uMataayi 25
25
Ishiholanyo isha vhalindu 10
1Pe uYeesu ahavhavhuuzya avhasundikwa vhaakwe ahati, “Ahavhaliilizyo iho uvhumwene uvhwa Mulungu vhuliholana ni shiholanyo isha vhalindu 10 vhe vhányatuuye inyaale zyavho nu kusogola kumuposheela we akwimala. 2Vhasaano muli ivho, vháali vhapukupuuku na vhamwavho vhasaano vháali vha njeele. 3Avhapukupuuku vhasaano ivho, vhányatuuye inyaale zyavho ishisita amafuta aga kwonjezya. 4Ileelo avheene avha njeele vhányatuuye inyaale zyavho pooka na mafuta aga kwonjezya mu nsupa zyavho. 5Lwe we akwimala ahaavha kwinza, utulo tuhavhalema avhalindu ivho vhonti nu kusupiila. 6Ileelo pa vhusiku pahati, avhantu vhahavhilishila vhahati, ‘Yeenya, we akwimala ayinza! Fumaaji, tujende tumuposheele.’ 7Naluvhiilo avhalindu vhonti vhahadaamula nu kusengaanya inyaale zyavho.
8“Avhalindu vhasaano vhaala avhapukupuuku vhahavhavhuuzya avha njeele vhahati, ‘Tukulaavha mutwavwe amafuta gamo, mwe pe inyaale zyitu zikuzima.’ 9Ileelo avha njeele vhaala vhahavhaamula vhahati, ‘Ndaali! Tutangavhaavwa, amafuta ge tuli nago gatangatukwila swenti pooka niimwe. Yikwanzilwa musogole kwe vhakukazya, muyikalile agiinyu.’
10“Lwe avhapukupuuku vhaala vhakusogola kuyikalila amafuta, we akwimala ahinza. Avhalindu avha njeele vhe vháyisengiinye, vhahinjila pooka nawo mu nyumba mwe vhahavhombelaga. Pe umulyango wuhigalilwa. 11Pisinda, vhoope avhalindu vhe vháali vhapukupuuku vhahagaluha nu kwaga umulyango mwigalile. Pe vhahimiilila panzi nu kuvhilishila kuuti, ‘We mwene! Tukulaavha utwigulile umulyango!’ 12Ileelo we akwimala ahavhaamula ahati, ‘Nalyoli nkuvhavhuuzya kuuti, ntavhamanyile imwe!’”
13UYeesu ahavhavhuuzya avhasundikwa vhaakwe ahati, “Ishi muvhanje minso, mwe pe mutamanyile isiku, poosye ahavhaliilizyo he ndigaluha.”
Ishiholanyo isha vhavhomvi vhe vhápeliilwe impiiya
(uLuuka 19:11-27)
14UYeesu ahajendeelela kuyanga kuuti, “Havhili uvhumwene uvhwa Mulungu#25:14 Uvhumwene uvhwa Mulungu: Vhaazya mu Ntantiho izya Mazwi aMajeni. vhuholiine ni shiholanyo isha muntu we áshuuye. Lwe aakushuula, ahavhiita avhavhomvi vhaakwe nu kuvhaleshela ishuuma shaakwe, inga vhashitaananie. 15Ahaavhapa italanta#25:15 Italanta: Italanta yooka yihakwilanaga kumulipa umuvhomvi amaaha 15 nu kushila. avhavhomvi vhonti kulandatana nu vhuvhomvi vhwavho. Wooka ahaamupa italanta zisaano, uwamwavho zivhili nu wamwavho yooka, pe ahashuula.
16“We vhámupiiye italanta zisaano, naluvhiilo ahasogola kuzitaanania, ahambulila izyamwavho zisaano. 17Woope we vhámupiiye italanta zivhili, ahasogola kuzitaanania, ahambulila izyamwavho zivhili. 18Ileelo uweene we vhámupiiye italanta yooka, ahasogola, ahabana ishilivha nu kuyifushila italanta iya mwene waakwe.
19“Lwe padiila, umwene uwa vhavhomvi ivho ahavhwela kufuma kwe áshuuye. Pe ahavhiita avhavhomvi vhaakwe, inga vhamuvhaazizye ivwuma vwe vhámbuliiye ku viila vwe ávhalesheeye. 20Umuvhomvi ula we vhámupiiye italanta zisaano ahinza kwa mwene waakwe ni talanta izyamwavho zisaano, ahamuvhuuzya ahati, ‘We mwene, italanta zye waandesheeye zisaano, yeenya, zipaafile izyamwavho zisaano izi.’ 21Umwene waakwe ahamuvhuuzya ahati, ‘Uvhomvile ahinza nkaani. Iwe we muvhomvi umwinza, havhili umutungamu! Mwe pe waamile we mutungamu ku vintu ivinsi, ishi kwe nkuvhiishe kuvha we mwimiilizi uwa vintu ivwinji. Yinjiila tuseshele pooka niine ne mwene waaho.’
22“Woope umuvhomvi ula we ámupiiye italanta zivhili ahinza ni talanta izyamwavho zivhili, ahamuvhuuzya ahati, ‘We mwene, italanta zye waandesheeye zivhili, yeenya, zipaafile izyamwavho zivhili izi.’ 23Umwene waakwe ahamuvhuuzya ahati, ‘Uvhomvile ahinza nkaani. Iwe we muvhomvi umwinza, havhili umutungamu! Mwe pe waamile we mutungamu ku vintu ivinsi, ishi kwe nkuvhiishe kuvha we mwimiilizi uwa vintu ivwinji. Yinjiila tuseshele pooka niine ne mwene waaho.’
