uMaaliko 15

Vhakumutwala uYeesu kwa Pilaato

(uMataayi 27:1-2, 11-14; uLuuka 23:1-5; uYoohani 18:28-38)

1Lwe kwasha, avhapiti avha vhapuuti na vhasongo avha Vhayuuda na vhasambiilizi avha ndajizyo nu lukuvhato lwonti vhahapanzanya. Vhahamukunga uYeesu nu kumutwala kwa mupiti waavho uMuluumi we izina lyakwe vhahatinji uPilaato. 2UPilaato ahamuvhuziilizya uYeesu ahati, “Iwe we Mwene uwa Vhayuuda?” UYeesu ahati, “Iwe we wayanga.” 3Avhapiti avha vhapuuti vhaala vhahamulonjeelela uYeesu amalandu aminji. 4UPilaato ahamuvhuziilizya havhili ahati, “Vhuli, utakwamula naalimo? Yeenya zye vhakukulonjeelela vwe zya vhwinji!” 5UYeesu atahaamula naalimo havhili. Pe uPilaato ahasukumila nkaani.

UYeesu akulongwa kufwa

(uMataayi 27:15-26; uLuuka 23:13-25; uYoohani 18:39-19:16)

6Gáamile maata umulongozi uwa nsi, ahavhaliilizyo aha pa shikulukuulu isha Pasaaka, kumusatula umukungwa wooka we avhantu vhahalaavhaga kuuti asatulwe. 7Pe kwáli umuntu wumo we izina lyakwe vhahatinji uBalaaba. UBalaaba ákunziilwe pooka na vhasambusu avhanji, mwe pe vhávhomvile uvhusambusu uvhupiti nu kugoga. 8Avhantu avhinji vhahasogola kwa Pilaato, vhahanda kumulaavha kuuti avhavhombele inza vwe ahavheelela kuvhavhombela pa shikulukuulu. 9UPilaato ahavhavhuziilizya ahati, “Vhuli, mukwanza kuuti mbasatulile uMwene uwa Vhayuuda uno?” 10Ávhavhuziliziizye isho, mwe pe ámanyile kuuti avhapiti avha vhapuuti vhaala, vhámutwaye uYeesu ku kwakwe, mwe pe vháali nu mwone.

11Avhapiti avha vhapuuti vhahasonzya ivhungaana ilya vhantu kuuti, vhamulaavhe uPilaato amusatulile uBalaaba, ileelo uYeesu asyale. 12UPilaato ahavhavhuziilizya havhili ahati, “Ishi mukwanza imuhonzye vhuli umuntu uno we mukuti wu Mwene uwa Vhayuuda?” 13Avhantu vhonti vhahonjezya kuzuma ahalanga, vhahati, “Muhomeele pa shihovhenkanyo!” 14UPilaato ahavhuziilizya havhili ahati, “Ananzile ishooni she tumuhomeele?” Ileelo avheene vhahajendeelela kuzuma ahalanga kuuti, “Muhomeele!” 15Mwe pe uPilaato ahanzaga kulihondezya ivhungaana ilya vhantu, ahavhasatulila uBalaaba inza vwe vhahanzaga. Ileelo ahalajizya kuuti uYeesu ahomwe nu muchaapu nu kumutwala kuhomeelwa pa shihovhenkanyo.

Avhasikaali vhakumujevhula uYeesu

(uMataayi 27:27-31; uYoohani 19:2-3)

16Avhasikaali vhahamutwala uYeesu mu nyumba iya kukonzezya iya Pilaato, pe vhahiitana impuga yonti iya vhasikaali. 17Vhahamuzwalizya umwenda uwa muhoola uwa mafwomfwo ngati wu mwene, vhahatavha ishipambwi isha mimvwa nu kumuvhiiha kwi itwe. 18Vhahataliha kumujevhula nu kumulamuha kuuti, “Mwakaata Mwene wa Vhayuuda!” 19Vhahamuhoma ni ilanzi kwi itwe, vhahamuswilila amati, vhahamusugamilila nu kwinama pansi ngati vhakumushindiha. 20Lwe avhasikaali ivho vhaamala kumujevhula, vhahamuzuula umwenda uwo uwa muhoola uwa mafwomfwo nu kumuzwalizya amenda gaakwe havhili. Vhahamutwala panzi, inga vhamuhomeele pa shihovhenkanyo.

