uMaaliko 4
4
Ishiholanyo isha mupesa mbeyu
(uMataayi 13:1-9; uLuuka 8:4-8)
1UYeesu ahataliha kusambiilizya lwe ali pa luvhazu pa sumbi. Ivhungaana ipiti ilya vhantu lihinza pe áamile, pe uweene ahalimbila mwi ivhooti, nu kutendama muumwo, inga avhe nu vhuzilo uvhwa kusambiilizya avhantu vhe vháali ku nsi inyuumu. 2Ahavhasambiilizya inyinji ku viholanyo, ahati, 3“Tejeelezyi! Umulimi wumo ásogooye kupesa imbeyu zyakwe. 4Lwe akupesa, imbeyu zimo zihagwila pa luvhazu pi idala, inyunyi zihinza, zihalya. 5Izyamwavho zihagwila pi iyalaawe pe patáamile intope inyinji, izyene zihamela naluvhiilo, mwe pe patáamile intope inyinji. 6Ileelo lwe ahasanya haalama, imbeyu izyo zihafwoha nu kwuma, mwe pe amazi gaakwe gatíisile pansi nkaani. 7Izyamwavho zihagwila pahati pa mimvwa, lwe amimvwa igo gaakula, gahazibuda, zitaheela naazimo. 8Izyamwavho zihagwila pa nsi inyinza. Pe lwe zyela zimo zihapaapa amantonongwa 30, izyamwavho 60, izyamwavho zihapaapa amantonongwa 100.” 9Havhili ahati, “We ali na makutwi, atejeelezye!”
UYeesu akulondovhola ishiholanyo isha mupesa mbeyu
(uMataayi 13:10-23; uLuuka 8:9-15)
10UYeesu na vhasundikwa vhaakwe pooka na vhantu vhe vhahamulandataga vhahasogola kukwilu. Vhahamulaavha kuuti avhalondovholele iviholanyo vwakwe. 11Uweene ahavhavhuuzya ahati, “Imwe uMulungu avhapiiye kuzimanya izya kukwilu izya vhumwene vhwakwe. Ileelo avhanji nkuvhasambiilizya ku viholanyo, inga
12‘vhenyaaje zye nkuvhomba,
ileelo vhatazilolaje.
Havhili vhatejelezyaje zye nkuyanga,
ileelo vhatazimanyinsanyaaje.
Vhatahinze vhapindushe nu kuswilwa.’#4:12 uYisaayi 6:9-10”
13Pe uYeesu ahati, “Mutashimanyile ishiholanyo ishi? Pe iviholanyo ivinji mungavimanya vhuli? 14We akupesa imbeyu we wula we akusambiilizya izwi ilya Mulungu. 15Imbeyu zye zyágwiliiye pa luvhazu pi idala, lizwi lye avhantu vhakulyivwa, ileelo naluvhiilo uSeetano akwefwa izwi ilyo kufuma mu mooyo gaavho.
16“Imbeyu zye zyágwiliiye pansi pi iyalaawe, shiholanyo isha vhantu vhe vhakwivwa izwi ilya Mulungu nu kuliposheela naluvhiilo ku luseshelo. 17Ileelo, mwe pe amazi muhati yaakwe gatiisile pansi nkaani, izwi ilyo likutendama ku havhaliilizyo hansi vhweleele. Amayimba, poosye amalavha inga gamwaga kuzya izwi ilya Mulungu, naluvhiilo akulileha. 18Imbeyu zye zyágwiliiye mu mimvwa, shiholanyo isha vhantu vhaala vhe vhakwivwa izwi ilya Mulungu, ileelo pisinda mu vhulanzi vhwavho, vhakulemwa na maganigani nu kutepushila mu vhudumbwe na mu nyinza izya mu nsi. Izyo zikuliviganya izwi ilyo nu kulivhiiha kuuti lipootwe kupaapa. 19Ileelo imbombo izya mu nsi, nu luhopenkanyo ulwa vwuma nu lupapilo ulwa vintu ivwinji, vikulibuda izwi, lyope litakupaapa. 20Imbeyu zye zyágwiliiye pa nsi inyinza, shiholanyo isha vhantu vhe vhakulitejeelezya izwi nu kuliposheela. Avhantu ivho vhe vhamo vhakupaapa amantonongwa 30, avhamwavho 60, na vhamwavho vhakupaapa amantonongwa 100.”
