uMaaliko 2

UYeesu ali na maha aga kuvhaswila avhantu uvhutalamalandu

(uMataayi 9:1-8; uLuuka 5:17-26)

1Lwe zyatuuha insiku nyinsi, uYeesu ahagaluha ku Kapelanawuumu na vhantu vhahiivwa kuuti ali pa nkaaya. 2Avhantu avhinji vhahiizula mu nyumba yonti na kunzi vhweleele, woope uYeesu ahalumbililaga izwi ilya Mulungu. 3Pe vhahinza avhantu vhane, vhamusenziinye pi izagala umuntu we áhataliiye, vhahamutwalaga kwa Yeesu. 4Mwe pe páali ivhungaana ilya vhantu, vhahapootwa apa kumwinjizya mu nyumba, vhahadovhola pamwanya pe uYeesu áamile. Pe vhahamwisya umuvhinu ula she ali pi izagala lyakwe. 5Lwe uYeesu aalola ulwitiho lwavho, ahamuvhuuzya we áhataliiye uyo ahati, “We mwana waane, nakuswila uvhutalamalandu vhwaho.”

6Ileelo avhasambiilizi avha ndajizyo izya Moose vhe vháliipo paala, vhahasiivha mu mooyo gaavho kuuti, 7“Shooni she akumusaamula uMulungu? Ataliipo umuntu we angavhaswila avhantu uvhutalamalandu, nkandi we Mulungu weeka.” 8Ileelo uYeesu ahamanya insiivho zyavho, pe ahavhapilila ahati, “Shooni she mukusiivha izyo mu mooyo giinyu? 9Ishi lili kwoshi lye lipupuusu: kumuvhuuzya we ahataliiye kuuti, ‘Nakuswila uvhutalamalandu vhwaho,’ pamo kuuti, ‘Yimiliila, unyatule izagala lyaho, ujendaje’? 10Ileelo ishi, nkwanza mumanye kuuti ne Mwana wa Aadamu#2:10 UMwana wa Aadamu: Vhaazya mu Ntantiho izya Mazwi aMajeni. indi na maha aga kuvhaswila avhantu uvhutalamalandu mu nsi.” Pe ahamuvhuuzya ula we áhataliiye ahati, 11“Yimiliila! Nyatuula izagala lyaho, vhwelaaga kuhaaya.” 12Pepaala ahimiilila, ahanyatula izagala lyakwe, aheepa she avhantu vhonti vhakumulola. Avhantu vhe vháliipo paala lwe vhaalola vhahasukumila nkaani, vhahamutiima uMulungu, vhahati, “Tutahalola naalumo amafindango inza iga!”

UYeesu akumwita uLaawi kuuti avhe musundikwa waakwe

(uMataayi 9:9-13; uLuuka 5:27-32)

13UYeesu ahasogola havhili mu luvhazu mwa sumbi uwa Galilaaya. Ivhungaana ilya vhantu lihamulandata, woope ahataliha kuvhasambiilizya. 14Lwe akujenda ahamulola umuntu wumo, we izina lyakwe vhahatinji uLaawi, umwana wa Alufaayo, atendiime apa kusonchezezya umusonko. UYeesu ahamuvhuuzya ahati, “Undandate! Uvhe we musundikwa waane.” Woope uLaawi ahimiilila nu kumulandata.

15Pe uYeesu ahasogola kulya ishaakulya kwa Laawi. Vhoope avhasonchezya musonko#2:15 Avhasonchezya musonko: Vhaazya mu Ntantiho izya Mazwi aMajeni. na vhatalamalandu avhamwavho avhinji#2:15 Avhatalamalandu avhamwavho avhinji: AVhafalisaayi vhahalandataga inkomeelezyo izya Moose. Vhaala vhe vhatahalandataga inkomeelezyo izya Moose na miiho gaavho ge vhahonjezyaga, vhahatinji vhatalamalandu. vhahatendama kulya ishaakulya pooka nu Yeesu na vhasundikwa vhaakwe, mwe pe vháali vhinji vhe vhahamulandataga. 16Avhasambiilizi avha ndajizyo izya Moose vhe vháali Vhafalisaayi,#2:16 AVhafalisaayi: Vhaazya mu Ntantiho izya Mazwi aMajeni. lwe vhaalola uYeesu akulya na vhantu vhaala, vhahavhakwinkwina avhasundikwa vhaakwe vhahati, “Shooni she akulya na vhasonchezya musonko na vhatalamalandu?” 17Lwe uYeesu ayiivwa amazwi igo, ahavhaamula ahati, “Avhapuuma vhatakumwanza umuganga, nkandi vhe vhavhinile vhe vhakumwanza. Ine ntinzile kuvhiita avhagolosu, nkandi kuvhiita avhatalamalandu, inga vhapindushe.”