UYeesu akuhomeelwa pa shihovhenkanyo

(uMataayi 27:32-44; uLuuka 23:26-43; uYoohani 19:17-27)

21Lwe vhali mwi idala, vhahahomaana nu muntu wumo we izina lyakwe vhahatinji uSiimoni, umuhaaya uwa mu nkaaya iya Kileene. Umuntu uyo áfumile ku magunda. USiimoni uyo we áamile wu yise wa Alekizanda nu Luufo. Vhahamuvijiilizya kuuti avhegale ishihovhenkanyo isha Yeesu. 22Vhahamuleeta uYeesu pe vhahatinji pa Goligoota, kwe kuuti pi Ipangaawe ilya Itwe. 23Vhahaamupa idivaayi ye vhásangiinye nu mulembo uwa kusheefwa uvhuvhaavi, ileelo ahahaana kumwela. 24Vhahamuhomeela, vhahagahomela ulutambu amenda gaakwe, inga vhamanye kuuti wu naanu anyatule mwenda vhuli. 25Yáamile saala taatu inzanshi, lwe avhantu vhaala vhakumuhomeela. 26Vhávhiisile uvhusimbe pamwanya pa Yeesu, uvhwa vhulonjeelezi vhwakwe vhwe vhukuti, “UMWENE UWA VHAYUUDA.” 27Ipo kwáli avhapumula vintu vhavhili. Vhoope vhahahomeelwa pa vihovhenkanyo vwavho pooka nu Yeesu, wumo ku luvhazu ulwa kundiilo ulwa Yeesu, uwamwavho ulwa kumongo. 28Izyo zyávhombesile, inga uVhusimbe uVhufinjile vhulunjishe, vhwe vhukuti, “Vhámuvhaziizye pooka na vhatalamalandu.”#15:28 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na hansi aha 28. Zyope iBiibiliya zimo izya manda iga zikuhaleha ahansi iha ishisita kusimba.#15:28 uYisaayi 53:12

29Avhantu vhe vhahatuuhaga mwi idala liila vhahamuligaga uYeesu nu kuyinzaanya amatwe gaavho kumusuufwa. Vhahamujevhulaga vhahatinji, “We! Te weewe we watinji ungayimongola iNyumba iMfinjile nu kuyizenga havhili ku nsiku zitatu? 30Ishi, uyiposhe weneewe, uyiishe pa shihovhenkanyo ipo!” 31Vhwevhulo, vhoope avhapiti avha vhapuuti na vhasambiilizi avha ndajizyo vhahamujevhula. Vhahati, “Aavhaposile avhanji, ileelo atangayipoha wuuyo! 32Inga uweene wu Chilisiti, havhili wu Mwene uwa Vhaisilayeeli, ayiishe pa shihovhenkanyo, niiswe tumulole, pe kwe tumwitishe.” Vhoope vhe vháhomeliilwe pooka nawo vhahamuliga.

Kufwa ukwa Yeesu

(uMataayi 27:45-56; uLuuka 23:44-49; uYoohani 19:28-30)

