwanza, uyo we munine waane havhili we wu maayi waane.”

Currently Selected:

uMaaliko 3: nih

Highlight

Copy