uMaaliko 14

Avhalongozi avha Vhayuuda vhakupanzanya kumugoga uYeesu

(uMataayi 26:1-5; uLuuka 22:1-2; uYoohani 11:45-53)

1Zyasyala insiku zivhili kufiha pa shikulukuulu isha Pasaaka#14:1 IPasaaka: Vhaazya mu Ntantiho izya Mazwi aMajeni. ni sha makaati ge vhataluziizye.#14:1 Amakaati ge vhataluziizye: Vhaazya ishikulukuulu isha makaati ge vhataluziizye mu Ntantiho izya Mazwi aMajeni. Avhapiti avha vhapuuti na vhasambiilizi avha ndajizyo vhahalondolaga idala ilya kumulema uYeesu ku vhushevu nu kumugoga. 2Vhátili, “Litahiime lisiku ilya pa shikulukuulu, avhantu vhatahinze vhapele ivho.”

Umwantanda wumo akumwitiilizya uYeesu amafuta

(uMataayi 26:6-13; uYoohani 12:1-8)

3Ahavhaliilizyo hehaala uYeesu áamile ku Besaniya mu nyumba iya Siimoni we ku vhwandilo áamile na mambombo. Lwe atendiime kulya ishaakulya, ahinjila umwantanda wumo na mafuta ge gakununshila ge gáamile ga nsavho nkaani. Amafuta igo gáamile mu nsupa ye vhagombeeye ivhwe ilya nsavho nkaani lye vhahatinji ialabaasita. Ahagubula insupa iyo, ahamwitiilizya uYeesu pi itwe kulolesya umushinzi. 4Avhantu vhamo vhe vháali paala vhahaviitwa nu kuvhuzilizyanya kuuti, “Shooni she akuteezya amafuta iga vhweleele? 5Yeenya, amafuta iga twaamile tukazyaje nu kuposheela idinaali 300#14:5 Idinaali 300: Idinaali yooka gáamile malipilo aga isiku lyoka kwa muvhomvi. Kuli izyo, idinaali 300 zyáli zya malipilo aga nsiku 300 kwa muvhomvi. nu kutuuha, nu kuuvhapa avhapiina zyenezyo.” Vhahamupilila umwantanda ula.

6Ileelo uYeesu ahati, “Muleshi, shooni she mukumutamwa? Ambombela inyinza. 7Yeenya, avhapiina muli navho insiku zyonti, inga mwasungwa muhondeeye kuvhaavwa ahavhaliilizyo honti. Ileelo ine te mbe niimwe ahavhaliilizyo honti. 8Uweene avhomba liila lye angalivhomba, awupaha umuvhili waane kunsengaanya kwi isiku ilya kusyilwa. 9Nalyoli nkuvhavhuuzya kuuti, mu nsi yonti pe vhalikumusya Izwi iLyinza, niili lye avhomba umwantanda uno kwe liyangwaje kumukumbuha.”

UYuuda akwanza kumwaniila uYeesu

(uMataayi 26:14-16; uLuuka 22:3-6)

10UYuuda uwa ku Kaalyoti, we áamile wooka mu vhasundikwa vhaala 12, ahasogola kumwaniila uYeesu ku vhapiti avha vhapuuti kuuti avhalongole kumulema uYeesu. 11Lwe vhiivwa vwe akuyanga vhahaseshela, vhahati kwe vhaamupe impiiya. Woope ahanda kulondola ahavhaliilizyo ahinza aha kumwaniila uYeesu.

Avhasundikwa avha Yeesu vhakusengaanya ishikulukuulu isha Pasaaka

(uMataayi 26:17-25; uLuuka 22:7-14, 21-23; uYoohani 13:21-30)

12Isiku ilya kwanda ilya shikulukuulu isha makaati ge vhataluziizye, ahavhaliilizyo aha kuvhoola ahagonzi aha Pasaaka, avhasundikwa vhaakwe vhahamuvhuziilizya uYeesu vhahati, “Tusengaanye kwoshi ishikulukuulu isha Pasaaka?” 13UYeesu ahavhasonteelezya avhasundikwa vhavhili ahati, “Musogole mu nkaaya, kwe muhomaane nu mwanaavuli wumo, ayitwinsile insonta iya minzi. Mumulandate umuntu uyo. 14Mu nyumba mwe ayinjila, mumuvhuziilizye umuhaata nyumba iyo muti, ‘UMusambiilizi akuvhuziilizya kuuti, “Ishumba isha vhajeni shili kwoshi? Nkwanza kulya ishikulukuulu isha Pasaaka pooka na vhasundikwa vhaane.”’ 15Woope kwe avhalanje ishumba ishipiti isha pamwanya mu nyumba injelenkanu, she vhasengiinye nziila apa kutendama. Umwo mwe mutusenganizanye.” 16Avhasundikwa ivho vhaheepa, vhahasogola mu nkaaya iyo. Lwe vhaafiha, vhahaaga zyonti zili sheshiila inza vwe uYeesu ávhavhuziizye. Pe vhahasengaanya ishaakulya isha shikulukuulu isha Pasaaka.

