uMaaliko 1

UYoohani uMwozyi akulumbiilila

(uMataayi 3:1-12; uLuuka 3:1-18; uYoohani 1:19-28)

1Uvhu vhwe vhwandilo uvhwa Izwi iLyinza lye likulondovhola izya Yeesu Chilisiti#1:1 UChilisiti: Vhaazya mu Ntantiho izya Mazwi aMajeni. uMwana wa Mulungu.#1:1 UMwana wa Mulungu: Vhaazya mu Ntantiho izya Mazwi aMajeni. 2Lyátalisile inza vwe ásimvile umukuvhwi uYisaayi kuuti,

“Yeenya, ndimusonteelezya umuvhomvi waane,

akulongolele kulingaanya idala lye ulituuha.#1:2 uMalaaki 3:1

3Umuvhomvi uyo alitaliha kuvhila imbila mu luugwa kuuti,

‘Musenganizanyi uMWENE uMulungu idala,

nu kugolosya mwe kuuti atuushe.’”#1:3 uYisaayi 40:3

4Uhoome uyo áali wu Yoohani we ahavhanga mwi ilaala, ahakumusyaga ahatinji avhantu vhapindushe nu kwozelwa, inga uMulungu avhaswile uvhutalamalandu vhwavho. 5Avhantu kufuma mu nkaaya iya Yelusaleemu na mu shigavho isha nsi shonti isha Yudeeya vhahasogolaga kwa Yoohani kumutejeelezya. Vhahapemulaga uvhutalamalandu vhwavho, woope ahavhozyaga mwi ijenje uYoolodaani. 6UYoohani ahazwalaga amenda ge gásoniilwe na masepe aga ngamila,#1:6 Ingamila shihanu isha kusugwa she shipiti, havhili shili na masepe aminji. nu kuyipinya ni ilamba ilya ikwembe mu musana. Havhili ahalyanga avhamakanta nu vhwushi. 7Ahakumusyaga ahatinji, “We akwinza mwisinda lyane ali na maha kunduusya ine, ine ntahondeeye poosye kuvha ne muvhomvi waakwe uwa kuzevwa nu kusatula inkusa izya vilyatu vwakwe.#1:7 Ine ntahondeeye poosye kuvha ne muvhomvi waakwe uwa kuzevwa nu kusatula inkusa izya vilyatu vwakwe: Amaata aga Vhayuuda yáali mbombo ya muzya kusatula inkusa izya vilyatu vwa mupiti waakwe. 8Ine nkuvhoozya na minzi, ileelo uweene alivhoozya nu Mupepo uMufinjile.#1:8 UMupepo uMufinjile: Vhaazya mu Ntantiho izya Mazwi aMajeni.”

UYeesu akwozelwa nu kulingwa

(uMataayi 3:13-4:11; uLuuka 3:21-22; 4:1-13)

9Ahavhaliilizyo hehaala uYeesu ahafuma mu nkaaya iya Naazaleeti mu shigavho isha nsi isha Galilaaya, ahafiha kwa Yoohani, woope ahamwozya mwi ijenje uYoolodaani. 10UYeesu lwe akutumpuha mu minzi, naluvhiilo ahalola ku mwanya kukwiguha nu Mupepo uMufinjile we ali ngati nkunda ahamwishila pamwanya yaakwe. 11Izwi ilya Mulungu lihivwiha kufuma ku mwanya, lihati, “Iwe we Mwana waane#1:11 UMwana waane: Vhaazya uMwana wa Mulungu mu Ntantiho izya Mazwi aMajeni. unkundwa, nahondezelwa niiwe.”

12Pe uMupepo uMufinjile ahamutwala uYeesu mu luugwa. 13Ahiima mu luugwa insiku 40 pooka ni vihanu ivwa umwo. Ahavhaliilizyo honti iho uSeetano ahavhanga akumulinga. Lwe zyatuuha izyo, avhahavhizya avha Mulungu vhahinza kumuvhombela.

