uMaaliko 13

UYeesu akukuvhwa izya kumongolwa iNyumba iMfinjile

(uMataayi 24:1-2; uLuuka 21:5-6)

1UYeesu ahafuma pa Nyumba iMfinjile na vhasundikwa vhaakwe, wooka mu vhasundikwa vhaakwe ahayanga ahati, “We Musambiilizi! Yeenya amavhwe iga, ni nyumba izi vwe zili uvhwinza.” 2UYeesu woope ahati, “Mukuzilola inyumba zyonti impiti izi? Te lihasyale ivhwe naalimo pamwanya pa lyamwavho. Amavhwe gonti igo galimongolwa!#13:2 Amavhwe gonti igo galimongolwa: INyumba iMfinjile yámongoliilwe na Vhaluumi umwaha uwa 70 kufuma pe uYeesu ápafwilwe.”

UYeesu akusambiilizya izya mayimba aga ku vhusililishilo

(uMataayi 24:3-14; uLuuka 21:7-19)

3UYeesu ahatendama pi igamba ilya Mazayituuni na vhasundikwa vhaakwe, kulungamana ni Nyumba iMfinjile. UPeeteli nu Yaakobu nu Yoohani nu Andeleeya vhahanda kumuvhuziilizya kukwilu, 4vhahati, “Izyo zilifumila lii? Havhili shilolesyo vhuli she shilitulolesya kuuti zyapalamila kulunjiha?”

5UYeesu ahanda kuvhavhuuzya kuuti, “Muvhanje minso, inga vhatahinze vhavhahopenkanye! 6Nkuvhavhuuzya vhwevhulo, mwe pe avhantu avhinji vhaliyinza kwi izina lyane, vhaliiti, ‘Ine ne ne Chilisiti!’ Vhalivhahopenkanya avhantu avhinji. 7Imwe lwe mwivwa inkoolo izya vhulugu ni nongwa izya vhulugu, mutahinze musaaje. Poosye zivhe vhuli, izyo zikwanzilwa kufumila suuti, ileelo ahavhaliilizyo aheene aha kumpeleela haliivha hashiili. 8Insi yililwanga ni nsi iyamwavho, vhwope uvhumwene vhulilwanga nu vhumwene uvhwamwavho. Havhili kuliivha ivisumbi ni nzala uku nuukwo. Ivwo viliivha vhwandilo vhweleele uvhwa havhaliilizyo aha kumpeleela, inza vwe uvhuvhaavi vhwe vhwandilo uvhwa mwantanda kupaapa.

9“Muvhe minso, mwe pe vhalivhatwalaga kulongwa pa lukuvhato nu kuhomwa mu masinagoogi. Havhili vhalivhatwalaga ku vhamwene na ku vhantu avhanji vhe vhali na maha kuuti mulongwe, mwe pe imwe mwe vhasundikwa vhaane. Ileelo kuli imwe, iho he haliivha havhaliilizyo aha kufumwa uvhwahoome uvhwa lwitiho lwinyu ku kwavho. 10Isuuti inga Izwi iLyinza lyakumuha insi zyonti, pe uvhusililishilo vhuliyinza. 11Lwe vhavhalema nu kuvhatwala kuvhalonjeelela, mutasiivhaje ilya kuyanga. Lyonti lye mulipelwaga ahavhaliilizyo hehaala lye muhaliyangaje, mwe pe te mwemwe muliyangaga, nkandi uMupepo uMufinjile we alivhapanga izya kuyanga. 12Umunine alimwaniila uwamwavho, inga amugoje. Woope utaata alimwaniila umwana waakwe, inga amugoje. Vhoope avhaana vhalisambuha ku vhapaafi vhaavho nu kuvhagoga. 13Avhantu vhonti vhalivhavitilwaga, mwe pe mukundandata ine, ileelo we alijimbiilila kufishila ku vhusililishilo we aliipokwa.”

Ahavhaliilizyo aha mayimba amapiti

(uMataayi 24:15-28; uLuuka 21:20-24)