17Lwe havha havhaliilizyo aha hamazuuvha, uYeesu ahafiha paala pooka na vhasundikwa vhaakwe 12. 18Lwe vhakulya, uYeesu ahavhavhuuzya ahati, “Nalyoli nkuvhavhuuzya kuuti, wumo muli imwe we akulya pooka niine kwe ananiile.” 19Avhasundikwa vhaakwe vhahaswimiililwa, vhahanda kumuvhuziilizya, wooka wooka kuuti, “Vhuli, neene?” 20UYeesu ahavhaamula ahati, “Ali pahati yiinyu imwe 12 we akusanzila ikaati pooka niine mu luvhiga. 21Ne Mwana wa Aadamu kwe mfwe inza vwe nsimviliilwe mu Vhusimbe uVhufinjile. Ileelo asheela umuntu uyo we akunaniila. Yaamile kwashi ku kwakwe, inga atápafwilwe.”

Ishaakulya isha Mwene

(uMataayi 26:26-30; uLuuka 22:14-20; 1 aVhakolinto 11:23-25)

22Lwe vhakulya, uYeesu ahanyatula ikaati, ahaliloota, ahalimensula, ahaavhapa, ahati, “Nyatuuli, uno we muvhili waane.” 23Havhili ahanyatula ulupindi lwe lwáli ni divaayi, ahamusalifwa uMulungu, ahaavhapa, vhoope vhahamwelela vhonti. 24Ahati, “Iga mavhanda gaane aga lufingwi#14:24 Ulufingwi: Vhaazya mu Ntantiho izya Mazwi aMajeni. ge gakwitiha kuzya vhantu avhinji. 25Nalyoli nkuvhavhuuzya imwe kuuti, te nkamwele havhili idivaayi, kufishila isiku liila pe ndimwela idivaayi impwa#14:25 Ndimwela idivaayi impwa: Lumo kwe kuuti, Ndimwela idivaayi vhupwa. mu vhumwene uvhwa Mulungu.” 26Pe vhahateela ulwimbo ulwa kumutiima uMulungu.#14:26 Ulwimbo ulwa kumutiima uMulungu: Lwe aVhayuuda vhaamala kulya ishaakulya isha Pasaaka, vhahimbaga iZabuuli 113-118. Lwe vhaamala, vhaheepa paala, vhahasogola kwi igamba ilya Mazayituuni.

UYeesu akuyanga kuuti uPeeteli kwe amuhaane

(uMataayi 26:31-35; uLuuka 22:31-34; uYoohani 13:36-38)

27UYeesu ahavhavhuuzya avhasundikwa vhaakwe ahati, “Uvhusiku uvhwa ileelo mwenti kwe mushimbile mundeshe, mwe pe yisimviilwe mu Vhusimbe uVhufinjile kuuti,

‘Ndimuhoma umudiimi,

ni ngʼonzi zilisaata.’#14:27 uZakaliya 13:7

28“Ileelo lwe uTaata waane anzyusya, ndivhalongolela kusogola ku Galilaaya.” 29Ileelo uPeeteli ahati, “Poosye inga vhakukuleha vhonti, ine te nkuleshe inga hansi.” 30UYeesu ahamwamula ahati, “Nalyoli nkukuvhuuzya kuuti, uvhusiku uvhwa ileelo lwe inkanda yishiili kuvhilishila luvhili, kwe unkaane lutatu.” 31Ileelo uPeeteli ahahaana nkaani ahati, “Poosye inga nkwanzilwa kufwa pooka niiwe, ine te nkuhaane iwe.” Avhamwavho vhoope vhahayanga vhwevhulo.