UYeesu akutaliha kuvhiita avhantu kuvha vhasundikwa vhaakwe

(uMataayi 4:12-22; uLuuka 4:14-15; 5:1-11)

14Pisinda, uYoohani ahakungwa mu jeela, pe uYeesu ahasogola mu shigavho isha nsi isha Galilaaya, ahataliha kukumusya Izwi iLyinza ilya Mulungu. 15Ahati, “Ahavhaliilizyo aha vhumwene uvhwa Mulungu#1:15 Uvhumwene uvhwa Mulungu: Vhaazya mu Ntantiho izya Mazwi aMajeni. haafiha nu vhumwene uvhwa Mulungu vhupalamiiye! Mupindushe, mulyitishe Izwi iLyinza ilya Mulungu.”

16Isiku limo, uYeesu ahajendaga mu luvhazu mwa sumbi uwa Galilaaya. Ahavhalola avhavuvhi avha nswi vhavhili, uSiimoni#1:16 USiimoni: Uyo izina ilyamwavho áali wu Peeteli. nu munine waakwe uAndeleeya. Vhahasumbilaga inyeelo zyavho mwa sumbi. 17UYeesu ahavhavhuuzya ahati, “Mundandate! Niine kwe mbavhiishe kuvha mwe vhavuvhi vha vhantu.#1:17 Avhavuvhi vha vhantu vhantu vhe vhakuvhungaaniha avhantu avhanji kufuma mu vhutalamalandu vhwavho nu kuvhatwala kwa Mulungu.” 18Pepaala, vhahazileha inyeelo zyavho, vhahamulandata.

19Lwe uYeesu asogola pilongolela hansi ahavhalola avhanine avhamwavho vhavhili, uYaakobu nu munine waakwe uYoohani, avhaana vha Zebedaayi. Vháali mwi ivhooti, vhahalinganyaaga inyeelo zyavho. 20Lwe avhalola vhweleele, ahavhiita, vhoope vhahamuleha utaata waavho uZebedaayi muhati iya ivhooti pooka na vhavhomvi vhaakwe, vhahamulandata uYeesu.

UYeesu akushimbizya impepo inkandamanu

(uLuuka 4:31-37)

21UYeesu na vhasundikwa vhaakwe vhahasogola mu nkaaya iya Kapelanawuumu. Lwe lyafiha isiku ilya Sabaato,#1:21 ISabaato: Vhaazya mu Ntantiho izya Mazwi aMajeni. ahinjila mwi isinagoogi#1:21 Isinagoogi: Vhaazya mu Ntantiho izya Mazwi aMajeni. pooka na vhasundikwa vhaakwe, ahanda kusambiilizya. 22Avhantu vhahasukumila nkaani insambiilizyo zyakwe, mwe pe ahasambilizyaga ngati muntu we ali na maha, atahasambilizyaga ngati vhasambiilizi vhaavho avha ndajizyo izya Moose.#1:22 Avhasambiilizi vhaavho avha ndajizyo izya Moose: Vhaazya avhasambiilizi avha ndajizyo izya Moose mu Ntantiho izya Mazwi aMajeni. 23Mwi isinagoogi ilyo mwáli umuntu wumo, we álemwilwe ni mpepo inkandamanu. 24Ahahoola inkoolo ahati, “Shooni she ukutwinjiilila, iwe Yeesu wa ku Naazaleeti? Uyinzile kutulovwa? Imanyile kuuti iwe we Mufinjile uwa Mulungu.” 25UYeesu ahayipilila impepo yiila ahati, “Ahalanga! Fuma mwa muntu uno!” 26Impepo iyo yihamutetemesya umuntu ula, ahahoola nkaani, yihafuma.

27Vhonti vhahasukumila nkaani nu kuvhuzilizanya kuuti, “Nsambiilizyo vhuli injeni izi, havhili izya maha? Umuntu uno ali na maha amapiti, mwe pe kwi izwi akuzipilila impepo inkandamanu, zyope zikumushindiha!” 28Pe inongwa izya mbombo izya Yeesu zihakumuha naluvhiilo mu shigavho isha nsi shonti isha Galilaaya.