14“Ahavhaliilizyo iho mulishilola ishintu isha kuviisya nu kuhandamania shimiliiye pe patakwanzilwa.#13:14 uDaaniyeeli 9:27; 11:31; 12:11 Umuntu wonti we akuvhaazya amazwi iga, agamanyinsanyaaje. Pe vhe vhali mu shigavho isha nsi isha Yudeeya vhahashimbililaje mu magamba. 15Umuntu we ali pamwanya pa nyumba, atahiishe nu kwinjila mu nyumba, inga anyatule ivintu vwakwe umwo, nkandi ayiishe nu kushimbila. 16Woope we ali ku magunda, atahagalushe mwisinda kunyatula umwenda waakwe pe avhiisile. 17Vhasheela avhantanda vhe vhaliivha pa vhumwamu na vhe vhaliyonsyaga insiku izyo! 18Ishi mupuutaje, inga izi zitahavhaaje mu havhaliilizyo ahavhiivhi aha lupepu. 19Nkuyanga vhwevhulo, mwe pe insiku izyo ziliivha na mayimba ge gatafumiiye naalumo kufuma pe uMulungu ápezile insi kufishila ileelo. Havhili amayimba igo te gahafumile naalumo. 20Inga uMWENE uMulungu atazivhiihaje insiku izyo izya mayimba kuvha nyinsi, umuntu nuumo we aamile apokwaje. Ileelo kuzya vhasaavhulwa vhaakwe, uMulungu alizivhiiha insiku izyo kuvha nyinsi.

21“Ahavhaliilizyo iho, inga umuntu akuvhavhuuzya kuuti, ‘Yeenya, uChilisiti ali ipa,’ poosye kuuti, ‘Ali kuula!’ Mutahinze mwitishe. 22Yeenya, vhalifumila avhantu vhe vhakuluma ilenga kuuti, ine ne Chilisiti nu kuuti ne mukuvhwi. Vhalivhomba ivilolesyo ivwa kusukumizya, inga vhavhahopenkanye avhantu, inga zingavha poosye na vhasaavhulwa avha Mulungu. 23Pe imwe muvhanje minso, ine navhasoha nziila zyonti izyo she zishiili kufumila.”

Kwinza ukwa Mwana wa Aadamu

(uMataayi 24:29-31; uLuuka 21:25-28)

24“Lwe zyatuuha insiku izyo izya mayimba, izuvha lilivhiishilwa ishiisi, nu mwezi te wuhaahozye uvhuzelu vhwakwe,#13:24 uYisaayi 13:10 25zyope inzota zililagala kufuma kumwanya. Havhili ivintu ivwa kumwanya viliyingaana.#13:25 uYisaayi 34:4 26Ahavhaliilizyo iho, pe avhantu vhalindola ine ne Mwana wa Aadamu nkwinza mu mavhingo ku maha nu vhushindamu.#13:26 uDaaniyeeli 7:13 27Pe ndivhasonteelezya avhahavhizya vhaane kuvhavhungaaniha avhasaavhulwa vhonti avha Mulungu kufuma imbazu zyonti zine izya nsi, kwandila uluvhazu ulwa kwanda kwe insi yanzite, kufishila kwe yisiliiye.

28“Musambiilile ishiholanyo isha ituvhu, ahavhaliilizyo he mwalola insamba zyanda kuvha nyoolo nu kulemba amatundu, naluvhiilo mukumanya kuuti ishisiku shipalamiiye. 29Vhwevhulo, niimwe lwe mukuzilola izyo zikuvhombeha, pe muhamanyaje kuuti ne Mwana wa Aadamu mpalamiiye nkaani kwinza. 30Nalyoli nkuvhavhuuzya kuuti, avhantu avha havhaliilizyo iha te vhatuushe she izi zyonti zishiili kulunjiha. 31Imwanya ni nsi viliyeepa, ileelo poosye zivhe vhuli amazwi gaane galilunjiha.”

Ataliipo we amanyile isiku na havhaliilizyo

(uMataayi 24:36-44)

32“Ileelo izya isiku liila na havhaliilizyo haala, ataliipo umuntu we amanyile, poosye avhahavhizya vhe vhali ku mwanya, poosye uMwana, nkandi we Taata weeka vhweleele. 33Mushevhaje nu kuvha minso havhili mulaavhaje,#13:33 Mulaavhaje: IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali ni izwi ili. Zyope iBiibiliya zimo izya manda iga zikulileha izwi ili ishisita kusimba. mwe pe mutamanyile ahavhaliilizyo iho haliifiha lyeli. 34Ishiholanyo isha kugaluha kwane shili ngati muntu we akushuula, ahayileha inyumba yaakwe na vhazya vhaakwe, ahaavhapa vhonti amaha ni mbombo zyavho. Ahamulajizya umuguulizi uwa mulyango ahati, ‘Uvhanje minso.’ 35Pe ishi, muvhanje minso, mwe pe mutamanyile isiku lye umuhaata nyumba aliyinza, pamo he hamazuuvha, pamo havhaliilizyo aha pa vhusiku pahati, pamo lwe yikuvhilishila inkanda, pamo nzanshi. 36Atahinze avhwele, lwe muyiluviilwe nu kukaata. 37Izi zye nkuvhavhuuzya imwe, nkuvhavhuuzya avhantu vhonti kuuti vhavhanje minso!”

Currently Selected:

uMaaliko 13: nih

Highlight

Copy