Vhakumuvhuziilizya uYeesu izya kuyiima kulya

(uMataayi 9:14-17; uLuuka 5:33-39)

18Ahavhaliilizyo haala avhasundikwa vha Yoohani na Vhafalisaayi vháamile na maata aga kuyiima kulya#2:18 Kuyiima kulya: Vhaazya mu Ntantiho izya Mazwi aMajeni. ishaakulya. Isiku limo, avhantu vhahinza kumuvhuziilizya uYeesu vhahati, “Shooni she avhasundikwa avha Yoohani na vha Vhafalisaayi vhakuyiima kulya, ileelo avhaaho haa?” 19UYeesu ahavhaamula ahati, “Vhe vhalanjiliilwe pa winga, vhatakwanzilwa kuyiima, lwe we akwimala ali pooka navho, 20nkandi insiku zye vhalivheefwezya we akwimala pe vhaliyiima kulya.#2:19-20 UYeesu akuyiholanya na we akwimala na vhasundikwa vhaakwe akuvhaholanya na vhe vhakuvhalanjila. Havhili lwe akutaha ahavhaliilizyo he vhalivheefwezya we akwimala, akupanga ahavhaliilizyo he vhalimugoga.

21“Ataliipo umuntu we akugambiha ishigamba ishipwa pa mwenda umukaali, mwe pe ishigamba ishipwa shikuzepulanya nu kunanganya nkaani umwenda umukaali. 22Havhili, ataliipo umuntu we akuvhiiha idivaayi#2:22 Idivaayi: Vhaazya mu Ntantiho izya Mazwi aMajeni. impwa mu mafuuku amakaali aga makwembe. Inga avhomba vhwevhulo, idivaayi iyo yikupunsya amafuuku nu kwitiha, goope amafuuku gakunanjiha. Idivaayi impwa yikwanzilwa kuyivhiiha mu mafuuku amapwa.”#2:22 AVhaisilayeeli vhahasengulaga idivaayi mu mafuuku aga makwembe aga mbuzi. Amafuuku amakaali gahapotwaga kududuha nkaani lwe idivaayi ye yili muumwo yikulula, pe gahapuntaga. Ileelo amafuuku amapwa gahaduduhaga nkaani, ageene gatahapuntaga. Mu miivhi iga, idivaayi impwa, kwe kuuti insambiilizyo impwa izya Yeesu, goope amafuuku amakaali aga makwembe, kwe kuuti amaata aga hali aga Vhaisilayeeli.

UYeesu wu Mwene uwa Sabaato

(uMataayi 12:1-8; uLuuka 6:1-5)

23Isiku limo ilya Sabaato, uYeesu na vhasundikwa vhaakwe vhahatuuhaga mu magunda aga ngana. Avhasundikwa vhaakwe vhahanda kuvwanula amatwe aga ngana. 24AVhafalisaayi vhamo vhahamuvhuziilizya uYeesu vhahati, “Indajizyo izya Moose zitakwitishila kuvhomba imbombo pi isiku ilya Sabaato!#2:24 Indajizyo izya Moose zitakwitishila kuvhomba imbombo pi isiku ilya Sabaato: Indajizyo izya Vhayuuda zihavhitishilaga avhantu kuvwanula nu kulya amantonongwa kufuma mu magunda aga vhantu avhanji, lwe vhakutuuha mu magunda gaavho. Vhaazya iNkumbushizyo izya Ndajizyo 23:25. AVhafalisaayi vhahasukumilaga, mwe pe avhasundikwa avha Yeesu vhávhomvile imbombo iyo pi isiku ilya Sabaato lye lyáli lya kutuuzya, havhili lye umuntu nuumo atahitishilwaga kuvhomba imbombo. Vhaazya Kufuma 20:8-11; 34:21; iNkumbushizyo izya Ndajizyo 5:12-15. Shooni she avheene avhasundikwa vhaaho vhakuvhomba?”

25UYeesu ahavhaamula ahati, “Mutahavhaazya mu Vhusimbe uVhufinjile vwe uDaavhudi#2:25 UDaavhudi: Vhaazya mu Ntantiho izya Mazwi aMajeni. ávhomvile, lwe inzala yamuluma pooka na vhamwavho? 26Áyinjiiye mwi Iheema ilya Mulungu#2:26 Iheema ilya Mulungu: Vhaazya iNyumba iMfinjile mu Ntantiho izya Mazwi aMajeni. ahavhaliilizyo he uAbiyataali áali mupuuti umupiti#2:26 Umupuuti umupiti: Vhaazya avhapuuti mu Ntantiho izya Mazwi aMajeni. uwa Vhayuuda nu kunyatula amakaati ge gáamile mafinjile. Indajizyo izya Moose zitahitishilaga avhantu avhanji kulya amakaati igo, nkandi vhe vhapuuti vheeka, ileelo uDaavhudi ahalya ahaavhapa na vhamwavho.”#2:26 1 uSaamweli 21:1-6 27Ahonjezya ahati, “Isiku ilya Sabaato lyávhisiilwe kumwavwa umuntu, umuntu atápeziilwe kuyivhombela iSabaato. 28Mumanye kuuti ne Mwana wa Aadamu indi na maha poosye ni Sabaato.”

Currently Selected:

uMaaliko 2: nih

Highlight

Copy