24“Pe woope umuvhomvi ula we ámupiiye italanta yooka, ahinza nu kumuvhuuzya umwene waakwe kuuti, ‘We mwene, imanyile kuuti iwe we muntu umugomu nkaani. Iwe uli inza umuntu we akuvuna pe atávhwaye, nu kuvhungaaniha mu nkoma vwe atávunile. 25Noogofile kuyiteezya italanta yaaho, pe nasogola kuyifushila pansi. Ishi, nyatuula italanta yaaho ino.’ 26Umwene waakwe ahamwamula ahati, ‘We muvhomvi umuvhiivhi iwe, havhili we muhata! Inga waamanyile kuuti nkuvuna mwe ntavhwaye havhili nkuvhungaaniha mu nkoma vwe ntavunile, 27ishi shooni she utavhiihaga impiiya zyane ku vhe vhakupaafwa, inga lwe navhwela inyatule pooka na zye zipafwilwe?’ 28Pe umwene waakwe ahati, ‘Mufwule italanta iyo, muumupe umuvhomvi we ali ni talanta 10.’
29“Umuntu wonti we akuvhombela imbombo she apeliilwe, aliyonjezelwa ishamwavho, woope aliivha navwo ivwinji. Ileelo we atakuvhombela imbombo she apeliilwe, poosye ishinsi she ali nasho alifwulwa. 30Umuvhomvi uno muvhiivhi, mumuleme nu kumusumbila kunzi ku shiisi. Ukwo kwe vhalikuutaga nu kuyimba nkaani.”
Uvhulonzi uvhwa kumpeleela
31UYeesu ahajendeelela kuvhavhuuzya avhasundikwa vhaakwe kuuti, “Lwe ine ne Mwana wa Aadamu ninza mu vhushindamu vhwane pooka na vhahavhizya vhonti, nditendama pa shitengo shaane isha vhushindamu. 32Avhantu kufuma mu nsi zyonti vhalivhungaana pilongolela lyane. Niine ndivhasavhulanya inza vwe umudiimi akuzisavhulanya ingʼonzi ni mbuzi. 33Ndivhavhiiha avhagolosu uluvhazu lwane ulwa kundiilo na vhatalamalandu uluvhazu lwane ulwa kumongo, inza vwe umudiimi akuzivhiiha ingʼonzi uluvhazu lwakwe ulwa kundiilo ni mbuzi uluvhazu lwakwe ulwa kumongo.
34“Pe ine ne Mwene ndivhavhuuzya avhantu vhaala vhe vhali ku luvhazu lwane ulwa kundiilo ndiiti, ‘Nzaaji imwe mwe mulosiitwe nu Taata waane, muposheele uvhupwano uvhwa vhumwene vhwe uMulungu ávhasenganiziinye kufuma pe ápezile insi. 35Yeenya, lwe náali ni nzala mwámpiiye ishaakulya, lwe náali ni shinyooto mwámpiiye aminzi aga kumwela, havhili lwe náali ne mujeni, mwámposheleeye mu nyumba zyinyu. 36Lwe náali ishitali, mwánzwaliziizye amenda. Lwe návhinile, mwínzile kumbinia. Lwe náali mu jeela, mwínzile kuneenya.’ 37Pe avhagolosu vhaliiti, ‘We Mwene, lyeli pe wáali ni nzala twákupiiye ishaakulya? Poosye lyeli pe wáali ni shinyooto twákupiiye aminzi aga kumwela? 38Havhili, lyeli pe wáali we mujeni twákuposheleeye mu nyumba zyitu? Poosye lyeli pe wáali ishitali twákuzwaliziizye amenda? 39Havhili, lyeli pe wáali we muvhinu twínzile kukuvhinia, poosye lyeli pe wáali mu jeela twínzile kukwenya?’ 40Pe ine ne Mwene ndivhaamula ndiiti, ‘Nalyoli nkuvhavhuuzya kuuti, lyonti lye mwámuvhombeeye wumo mu vhamwitu ivha vhe te vhamwamu, mwámbombeeye neene.’
41“Pe vhoope vhe vhali ku luvhazu lwane ulwa kumongo ndivhavhuuzya ndiiti, ‘Yeepi ipa imwe mwe mutifiilwe! Mwinjile mu mwoto uwa shiima we uMulungu ámusenganiziinye uMukwalanzi na vhahavhizya vhaakwe. 42Yeenya, lwe náali ni nzala mutámpiiye ishaakulya, havhili lwe náali ni shinyooto mutámpiiye aminzi aga kumwela. 43Lwe náali ne mujeni mutámposheleeye mu nyumba zyinyu, lwe náali ishitali mutánzwaliziizye amenda. Havhili lwe náali ne muvhinu, mutínzile kumbinia, poosye lwe náali mu jeela mutínzile kuneenya.’ 44Pe vhoope vhe vhali ku luvhazu lwane ulwa kumongo vhaliiti, ‘We Mwene, lyeli pe twákuvhwenyi uli ni nzala, poosye ni shinyooto, poosye we mujeni, poosye uli ishitali, poosye we muvhinu, poosye uli mu jeela, ileelo tutákwavwizye?’ 45Niine ndivhaamula ndiiti, ‘Nalyoli nkuvhavhuuzya kuuti, zyonti zye mutámuvhombeeye wumo muli ivha vhe te vhamwamu, mutámbombeeye neene.’
46“Pe avhatalamalandu vhaliyeepa nu kusogola kwi isunde ilya shiima. Ileelo avhagolosu, vhaliyinjila mu vhulanzi uvhwa shiima.”
Currently Selected:
uMataayi 25: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