UYeesu akumulaavha uMulungu mu shilimbika isha Getisemaani

(uMataayi 26:36-46; uLuuka 22:39-46)

32Pe vhahafiha pa shilimbika shimo she vhahatinji iGetisemaani. UYeesu ahavhavhuuzya avhasundikwa vhaakwe ahati, “Mutendame ipa lwe nkulaavha.” 33Ahamunyatula uPeeteli nu Yaakobu nu Yoohani, ahataliha kuswimiililwa nkaani nu kupulupuuta mu mwoyo. 34Ahati, “Umwoyo waane wuswimiliilwe nkaani, nkuvha ngati naakufwa, muvhe ipa, mudamulilaje.” 35Ahasogola pilongolela hansi, ahagwa ishikupama, ahalaavha kuuti, yingavha hinza ahavhaliilizyo aha mayimba igo hasegushe. 36Ahati, “Taata, ku kwaho zyonti zikuvhombeha, nkukulaavha kuuti uneefwezye amayimba iga.#14:36 Uneefwezye amayimba iga: IShiyunaani shikuti, Uneefwezye ulupindi ulu. Ileelo te vwe nkasiime ine, nkandi vwe ukasiime weewe.” 37Pe uYeesu ahagaluha, ahaaga vhakaasite utulo, ahamuvhuziilizya uPeeteli ahati, “Siimoni, vhuli, ukaasite? Uposiitwe kudamulila isaala inga lyoka vhweleele? 38Damuuli, mumulaavhaje uMulungu, kuuti aavhape amaha, inga indingo zitahinze zivhapoote. Mukusungwa kuvhomba ahinza ileelo amavhili giinyu mayeyevhazu.”

39UYeesu ahasogola havhili kulaavha, ahavhuyizyaga kulaavha amazwi gegaala. 40Ahagaluha havhili, ahaaga vhakaasite utulo, mwe pe aminso gaavho gáali mamwamu. Vhahapootwa ilya kumwamula.

41Ahinza ulwa vhutatu ahati, “Niishi mukaasite utulo nu kutuuzya? Ishi zyakwila! Yeenya, ahavhaliilizyo haafiha, ne Mwana wa Aadamu kwe vhambiishe mu nyoovhe izya vhatalamalandu. 42Vhuushi, tujendi. Yeenya, we akunaniila apalamiiye.”

UYeesu akulemwa

(uMataayi 26:47-56; uLuuka 22:47-53; uYoohani 18:3-12)

43Ahavhaliilizyo hehaala uYeesu lwe akuyanga, uYuuda we wooka mu vhasundikwa 12 ahafiha ni ivhungaana ilya vhantu vhe vháamile na mapanga ni nduugu. Avhantu ivho, avhapiti avha vhapuuti na vhasambiilizi avha ndajizyo izya Moose na vhasongo#14:43 Avhapiti avha vhapuuti na vhasambiilizi avha ndajizyo izya Moose na vhasongo: Vhonti ivha vhahinjilaga mu lukuvhato. Vhaazya ulukuvhato na vhapuuti na vhasambiilizi avha ndajizyo izya Moose mu Ntantiho izya Mazwi aMajeni. vhávhasonteleziizye. 44UYuuda we akumwaniila uYeesu, ápezile avhapiiye ishilolesyo, ávhavhuziizye átili, “Ula we namwofwa, we muhamulemaje, nu kumunyatula.”

45UYuuda lwe aafiha vhweleele paala, ahasogola kwa Yeesu ahati, “We Musambiilizi!” Ahamwofwa. 46Pepaala, avhantu vhaala vhahamulema uYeesu nu kumukunga. 47Wumo we áali nu Yeesu ahanyatula ipanga lyakwe, ahamudiba nu kumudumula ikutwi umuzya uwa mupuuti umupiti. 48UYeesu ahavhavhuziilizya ahati, “Shooni she mwaninzila na mapanga ni nduugu ngati mwinzile kumulema umupumula vintu? 49Insiku zyonti navhanga niimwe nkusambiilizya pa Nyumba iMfinjile, ileelo mutandemaga! Ileelo izi zyavhombeha, inga zye zisimviilwe mu Vhusimbe uVhufinjile zilunjishe.” 50Pe avhasundikwa vhaakwe vhonti, vhahamuleha weeka nu kushimbila.

51Áliipo umujaaha wumo ahamulandataga uYeesu, ázwaye igolole izelu lyeka vhweleele. Avhantu vhaala vhahalinga kumulema, 52ileelo ahafutumuha nu kulileha igolole lyakwe, ahashimbila ishitali.

UYeesu pilongolela ilya vhalongozi avha Vhayuuda

(uMataayi 26:57-68; uLuuka 22:54-55, 63-71; uYoohani 18:13-14, 19-24)

53Avhantu ivho vhahamutwala uYeesu kwa mupuuti umupiti, vhahamuvhungaanila vhonti, avhapiti avha vhapuuti#14:53 Avhapuuti: Vhaazya mu Ntantiho izya Mazwi aMajeni. na vhasongo na vhasambiilizi avha ndajizyo izya Moose. 54UPeeteli ahavhanga akulandata mwisinda ukutali, ahinjila pa lupitu ulwa nyumba iya mupuuti umupiti, ahatendama pooka na vhavhomvi avha mupuuti umupiti kwota umwoto.