33Kwandila ahavhaliilizyo aha vhushenzelo kufishila saala 9, ishiisi shihagwa insi yonti. 34Lwe yaafiha saala 9, uYeesu ahavhilishila mu njango yaavho kwi izwi ipiti ahati, “Elooyi, Elooyi, laama sabakitaani!” Kwe kuuti, “We Mulungu waane! We Mulungu waane, shooni she wandeha?”#15:34 iZabuuli 22:1 35Avhantu vhamo vhe vhímiliiye paala, lwe vhiivwa amazwi igo, vhahati, “Tejeelezyi! Akumwita umukuvhwi uEeliya.#15:35 Akumwita umukuvhwi uEeliya: UEeliya akuyangwa ipa, mwe pe aVhayuuda avhinji vhahitihaga kuuti uEeliya atahafwa, ileelo uMulungu ámunyatuuye mu nsi she mupuuma nu kusogola nawo ku mwanya. Havhili vhahasuvhilaga kuuti uEeliya aliyinza havhili mu nsi. Vhaazya 2 aVhamwene 2:11; uMalaaki 4:5.” 36Umuntu wumo ahashimbila naluvhiilo, ahatumpiha umwepe mu divaayi inkali, ahavhiiha kwi ilanzi, ahamumwensya, ahati, “Leha twenye inga umukuvhwi uEeliya akwinza kumwisya pa shihovhenkanyo!”

37Pe uYeesu ahahoola kwi izwi ipiti, ahafwa. 38Umwenda#15:38 Umwenda: Vhaazya iNyumba iMfinjile mu Ntantiho izya Mazwi aMajeni. we wápituliinye iNyumba iMfinjile wuhazeepuha pahati, kufuma pamwanya kufiha pansi. 39Umupiti uwa vhasikaali we ahimililaga pilongolela paala, lwe aalola vwe uYeesu aafwa sheshiila ahati, “Nalyoli umuntu uno aamile Mwana wa Mulungu!”

40Kwáli avhantanda vhe vhahenyaaga ukutali, áliipo uMaliiya uwa ku Magidaala nu Saloome nu Maliiya unyina wa Yoose umuzuuna uwa Yaakobu. 41Avhantanda ivho vhahamulandataga uYeesu nu kumuvhombela, lwe áali mu shigavho isha nsi isha Galilaaya. Avhantanda ivha na vhamwavho avhinji, vháfisile na woope ku Yelusaleemu.

Kusyilwa ukwa Yeesu

(uMataayi 27:57-61; uLuuka 23:50-56; uYoohani 19:38-42)

42Isiku ilyo lyáli lisiku ilya kusengaanya iSabaato#15:42 Isiku ilya kusengaanya iSabaato: Ilyo lyámile lisiku ilya Pachisaano, pe aVhayuuda vhahayisenganyaaga kwi isiku lyavho ilya Sabaato. ISabaato iyo yihandaga Pachisaano hamazuuvha. ye yáali isiku lye lihalandataga. Lwe haafiha hamazuuvha, 43ahinza umuntu wumo we vhahatinji uYoosefu, uwa mu nkaaya iya Alimataayi, ahayigomwa, ahasogola kwa Pilaato, ahamulaavha kuuti anyatule ishaala isha Yeesu, inga ashisyile. UYoosefu ahashindikwaga nkaani, áamile wa mu lukuvhato ulwa Vhayuuda, woope ahavhugulililaga uvhumwene uvhwa Mulungu.

44UPilaato ahasukumila kwivwa kuuti uYeesu aafwa naluvhiilo. Ahamwita umupiti uwa vhasikaali, ahamuvhuziilizya inga uYeesu afuuye hali. 45UPilaato lwe azyaganya kufuma kwa musikaali ula kuuti uYeesu afuuye, ahamwitishila uYoosefu kuuti asogole ashinyatule ishaala isha Yeesu.

46UYoosefu ahakala umwenda umwinza umuzelu uwa kumusyilila uYeesu. Ahashiisya ishaala pa shihovhenkanyo, ahashigwinshila nu mwenda we ákazile, ahashisyila mu mbiipa ye yábaniilwe mwi iyalaawe. Ahaligalagaasizya ivhwe ipiti pa mulyango uwa mbiipa. 47Woope uMaliiya uwa ku Magidaala nu Maliiya unyina wa Yoose vhahalola pe áshisyiliiye ishaala isha Yeesu.

Currently Selected:

uMaaliko 15: nih

Highlight

Copy