UYeesu akusambiilizya kutejeelezya ahinza
(uLuuka 8:16-18)
21UYeesu ahajendeelela kuvhasambiilizya avhantu ahati, “Inyaale yikwanzilwa kuyivhiiha pi ibeeja, te kuyigubishila ni nsonta, poosye kuyivhiiha kwi izungululu ku shitala. 22Vhwevhulo, zyope zyonti zye zizyihiime ziliivha apazelu, havhili zyonti zye zili kukwilu zilivumbuha. 23We ali na makutwi, atejeelezye!” 24Ahonjezya kuvhavhuuzya kuuti, “Mutejelezyaje ahinza zye mukwivwa. Vwe mukuyifumwa kutejeelezya, vwe kwe mumanyaje ahinza, nu kwonjezelwa. 25Umuntu we akulema insambiilizyo zyane, kuuti zimwonjezye uvhumanyi. Ileelo we atakulema, nu vhumanyi uvhunsi vhwe ali navhwo, vhwope alifwulwa.”
UYeesu akusambiilizya ishiholanyo isha mbeyu ye yikumela
26Havhili ahati, “Uvhumwene uvhwa Mulungu vhuli inza ishi. Umuntu wumo ápesile imbeyu mu mugunda. 27Ahakaataga twe tulo nu kudaamula, atámanyile imbeyu vwe yikumela nu kukula. 28Zyáli vhwevhulo, mwe pe intope yikupaapisya yiiyo yeeka, likutaliha intooga, likulandata ipelele, pisinda ingana. 29Inga vwela, pe akunyatula ishikwakwa nu kutaliha kuvuna.”
Ishiholanyo isha mbeyu iya haladaali
(uMataayi 13:31-32, 34; uLuuka 13:18-19)
30UYeesu ahajendeelela kuyanga ahati, “Uvhumwene uvhwa Mulungu tuvhuholanye ni shooni? Shiholanyo vhuli she tuvhuvhiishile? 31Vhuholiine ni mbeyu iya haladaali ye nyinsi kuluusya imbeyu zyonti. Ileelo poosye she nyinsi kuluusya imbeyu zyonti izya mu nsi, 32inga yavhwalwa yikukula, nu kutalimpa kuluusya amakwi gonti aga mu shilimbika. Yikuvha ni nsamba impiti, ni nyunyi zikutenjela mwenemwo.”
33UYeesu ahavhavhuzyaga avhantu ku viholanyo ivinji inza ivi, kulandatana na vwe vhahatejelezyaga. 34Atahavhavhuzyaga naashimo ishisita ishiholanyo, ileelo lwe ayiima weeka na vhasundikwa vhaakwe ahavhavumbulilaga zyonti.
UYeesu akupilila inkungu na mavhilingwa
(uMataayi 8:23-27; uLuuka 8:22-25)
35Isiku lyeliila hamazuuvha, uYeesu ahavhavhuuzya avhasundikwa vhaakwe ahati, “Tulambe kwi isyila ilya sumbi.” 36Vhahalileha ivhungaana, vhaheepa ni ivhooti she uYeesu ali mwemuula. Amavhooti aganji gahalongozanya pooka navho. 37Lwe vhakujendeelela nu vhulendo, inkungu impiti nkaani yihinza. Amavhilingwa gahanda kunyamfushila mwi ivhooti na minzi gahinjila nu kwizula muumwo.
38Uweene uYeesu ápezile akaasite utulo muhati kwisinda mwi ivhooti pa nsagamilo. Avhasundikwa vhaakwe vhahamudaamusya vhahati, “We Musambiilizi! Twavwe! Tukufwa!” 39Ahadaamula, ahayipilila inkungu nu kumuvhuuzya usumbi kuuti, “Puuma!” Pepaala, inkungu yihaleha kuvugula, usumbi ahapuuma mwaa! 40UYeesu ahavhavhuuzya avhasundikwa vhaakwe ahati, “Shooni she mukwogopa? Mutali nu lwitiho niishi?” 41Vhahoogopa nkaani, vhahavhuuzanya vhahati, “Muntu vhuli uno we ni nkungu nu sumbi vikumushindiha?”
Currently Selected:
uMaaliko 4: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