55Pe avhapiti avha vhapuuti nu lukuvhato#14:55 Ulukuvhato: Vhaazya mu Ntantiho izya Mazwi aMajeni. lwonti ulwa Vhayuuda, vhahanda kulondola uvhwahoome uvhwa kumulonga uYeesu, inga vhamugoje, ileelo vhatahavhwaga. 56Avhantu avhinji vhahahomeshezyaga inongwa izya ilenga, ileelo zitahalingaanaga. 57Avhantu vhamo vhahimiilila kuhomeshezya ilenga, vhahati, 58“Twaamwivuuye akuyanga kuuti, ‘Ingayimongola iNyumba iMfinjile ino ye yázengwilwe ni nyoovhe izya vhantu, na ku nsiku zitatu ingazenga iyinji ye yitakuzengwa ni nyoovhe izya vhantu.’” 59Pooka niizyo uvhwahoome vhwavho vhutahalingaana.

60Pe umupuuti umupiti ahimiilila pahati yaavho, ahamuvhuziilizya uYeesu, ahati, “Shooni she utakuvhaamula vwe vhakuhomeshezya?” 61Ileelo uYeesu ahapuuma, atahaamula naashimo. Pe umupuuti umupiti ahamuvhuziilizya havhili ahati, “Iwe we Chilisiti, uMwana wa Mulungu uMushindamu?” 62UYeesu ahati, “Ine ne neene. Niimwe kwe mundole ne Mwana wa Aadamu ntendiime ku luvhazu ulwa kundiilo ulwa Mulungu uwa Maha Gonti pa vhushindamu uvhupiti nkaani, havhili kwe mundole nkwinza mu mavhingo.” 63Lwe umupuuti umupiti ayiivwa izyo, ahazeepula amenda gaakwe#14:63 Umupuuti umupiti ahazeepula amenda gaakwe, mwe ahaganduha lwe uYeesu ati uweene wu Chilisiti uMwana wa Mulungu. kulolesya kuuti avisiitwe, ahati, “Tukwanza avhahoome avhanji vhaashi? 64Mwivwa mweneemwe vwe akusaamula! Mukuti vhuli?” Vhonti vhahamulonga vhahati, “Uyo akwanzilwa kufwa.” 65Avhantu vhamo paala vhahataliha kumuswilila amati, vhahamupinya ni shitambaala ku minso, vhahataliha kumuhoma ni mbuli, vhahati, “Twivwe kuvhwa, wu naanu we akuhoma!” Avhavhomvi vhoope vhahamunyatula nu kumukanza na makoofi.

UPeeteli akumuhaana uYeesu

(uMataayi 26:69-75; uLuuka 22:56-62; uYoohani 18:15-18, 25-27)

66UPeeteli lwe ali pepaala pa luvhungaano, umuvhomvi umwantanda uwa mupuuti umupiti ahinza. 67Ahamulola uPeeteli lwe akwota umwoto, ahamuzyamila, ahati, “Niiwe waamile pooka nu Yeesu uMunaazaleeti.” 68Ileelo uPeeteli ahamuhaanila ahati, “Ntakukumanyinsanya inga hansi, havhili ntakumanya zye ukuyanga!” UPeeteli aheepa paala, ahasogola pa mulyango, ahavhaliilizyo hanaaho inkanda yihavhilishila. 69Umuvhomvi umwantanda ula ahamulola havhili, ahanda kuvhavhuuzya avhantu vhe vhímiliiye paala ahati, “Umuntu uno ali pooka nu Yeesu.” 70UPeeteli ahahaana havhili. Lwe pahaavha hansi, vhe vhimiliiye paala vhahati, “Nalyoli iwe we wooka mu vhantu ivho, mwe pe niiwe we muntu uwa ku Galilaaya.” 71UPeeteli ahataliha kutipa nu kulapa, ahati, “Ntamumanyile umuntu uyo we mukumuyanga.” 72Ahavhaliilizyo hanaaho inkanda yihavhilishila ulwa vhuvhili. UPeeteli ahalikumbuha izwi liila lye uYeesu ámuvhuziizye átili, “Lwe inkanda yishiili kuvhilishila luvhili, kuuti uvhe wankaana lutatu.” UPeeteli ahaswimiililwa, ahanda kukuuta nkaani.

Currently Selected:

uMaaliko 14: nih

Highlight

Copy