UYeesu akuvhaponia avhavhinu avhinji

(uMataayi 8:14-17; uLuuka 4:38-41)

29Lwe vhaafuma mwi isinagoogi, uSiimoni nu Andeleeya vhahamuposheela uYeesu nu Yaakobu nu Yoohani ku nyumba yaavho. 30Mu nyumba muula, unyinavwala uwa Siimoni ákaasite, ávhinile inzegema. Lwe uYeesu aafiha paala, vhahamuvhuuzya izya vhuvhinu uvhwa maayi ula. 31UYeesu ahamupalamila umuvhinu, ahamulema inyoovhe yaakwe, inzegema yihapona, ahamuvhuusya. Woope ahataliha kuvhavhombela.

32Lwe haafiha hamazuuvha, izuvha lyaswa, avhantu avha mu nkaaya yiila vhahamuleetela uYeesu avhavhinu vhonti na vhe vhálemwilwe ni mpepo inkandamanu. 33Avhantu avhinji nkaani avha mu nkaaya yiila vhávhungiine pilongolela ilya nyumba yiila. 34Ahavhaponia avhantu vhonti avha mavhinu aga mavhiila mu mavhiila. Havhili, ahazyefwa impepo inyinji, ileelo ahazihaana kuuti zitamutahaje,#1:34 Ahazihaana kuuti zitamutahaje: UYeesu ahazihaanaga impepo zitamutahaje kuvha wu naanu mwe atahanzaga avhantu vhamanye kuuti Mwana wa Mulungu. mwe pe zyámumanyile kuuti wu naanu.

UYeesu akulumbiilila mu Galilaaya

(uLuuka 4:42-44)

35Indaavhi yaakwe inzanshi lwe kushiili kusha uYeesu ahadaamula, aheepa mu nyumba, ahasogola pe patáali avhantu kulaavha. 36Lwe hatuuha ahavhaliilizyo hamo, uSiimoni na vhamwavho vhahasogola kumulondola. 37Lwe vhamulola vhahamuvhuuzya vhahati, “Avhantu vhonti vhakukulondola.” 38UYeesu ahati, “Tujende ukunji mu nkaaya izinji izya mupiipi, insogole inkumusye mwope, mwe pe ninzile ku vhantu vhonti.” 39Pe ahasogola mu shigavho isha nsi isha Galilaaya shonti, ahakumusyaga mu masinagoogi gaavho nu kwefwa impepo inkandamanu.

UYeesu akumuzelufwa uwa mambombo

(uMataayi 8:1-4; uLuuka 5:12-16)

40Umuntu wumo uwa mambombo ahinza kwa Yeesu, ahamusugamilila, ahamulambiilizya ahati, “Imanyile kuuti uli na maha aga kunzelufwa. Inga ukwanza, nkulaavha unzelufwe.” 41UYeesu ahamufwila uvhwila, ahagolosya inyoovhe yaakwe nu kumupalamansya,#1:41 Kumupalamansya: Ku Vhayuuda yáali mwiho kumupalamansya we ali na mambombo. Inga umuntu amupalamansya, yáali mwiho kumupuuta uMulungu. ahati, “Nkwanza uzelupe!” 42Pepaala, umuntu ula, uvhuvhinu vhuhamwepa, ahazelupa. 43UYeesu ahamuvhuuzya kuuti asogole, ahamulajizya ahati, 44“Utahamuvhuuzye umuntu wonti inongwa izi! Ileelo usogole uyilolesye kwa mupuuti#1:44 Umupuuti: Vhaazya avhapuuti mu Ntantiho izya Mazwi aMajeni. nu kufumwa impuutile izya kuzelupa kwaho inza vwe uMoose#1:44 UMoose: Vhaazya mu Ntantiho izya Mazwi aMajeni. álajiziizye,#1:44 aVhalaawi 14:1-32. inga avhantu vhonti vhazilole zye uMulungu akuvhombela.” 45Ileelo umuntu ula atahapuuma, ahajendeelela kukumusya zye uYeesu amuvhombela zyonti. Pe mu nkaaya yonti yihavha shigomu kwa Yeesu, poosye kwinjila apazelu, mwe pe avhantu vhahamuvhunganilaga, ahiima kukwilu kwe kutáali avhantu. Ileelo avhantu kufuma intala zyonti vhahamulandata kwekuula kwe áamile.

Currently Selected:

uMaaliko 1: nih

Highlight

Copy